Category: Hraparak.am

Երեկ դեսպանների հերթական ռոտացիան տեղի ունեցավ. Իտալիայում ՀՀ դեսպան Ծովինար Համբարձումյանը հետ կանչվեց Իտալիայից եւ գործուղվեց Եվրոպայի ամենահետամնաց երկրներից մեկը` Բուլղարիա: Նրա փոխարեն նշանակվեց Փաշինյանի «լյուբիմչիկ» Վլադիմիր Կարապետյանը։ Դիվանագիտական շրջանակներում չարախնդում են, որ «Ծովինարին չփրկեցին անգամ այս իշխանություններին մատուցած ծառայությունները»:
Սերժ Սարգսյանի ժամանակ նախագահականում աշխատած, կրթությամբ արեւելագետ Համբարձումյանը 2018-ին արագ ճամբարափոխ եղավ` նշանակվելով Փաշինյանի կառավարության արտաքին կապերի վարչության պետ, իսկ 2020-ին՝ Իտալիայում ՀՀ դեսպան: Ասում են՝ նա աջակցել է Վատիկանում ՀՀ նախկին դեսպան, Սերժ Սարգսյանի փեսա Միքայել Մինասյանի հետ կապված քրեական վարույթներին եւ անգամ որդեգրումների գործով է փորձել ամեն ինչ անել, որ «միշիկական» հետքը հաստատվի: Մասնավորապես՝ Ֆլորենցիայում Մինասյանի հյուրանոցի փաստը, մեր տեղեկություններով, նրա օգնությամբ է բացահայտվել: Բայց, ինչպես տեսնում ենք, սա առաջին դեպքը չէ, որ ծառայություններ մատուցած անձանց չեն գնահատում, այլ միայն «օգտագործում» են:

Իսրայելը հարձակում է իրականացրել Իրանի վրա՝ ի պատասխան հոկտեմբերի 1-ին՝ հրեական պետության ուղղությամբ տեղի ունեցած զանգվածային հարվածի։ Այս մասին հայտնում է Axios պորտալը։
«Իսրայելը վաղ առավոտյան հարձակում է իրականացրել Իրանի վրա՝ ի պատասխան հոկտեմբերի 1-ին նրա զանգվածային բալիստիկ հրթիռային հարձակման»,- գրում է Axios-ը՝ վկայակոչելով իր աղբյուրները։
Իրանի պետական ​​հեռուստատեսությունն իր հերթին հայտնել է երկրի մի շարք շրջաններում, այդ թվում՝ Թեհրանում պայթյունների մասին, ընդգծում է պորտալը։

Մեր տեղեկություններով, Պետեկամուտների կոմիտեն վերջերս ստուգումներ է արել աշխատանքի եւ սոցիալական հարցերի նախարար Նարեկ Մկրտչյանի ընտանիքին պատկանող՝ Փարաքարում գտնվող «Լիանա գարդեն հոլ» ռեստորանում։ Պատմեցին, որ չարաշահումներ ու խախտումներ են արձանագրվել, սակայն ՊԵԿ աշխատակիցները ռեստորանը չեն կապարակնքել, թեպետ բավարար հիմքեր ունեցել են։ Տեղեկությունը ճշտեցինք նախարար Նարեկ Մկրտչյանից:
Նա ասաց. «Այո, ռեստորանը պատկանում է իմ հորեղբորը, բայց ես տեղյակ չեմ այդ ստուգումներից։ Եթե նույնիսկ խախտումներ են հայտնաբերել, ապա համապատասխան ընթացք կտան»։ Հարցին՝ իրեն չե՞ն հայտնել, որ հորեղբոր ռեստորանում ստուգումներ են արել, ասաց․ «Իհարկե ոչ, եթե անգամ նման պրակտիկա լինի, ես՝ ինքս, կկանխեմ իմ տեղեկացնելը»:

Ազատ ոճի ըմբշամարտի աշխարհի երիտասարդական առաջնության որակավորման փուլում հայ ըմբիշ Լյովա Գևորգյանի և թուրք Հաքան Բույուգչինգիլիի միջև հենց մրցամարտի ժամանակ ծեծկռտուք է տեղի ունեցել։ Միջադեպից առաջ Գևորգյանը հաղթում էր 1:0 հաշվով։ Երկու ըմբիշներն էլ որակազրկվել են։

Ամիսը մի քանի անգամ լսում ենք, որ Երեւան-Մեղրի ավտոճանապարհին բեռնատար է վթարի ենթարկվել կամ կողաշրջվել, վատագույն դեպքում՝ շրջվել, անգամ առաջացել է պայթյուն եւ այլն։ Ամբողջ խնդիրն այն է, որ Գորիս-Կապան ճանապարհը Ադրբեջանին հանձնելուց հետո գործող` շրջանցող ճանապարհը չի համապատասխանում միջազգային բեռնափոխադրումների ստանդարտներին, այնքան նեղ է, որ մեծ բեռնատարները ոլորաններով անցնելիս շրջվում են, վթարի ենթարկվում:
Այժմ շահագործվող այդ ճանապարհը կառուցվել է ԽՍՀՄ ժամանակներում` որպես միջպետական ճանապարհին այլընտրանքային ճանապարհ եւ չափերով ու որակով խիստ զիջում է միջպետական` Երեւան-Գորիս-Կապան ճանապարհին: 2021-ին Գորիս-Կապան ճանապարհի 21 կիլոմետրանոց հատվածը թշնամու կողմից գրավելուց հետո, շրջանցող ճանապարհը դարձավ հիմնական եւ փոքր ինչ բարեկագրվեց` ասֆալտապատվեց, սակայն այն շատ նեղ է բեռնատարների, տուրիստական մեծ ավտոբուսների երթեւեկության համար։ Վերջին տարիներին ճանապարհի՝ Քաջարանի հատվածը լայնացվեց, սակայն դա․, ինչպես երեւում է, նույնպես իրավիճակը չի փոխել։

Գերմանիայի Ֆրանկֆուրտ քաղաքի օդանավակայանում մեր հայրենակիցները ֆիքսել են Նիկոլ Փաշինյանի կնոջը` Աննա Հակոբյանին, փոքր դստեր՝ Արփիի հետ։ Աննա Հակոբյանի հետ են եղել նաեւ օգնականը եւ անվտանգության աշխատակիցը։
Լուսանկարը «Հրապարակ»-ին ուղարկող անձը պատմեց, որ թեեւ իշխանական ընտանիքը թռել է էկոնոմ դասով, սակայն օդանավից իջնելիս, հատուկ պահպանվող տարածքում, նրանց դիմավորել են բարձր դասի ամենագնաց մեքենայով, որ հանկարծ անձնագրային ծառայությունում շարքային մարդկանց հետ հերթ չկանգնեն։ Սա նոր բան չէ, որ Փաշինյանն ու իր կինը ցուցադրում են իրենց «համեստ» կյանքն ու կենցաղը՝ էկոնոմ դասով մեկնելով, մյուս կողմից` մնացած բոլոր հարցերում VIP ծառայություններից, հատուկ արտոնություններից են օգտվում։ Նշենք նաեւ, որ օդանավը, որը Երեւան-Ֆրանկֆուրտ թռիչքներն է իրականացնում, մեծ հաշվով չունի բիզնես դաս, բիզնես են համարվում օդանավի առաջին շարքերը, որոնք էկոնոմից առանձնանում է ընդամենը վարագույրով։

Ադրբեջանի նախագահ Իլհամ Ալիևը հաստատել է Հայաստանի և Ադրբեջանի միջև սահմանի սահմանազատման հանձնաժողովների գործունեության կանոնակարգը։
Քիչ առաջ էլ հայտնել էինք, որ ՀՀ նախագահ Վահագն Խաչատուրյանը ստորագրել է «ՀՀ և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրբեջանի և ՀՀ միջև պետական սահմանի սահմանազատման պետական հանձնաժողովի համատեղ գործունեության մասին» կանոնակարգը վավերացնելու մասին» օրենքը: