Հայաստանն ինստիտուցիոնալ երկիր է, և պետական ինստիտուտներն աշխատում են՝ անկախ նրանից, թե վարչապետը որտեղ է և ինչով է զբաղված:
Այս մասին վստահեցրեց ՀՀ վարչապետ Նիկոլ Փաշինյանն ԱԺ-կառավարություն հարցուպատասխանին՝ անդրադառնալով «Հայաստան» խմբակցության պատգամավոր Ագնես Խամոյանի հարցին:
Ագնես Խամոյանը ՀՀ արտաքին հետախուզական ծառայության՝ 2026թ զեկույցից մեջբերում արեց, որը վերաբերում էր Իրանին: Նա մեղադրեց վարչապետին այդ պայմաններում, Իրան-ԱՄՆ-Իսրայել պատերազմի առաջին օրը մարզ այցելության ճանապարհին «պեռաշկի» ուտելու համար:
Ի պատասխան, վարչապետն ընդգծեց, որ Հայաստանում կան ինստիտուտներ, որ, անկախ նրանից, թե վարչապետը որտեղ է կամ ինչով է զբաղված, գործում են:
«Վարչապետն ու կառավարությունը հոգ են տարել, որ այդ ինստիտուտներն աշխատեն: Ընդ որում, այն, ինչ տեղի է ունենում Իրանում, ձեզ համար նորություն է, Հայաստանի պետական ինստիտուտների համար նորություն չէ: Այս իրավիճակը տարիներով է զարգանում: Եթե հնարավորություն ունենայի՝ տասնյակ ուրիշ այդպիսի զեկույցներ կտեսնեիք, որոնք եկել, անցել են վարչապետի աշխատասեղանի վրայով համապատասխան ընթացակարգերով: Իհարկե, մենք շատ ցավում ենք Իրանի Իսլամական Հանրապետությունում և շուրջը տեղի ունեցող իրադարձությունների համար, արտահայտել ենք, արտահայտում ենք»,-ասաց Փաշինյանը:
Նա հիշեցրեց՝ Հայաստանի ԱԽ-ն Իրանում ծավալվող իրադարձություններից և մի օր առաջ, և մի օր հետո նիստ է ունեցել: Հայաստանի պաշտպանության նախարարն այդ նույն շաբաթ այցով եղել է Իրանում: Արտաքին հետախուզական ծառայությունն է զեկույցով հանդես եկել: ԱԽ-ի ներքո բավականին երկար ժամանակ գործում է միջգերատեսչական աշխատանքային խումբ, որը գործում է ամենօրյա ռեժիմով:
«Որ ինձ ասում եք, թե «պեռաշկի» ենք ուտում, ձեզնից չի երևում, որ հացադուլ հայտարարած վիճակում եք… Եվ ընդհանրապես ես չեմ տեսնում պատճառ, որ ՀՀ կառավարող մեծամասնությունը սեփական քաղաքացիների հետ շփվելուց հրաժարվի»,-պատգամավորին պատասխանեց վարչապետը:
Նա նաև հավելեց՝ պատգամավորի համար վատ լուր ունի.
«Երբ մենք «պեռաշկի» էինք ուտում, և այդ տեսանյութը տարածվեց համացանցով, այդ թվում՝ միջազգային, Մերձավոր Արևելքի մի շարք հարգելի գործընկերներ որոշեցին գնալ և հրապարակային ռեստորաններում ճաշել՝ ցույց տալու համար, որ իրենց քաղաքացիներն անհանգստանալու բան չունեն, և իրավիճակը վերահսկողության տակ է: Եթե չեք նկատել դա, ապա՝ ավելի վատ»:
Նա շեշտեց՝ Հայաստանն ինստիտուցիոնալ երկիր է, արտաքին հետախուզության ծառայությունն իր գործն է անում, մնացածը՝ իրենց, պետական ինստիտուտներն աշխատում են: