Category: Armen Press

ՀՀ ԱԳ նախարար Արարատ Միրզոյանն ընդունել է ՆԱՏՕ-ի գլխավոր քարտուղարի Կովկասում և Կենտրոնական Ասիայում հատուկ ներկայացուցիչ Քևին Հեմիլթոնին։
Այս մասին տեղեկացնում են ՀՀ արտաքին գործերի նախարարությունից՝ նշելով, որ զրուցակիցները գոհունակությամբ ընդգծել են Հայաստանի և ՆԱՏՕ-ի միջև քաղաքական երկխոսության ակտիվ դինամիկան։ Քննարկվել են փոխգործընկերության ընդլայնմանն ուղղված նախագծերը, որոնց կարևոր բաղադրիչ է Հայաստանի կողմից իրականացվող բարեփոխումներին և ժողովրդավարական զարգացմանն աջակցությունը։
Նախարար Միրզոյանը ներկայացրել է տարածաշրջանային վերջին զարգացումները, ինչպես նաև՝ հարևանների հետ հարաբերությունների կարգավորման և խաղաղության հետագա ինստիտուցիոնալիզացիայի ուղղությամբ իրականացվող քայլերը։
Անդրադառնալով տարածաշրջանային փոխկապակցվածության թեմային՝ զրուցակիցներն ընդգծել են, որ նոր իրողությունների պայմաններում Հարավային Կովկասը կարող է փոխկապակցող կամրջի դեր կատարել: Սա արտահայտված է նաև ՀՀ կողմից ներկայացված «Խաղաղության խաչմերուկ» նախագծում:
Հանդիպմանը մտքեր են փոխանակվել միջազգային անվտանգությանն առնչվող հարցերի, ինչպես նաև բազմակողմ հարթակներում փոխգործակցության շուրջ։

Հայաստանի Հանրապետության նախագահ Վահագն Խաչատուրյանն աշխատանքային այցով Աստանայում է։
«Արմենպրես»-ի փոխանցմամբ՝ ՀՀ նախագահի աշխատակազմից հայտնում են, որ Վահագն Խաչատուրյանը կմասնակցի ՄԱԿ-ի «Կայուն ապագայի ընդհանուր տեսլական» խորագրով տարածաշրջանային բնապահպանական գագաթնաժողովին։

❗️Ապատեղեկատվական արշավ վարչապետ Նիկոլ Փաշինյանի և նրա ընտանիքի անդամների դեմ. Նազելի Բաղդասարյանը հերքել է հերթական կեղծիքը
Հայաստանի վարչապետի մամուլի քարտուղար Նազելի Բաղդասարյանը հերքել է շրջանառվող լուրերը վարչապետ Նիկոլ Փաշինյանի ընտանիքի անդամների կողմից իբր կոռուպցիոն սխեմաների միջոցով բյուջեից գումարներ յուրացնելու վերաբերյալ։
Նազելի Բաղդասարյանը «Ֆեյսբուք»-ի իր էջում գրել է, որ նշված տեղեկատվությունը սուտ է և որևէ կապ չունի իրականության հետ։ «Սա հերթական ապատեղեկատվական արշավն է՝ երկրի վարչապետի և իր ընտանիքի անդամների դեմ»,- գրել է Բաղդասարյանը։
Կեղծ տեղեկատվությունը տարածել է Vtforeignpolicy com կայքը, որը հետո հրապարակել է նաև X-ում՝ RussianNews էջում։
Տարածված կեղծ լուրի համաձայն՝ Վարչապետ Նիկոլ Փաշինյանը դուստրը՝ Մարիամ Փաշինյանը, իբր իր «Ատլիքս» ընկերության միջոցով և կոռուպցիոն սխեմաներով ավելի քան 80 միլիոն դոլար է յուրացրել պետական բյուջեից։
Կայքը ևս մեկ կեղծիք է տարածել առ այն, որ գործարար Սամվել Ալեքսանյանը «Ատլիքս» ընկերության միջոցով իբր հանցավոր բիզնես է վարում՝ ներառյալ գունավոր մետաղների և զենքերի վաճառքը քրդական խմբավորումներին։ Զավեշտալի է, որ կայքը գործարար Սամվել Ալեքսանյանին ներկայացրել է որպես Հայաստանում իշխող «Քաղաքացիական պայմանագիր» կուսակցության պատգամավոր, սակայն Ալեքսանյանը երբեք «Քաղաքացիական պայմանագիր» խմբակցության պատգամավոր չի եղել։
Կայքում կեղծ տեղեկություններ են հրապարակվել նաև վարչապետի նախկին կնոջ՝ Աննա Հակոբյանի և վերջինիս եղբոր՝ ԱԺ պատգամավոր Հրաչյա Հակոբյանի վերաբերյալ՝ նշելով, թե իբր նրանք պարբերաբար կոռուպցիոն սկանդալների մեջ են հայտնվել, որոնց մասին գրել է թե՛ հայկական, թե՛ արտասահմանյան մամուլը։

