Category: Hraparak.am

Մեր տեղեկություններով, մոտ 40 անձի մուտք է արգելված Ռուսաստան, սակայն ցանկը գաղտնի է պահվում: Իսկ փորձագետները տրամաբանական հարցադրում են անում` եթե ռուսաֆոբիա տարածող իշխանության բարձրաստիճան ներկայացուցիչների մուտքը չի արգելվում Ռուսաստան, ապա ինչ սկզբունքով է արգելվում գործարարների մուտքը, որոնք գոնե նման հայտարարություններ չեն անում եւ հակառուսական քարոզչություն չեն իրականացնում:

Մեր տեղեկություններով, արդարադատության նախարարի նոր թեկնածուներ են ի հայտ եկել, որոնք ավելի մեծ շանսեր ունեն հավանության արժանանալու։
Ինչպես արդեն գրել էինք՝ մի թեկնածուն ՆԳՆ փոխնախարար Արփինե Սարգսյանն է, որն ընդունելի կլինի նաեւ արեւմուտքում, սորոսական շրջանակների կողմից։
Երկրորդ թեկնածուն Եղիշե Կիրակոսյանն է՝ միջազգային կառույցներում ՀՀ ներկայացուցիչը, ում թեկնածությունը քննարկվում էր նաեւ Գրիգոր Մինասյանին նշանակելու օրերին։ Իրավական շրջանակները նրան լավ իրավաբան են համարում եւ նա շատ ջանասիրաբար աշխատում է միջազգային կառույցներում ի շահ Հայաստանի, սակայն վերջին շրջանում նրա եւ երկրի քաղաքական իշխանության մոտեցումների մեջ լուրջ հակասություններ են առաջացել եւ նա անգամ մտադիր էր հրաժարական տալ, սակայն իշխանությունը համոզեց եւ նրան հետ վերադարձրեց։
Կա նաեւ երրորդ թեկնածուն՝ ԲԴԽ նախկին նախագահ, նախկին զինդատախազ Գագիկ Ջհանգիրյանը, ում թեկնածությունը, մեր տեղեկություններով, առաջադրել է Հակակոռուպցիոն Կոմիտեի նախագահ Սասուն Խաչատրյանը։
Կա եւս մեկ թեկնածու՝ ՀՀ գլխավոր դատախազի տեղակալ Սրբուհի Գալյանը։

Նոյեմբերի 1-ից Երեւանի քաղաքային տրանսպորտով երթեւեկելու համար մարդիկ պարտադիր պետք է 100 դրամանոց ունենան իրենց մոտ կամ QR կոդով վճարելու հնարավորություն: Եվ այս խնդիրը շատերին է անհանգստացնում: Մարդիկ վերջին օրերին 100 դրամանոցների որսով են զբաղված խանութներից, բանկերից, կրպակներից ուղղակի սրբում են 100 դրամանոց մետաղադրամները: Անգամ իրար հետ մրցում են ես կես կիլո ճարել եմ, ես 40 հատ ունեմ:
Մարզերում ապրող իրենց ընկեր-բարեկամներին եթե առաջ խնդրում էին ընկույզ, մեղր, աշնան դեղձ բերել իրենց, հիմա խնդրում են 100 դրամանոցներ հավաքել եւ քաղաք գալիս բերել: Բայց առաջիկայում ուրիշ խնդիրներ էլ են առաջանալու: Օրինակ «Թել-սելի» վճարային ապարատն ու 100 դրամանոցի ապարատն ավտոբուսի նույն հատվածում չեն: Այսինքն՝ ավտոբուս բարձրանալիս կուտակումներ են առաջանալու, եւ իրար խանգարելու են QR կոդով ու 100 դրամանոցով բարձրացողները:

Հոկտեմբերի 24-ին Ալիեւ-Փաշինյան կազանյան բանակցություններին մասնակցել են նաեւ 2 երկրի ԱԳ նախարարները։ Հանդիպման ընթացքում խոսք է գնացել գերիների շուրջ։ Երբ Արարատ Միրզոյանն Ալիեւին առաջարկել է COP-29-ին իրենց մասնակցելու դիմաց գերեվարված զինծառայողներից գոնե մի քանիսին վերադարձնել եւ երաշխավորել է, որ այդ դեպքում անձամբ կգնա Բաքու՝ մասնակցելու միջոցառմանը, Ալիեւը հարցին պատասխանելու փոխարեն Փաշինյանին է հարց տվել.
«Իսկ ինչո՞ւ Ռուբեն Վարդանյանին չեք պահանջում»: «Որովհետեւ գիտեմ, որ չեք տալու»,- պատասխանել է Փաշինյանը։
Ալիեւը շարունակել է․ «Փոխարենը՝ այլ երկրից են պահանջում, Պուտինն է պահանջում նրան»։
Ի դեպ, Արարատ Միրզոյանն այս զրույցի մասին պատմել է ՔՊ-ական պատգամավորներին` ուրբաթ երեկոյան տեղի ունեցած փակ հանդիպման ժամանակ։

Գրել էինք, որ այսօր երեկոյան Նիկոլ Փաշինյանը կայցելի Ազգային ժողով, ՔՊ խմբակցության հետ փակ հանդիպում էր նախատեսված։ Տեղեկացանք, որ այն չի կայացել, մեր աղբյուրի փոխանցմամբ՝պատճառը բյուջետային քննարկումն է եղել, որը ձգվել է մինչ երեկո: 18:50 պատգամավորներին տեղեկացրել են,որ հանդիպումը հետաձգվում է, ամենայն հավանակնությամբ վաղը կլինի։

Ռուսթավելի պողոտան՝ այս պահին։

Վրաստանի խորհրդարանի դիմաց սկսվել է երկրի նախագահ Սալոմե Զուրաբիշվիլիի կազմակերպած՝ խորհրդարանական ընտրությունների արդյունքների դեմ ցույցը։
Հրապարակում մարդկանց ձեռքում են Վրաստանի և ԵՄ դրոշները, ինչպես նաև պաստառներ։ Հավաքվածները շարժվել են դեպի Ռուսթավելի պողոտա՝ արգելափակելով դրա երկայնքով մեքենաների շարժը։
Մինչև այդ, Վրաստանի ՆԳՆ ղեկավարությունը հատուկ ջոկատայիններ է մտցրել երկրի մայրաքաղաքի խորհրդարանի շենք, որտեղ պետք է տեղի ունենա խորհրդարանական ընտրությունների արդյունքների դեմ հանրահավաքը, հայտնում է ՏԱՍՍ-ը։
Բացի այդ, Օրենսդիր շենքի մոտ ևս տեղակայվել են իրավապահներ։ Խորհրդարանից ոչ հեռու գտնվող
Կառավարության շենքի բակում նկատել են նաև հատուկ նշանակության ջոկատի աշխատակիցներ։ Ներս են մտել նաև մգեցված ապակիներով մի քանի միկրոավտոբուսներ։

ԿԸՀ-ն հաղորդում է.
«Հարգելի՛ գործընկերներ, ի պատասխան թիվ 31 Ընտրատարածքային ընտրական հանձնաժողով ուղղված ձեր բազմաթիվ հեռախոսազանգերի, տեղեկացնում ենք, որ Գյումրին ընդգրկող թիվ 31 ԸԸՀ-ն այսօր ստացել է ավագանու 14 անդամի, այդ թվում՝ համայնքի ղեկավարի, պարտականությունների վաղաժամ դադարեցման արձանագրություններ: Թափուր մանդատների հարցին թիվ 31 ԸԸՀ-ն կանդրադառնա նոյեմբերի 1-ին 18:00-ին հրավիրված նիստին»: