«Պատիվ ունեմ» խմբակցության պատգամավոր Արմենուհի Կյուրեղյանն այսօրվա նիստի ժամանակ, դիմելով Ռուբեն Ռուբինյանին, ասել է, որ պատերազմի տարում և պատերազմից հետո պատգամավորները շարունակել են ստանալ պարգևավճարներ։ Ռուբինյանը, որն առաջադրված է ԱԺ փոխնախագահի պաշտոնում, ի պատասխան Կյուրեղյանի դիտարկմանը, նշել է, թե վերջինիս խոսքում փաստական սխալ կա․ «Մենք պարգևավճար չենք ստացել պատերազմից հետո, ավելին՝ պատգամավորները վերջին անգամ պարգևավճար են ստացել 2020թ․ գարնանը, եթե չեմ սխալվում՝ փետրվարին»։ Թե՛ Ռուբինյանը, թե՛ Կյուրեղյանը, սակայն, սխալվում են․ թեև պատերազմից հետո պատգամավորները պարգևավճար չեն ստացել, սակայն ԱԺ նախկին նախագահ Արարատ Միրզոյանի կարգադրությամբ՝ պատգամավորները պարգևավճար են ստացել 2020թ․ սեպտեմբերին, ինչի վերաբերյալ Infocom-ը գրել էր դեռ մարտի 21-ին, երբ Միրզոյանն ասել էր, թե պատգամավորները վերջին անգամ պարգևավճար ստացել են փետրվար ամսվա համար։