Հայաստանի աշխատանքի և սոցիալական հարցերի նախարարի մամուլի խոսնակ Նվեր Կոստանյանը հերքել է մամուլում տարածված լուրը, թե Ղարաբաղից տեղահանված ընտանիքների բնակապահովման պետական աջակցության ծրագիրը իբր անիրագործելի է դարձել։
«Hraparak.am-ը հերթական հոդվածով փորձում է խեղաթյուրել իրականությունը՝ պնդելով, թե Ղարաբաղից տեղահանված ընտանիքների բնակապահովման պետական աջակցության ծրագիրն իբր դարձել է անիրագործելի։ Մինչդեռ պաշտոնական տվյալները ներկայացնում են իրավիճակի էապես այլ պատկեր։
Այսպես, օգոստոսի 13-ի դրությամբ ծրագրի շրջանակում արդեն իսկ հավաստագիր է ստացել 7743 ընտանիք (31,845 անձ), որից 7147 ընտանիք (29,921 անձ)՝ ձեռքբերման բաղադրիչով, 297 ընտանիք (1104 անձ)՝ կառուցապատման բաղադրիչով, 299 ընտանիք (820 անձ)՝ գործող հիփոթեքի մարման աջակցության բաղադրիչով։
Հավաստագրերի իրացման գործընթացը ևս ակտիվ շարունակվում է․ հավաստագիրն իրացրել է 4146 ընտանիք (19,098 անձ), որից 3853-ը (18,134 անձ) ձեռքբերման բաղադրիչով, 62-ը (304 անձ) կառուցապատման բաղադրիչով, 231-ը (660 անձ)` գործող հիփոթեքի մարման աջակցության բաղադրիչով։
Ձեռքբերման և կառուցապատման բաղադրիչով իրացված հավաստագրերի մարզային բաշխվածությունը հետևյալն է՝ Վայոց Ձոր – 63, Տավուշ – 87, Արագածոտն – 135, Շիրակ – 147, Գեղարքունիք – 158, Սյունիք – 228, Լոռի – 368, Երևան – 450, Արարատ –531, Արմավիր – 667, Կոտայք – 1081։
ԶԼՄ-ին կոչ եմ անում Ղարաբաղից տեղահանված մեր հայրենակիցների բնակապահովման ծրագրին անդրադարձ կատարելիս հիմնվել բացառապես թվային տվյալների և փաստական հիմքերի վրա»,- «Արմենպրես»-ի փոխանցմամբ՝ «Ֆեյսբուք»-ի իր էջում գրել է Նվեր Կոստանյանը։
Նշենք, որ «Հրապարակ»-ը գրել էր, թե Ղարաբաղից տեղահանված անձանց բնակապահովման ծրագիրը բազում խոչընդոտների է հանդիպում, քանի որ բնակարանների բարձր գների պատճառով բնակապահովման ծրագրի շրջանակներում տրամադրվող սերտիֆիկատները հնարավոր չի լինում իրացնել։