Category: Armen Press

Մարտի 31-ից վերագործարկվել են Կապան-Երևան-Կապան ավիաթռիչքները, որոնք ժամանակավորապես դադարեցվել էին՝ պայմանավորված չվերթները սպասարկող միակ օդանավի տեխնիկական սպասարկման աշխատանքների անհրաժեշտությամբ։
Չվերթները սպասարկող NovAir ընկերության ծրագրերի, վերագործարկված Կապան-Երևան-Կապան ավիաթռիչքների, ինչպես նաև Կապանի «Սյունիք» օդանավակայանին միջազգային օդանավակայանի կարգավիճակ տալու թեմաների շուրջ «Արմենպրես»-ը զրուցել է NovAir ընկերության և «Սյունիք» օդանավակայանի տնօրեն Կարեն Վարդանյանի հետ։

Միացյալ Նահանգների նախագահ Դոնալդ Թրամփը ապրիլի 1-ի երեկոյան հանդես է եկել ուղերձով՝ հայտարարելով, որ ԱՄՆ զինված ուժերը գրեթե հասել են իրենց նպատակներին Իրանում
19 րոպե տևող իր ելույթում նա ընդգծել է, որ ավելի քան մեկ ամիս շարունակվող ռազմական գործողությունների արդյունքում ամերիկյան կողմը ոչնչացրել է Իրանի ռազմածովային և ռազմաօդային ուժերը, ինչպես նաև կաթվածահար է արել Թեհրանի բալիստիկ հրթիռային և միջուկային ծրագրերը։
Թրամփը, առանց ժամկետներ նշելու, հայտնել է, որ ԱՄՆ-ն «շատ արագ» կավարտի աշխատանքը։

«Մենք ունենք բոլոր քարտերը, իսկ նրանք՝ չունեն», — ասել է Թրամփը։

Խոսելով Հորմուզի նեղուցի մասին՝ նախագահը հայտարարել է, որ այն կբացվի, երբ պատերազմն ավարտվի։

«Մենք նրանց չափազանց ուժեղ հարվածելու ենք հաջորդ երկու-երեք շաբաթվա ընթացքում։ Մենք նրանց վերադարձնելու ենք քարե դար, որին նրանք պատկանում են», — հայտարարել է ԱՄՆ նախագահը։

Թրամփը չի հիշատակել Իրանի հետ բանակցությունները կամ Հորմուզի նեղուցը բացելու համար ապրիլի 6-ին Իրանին տրված վերջնաժամկետը։

NASA-ն հաջողությամբ իրականացրել է «Արտեմիս-2» մարդատար լուսնային առաքելության մեկնարկը․ Orion տիեզերանավը չորս տիեզերագնացներով ուղևորվել է դեպի Լուսին։

Հայաստանի Հանրապետության նախագահ Վահագն Խաչատուրյանն ընդունել է Եվրամիության դիտորդական առաքելության նորանշանակ ղեկավար Սատու Կոյվուին
Այս մասին հայտնում են ՀՀ նախագահի աշխատակազմից։
Նախագահը շնորհավորել է տիկին Կոյվուին պատասխանատու պաշտոնը ստանձնելու կապակցությամբ և մաղթել արդյունավետ աշխատանք՝ ընդգծելով, որ առաքելության գործունեությունը կարևոր նշանակություն ունի Հայաստանի սահմանամերձ շրջաններում կայունության և անվտանգության ապահովման գործում։
Նա նշել է, որ վերջին չորս տարիների ընթացքում իրականացված աշխատանքը զգալի ներդրում է ունեցել լարվածության նվազեցման և խաղաղ միջավայրի ձևավորման ուղղությամբ։ Նախագահը նաև պատրաստակամություն է հայտնել իր աջակցությունը ցուցաբերել առաքելությանը՝ դրա արդյունավետ գործունեությունն ապահովելու նպատակով։
Սատու Կոյվուն շնորհակալություն է հայտնել ընդունելության և վստահության համար՝ նշելով, որ մեծ պատիվ է ստանձնել այս առաքելության ղեկավարումը նման կարևոր ժամանակահատվածում։ Նա ընդգծել է, որ շարունակելու է գործադրել բոլոր ջանքերը՝ առաքելության արդյունավետությունն ապահովելու և տարածաշրջանում խաղաղության ամրապնդմանը նպաստելու համար։
Նշվում է, որ հանդիպման ընթացքում կողմերը կարևորել են Եվրամիության դիտորդական առաքելության դերը Հայաստանի համար բարդ ժամանակաշրջանում՝ տարածաշրջանում խաղաղության հաստատման ուղղությամբ իրականացվող քայլերի համատեքստում։
Նշվել է նաև, որ առաքելության գործունեությունը կարևոր է Հայաստանի քաղաքացիների համար, որոնք բարձր են գնահատում դրա դերը սահմանամերձ բնակավայրերում անվտանգության և կայունության ապահովման գործում։
Հաղորդվում է, որ կողմերը կարևորել են նաև արդեն ընթացող խաղաղության գործընթացը հաջողությամբ ավարտին հասցնելու անհրաժեշտությունը։

Հայաստանի Հանրապետության ազգային ժողովի արտաքին հարաբերությունների մշտական հանձնաժողովի նախագահ Սարգիս Խանդանյանը Երևանում Եվրոպական քաղաքական համայնքի գագաթնաժողովի և Հայաստան-ԵՄ գագաթնաժողովի անցկացումը շատ կարևոր է համարում Հանրապետության հեղինակության բարձրացման համար։
Այս մասին Խանդանյանը նշեց Կովկասի ինստիտուտի կազմակերպած «Գործընկերությունը շարժման մեջ. Հայաստանը, ԵՄ-ն և երկու խորհրդարանների տեսլականը առավել սերտ ինտեգրման շուրջ» խորագրով պանելային քննարկման ժամանակ։

«Սա, ըստ էության, լինելու է ամենաբարձրաստիճան միջազգային համաժողովը, որը տեղի կունենա Հայաստանում։ Այս համաժողովի շրջանակներում կլինեն մի շարք երկրների առաջնորդներ, որոնք Հայաստան են գալու նաև պետական և պաշտոնական այցերի տեսքով։ Երկու միջոցառումներն էլ իսկապես շատ կարևոր են մեր երկրի հեղինակության բարձրացման տեսանկյունից»,-ասաց Սարգիս Խանդանյանը։

ՀՀ վարչապետ Նիկոլ Փաշինյանը հայտարարել է, որ Ռուսաստանի հետ հարաբերությունները խորն են և չեն կարող դրվել հարցականի տակ՝ միաժամանակ նշելով, որ Հայաստանը ներկայում փորձում է համատեղել ԵԱՏՄ և Եվրամիության հետ համագործակցության օրակարգերը։
Ռուսաստանի նախագահ Վլադիմիր Պուտինի հետ հանդիպման ընթացքում Փաշինյանը նշել է, որ երկկողմ հարաբերությունները զարգանում են դինամիկ կերպով։
«Ռուսաստանի Դաշնության հետ մեր հարաբերությունները շատ խորն են և շատ կարևոր են մեզ համար»,- ասել է նա։
Վարչապետի խոսքով՝ տարածաշրջանում նոր իրողությունների պայմաններում, երբ Հայաստանի և Ադրբեջանի միջև հաստատվել է խաղաղություն, այդ գործընթացը դրական ազդեցություն է ունենում նաև հայ-ռուսական հարաբերությունների վրա։
Փաշինյանը նաև ընդգծել է տնտեսական համագործակցության կարևորությունը՝ նշելով, որ Հայաստանի անկախությունից ի վեր առաջին անգամ գործում է երկաթուղային կապ Ռուսաստանի հետ՝ Ադրբեջանի տարածքով։

«Մենք ներմուծումներ ենք իրականացնում Ռուսաստանից, և հուսով եմ՝ մոտ ապագայում նաև կարտահանենք»,- ասել է նա։

