Category: Armen Press

Միացյալ Թագավորությունում Հայաստանի արտակարգ և լիազոր դեսպան Վարուժան Ներսեսյանը հուլիսի 16-ին հանդիպել է Վերակառուցման և զարգացման եվրոպական բանկի (EBRD) նախագահ Օդիլ Ռենո-Բասոյի հետ։
Այս մասին հաղորդագրություն է տարածել Միացյալ Թագավորությունում ՀՀ դեսպանությունը։
Հանդիպման ընթացքում դեսպան Ներսեսյանը տիկին Ռենո-Բասոյին փոխանցել է ՀՀ կառավարության հրավերը՝ մասնակցելու Երևանում կայանալիք Կենսաբանական բազմազանության մասին կոնվենցիայի Կողմերի համաժողովի 17-րդ նիստին (COP17)։
Զրուցակիցները քննարկել են Հայաստանի և EBRD-ի միջև ձևավորված երկարամյա գործընկերությունը և անդրադարձել առաջնահերթ ոլորտներում համագործակցության ընդլայնման հեռանկարներին։
Կողմերը մտքեր են փոխանակել նաև տարածաշրջանային զարգացումների շուրջ։

Երևանի Տիգրան Պետրոսյան փողոցում շարունակվում են նորոգման աշխատանքները
Երևանի Դավթաշեն վարչական շրջանի Տիգրան Պետրոսյան փողոցում շարունակվում են նորոգման աշխատանքները։
Այս մասին հաղորդագրություն է տարածել Երևանի քաղաքապետարանը՝ քաղաքացիներին հորդորելով հուլիսի 17-ին, ժամը 21։00-ից փողոցում ավտոմեքենաներ չկայանել։  

«Հարգելի քաղաքացիներ, Տիգրան Պետրոսյան փողոցում միջին նորոգման գործընթացը չխոչընդոտելու համար խնդրում ենք հուլիսի 17-ին՝ ժամը 21:00-ից նշված հատվածում ավտոմեքենաներ չկայանել»,- ասված է հաղորդագրության մեջ:

Կայուն զարգացման հարցերով բարձր մակարդակի քաղաքական ֆորումի շրջանակներում Հայաստանի  արտաքին գործերի նախարարի տեղակալ Ռոբերտ Աբիսողոմոնյանը հանդիպել է  ՄԱԿ գլխավոր քարտուղարի՝ խաղաղությանն ուղղված գործողությունների գծով տեղակալ Ժան-Պիեռ Լակրուայի հետ։
Այս մասին հաղորդագրություն է տարածել ՀՀ արտաքին գործերի նախարարությունը։
Հանդիպման ընթացքում քննարկվել են Հայաստանի և ՄԱԿ-ի միջև խաղաղապահության և խաղաղաշինության ոլորտներում համագործակցությանն առնչվող հարցեր։ Այս համատեքստում անդրադարձ է կատարվել ՄԱԿ-ի խաղաղապահ գործողություններին Հայաստանի մասնակցությանը, մտքեր են փոխանակվել միջազգային անվտանգության օրակարգի արդիական հարցերի, այդ թվում` Մերձավոր Արևելքում վերջին զարգացումների և առկա մարտահրավերների վերաբերյալ:
ՀՀ ԱԳ նախարարի տեղակալն իր զրուցակցին ներկայացրել է Հարավային Կովկասում հաստատված խաղաղության ինստիտուցիոնալացմանն ուղղված քայլերը։

ՀՀ — ԵՄ վիզաների ազատականացման երկխոսության շրջանակներում քննարկվել են սահմանների համալիր կառավարման հիմնախնդիրները
Այս մասին հաղորդագրություն է տարածել Հայաստանի ԱԱԾ-ն։
«ՀՀ-ԵՄ վիզաների ազատականացման երկխոսության շրջանակներում սահմանների համալիր կառավարման համակարգի զարգացման ուղղությամբ ընթացող աշխատանքները քննարկելու նպատակով ՀՀ ազգային անվտանգության ծառայությունում  հուլիսի 16-ին տեղի ունեցավ աշխատանքային հանդիպում՝ ՀՀ ազգային անվտանգության ծառայության, Անվտանգության խորհրդի գրասենյակի, Ներքին գործերի, Արտաքին գործերի նախարարությունների, Պետական եկամուտների կոմիտեի ներկայացուցիչների, ինչպես նաև միջազգային փորձագետների մասնակցությամբ»,– հայտնում են կառույցից՝ ընդգծելով, որ սահմանների համալիր կառավարումը ՀՀ-ԵՄ վիզաների ազատականացման երկխոսության շրջանակներում իրականացվող գործողությունների կարևոր ուղղություններից է:    
Հանդիպման ընթացքում մասնակիցներին ներկայացվել է ՀՀ ազգային անվտանգության ծառայության կողմից շրջանառվող «ՀՀ պետական սահմանի համալիր կառավարման համակարգի ռազմավարության և գործողությունների ծրագրի» նախագծի ընթացքի վերաբերյալ հանգամանալից տեղեկատվություն, մասնակիցների կողմից ընդգծվել է նախագծի կարևորությունը և այն հնարավորինս շուտ հաստատելու անհրաժեշտությունը:
Միաժամանակ, միջազգային փորձագետների կողմից ներկայացվել են սահմանների համալիր կառավարման եվրոպական կոնցեպտն ու դրա պարտադիր բաղադրիչները:
Հանդիպման ավարտին ձեռք է բերվել պայմանավորվածություն «ՀՀ պետական սահմանի համալիր կառավարման համակարգի ռազմավարության և գործողությունների ծրագրի» նախագծի լրամշակման շուրջ իրավասու մարմինների հետ աշխատանքները ակտիվացնելու և գործողությունները համաձայնեցնելու վերաբերյալ:

