Category: Suren Surenyants

Թուրքիան շատ էֆեկտիվ արտաքին քաղաքականություն է վարում ու դա պետք է խոստովանել: Մի կողմից, Ռուսաստանի հետ ապրանքաշրջանառությունը հասցնում է 100 միլիարդ դոլարի ու Մոսկվային օգնում է շրջանցել արևմտյան պատժամիջոցները, մյուս կողմից՝ Baykar ընկերությունը մտադրվել է Ուկրաինայում կառուցել «Բայրաքթար» տեսակի անօդաչու թռչող սարքերի գործարան:

Թուրքիան ու Ռուսաստանը ստորագրել են տնտեսական համագործակցության «Ճանապարհային քարտեզ», որով մտադիր են ապրանքաշրջանառությունը հասցնել 100 միլիարդ դոլարի: Իսկ մեզանում դեռ կան միամիտ մարդիկ, ովքեր փորձում են Մոսկվային բացատրել ռուսական շահը…

Բլինքենի՝ Երևանի ու Բաքու կատարած նախորդ հեռախոսազանգերից հետո, Ադրբեջանը գնաց էսկալացիայի:
Հետաքրքիր է՝ ի՞նչ արդյունք կունենան պետքարտուղարի երեկվա զանգերը…

Պեսկովը լրագրողների հետ զրույցում չի բացառել, որ այսօր Պուտինն ու Էրդողանը կքննարկեն նաև ԼՂ-ի շուրջ ստեղծված իրավիճակը: Սա բնական է, եթե հաշվի առնենք այն հանգամանքը, որ հետպատերազմյան ստատուս- քվոն, մեծ հաշվով, ռուս- թուրքական համաձայնությունների հետևանք է:

Պատրաստ եղեք ցանկացած սցենարի՝ ժողովրդին ասում է Իշխան Սաղաթելյանը:
Գեղեցիկ է ասված, բայց դատարկ մի կոչ է, եթե խորհրդարանական ընդդիմությունը չի ներկայացնում ԼՂ խնդրի լուծման, հայ- ադրբեջանական դիալոգի իր տեսլականը:

Դրեք մանդատները, եթե գիտակցել եք, որ Փաշինյանի «թթվածինն» ենք…
«Ժողովուրդ» օրաթերթի տեղեկություններով, «Հայաստան» խորհրդարանական ընդդիմադիր խմբակցությունը ստորագրահավաք է սկսել: «Ժողովուրդ» օրաթերթի տեղեկություներով՝ խմբակցության անդամները որոշել են ոչ միայն իրենք իրենց, այլ նաեւ «Հայաստան» դաշինքի բոլոր 153 անդամների ստորագրությունները ստանալ առ այն, որ եթե որոշեն հրաժարվել պատգամավորական մանդատներից, ապա այն բոլորի վրա է տարածվելու:
Այս տեղեկատվությանն առանձնապես չեմ հավատում, այնուամենայնիվ, եթե խորհրդարանական ընդդիմությունը կոնսոլիդացված նման քայլի գնա, ամիսների ընթացքում ԱԺ արտահերթ ընտրությունները կդառնան անխուսափելի(Հայաստանը Հյուսիսային Կորեայի վերածվելու ռեսուրս չունի):
Ինչո՞ւ չեմ հավատում, որ խորհրդարանական ընդդիմությունը նման քայլի կգնա:
«Հայաստան» դաշինքը հատկապես հաստատապես գիտի, որ որևէ պարագայում այլևս չի կարող նման ներկայություն ունենալ ԱԺ-ում:
Այո, մենք օրինաչափություններից դուրս քաղաքական համակարգում ենք ապրում, որտեղ նույնիսկ դիլետանտ ու լուզեր իշխանության պարագայում ավելի ոչ պոպուլյար է խորհրդարանական ընդդիմությունը:
Ռացիոնալ բոլոր մարդիկ հասկացել են, որ Նիկոլ Փաշինյանի իշխանությանը հնարավոր է հեռացնել՝ քաղաքականությունից Ռոբերտ Քոչարյանին հեռացնելուց հետո:
Դե, ուրեմն, դրեք մանդատները, եթե գիտակցել եք, որ Փաշինյանի «թթվածինն» ենք…

Ուկրաինական պատերազմի, այսպես ասած, գաղափարական ազդեցությունն ակնհայտ է Բալկաններում տեղի ունեցող վտանգավոր զարգացումների վրա: Սերբիայի նախագահի կուսակցության թոփ- ֆունկցիոներ Վլադիմիր Ջուկանովիչը Twitter-ում գրել է, թե Սերբիան հարկադրված է «դենացիֆիկացիա սկսել Բալկաններում»: Այս տերմինի օգտագործմամբ սկսվեց ռուսական ներխուժումն Ուկրաինա…

Փաստաբանի փոխանցմամբ՝ Վրաստանի նախկին նախագահ Միխեիլ Սաակաշվիլին հեռանում է քաղաքականությունից: Հարավային Կովկասի ամենահետևողական արևմտամետն անգամ հասկացավ, որ Արևմուտքի աջակցության վրա հույս դնել չի կարելի…

Դաշնակցական պատգամավորը հանրահավաքում ասում է՝ կառավարությունը մեկ անձից գնումներ է անում՝ հարստացնելով իր շրջապատին:
Վերջին մեկ անձից գնումը կառավարությունն արել է Քոչարյանի ընտանիքին պատկանող ընկերությունից:
Փաստորեն, Ռոբերտը Նիկոլ շրջապատից է…