Category: Infocom

⚖️ Այսօր տեղի է ունեցել Ադրբեջանում ապօրինի պահվող Արցախի ռազմաքաղաքական ղեկավարների շինծու գործերով հերթական դատական նիստը։
📌 Նիստի սկզբում Արայիկ Հարությունյանի պաշտպանը դիմել է դատարանին՝ հայտարարելով, որ ցանկանում է առանձին հանդիպում ունենալ իր պաշտպանյալի հետ։ Դատարանը բավարարել է միջնորդությունը և պայմաններ ստեղծել հանդիպման համար։
📝 Մեղադրյալներից ոչ ոք իրեն մեղավոր չի ճանաչում իրենց առաջադրված մեղադրանքներում։ Հաջորդ դատական նիստը նշանակվել է փետրվարի 24-ին։ |factor.am|

📌 ՆԱՏՕ-ի պատվիրակության՝ Հայաստան կատարած այցի շրջանակում փետրվարի 17-21-ն անցկացվում է «Գործընկերային ներդաշնակված կարողությունների գնահատում» խորագրով վարժանքի առաջին փուլը։
🤝 Վարժանքի նպատակը ՀՀ-ՆԱՏՕ համագործակցության ամրապնդումն է։ [ՀՀ ՊՆ]

🚧 ՀՀ տարածքում կան փակ և դժվարանցանելի ավտոճանապարհներ։
🔸 Փակ են Արագածոտնի մարզում «Ամբերդ» բարձրլեռնային օդերևութաբանական կայանից Քարի լիճ և Ամբերդ ամրոց տանող ավտոճանապարհները։
🚚 Սպիտակի ոլորանները, Վանաձոր-Ալավերդի, Վանաձոր-Դիլիջան և Վանաձոր-Ստեփանավան ավտոճանապարհները փակ են բեռնատարների և կցորդիչով բեռնատարների համար։ Լոռու մարզի բոլոր ավտոճանապարհները դժվարանցանելի են։
[ՆԳՆ ՓԾ]

🇷🇺🇸🇦 Պուտինը հեռախոսազրույց է ունեցել Սաուդյան Արաբիայի թագաժառանգի հետ, հայտնել են Կրեմլից։
🤝 ՌԴ նախագահը շնորհակալություն է հայտնել փետրվարի 18-ին Էր Ռիադում ԱՄՆ-ի հետ բանակցությունների համար բարենպաստ պայմանների ստեղծման համար։
🔸 Հաստատվել է համագործակցության հետագա զարգացման հանձնառությունը, որ կողմերը կշարունակեն համագործակցել ՕՊԵԿ+-ի շրջանակներում նավթի շուկայում կայունությունը պահպանելու համար։

🇦🇲🇹🇷 Հայաստանի և Թուրքիայի պատվիրակությունների հանդիպում է տեղի ունեցել Վիեննայում ԵԱՀԿ Խորհրդարանական վեհաժողովի ձմեռային նստաշրջանի շրջանակներում։
📌 Հանդիպմանը քննարկվել են երկու երկրների միջև հարաբերությունների կարգավորմանը վերաբերող հարցեր: Երկկողմ կարևորվել է տարածաշրջանի ճանապարհների և այլ ենթակառուցվածքների շուտափույթ ապաշրջափակումը եւ տնտեսական հարաբերությունների զարգացումը:
[Արտաքին հարաբերությունների մշտական հանձնաժողովի նախագահ Սարգիս Խանդանյան]

✝️ Երուսաղեմի Հայոց պատրիարքության սեփականությունը կարող է բռնագրավվել և աճուրդով վաճառվել․ պատրիարքը դիմել է Իսրայելի վարչապետին։
⚖️ Որպես բռնագրավման պատճառ բերվում է 1994 թվականից չվճարված գույքահարկը։ Երկուշաբթի տեղի կունենա վարչական միջնորդության լսում, որտեղ Պատրիարքարանը կփորձի կանխել Արևմտյան Երուսաղեմում դարեր շարունակ իրեն պատկանող գույքի օտարումը։ Եթե միջնորդությունը մերժվի, քաղաքապետարանը կսկսի գույքի բռնագրավման և աճուրդի գործընթացը՝ ձգտելով հավաքել այն, ինչը Պատրիարքարանը համարում է «վիճելի պարտքեր»։ Ըստ Պատրիարքարանի՝ այս պարտքերը երբևէ չեն հաստատվել դատական կարգով։
📄 Պատրիարք Ամեն. Տ. Նուրհան արք. Մանուկյանը Նեթանյահուին ուղղված նամակում հորդորել է միջամտել և դադարեցնել քաղաքապետարանի գործողությունները, վերսկսել իր նշանակած կառավարական հանձնախմբի հանդիպումները՝ խնդրին լուծում գտնելու համար:
📌 Այս հարկային վեճը չի առնչվում Հայոց թաղամասում գտնվող «Կովերի պարտեզի» հայտնի խնդրին։ |civilnet.am|

🚨🚙 Մեկ տասնյակից ավելի մեքենաներ են բախվել Հանրապետության Մ-1 ավտոճանապարհի Մաստարա-Լանջիկ հատվածում։
📌 Ըստ նախնական տվյալների՝ այս պահին կա 4 տուժած, և դեպի Երևան ճանապարհը երկկողմանի փակվել է:
👮 Նշված հատվածում ծառայություն են իրականացնում ՆԳՆ Փրկարար ծառայության և Ոստիկանության աշխատակիցներ։ Ձեռնարկվում են միջոցառումներ ճանապարհահատվածը բացելու ուղղությամբ։
[ՆԳՆ մամուլի քարտուղար]