Հայաստանի Հանրապետության վարչապետ Նիկոլ Փաշինյանն ընդունել է Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Քևին Համիլթոնին։
Նիկոլ Փաշինյանը շնորհավորել է Համիլթոնին պաշտոնը ստանձնելու առիթով և կարևորել Հայաստան–ՆԱՏՕ համագործակցությունն ու սերտ երկխոսությունը՝ ի նպաստ տարածաշրջանում անվտանգության և կայունության ամրապնդման։
Զրուցակիցները քննարկել են Հայաստան–ՆԱՏՕ գործընկերության օրակարգին վերաբերող մի շարք հարցեր։ Մասնավորապես, անդրադարձ է կատարվել համագործակցության զարգացման հեռանկարներին, ինչպես նաև փոխադարձ հետաքրքրություն ներկայացնող ուղղություններով ծրագրերի արդյունավետ իրականացմանը։
Նիկոլ Փաշինյանը խոսել է Հայաստանի կառավարության կողմից իրականացվող ժողովրդավարական բարեփոխումների ընթացքի մասին և ընդգծել միջազգային գործընկերների հետ հետևողական համագործակցության կարևորությունը՝ ինստիտուցիոնալ կարողությունների զարգացման և երկրի դիմակայունության ամրապնդման տեսանկյունից։
Հանդիպման ընթացքում մտքեր են փոխանակվել նաև տարածաշրջանային անվտանգային միջավայրի, առկա մարտահրավերների, ինչպես նաև խաղաղության և կայունության ապահովմանն ուղղված ջանքերի շուրջ։
Քևին Համիլթոնը նշել է, որ ՆԱՏՕ-ն կարևորում է Հայաստանի հետ գործընկերությունը և պատրաստ է շարունակել համագործակցությունը փոխադարձ հետաքրքրություն ներկայացնող ոլորտներում։

Կոպեկ գողանալուց հասել ենք թվային լուծումների. Ավինյանը տրանսպորտային բարեփոխումների մասին
https://youtu.be/WWzNnZLxVWU?si=KiNoPT3oFShku4Xv

Հայաստանի Հանրապետության փոխվարչապետ Տիգրան Խաչատրյանն ընդունել է Հայաստանում Ֆրանսիայի արտակարգ և լիազոր դեսպան Օլիվիե Դըկոտինյիին:
Ինչպես «Արմենպրես»-ը տեղեկանում է ՀՀ կառավարության տարածած հաղորդագրությունից, փոխվարչապետն առանձնահատուկ ընդգծել է մայիսի 4-ին Եվրոպական քաղաքական համայնքի (ԵՔՀ) գագաթնաժողովին, ինչպես նաև հաջորդ օրը՝ մայիսի 5-ին, Ֆրանսիայի նախագահ Էմանուել Մակրոնի՝ պետական այցի շրջանակներում Հայաստանում գտնվելու կարևորությունը:
Այցին ընդառաջ մանրամասն անդրադարձ է կատարվել երկկողմ հարաբերությունների օրակարգային մի շարք հարցերի, այդ թվում՝ խմելու ջրամատակարարման և ջրահեռացման, Հյուսիս-Հարավ ճանապարհային միջանցքի Սիսիան-Քաջարան ճանապարհահատվածի կառուցման շրջանակներում ֆրանսիական կողմի ներգրավվածության, կրթական համագործակցության, ինչպես նաև ռազմավարական նշանակության այլ ծրագրերի և նախաձեռնությունների վերաբերյալ:
Երկուստեք ընդգծվել է ձևավորված կառուցողական փոխգործակցության կարևորությունը՝ դրա շրջանակներում համաձայնեցման ենթական հարցերի արդյունավետ կարգավորման և երկկողմ հարաբերությունների շարոնակական ընդլայնման նպատակով:

Նորավան-Լծեն-Տաթև ավտոճանապարհը փակ է բոլոր տեսակի տրանսպորտային միջոցների համար։ «Արմենպրես»-ի փոխանցմամբ՝ այս մասին հայտնում են «Ճանապարհային դեպարտամենտ» հիմնադրամից՝ նշելով, որ ճանապարհի փակ լինելու պատճառը քարաթափումն է։
«Նորավան-Լծեն-Տաթև ավտոճանապարհին ապրիլի 21-ին տեղի է ունեցել քարաթափում։ Ավտոճանապարհը փակ է բոլոր տեսակի տրանսպորտային միջոցների համար։ Ճանապարհը սպասարկող ընկերության կողմից կատարվում են մաքրման աշխատանքներ»,– նշված է հիմնադրամի տարածած հաղորդագրության մեջ։

Հայաստանի անվտանգության խորհրդի քարտուղար Արմեն Գրիգորյանն ապրիլի 22-ին Հունաստանի Դելֆի քաղաքում կմասնակցի «Դելֆի տնտեսական ֆորում»-ին:
«Արմենպրես»-ի փոխանցմամբ՝ այս մասին հաղորդագրություն է տարածել ՀՀ անվտանգության խորհուրդը։
Ֆորումի շրջանակում Արմեն Գրիգորյանը Հունաստանի Հանրապետության վարչապետի ազգային անվտանգության հարցերով խորհրդական Թանոս Դոկոսի, Ադրբեջանի Հանրապետության նախագահի օգնական Հիքմեթ Հաջիևի և Մոլդովայի Հանրապետության նախագահի ազգային անվտանգության խորհրդական Ստանիսլավ Սեկրիերուի հետ կմասնակցի «Ռազմավարական բաժանարար գծեր. Հակամարտությունների կառավարում և դիմակայունության ձևավորում Եվրոպայի արևելյան հարևանությամբ» խորագիրը կրող պանելային քննարկմանը:
https://armenpress.am/hy/article/1248001/amp

Ապրիլի 24-ին ընդառաջ. նախապատրաստական աշխատանքները քաղաքապետարանի ուշադրության կենտրոնում են
https://youtu.be/9X51IHnf_vc?si=4_64yOuFQpLWB4xY