Ռուսաստանի նախագահ Վլադիմիր Պուտինը հայտարարել է, որ Ռուսաստանի և Հայաստանի տնտեսական հարաբերությունները զարգանում են լավ տեմպերով՝ ընդգծելով նաև, որ Հայաստանի արտահանումը ԵԱՏՄ երկրներ վերջին տարիներին աճել է շուրջ 10 անգամ։
Պուտինը այս մասին ասել է Կրեմլում ՀՀ վարչապետ Նիկոլ Փաշինյանի հետ հանդիպման ընթացքում։

«Ինչ վերաբերում է տնտեսությանը, ապա այն զարգանում է լավ տեմպերով»,- նշել է Ռուսաստանի նախագահը հայ-ռուսական բանակցությունների ժամանակ։

Նրա խոսքով՝ երկկողմ ապրանքաշրջանառությունը 2024 թվականին կազմել է շուրջ 11 միլիարդ դոլար, իսկ 2025 թվականին՝ 6,4 միլիարդ դոլար։
Պուտինը նաև անդրադարձել է Հայաստանի տնտեսական ցուցանիշներին ԵԱՏՄ շրջանակում։

«Հայաստանից դեպի ԵԱՏՄ երկրներ արտահանումը վերջին տարիներին տասն անգամ աճել է»,- ասել է նա։

Ռուսաստանի նախագահ Վլադիմիր Պուտինը հայտարարել է, Մոսկվան հանգիստ է վերաբերվում Երևանի՝ Եվրամիության հետ հարաբերությունների զարգացման գործընթացին:
ՀՀ վարչապետ Նիկոլ Փաշինյանի հետ հանդիպման ընթացքում Պուտինը նշել է, որ Մոսկվան հանգիստ է վերաբերվում Երևանի՝ Եվրամիության հետ հարաբերությունների զարգացման գործընթացին։
«Մենք տեսնում ենք, որ Հայաստանում քննարկում է ընթանում Եվրամիության հետ հարաբերությունների զարգացման վերաբերյալ։ Մենք դրան միանգամայն հանգիստ ենք վերաբերվում։ Մենք հասկանում ենք, որ ցանկացած երկիր առավելագույն օգուտներ է փնտրում երրորդ երկրների հետ համագործակցությունից»,- ասել է նա։
Միևնույն ժամանակ Պուտինն ընդգծել է, որ նման գործընթացները պետք է լինեն հստակ և կանխատեսելի։
Նրա խոսքով՝ Եվրասիական տնտեսական միության և Եվրամիության մաքսային համակարգերում միաժամանակ գտնվելը հնարավոր չէ։

«Եվրամիության և ԵԱՏՄ-ի հետ մաքսային միությունում գտնվելն անհնար է։ Դա պարզապես հնարավոր չէ ըստ սահմանման։ Եվ հարցը նույնիսկ քաղաքականության մեջ չէ, այլ զուտ տնտեսական բնույթի հարց է»,- ընդգծել է Պուտինը։

🔴 Փաշինյան-Պուտին հանդիպումը Մոսկվայում․ ՈւՂԻՂ
https://www.youtube.com/watch?v=1np7dmvuZrc

Հայաստանի երկաթուղու կոնցեսիոն կառավարումը Ղազախստանին փոխանցելու շուրջ Ռուսաստանը բանակցություններ չի վարում։
Այս մասին ապրիլի 1-ին կայացած ճեպազրույցի ժամանակ ասել է ՌԴ ԱԳՆ պաշտոնական ներկայացուցիչ Մարիա Զախարովան՝ հիշեցնելով, որ ավելի վաղ` մարտի 30-ին, ՌԴ տրանսպորտի նախարար Անդրեյ Նիկիտինը ևս հայտարարել էր այդ մասին։
Զախարովան նշել է, որ 2008 թվականին կնքված կոնցեսիոն համաձայնագրի վավերականության ժամկետը 30 տարի է և ունի ևս 10 տարով երկարաձգելու հնարավորություն։