Category: Infocom

🇦🇲🇺🇸 ԱՄՆ աշխատանքային այցի շրջանակում ՀՀ պաշտպանության նախարարի առաջին տեղակալ, ԶՈՒ ԳՇ պետ Էդվարդ Ասրյանը հանդիպել է ԱՄՆ ԶՈՒ շտաբների պետերի միացյալ կոմիտեի նախագահ, գեներալ Չարլզ Բրաունի հետ։ 
🤝 Քննարկվել են երկկողմ հետաքրքրություն ներկայացնող հարցեր։ Երկուստեք նշվել է, որ Հայաստան-ԱՄՆ համագործակցությունը պաշտպանության ոլորտում զարգանում է։
💬 Ամերիկյան կողմը նշել է, որ կշարունակի իր աջակցությունը ՀՀ ԶՈՒ կերպափոխման և բարեփոխումների ընթացքին։
🔸 Քննարկվել և կարևորվել է համատեղ անցկացվող միջոցառումների շարունակականությունը, անդրադարձ է կատարվել նաև տարածաշրջանային անվտանգությանն առնչվող մի շարք հարցերի։ [ՀՀ ՊՆ]

🇺🇦 Կիևը միջազգային հանրությանը կոչ է անում բոյկոտել Ադրբեջանում կայանալիք COP29-ը, եթե այդ համաժողովին մասնակցի ՌԴ նախագահ Վլադիմիր Պուտինը:
🗣 «Մենք պետք է ճնշում գործադրենք, և մեր գործընկերները պետք է հասկացնեն Ադրբեջանին, որ եթե Պուտինն այնտեղ է, ապա նրանք չեն գա»,- Politico-ին ասել է ԵՄ-ում Ուկրաինայի դեսպան Վսևոլոդ Չենցովը։
🇷🇺 Ուկրաինացի դիվանագետի կոչին նախորդել է Կրեմլի հայտարարությունը, թե Պուտինը դիտարկում է նոյեմբերին Բաքվում նախատեսված ՄԱԿ-ի Կլիմայական համաժողովին մասնակցելու հնարավորությունը։ ՌԴ նախագահի խոսնակը միաժամանակ նշել է, որ վերջնական որոշում դեռ չկա: |azatutyun.am|

🏘 2025-ի հունվարի 1-ից հետո եկամտահարկի վերադարձով ձեռք բերվող բնակարանների համար պետության կողմից վերադարձվող գումարը չի կարող գերազանցել 750 հազար դրամը։
✅ Համապատասխան որոշումն ընդունվեց ՀՀ կառավարության հոկտեմբերի 17-ի նիստում:
📍 Փոփոխությունը չի վերաբերելու այն քաղաքացիներին, որոնք արդեն իսկ կնքել են եկամտահարկի վերադարձով հիփոթեքային պայմանագիր։ |civilnet.am|

📈 Նախատեսվում է բարձրացնել ՀՀ քաղաքացիություն ստանալու և քաղաքացիությունը դադարեցնելու համար պետական տուրքը և սահմանել համապատասխանաբար 50 հազար և 150 հազար դրամ՝ համապատասխանաբար 1000 և 25 000 դրամի փոխարեն:
✅ Համապատասխան նախագիծը հավանության արժանացավ ՀՀ կառավարության նիստի ժամանակ: |1lurer.am|

✅ ՀՀ կառավարությունը հավանություն տվեց ՀՀ ժողովրդագրական իրավիճակի բարելավման 2024-2040թթ. ռազմավարությունը հաստատելու մասին նախագծին:
🗣 Աշխատանքի և սոցիալական հարցերի նախարար Նարեկ Մկրտչյանը նշեց 4 ռազմավարական թիրախները՝
📍 ընտանիքի բարեկեցության միջավայրի ստեղծում,
📍 վաղաժամ մահերի կանխման համակարգ,
📍 ակտիվ ծերության ծրագրերի իրականացում,
📍 միգրացիայի կառավարման քաղաքականություն:
💬 «Մեր բոլոր ռազմավարություններն այն մասին են, որ ՀՀ-ն մի տեղ է, որի հետ արժե կապել սեփական և սեփական սերունդների կյանքը. սա է մեր գործնական խնդիրը, որը պետք է կարողանանք ապացուցել»,- ասաց Նիկոլ Փաշինյանը: |1lurer.am|

🎇 Այս տարվա ընթացքում 26 անձ վարչական պատասխանատվության է ենթարկվել գիշերային ժամերին հրավառություն կատարելու համար:
🗣 Այս մասին, Factor.am-ի գրավոր հարցմանն ի պատասխան, տեղեկացրել են ՆԳՆ-ից։
💰 Ըստ գերատեսչության՝ վարչական պատասխանատվության ենթարկված յուրաքանչյուր քաղաքացու նկատմամբ նշանակվել է տուգանք 100 000-ական դրամի չափով։

❌ Գործադիրը առաջարկել է ձեռնպահ մնալ սեպտեմբերի 27-ը հիշատակի օր սահմանելու առաջարկության վերաբերյալ:
🔸 Նախագիծը ներկայացրել է ԱԺ պատգամավոր Գեղամ Նազարյանը:
❗️ Որպես հիմնավորում ՀՀ կառավարությունը նշել է այն, որ «հունվարի 28-ին նշվող Բանակի օրը հանդիսանում է ոչ միայն ՀՀ ԶՈՒ կազմավորման արժևորում, այլ նաև ներառում է բոլոր ժամանակներում Հայաստանի պաշտպանության ապահովման գործում ավանդ ունեցող, այդ թվում՝ կյանքը զոհած անձանց հիշատակի ոգեկոչումը»:

🇬🇪 Վրաստանի խորհրդարանի նախագահ Շալվա Պապուաշվիլին հայտարարել է, թե ընդդիմադիր կուսակցությունները հոկտեմբերի 26-ին կայանալիք խորհրդարանական ընտրություններից հետո սահմանադրական հեղաշրջման սցենար են պատրաստել։
📍 Նա նաև մեկնաբանել է տեխնիկական կառավարության գաղափարը, որն ընդդիմությանն առաջարկել է Վրաստանի նախագահ Սալոմե Զուրաբիշվիլին։ Նրա կարծիքով, եթե ընտրություններում հաղթեն ընդդիմադիր կուսակցությունները, կձևավորվի ժամանակավոր կառավարություն, որի խնդիրն է լինելու բարեփոխումներ իրականացնել։ 2025թ., նախագահի առաջարկած կանոնադրության համաձայն, որը ստորագրել են ընդդիմության առաջնորդները, կանցկացվեն կրկնակի ընտրություններ։
💬 «Սա կասկածներ է առաջացնում, որ ծրագրված է չճանաչել ընտրությունները, ապա այլընտրանքային իշխանության ներդնել: Սա այն է, ինչ հիշում ենք 90-ականներից, երբ ստեղծվեցին ռազմական խորհուրդները, այն է, ինչ տեսնում ենք «բանանային հանրապետություններում», երբ խունտան է գալիս իշխանության: Ըստ երևույթին, ինչ-որ մեկը դրսից մեզ նայում է որպես «բանանային հանրապետություն…» — նշել է Պապուաշվիլին։ |tert.am|

🇮🇱🇱🇧 Լիբանանի հարավում գտնվող Նաբաթիե խոշոր քաղաքի քաղաքապետերանի շենքին իսրայելական երեկվա ավիահարվածներից 16 մարդ է զոհվել, այդ թվում՝ քաղաքապետը:
💬 Լիբանանի պաշտոնյաները դատապարտել են միջադեպը՝ շեշտելով, որ Իսրայելի արշավը «Հեզբոլլահ»-ի զինված խմբավորման դեմ այժմ տեղափոխվում է լիբանանյան պետության տարածք։
📍 Իսրայելն առաջին անգամ հոկտեմբերի 3-ին էր Նաբաթիեի տասնյակ հազարավոր բնակիչներին տարհանելու մասին ծանուցում ուղարկել: Այդ ժամանակ քաղաքի քաղաքապետ Ահմեդ Քահիլը Reuters-ին ասել էր, որ չի պատրաստվում հեռանալ: |azatutyun.am|

📣 Freedom House-ը «Ազատությունը համացանցում» 2024թ. տարեկան իր զեկույցում կրկին դասել է Հայաստանն ազատ համացանց ունեցող երկրների շարքին: Դրա հետ մեկտեղ՝ արձանագրվել է իշխանության կողմից գրաքննության և թվային ոլորտի վերահսկման դեպք:
📍 Ըստ զեկույցի՝ «առցանց տեղեկատվական դաշտը Հայաստանում բևեռացված է, ենթարկվում է քաղաքական ճնշման և լի է ապատեղեկատվությամբ: Որոշ առցանց լրատվամիջոցներում լրագրողներին արգելվում է շեղվել խմբագրական քաղաքականությունից, որը որոշ դեպքերում կապված է քաղաքական կուսակցությունների կամ ուժերի հետ:
📍 Զեկույցն առանձնացրել է 2024թ. մարտին կառավարությանը քննադատող փոդքասթի հաղորդավարներ Վազգեն Սաղաթելյանի և Նարեկ Սամսոնյանի կալանավորման փաստը՝ խուլիգանության մեղադրանքով: Նրանց խափանման միջոց էր ընտրվել երկամսյա նախնական կալանքը վարչապետ Փաշինյանին վիրավորող հրապարակումից հետո: