Category: Hraparak.am

Մեկ տարուց ավելի է, ինչ Հայաստանի գլխավոր զինկոմի պաշտոնը թափուր է՝ ԺՊ-ն Արեն Սարգսյանն է։ Նախկին պետ Արմեն Ավթանդիլյանին պաշտոնից ազատել են անցած տարվա օգոստոսին։ Շուրջ 2 ամիս թափուր է նաեւ ՊՆ 5-րդ բանակային կորպուսի հրամանատարի պաշտոնը. Սասուն Բադասյանին պաշտոնից ազատելուց 2 ամիս է անցել, սակայն այն չի համալրվել: Անցած շաբաթ պաշտպանության փոխնախարար Արման Սարգսյանին Գեղամ Մանուկյանը հարց ուղղեց` ինչո՞ւ չեն համալրվում, բայց հստակ պատասխան չստացավ։
ՊՆ առանցքային պաշտոնները տեւական ժամանակ թափուր պահելու փաստը հատկապես ուշագրավ է այն տեղեկության ֆոնին, որ Ալիեւը խաղաղության պայմանագիր ստորագրելու նախապայմաններից մեկն էլ համարում է Հայաստանի Հանրապետության ապառազմականացումը: Հնարավոր է, որ հենց սրանով է պայմանավորված առանցքային պաշտոնները թափուր թողնելու հանգամանքը: Թեպետ չի բացառվում, որ ուղղակի կադրեր չունեն։

Երկուշաբթի օրը Բագրատ սրբազանը վերադարձել է Մոսկվայից։ Գառնիկ Դանիելյանին հարցրինք՝ Սրբազանը քաղաքական հանդիպումներ ունեցե՞լ է։ «Չեմ խոսացել Սրբազանի հետ, չեմ կարող ասել»: Ինչպե՞ս․ առողջական վիճակո՞վ էլ չեք հետաքրքրվել։
«Խոսացել եմ հետը, ասել եմ՝ ոնց եք զգում, ասել է լավ եմ, հիմա՝ մարդ եմ, ես էլ խնդիրներ ունեմ, զբաղված եմ կուսակցական ժողով կա, բան կա, պարապ նստած չեմ»: Իսկ առաջիկայում հավաք, միջոցառում նախատեսվո՞ւմ են։ «Տեղյակ չեմ»։
Մինչդեռ օրեր առաջ ասել էր, որ Սրբազանը հայ համայնքի հետ է հանդիպել, իսկ քաղաքական հանդիպման լուրերը «ստահոդ» էր անվանել։ Դանիելյանը գուցե այդ մեկնաբանության համար նկատողություն է ստացել ու որոշել է շառից-փորձանքից հեռու մնալ` չխոսել Սրբազանի հանդիպումներից։

Ինչո՞ւ է Նիկոլ Փաշինյանն այսքան երջանիկ Եվրահանձնաժողովի նախագահ Ուրսուլա ֆոն դեր Լայենին ողջունելիս: Այսպես լայնաբերան ժպիտ, այսքան ջերմ ձեռքսեղում նա երբեք չի ուղղում իր հայրենակիցներին, սակայն ադրբեջանասեր այս տիկնոջ հանդեպ ավելի քանի սիրալիր է:
Գուցե այս ջերմության պատճառը հենց Ուրսուլա ֆոն դեր Լայենի անթաքույց սե՞րն է` առ Ադրբեջան: Այս տիկինն էր ժամանակին հայտարարում. «Ադրբեջանը Եվրոպայի վստահելի գործընկերն է էներգետիկայի ոլորտում», հետո ասում էր. «Եվրամիությունը պատրաստ է աջակցել Ադրբեջանին հումանիտար ականազերծման գործում»։
Նա 2020-ի պատերազմից հետո այցելեց Ադրբեջան եւ շատ ջերմ հարաբերություններ հաստատեց Իլհամ Ալիևի հետ, իսկ նրա հետ համատեղ ասուլիսի ժամանակ էլ հայտարարեց. «Մենք քննարկեցինք ԵՄ-Ադրբեջան հարաբերությունների կարևորությունը` կայուն և բարգավաճ Հարավային Կովկասի համար»:

