Հայաստանի Հանրապետությունում հունիսի 7-ին կայանալիք խորհրդարանական ընտրություններին ընդառաջ՝ «Քաղաքացիական պայմանագիր» կուսակցության անդամները նախընտրական քարոզարշավի շրջանակում քաղաքացիների հետ
հանդիպում ունեցան Արմավիրում։
Հանդիպման ընթացքում առաջինը ելույթով հանդես եկավ կուսակցության աշխատակազմի ղեկավար Արուսյակ Մանավազյանը, որը խոսեց Արմավիրի մարզում իրականացված և շարունակվող շինարարական աշխատանքներից և կատարված ներդրումներից։
Հանդիպմանը ելույթ ունեցավ նաև Հայաստանի Հանրապետության տարածքային կառավարման և ենթակառուցվածքների նախարար Դավիթ Խուդաթյանը։
Նա նույնպես արձանագրեց այն բոլոր շինարարական և բարեկարգման աշխատանքները, որոնք վերջին շրջանում իրականացվել են Արմավիր քաղաքում։
«Այն փոփոխությունները, որոնք տեղի են ունեցել Արմավիրի մարզում և Արմավիր քաղաքում, տեղի են ունեցել հենց բնակիչների աչքի առաջ։ Ես երբեք չեմ մոռանա, թե մեզ համար բարդ ժամանակներում՝ 2021 թվականին արմավիրցիներն ինչպես կանգնեցին մեր կողքին։ Հիմա մեր համար մեկ մոտիվացիան մեր ամենօրյա աշխատանքով ձեզ վերադարձնելն է ձեր տված վստահությունը։ Նախորդ տարիներին իրականացված աշխատանքները կատարվել են ոչ խաղաղության պայմաններում, և հիմա 2025 թվականի օգոստոսի 8-ից հետո, առաջիկա հնգամյակում շատ ավելի աննախադեպ մեծ ծավալների հասնող աշխատանքներ ենք իրականացնելու»,-վստահեցրեց Խուդաթյանը։
Ազգային ժողովի նախագահ Ալեն Սիմոնյանն, իր հերթին, նշեց, որ ինքը ծառայել է Արմավիրի մարզում և կարող է համեմատականներ անցկացնել բանակում իր ծառայության ժամանակ տիրող իրավիճակի ու ներկա իրավիճակի միջև։ Նրա խոսքով՝ ներկայում բանակում տիրող իրավիճակը շեշտակի տարբերվում է նախորդ ժամանակներից։
«Մենք մեր երեխաներին պետք է կարևոր ժառանգություն թողնենք․ այդ ժառանգությունը խաղաղությունն է։ Այսօր մենք ունենք խաղաղություն, և պետք է տեր կանգնենք դրան»,-ասաց Ալեն Սիմոնյանը։
Ելույթներ ունեցան նաև ՀՀ աշխատանքի և սոցիալական հարցերի նախարար Արսեն Թորոսյանը, ՀՀ էկոնոմիկայի նախարար Գևորգ Պապոյանը։
Արմավիրի աջակիցների հետ հանդիպմանը խոսքով հանդես եկավ նաև արձակուրդում գտնվող ՀՀ վարչապետ, ՔՊ վարչության նախագահ Նիկոլ Փաշինյանն՝ իր ելույթը սկսելով սաղմոս համար 63-ով։
«2018 թվականի հեղափոխությունից հետո գալով Արմավիր՝ ես տեսնում եմ բոլորովին նոր մարզ ու քաղաք, տեսնում եմ, որ Արմավիրն ու Հայաստանի Հանրապետությունը ծաղկում են, բայց ամենակարևորը՝ ծաղկում է ՀՀ ժողովուրդը, որն այսօր ապրում է բոլորովին ուրիշ երկրում և ունի բոլորովին այլ տրամադրություն։ Մենք անցել ենք բազում դժվարությունների, չարչարանքների և դժոխքի միջով, բայց մենք այսօր հասել ենք մի կետի, որ տեսնում ենք ուրախ Հայաստան, ուրախ քաղաքացի, երեխաներ, ուրախ մարդիկ, և ես ձեզ շնորհավորում եմ այդ առիթով»,-ասաց Նիկոլ Փաշինյանը։
Նրա խոսքով՝ մարդկանց այդ ուրախությունն ունի կոնկրետ պատճառներ, որոնցից մեկն այն է, որ ժողովուրդը տեսնում է՝ իշխանությունները 2018 թվականին տված խոստումը՝ թալանվածը հատիկ առ հատիկ վերադարձնելու խոստումը հետևողականորեն իրականացնում են։
Փաշինյանի խոսքով՝ 2018 թվականի հեղափոխությունից հետո 6,6 միլիարդ դոլար է մուտք եղել ՀՀ պետական բյուջե, որն ուղղվել է ՀՀ-ն ծաղկեցնելուն։ Նա նորից անդրադարձ կատարեց «Հայաստանի էլեկտրական ցանցեր» ընկերությունը ՀՀ պետական սեփականություն դարձնելու հարցին՝ ընդգծելով, որ կառույցից պետբյուջե եկող եկամուտները ծառայելու են ի շահ ՀՀ քաղաքացիների։ Նա հավաստիացրեց, որ նախկինում ՀՀ պետական բյուջեից գողացված բոլոր միջոցները հատիկ առ հատիկ վերադարձվելու են ՀՀ քաղաքացիներին։
«2026 թվականի հունվարի 1-ից մինչև 2026 թվականի մայիսի 1-ը մենք Առողջության ապահովագրության համակարգով 41 միլիարդ 428 միլիոն դրամի ծառայություններ են մատուցել միայն 65-ից բարձր տարիք ունեցող քաղաքացիներին կամ 258 հազար 767 թոշակառուի»,-ընդգծեց Փաշինյանը։
Նա նաև շեշտեց, որ այսօր ամենակարևորը Հայաստանում հաստատված խաղաղությունն է, ինչի առթիվ շնորհավորեց բոլոր արմավիրցիներին։
Նիկոլ Փաշինյանն ու «Քաղաքացիական պայմանագիր» կուսակցության մյուս ներկայացուցիչները Արմավիրի բնակիչներին հորդորեցին անպայման մասնակցել ընտրություններին և քվեարկել 16 համարի օգտին։
Հանրահավաքն ավարտվեց Նիկոլ Փաշինյանի ստեղծած «Վարչաբենդ» երաժշտական խմբի ելույթով։
Հայաստանի Հանրապետությունում հունիսի 7-ին կայանալիք խորհրդարանական ընտրություններին ընդառաջ՝ «Քաղաքացիական պայմանագիր» կուսակցության…