Category: Armen Press

ԱՄՆ նախագահ Դոնալդ Թրամփը հայտարարել է, որ Վաշինգտոնը հասել է Իրանի հետ հակամարտության գրեթե բոլոր նպատակներին։ Այս մասին նա ասել է CNBC-ի հետ հարցազրույցում։

«Կարծում եմ՝ նրանք համաձայնել են գրեթե ամեն բանի հետ, ինչ մեզ անհրաժեշտ է», — ասել է Թրամփը։

Ըստ Թրամփի՝ մոտավորապես չորս ամիս տևող հակամարտությունը համեմատաբար կարճ ժամանակահատված է, և ամերիկյան ուժերը ոչնչացրել են Իրանի ռազմական ներուժը՝ նավատորմը, օդուժը, ռադարային համակարգերը և ղեկավարներին։

«Եվ ի՞նչի եմ ես հասել։ Ես նրանց ռազմական առումով հաղթել եմ», — հայտարարել է ԱՄՆ ղեկավարը։

Նա հավելել է, որ Թեհրանի հետ բանակցությունները շարունակվում են, և ռազմական հակամարտությունը հանգեցրել է Իսլամական Հանրապետության միջուկային զենքի հարցի լուծմանը։
Թրամփը նաև նշել է, որ նավթի գինը հիմա նույնիսկ ավելի ցածր է, քան մինչև փետրվարի 28-ին Իրանի դեմ ռազմական գործողությունների մեկնարկը։

⚽️🌍 Մունդիալ-2026 | 1/16 եզրափակիչ (Round of 32)
🇵🇹 Պորտուգալիան դրամատիկ պայքարում 2:1 հաշվով հաղթեց 🇭🇷 Խորվաթիային և նվաճեց 1/8 եզրափակչի (Round of 16) ուղեգիր։ Իվան Պերիշիչի գոլին պորտուգալացիները պատասխանեցին Կրիշտիանու Ռոնալդուի՝ VAR-ի միջամտությունից հետո նշանակված 11-մետրանոցով և փոխարինման դուրս եկած Գոնսալու Ռամուշի՝ 90+4-րդ րոպեին խփած հաղթական գոլով։ Հանդիպման վերջնամասում Խորվաթիայի գոլը չեղարկվեց VAR-ի միջամտությունից հետո։
🇪🇸 Իսպանիան վստահ հաղթեց 🇦🇹 Ավստրիային՝ 3:0 հաշվով և դուրս եկավ 1/8 եզրափակիչ (Round of 16)։ Դուբլի հեղինակ դարձավ Միկել Օյարսաբալը, ևս մեկ գոլ խփեց Պեդրո Պորոն։ Իսպանացիները ամբողջ հանդիպման ընթացքում վերահսկում էին խաղի ընթացքն ու լիովին արժանի հաղթանակ տարան։

Վարչապետ Նիկոլ Փաշինյանն աշխատանքային այցով մեկնել է Իրանի Իսլամական Հանրապետություն:
Վարչապետն այսօր Թեհրանում կմասնակցի ԻԻՀ հանգուցյալ գերագույն առաջնորդ Ալի Խամենեիի հրաժեշտի պաշտոնական արարողությանը:
 

Ազգային ժողովի գործող նախագահ Ալեն Սիմոնյանի հետագա գործունեության հարցը նոր իրավիճակ է, և այն դեռ պետք է քննարկվի
Այս մասին ասաց ՀՀ վարչապետ Նիկոլ Փաշինյանը լրագրողների հետ ճեպազրույցում։
Լրագրողը հետաքրքրվեց, թե արդյոք վարչապետը պատկերացում ունի՝ ինչով կարող է զբաղվել Ալեն Սիմոնյանը, եթե վերջինս վայր դնի պատգամավորական մանդատը։
Փաշինյանը նշեց, որ նախապես չի պլանավորել նման զարգացում։

«Բնականաբար, ես նախապես չեմ պլանավորել, որ պարոն Սիմոնյանը չի լինելու Ազգային ժողովի նախագահ կամ չի լինելու Ազգային ժողովի պատգամավոր։ Դա նոր իրավիճակ է, կքննարկենք, կհասկանանք»,- ասաց վարչապետը։

Հարցին՝ արդյոք Ալեն Սիմոնյանին որևէ առաջարկ ունի, Փաշինյանը պատասխանեց, որ եթե հիմա պատրաստի առաջարկ ունենար, կնշանակեր՝ նախապես պլանավորել է այդ իրավիճակը։

«Ես այդ իրադրությանը պատրաստված չեմ եղել։ Եթե ես հիմա առաջարկ ունենայի, կնշանակեր, որ ես ի սկզբանե պատրաստվել եմ, պլանավորել եմ, դասավորել եմ։ Ես ոչ մի բան չէի մտածում»,- նշեց վարչապետը։

Փաշինյանի խոսքով՝ ստեղծված իրավիճակն իր համար նոր է, և ինքը դեռ պետք է ձևավորի իր դիրքորոշումը։

«Քաղաքացիական պայմանագիր» խմբակցության ղեկավարի թեկնածու է ընտրվել Արուսյակ Մանավազյանը։
Այս մասին ՔՊ խմբակցության նիստից հետո լրագրողների հետ ճեպազրույցում հայտարարեց ՀՀ վարչապետ Նիկոլ Փաշինյանը։

«Հարգելի լրագրողներ, քննարկման և փակ գաղտնի քվեարկության արդյունքում «Քաղաքացիական պայմանագիր» խմբակցության ղեկավարի թեկնածու ընտրվեց Արուսյակ Մանավազյանը»,- ասաց Փաշինյանը։

Հայաստանի տարածքում՝ Իջևան քաղաքից 14 կմ հյուսիս, 2.4 մագնիտուդ ուժգնությամբ երկրաշարժ է գրանցվել։
«Արմենպրես»-ի հաղորդմամբ՝ այս մասին հայտնում են ՀՀ ՆԳՆ Սեյսմիկ պաշտպանության տարածքային ծառայությունից։
Երկրաշարժը գրանցվել է հուլիսի 2-ին՝ տեղական ժամանակով ժամը 19։05-ին, Գրինվիչի ժամանակով՝ ժամը 15։05-ին։
Ստորգետնյա ցնցման աշխարհագրական կոորդինատներն են հյուսիսային լայնության 41.00⁰ և արևելյան երկայնության 45.16⁰։ Օջախը գտնվել է 10 կմ խորության վրա։
Էպիկենտրոնային գոտում ստորգետնյա ցնցման ուժգնությունը կազմել է 3 բալ։
Երկրաշարժը զգացվել է Տավուշի մարզի Իջևան քաղաքում, Աչաջուր, Խաշթառակ և Սևքար գյուղերում՝ 2-3 բալ ուժգնությամբ։

❗️Հակակոռուպցիոն դատարանը ՊԵԿ նախկին նախագահ Գագիկ Խաչատրյանի որդու՝ Արտյոմ Խաչատրյանի, և եղբորորդու՝ Արամ Խաչատրյանի նկատմամբ որպես խափանման միջոց է կիրառել կալանքը։ «Արմենպրես»-ի հետ զրույցում այս մասին հայտնեցին Գլխավոր դատախազությունից։

«Հակակոռուպցիոն դատարանում Արտյոմ և Արամ Խաչատրյանների վերաբերյալ քննվող քրեական գործով դատարանը 2026 թվականի հուլիսի 2-ին բավարարել է դատախազի կողմից ներկայացված միջնորդությունները և վերջիններիս նկատմամբ որպես խափանման միջոց է կիրառել կալանքը, իսկ նրանց նկատմամբ կիրառված 200 մլն ՀՀ դրամ գրավը կդառնա պետության եկամուտ»,- ասացին դատախազությունից։

Ազգային ժողովի նախագահ Ալեն Սիմոնյանը հանդիպել է ՀՀ նախագահ Վահագն Խաչատուրյանի հետ։
Այս մասին Սիմոնյանը գրել է «Ֆեյսբուք»-ի իր էջում։

«Շնորհակալություն հայտնեցի պարոն նախագահին այս ընթացքում ունեցած արդյունավետ համագործակցության համար՝ մաղթելով հետագա արդյունավետ գործունեություն»,- գրել է ԱԺ նախագահը։

ՀՀ վարչապետ Նիկոլ Փաշինյանը հուլիսի 3-ին կմեկնի Իրան՝ մասնակցելու Իրանի գերագույն հոգևոր առաջնորդ Ալի Խամենեիի հուղարկավորության արարողությանը։ «Արմենպրես»-ի հարցին ի պատասխան այս մասին վարչապետը հայտնել է լրագրողների հետ ճեպազրույցում։

«Այո, վաղը մեկնելու եմ և վաղն էլ վերադառնալու եմ։ Բնականաբար, շփումներ Իրանի ղեկավարության հետ նախատեսված են»,- ասաց Փաշինյանը՝ հաստատելով իրական լրատվամիջոցներում տարածված տեղեկությունը։

Հայաստանը սկսել է Գյումրի-Ախուրիկ և Երասխի հատվածներում երկաթուղու վերականգնմանն ուղղված գործընթացները
Այս մասին լրագրողների հետ զրույցում ասաց ՀՀ վարչապետ Նիկոլ Փաշինյանը՝ անդրադառնալով հայկական երկաթուղու կառավարման հետ կապված զարգացումներին։
Լրագրողը հետաքրքրվեց՝ արդյոք ռուսական սահմանափակումների ֆոնին հայկական կողմը կարող է վերանայել Հայկական երկաթուղու կառավարման հարցում իր մոտեցումը։
Փաշինյանը նշեց, որ Հայաստանի դիրքորոշումները չեն փոխվել և չեն փոխվելու։

«Հնարավոր չէ (հայկական կողմը, — խմբ.) վերանայի իր մոտեցումը, բայց մյուս կողմից այն, ինչ մենք հայտարարել ենք, դա էլ չենք պատրաստվում վերանայել»,- ասաց վարչապետը։

Նրա խոսքով՝ Հայաստանը արդեն սկսել է այն գործընթացները, որոնք միտված են Գյումրի-Ախուրիկ հատվածի և Երասխի հատվածում երկաթուղու վերականգնմանը։

«Մենք անելու ենք այդ աշխատանքները։ Ինչ վերաբերում է մնացած հատվածին՝ աշխատանքային քննարկումները շարունակելու ենք, այդ թվում՝ Ռուսաստանի մեր գործընկերների հետ»,- նշեց Փաշինյանը։

Վարչապետը շեշտեց, որ Հայաստանը չի կարող պարզապես դիտորդի դերում լինել այն իրավիճակում, երբ միջազգային երկաթուղային ուղիները կարող են մտնել տարածաշրջան, բայց շրջանցել Հայաստանը։

«Չի կարող այդպիսի բան լինել։ Եկեք արձանագրենք, որ դա Հայաստանի Հանրապետության սեփականությունն է, և մենք մեր սեփականությունը պետք է կառավարենք»,- ասաց Փաշինյանը։

Նա հավելեց, որ մանրամասներ այս փուլում չի կարող հայտնել, քանի որ հարցերը պետք է լուծվեն իրավական խորհրդատվությունների և աշխատանքային քննարկումների արդյունքում։