Օսկարակիր կինոռեժիսոր, սցենարիստ, պրոդյուսեր Պավել Պավլիկովսկին համարվում է ժամանակակից եվրոպական կինոյի ամենակայացած հեղինակներից մեկը։ Այս տարի նա հյուրընկալվել է «Ոսկե ծիրան» միջազգային կինոփառատոնին, որի շրջանակում տեղի ունեցավ Պավլիկովսկու «Հայրենիք» ֆիլմի երևանյան պրեմիերան։
«Հայրենիք» կինոնկարի համար ամիսներ առաջ Պավլիկովսկին Կաննի կինոփառատոնում արժանացել է «Լավագույն ռեժիսոր» մրցանակին։
ՄԱՆՐԱՄԱՍՆԵՐ

Մոլդովան պետք է շարունակի ներդրումներ կատարել իր պաշտպանական կարողությունների ամրապնդման գործում և համապատասխանի Եվրամիության քաղաքականությանը, այդ թվում՝ Ուկրաինայի պատերազմի համատեքստում Ռուսաստանի Դաշնության նկատմամբ կիրառված պատժամիջոցներին։
Ինչպես «Արմենպրես»-ը տեղեկանում է Moldpres-ից, այս մասին հայտարարել է Մոլդովայի խորհրդարանի խոսնակ Իգոր Գրոսուն «Մոլդովա 1» հանրային հեռուստաալիքի եթերում՝ Կոպանկա բնակավայրի մոտ անօդաչու թռչող սարքի ընկնելու միջադեպից հետո։
Խոսնակը նշել է, որ միջադեպը տեղի է ունեցել Ռուսաստանի կողմից Ուկրաինայի դեմ սկսված պատերազմի ֆոնին, և որ Մոլդովան, որպես հակամարտության մեջ գտնվող երկրի հարևան պետություն, պետք է պատրաստ լինի նման իրավիճակների։

«Մեր անմիջական հարևանությամբ մենք ունենք լայնածավալ պատերազմ՝ բոլոր այն վայրագություններով, որոնք կարող է բերել պատերազմը։ Սա, հավանաբար, ամենասարսափելի պատերազմներից մեկն է, քանի որ մենք տեսնում ենք, թե որքան են զարգացել տեղեկատվական տեխնոլոգիաները և ինչպես է փոխվել պատերազմի դեմքը։ Դժբախտաբար, այս միջադեպերը կրկնվում են», — ասել է Իգոր Գրոսուն։

Միջադեպերի համար նա մեղադրել է Ռուսաստանին։
Անդրադառնալով Կոպանկա բնակավայրի մոտ հայտնաբերված անօդաչու թռչող սարքին՝ Գրոսուն մանրամասնել է, որ այն վտանգ էր ներկայացնում, քանի որ զինված էր պայթուցիկ նյութերով։

Հայաստանում նախատեսվում է սահմանել արտակարգ իրավիճակներում առաջնորդվելու համար հանրային վայրերում, պետական և մասնավոր կազմակերպությունների շենքերում ու շինություններում տեղադրվող կողմնորոշիչ ցուցանակների միասնական բովանդակությունն ու պահանջները։
Համապատասխան հրամանի նախագիծը հանրային քննարկման է ներկայացրել Հայաստանի ներքին գործերի նախարարությունը։ Այն նախատեսվում է ուժի մեջ մտցնել 2027 թվականի հունվարի 1-ից։

Հայաստանի Հանրապետության անվտանգության խորհրդի քարտուղար Արմեն Գրիգորյանը հուլիսի 16-ին ընդունել է Հայաստանում Եվրոպական միության գործընկերության առաքելության նորանշանակ ղեկավար, դեսպան Կոսմին Ջորջ Դինեսկուին։
Արմեն Գրիգորյանը ողջունել է Հայաստանում ԵՄ նոր քաղաքացիական առաքելության տեղակայումը՝ ընդգծելով հայկական կողմի հանձնառությունը՝ աջակցելու առաքելության մանդատից բխող միջոցառումների արդյունավետ իրականացմանը։
Արմեն Գրիգորյանը կարևորել է նաև առաքելության դերն ու աջակցությունն ապատեղեկատվության, կիբեռհարձակումների և ապօրինի ֆինանսական հոսքերի դեմ պայքարում։
Հանդիպման ընթացքում զրուցակիցները քննարկել են նաև համագործակցության հետագա ուղղություններն ու փոխգործակցության զարգացման հնարավորությունները։

