«Ինչ վերաբերում է խաղաղության մասին խոսելուն, ապա ասեմ, որ դա էլ է հարաբերական, եթե մենք մտածում ենք, որ իքս ադրբեջանցի խոսում է խաղաղության մասին, այնպես չէ, որ նա ասում է՝ գիտե՞ք՝ Արցախը հայերինն է, տվեք նրանց, այսինքն՝ այդ խոսույթը չի ենթադրում որևէ հայամետ դիրքորոշում, հայերի իրավունքների պաշտպանություն, իրենց պատկերացրած խաղաղության մասին են խոսում: Նրբությունն այն է, որ այդ մարդիկ ասում են՝ եկեք այդ մարդկանց չսպանենք, այդ մարդկանց նկատմամբ էթնիկ զտում չձեռնարկենք, այս ատելության խոսքի շարունակականությունը չապահովենք:
Նման ավելի ակտիվ դեպք դրսևորվել է 2023-ի ամռանը՝ մինչև Արցախի էթնիկ զտումը, դա բոլորն ուսումնասիրում էին, ու պարզ էր, որ դա տեղի է ունենալու, հենց այդ ժամանակ մի քանի ադրբեջանցի առաջարկեց հարձակում չգործել, նստել ու խոսել: Այդ բոլոր մարդիկ հետագայում ձերբակալվեցին, հանրային պարսավանքի ենթարկվեցին, մեղադրվեցին հայերի օգտին լրտեսություն անելու համար, ընդ որում, կրկնում եմ, այդ մարդիկ չէին ասում՝ եկեք Արցախը ճանաչենք Հայաստանի մաս, նրանք ընդամենն ասում էին՝ եկեք այդ մարդկանց չսպանենք, եկեք նստենք ու խոսենք նրանց հետ, համոզենք, որ Ադրբեջանի քաղաքացիություն ընդունեն ու ապրեն:
Այդ առումով ավելի ակտիվ շրջանառվում է Բահրուզ Սամադովի անունը, վերջինս երկար ժամանակ ապրել ու աշխատել է արտերկրում, մի քանի հոդված ունի ընդդեմ Ալիևի վարչակարգի, մի կարճ ժամանակով վերադառնում է Բաքու իր տատին այցելելու, այդ ժամանակ էլ ձերբակալվում է, մեղադրում են հայերի օգտին լրտեսության համար, դատապարտում կարծեմ 16 տարվա ազատազրկման:
Այսինքն՝ ցանկացած գործողություն, որը կարող է նպաստել հայերի վերաբերյալ վերաբերմունքի փոփոխությանը, Ադրբեջանի վարչակարգի համար խնդրահարույց է, որովհետև այդ վարչակարգը սնվում է հենց հայերի դեմ այդ քարոզչությամբ ու ատելության տարածմամբ, դա անփոփոխ է:
Բոլոր նրանք, ովքեր պատրանքներ ունեն այդ առումով, բացարձակ չեն հասկանում Ադրբեջան պետությունը, այն քաղաքական համակարգը, որ կա այնտեղ, Ալիևի համար կենսական է շարունակել հայերի վերաբերյալ թշնամական քարոզը»:
https://medialab.am/307053/Ադրբեջանում խաղաղության մասին խոսողները մեղադրվում ու դատապարտվում են. այդ խոսույթը բնավ էլ հայանպաստ չէ. Հայրապետյան — MediaLab…
«Մեդիալաբի» հարցերին պատասխանում է պատմական գիտությունների թեկնածու, ադրբեջանագետ Տաթևիկ Հայրապետյանը — Տիկի՛ն Հայրապետյան, Հայաստանում թե՛ իշխանության ներկայացուցիչները, թե՛ տարբեր գործիչներ խոսում են խաղաղություն, հարևանների հետ բարիդրացիական հարաբերություններ…