Blog

«Հայաստանի էլեկտրական ցանցեր» ՓԲ ընկերության գլխամասային գրասենյակում ընկերության ժամանակավոր կառավարիչ Ռոմանոս Պետրոսյանի նախաձեռնությամբ տեղի է ունեցել ընդլայնված կազմով աշխատանքային քննարկում՝ ՀՀ-ում արևային ֆոտովոլտային համակարգեր արտադրող և տեղադրող խոշորագույն ընկերությունների ներկայացուցիչների մասնակցությամբ։
«Արմենպրես»-ի հաղորդմամբ՝ այս մասին հայտնում է ՀԵՑ-ի մամուլի ծառայությունը՝ ներկայացնելով քննարկման մանրամասները։
Նշվում է, որ քննարկմանը մասնակցել են ՀՀ ՏԿԵ նախարար Դավիթ Խուդաթյանը, ԱԺ Ֆինանսավարկային և բյուջետային հարցերի մշտական հանձնաժողովի նախագահ Ծովինար Վարդանյանը, ՀՀ ԱԺ պատգամավոր Արփի Դավոյանը, ՀՀ ՀԾԿՀ անդամ Սերգեյ Աղինյանը, ՀՀ ՀԾԿՀ սակագնային վարչության պետ Աշոտ Ուլիխանյանը, ՀՀ ՀԾԿՀ Ֆինանսատեխնիկական և դիմումների քննարկման վարչության պետ Մերի Ղազարյանը, Շինարարների միության ՀԿ նախագահ Վահան Հարությունյանը, ինչպես նաև «Հայաստանի էլեկտրական ցանցեր» ՓԲ Ընկերության տեխնիկական տնօրինության, իրացման տնօրինության, ընդհանուր հարցերով տնօրինության, անվտանգության և վերահսկողության տնօրինության պատասխանատու ներկայացուցիչներ:
Հաղորդվում է, որ աշխատանքային հանդիպման սկզբում մանրամասն անդրադարձ է կատարվել Հայաստանի էներգետիկ ոլորտի զարգացման ռազմավարական ուղղություններին։ Քննարկվել են նաև էլեկտրաէներգիայի սակագնային քաղաքականության, էներգետիկ ենթակառուցվածքների զարգացման, համակարգային կուտակիչների ներդրման, ինչպես նաև էլեկտրական մեքենաների լիցքավորման և ջերմային պոմպերի կիրառման հեռանկարներին վերաբերող հարցեր։
Նշվում է, որ Ռոմանոս Պետրոսյանն առանձնահատուկ ընդգծել է հանդիպման կարևորությունը՝ նշելով, որ նման ձևաչափով քննարկումները հնարավորություն են տալիս համակողմանի անդրադառնալ էլեկտրաէներգետիկական համակարգում և ՀԷՑ-ի բաշխման ցանցում առկա իրավիճակին ու հիմնախնդիրներին, ինչպես նաև ոլորտի զարգացմանն ուղղված անհրաժեշտ գործընթացներին։
Քննարկման ընթացքում ընդգծվել է նաև էլեկտրաէներգիայի պահանջարկի կանխատեսման կարևորությունը՝ հաշվի առնելով տվյալների կենտրոնների և էլեկտրամոբիլների աճող ազդեցությունը, ինչպես նաև մոնիտորինգի ու տվյալների վերլուծության համակարգերի զարգացումը։
ՀԵՑ-ի տարածած հաղորդագրության համաձայն՝ մասնակիցներն անդրադարձ են կատարել Էներգետիկայի ինստիտուտի դերակատարությանը, պետություն–մասնավոր հատվածի համագործակցության ձևաչափով աշխատանքային խմբի ստեղծման հնարավորությանը, ինչպես նաև տեղական էներգետիկ ընկերությունների մրցունակության բարձրացման և նրանց ծառայությունների արտահանման խթանման ուղղություններին։
«Ներկաները ողջունեցին նման ձևաչափով աշխատանքային հանդիպման նախաձեռնությունն ու անհրաժեշտությունը: Քննարկման արդյունքում կողմերը կարևորեցին պետություն–մասնավոր հատվածի համագործակցության ամրապնդումը և նման ձևաչափով հանդիպումների շարունակականությունը՝ էներգետիկ ոլորտում առկա մարտահրավերներին համատեղ լուծումներ գտնելու և համակարգի կայուն ու արդյունավետ զարգացմանը նպաստելու նպատակով։ Նշվեց նաև, որ բարձրացված հարցերի շուրջ աշխատանքները կշարունակվեն մասնագիտական քննարկումների և համատեղ նախաձեռնությունների շրջանակում»,-հայտնել է ՀԵՑ-ը։