Ի նշանավորումն ARARAT հայկական կոնյակի և «Ոսկե ծիրան» կինոփառատոնի ավելի քան 20-ամյա համագործակցության՝ Երևանի կոնյակի գործարանի ARARAT թանգարանը հյուրընկալեց «Ոսկե ծիրան» միջազգային կինոփառատոնի պատվիրակությանը՝ փառատոնի հիմնադիրներին և միջազգային հյուրերին։
Այցի շրջանակներում հյուրերը ծանոթացան ARARAT հայկական կոնյակի արժեքահեն պատմությանը, վարպետության ավանդույթներին, ինչպես նաև անդրադարձան բազմամյա համագործակցության հիշարժան դրվագներին։
ARARAT-ի և «Ոսկե ծիրան»-ի համագործակցության այս տարվա դրվագը դարձավ ARARAT թանգարանում հատուկ տակառի հիմնադրումը։ Այն խորհրդանշում է ավելի քան երկու տասնամյակ համատեղ ստեղծված մշակութային ժառանգությունը, գործընկերության ամրությունն ու այն արժեքները, որոնք տարիներ շարունակ միավորել են երկու խորհրդանշական հայկական բրենդներին։  
Այցը շարունակվեց ARARAT թանգարանի գանձարանում, որտեղ հյուրերին ներկայացվեց ARARAT հայկական կոնյակի տարեգիրը՝ 1902 թվականի նմուշներից մինչ մեր օրեր։
ՄԱՆՐԱՄԱՍՆԵՐ

Եվրոպայի խորհրդի Կոռուպցիայի դեմ պայքարի պետությունների խումբը՝ ԳՐԵԿՈ-ն, հրապարակել է Հայաստանի վերաբերյալ գնահատման հինգերորդ փուլի համապատասխանության զեկույցը, որի համաձայն՝ Հայաստանը բավարար է կատարել ներկայացված 22 հանձնարարականներից վեցը։
Մնացած հանձնարարականներից 15-ը կատարվել են մասամբ, իսկ մեկը՝ չի կատարվել։ Զեկույցն ընդունվել է հունիսի 8-12-ը Ստրասբուրգում կայացած ԳՐԵԿՈ-ի 103-րդ լիագումար նիստում և հրապարակվել հուլիսի 16-ին։
Բավարար կատարված են համարվել հասարակական հիմունքներով գործող խորհրդականների իրավական կարգավիճակին, ոստիկանության հաղորդակցությանն ու թափանցիկությանը, հակակոռուպցիոն աշխատանքային ծրագրին, ոստիկանների վարքագծի կանոնագրքին և վերապատրաստմանը, ինչպես նաև ոստիկանների կողմից թույլ տրված լուրջ հակաիրավական գործողությունների անկախ քննությանը վերաբերող հանձնարարականները։
ԳՐԵԿՈ-ն բարձրագույն գործադիր մարմինների մասով ողջունել է Հայաստանի ձեռնարկած քայլերը՝ պաշտոնատար անձանց վարքագծի կարգավորման, արարողակարգային ծախսերին վերաբերող գնումների թափանցիկության, քաղաքացիական հասարակության մասնակցության, լոբբինգի, շահերի բախման կանխարգելման և Կոռուպցիայի կանխարգելման հանձնաժողովի ռեսուրսների ավելացման ուղղությամբ։
«Ընդհանուր առմամբ, թեև գրեթե բոլոր հանձնարարականների լիարժեք կատարման համար անհրաժեշտ է լրացուցիչ աշխատանք, այնուամենայնիվ, ԳՐԵԿՈ-ն խրախուսում է Հայաստանին շարունակել ջանքեր գործադրել և վստահ է, որ նախատեսված միջոցառումների իրականացումը կամրապնդի դրա հակակոռուպցիոն շրջանակը»,- նշված է զեկույցում։
Իրավապահ մարմինների առնչությամբ ԳՐԵԿՈ-ն արձանագրել է նշանակալի առաջընթաց՝ հատկապես ոստիկանության գործունեության թափանցիկության, հաղորդակցության, հակակոռուպցիոն ծրագրերի, ծառայողների վերապատրաստման և ոստիկանների իրավախախտումների քննության ոլորտներում։
Միաժամանակ արձանագրվել է, որ ոստիկանությունում կանանց ներկայացվածությունը, այդ թվում՝ ղեկավար պաշտոններում, շարունակում է մնալ ցածր։ 2025 թվականին ոստիկանության ղեկավար պաշտոններում կանանց մասնաբաժինը կազմել է 5,8 տոկոս, իսկ ոստիկանությունում ընդհանուր առմամբ՝ 8,7 տոկոս։
ՄԱՆՐԱՄԱՍՆԵՐ