Ռուսաստանի նախագահ Վլադիմիր Պուտինը ուղերձ է ձևակերպում ամբողջ աշխարհի համար, հայտարարել է «Ռոսսիա սեգոդնյա» միջազգային մեդիախմբի գլխավոր տնօրեն Դմիտրի Կիսելյովը ԱՊՀ երկրների «Մեդիայի զարգացումը փոփոխվող աշխարհում» մեդիաֆորումի ժամանակ:
«Պուտինը մեսիջ է ձևակերպում ամբողջ աշխարհի համար»,-նրա խոսքը մեջբերում է ՌԻԱ Նովոստին: Կիսելյովը նշել է, որ եթե մենք հասկանում ենք Պուտինին, ապա հասկանում ենք Ռուսաստանը և աշխարհում տեղի ունեցող գործընթացները:

Ֆրանսիայի նախագահ Էմանուել Մակրոնը Բուդապեշտում՝ Եվրոպական քաղաքական համայնքի համաժողովին իր ելույթի ընթացքում հույս է հայտնել, որ Հայաստանի եւ Ադրբեջանի միջեւ խաղաղության պայմանագիրը կարող է ստորագրվել: Այս մասին հայտնում Է ՀՀ-ում Ֆրանսիայի դեսպանը՝ X-ի իր էջում:
«Ֆրանսիայի Հանրապետության նախագահ պարոն Էմանուել Մակրոնը Եվրոպական քաղաքական համայնքի համաժողովին Բուդապեշտում. «Շատ կարևոր է ամեն ինչ անել Հայաստանի և Ադրբեջանի միջև ապագա կառուցելու համար։ Եվ հուսով եմ, որ խաղաղության պայմանագիրը կարող է ստորագրվել»։
«Մենք՝ եվրոպացիներս (…), մենք այլևս չենք ցանկանում իմպերիալիզմ և այլևս չենք ցանկանում սահմանների վերանայում մեր մայրցամաքում»»,- գրել է նա։

Աշխարհի առաջատար արժույթների զամբյուղի հանդեպ ամերիկյան դոլարը թանկացել է 1,92 տոկոսով, հասնելով 105,441 նիշի, այն բանից հետո, երբ հայտնի է դարձել, որ ԱՄՆ նախագահական ընտրություններում հաղթել է Դոնալդ Թրամփը։ Սա դոլարի ամենամեծ թանկացումն էր՝ 2016 թվականից հունիսից սկսած։ Այս մասին հայտնում է Financial Times պարբերականը։ Դոլարի ինդեքսը հանդիսանում է կարեւոր ցուցանիշ, որը արտահայտում է դոլարի փոխարժեքը աշխարհի վեց առաջատար արժույթների հանդեպ։

Նիկոլ Փաշինյանին դավաճան և վիժվածք անվանելու համար դատարանն այսօր Դավիթ Ավետիսյանին մեղավոր ճանաչեց և նրա նկատմամբ որպես պատիժ 525 հազար դրամի տուգանք նշանակեց:
Նշենք, որ Դավիթ Ավետիսյանը «Սասնա ծռեր» խմբի անդամ Վարուժան Ավետիսյանի որդին է։
Նշենք նաեւ, որ նախորդ տարի հուլիսի 2-ի՝ն ժամը 16։00-ի սահմաններում երևանյան այգիներից մեկում վարչապետ Նիկոլ Փաշինյանին ուղղված մի քանի արտահայտություններից հետո Ավետիսյանը բերման էր ենթարկել, ձերբակալվել, որից հետո հարուցվեց քրեական գործ։

Երկու օրում 6500-ից ավելի ստորագրություն է հավաքել տրանսպորտի թանկացման դեմ։ Այսօր երրորդ օրն է, և տեսնում ենք, որ մարդիկ ակտիվ մասնակցում են ստորագրահավաքին։ Այս մասին այսօր հայտարարել է Երևանի նախկին քաղաքապետ Հայկ Մարությանը:
«Եթե ռեսուրս ունենայինք և 10000 հոգի դուրս գար ստորագրահավաք անելու, 100000-ավոր մարդիկ կմիանային: «Մարդկանց 95 տոկոսը դեմ է տրանսպորտի թանկացմանը»,-ասել է նա:

Ինչպես հայտնի է, Նիկոլ Փաշինյանը տիկնոջ՝ Աննա Հակոբյանի հետ, գտնվում է Հունգարիայում: Նա պիտի մասնակցի Եվրոպական քաղաքական համայնքի հինգերորդ գագաթնաժողովին: Նա այս անգամ հեծանիվ է քշել այնտեղ:
«Չկանգնացնեն մեզ ոստիկանները՝ խայտառակ ըլնենք»,- ասում է Փաշինյանը հրապարակած տեսանյութում: