Ռուսաստանի նախագահ Վլադիմիր Պուտինը հայտարարել է, որ եթե Հայաստանը համարի, որ Գյումրիում ռուսական ռազմաբազայի ներկայությունն այլևս անհրաժեշտ չէ, Մոսկվան պատրաստ է այն դուրս բերել։
«Եթե Հայաստանը կարծում է, որ ռուսական ռազմաբազան իրեն պետք չէ, մենք թեկուզ վաղը կհեռանանք։ Հայաստանը պատրա՞ստ է դրան։ Խնդրեմ, մենք ոչ մեկին ոչինչ չենք պարտադրի։ Իսկ եթե հայ ժողովուրդը ցանկանում է, որ կողքին ինչ-որ ռուսական ռազմական ներկայություն լինի, մենք կմնանք, կաշխատենք, կհամագործակցենք», -ասել է Պուտինը։
Անդրադառնալով Հայաստանի՝ Եվրամիությանն անդամակցելու ձգտմանը՝ Ռուսաստանի նախագահը կրկնել է, որ դա Երևանի ինքնիշխան որոշումն է, սակայն, նրա խոսքով, Հայաստանը չի կարող միաժամանակ լինել և՛ ԵՄ-ի, և՛ Եվրասիական տնտեսական միության անդամ։
Պուտինը հիշեցրել է, որ Հայաստանում ընդունվել է Եվրամիությանն անդամակցության գործընթացի մեկնարկի մասին օրենքը։ Նրա գնահատմամբ՝ դրանով Երևանը փաստացի հայտարարել է, որ հեռանկարում դուրս է գալու ԵԱՏՄ-ից։ Ռուսաստանի նախագահը նաև պնդել է, որ Հայաստանը ԵԱՏՄ-ին անդամակցության և Ռուսաստանի հետ համագործակցության շնորհիվ զգալի արտոնություններ է ստանում՝ այդ թվում էներգակիրների գների և ռուսական շուկա մուտքի հարցում։
«Թող հիմա ազնվորեն ասեն՝ ինչ են ուզում, որոնք են իրենց նպատակները», — հայտարարել է Պուտինը՝ հավելելով, որ Նիկոլ Փաշինյանի հետ պայմանավորվել են հանգիստ ռեժիմով վերլուծել հայ-ռուսական համագործակցության բոլոր ուղղությունները։ Նա վարչապետին հրավիրել է Մոսկվա՝ այդ հարցերը մասնագետների մասնակցությամբ քննարկելու համար։