Category: Suren Surenyants

Ռուսաստանի դեսպանատան անհեթեթ հայտարարության դեմ հանդես եկող իշխանամերձ գործիչներին մի հարց տամ` չե՞ն ուզում Փաշինյանից պարզել, թե ինչո՞ւ Հայաստանի սուբեկտությունը նման արագությամբ գահավիժեց…

Երբ նախկին իշխանության հանրապետական ազդեցիկ գործիչը հայերի ու թուրքերի “գենետիկ անհամատեղելիության” թեզն է գեներացնում, հասկանում ես, թե ինչու երկիրը կանգնեց նման աղետի առջեւ…

Մեր ամառանոցի հայկական անկյունը)))

Պետության մոդեռնիզացիայի պահանջ
Վարչապետն անոնսավորում է, թե հաջորդ տարվա հունվարի 1-ից կունենանք աշխատավարձի, թոշակի, նպաստների բարձրացում։
Դա, իհարկե, լավ է, բայց բավարար միջոց չէ տոտալ գնաճի, ԵՏՄ-ում ամենաբարձր գործազրկության համատեքստում։ Կառավարությունը գուցե ի վիճակի չէ սոցիալական աջակցության հասցեական ծրագրեր իրականացնել, բայց ճգնաժամի պայմաններում պարտավոր է կատարել բյուջետային ծախսերի կրճատումներ, մասնավորապես` պետական համակարգում, վարել այնպիսի քաղաքականություն, որի հետեւանքով չտուժի տնտեսության այն սեգմենտը, որը զբաղված է արտահանմամբ։ Առհասարակ` անհրաժեշտ է ձեռնամուխ լինել պետական համակարգի, տնտեսության արմատական բարեփոխումներին, պետության մոդեռնիզացիային, հակառակ պարագայում` աշխատավարձի, կենսաթոշակի աննշան բարձրացումը նմանվելու է գնաճի փոխհատուցման, այն էլ` ուշացումով։

Նոր դատախազ. ի՞նչ սպասել
Աննա Վարդապետյանն ընտրվել է ՀՀ գլխավոր դատախազ։ Իշխանությունների կադրային քաղաքականության մասին, մեղմ ասած, դրական կարծիք չունեմ։
Բայց այս պարագայում երկու հանգամանքի վրա շեշտադրում անեմ.
ա) Նիկոլ Փաշինյանն ուժեղացնում է իշխանության ուղղահայացը, ինչը դրական չեմ համարում, որովհետև անձնիշխանության տխուր հետեւանքներն արդեն տեսել ենք,
բ) դրական է, որ գլխավոր դատախազի պաշտոնն առաջին անգամ կին է զբաղեցնում։ Գուցե այս հանգամանքը փոխի այս կառույցի հանդեպ հանրային բացասական ընկալումը։
Ինչեւէ, կանխակալ կարծիք չհայտնեմ ու հուսամ, որ Աննա Վարդապետյանի ընտրությունը դատախազության խորքային ռեֆորմի ազդակ կլինի։

Փաշինյանի ասուլիսի առաջին երեսուն րոպեն բավականին տխուր տպավորություն է թողնում. վարչապետը կետ առ կետ հիմնավորում է, թե ինչու է տապալվում խաղաղության օրակարգը…

Ռուսաստանի դեֆոլտի մասին զրույցներն առաջիկա օրերին կդառնան Մոսկվայի ու Արեւմուտքի քարոզչական պատերազմի նոր թեմա։ Ռուսաստանը չի կատարել իր պարտավորությունները` դա փաստ է, բայց Մոսկվան պնդում է, թե դեֆոլտ գոյություն չունի, դա Արեւմուտքն է “եփում”, արեւմտյան մամուլը փաստում է իրական դեֆոլտի մասին։

ԱՄՆ Գերագույն դատարանը որոշել է չեղարկել աբորտի իրավունքի մասին օրենքը, ինչը երկրում բողոքի ալիք է հասունացրել: Բայդենը նույնպես ընդդիմացել է դատարանի որոշմանը։ Կասկած չկա, որ աբորտի թեման առանցքայիններից մեկն է դառնալու Կոնգրեսի միջանկյալ ընտրություններում։

Ինչո՞ւ են մարդիկ կրակում
Երեկ երեկոյան կրակոցներ են հնչել Երեւանում, այս անգամ, բարեբախտաբար, զոհերի չկան։ Տպավորություն է, որ ոստիկանությունը չի տիրապետում իրավիճակին ու նրա քթի տակ մարդիկ հարցեր են “լուծում”` իրար վրա կրակելով։
Ոստիկանությունում կադրային լուծումների անհրաժեշտություն կա, գրեթե հաստատուն դիրքորոշում ունեմ, որ ծառայության այսօրվա ղեկավարությունը արդյունավետ կառավարման տեսանկյունից` խնդիրներ ունի։ Այս պարագայում` երբ քաղաքական ղեկավարությունը կադրային լուրջ լուծումների չի գնում, ընդամենը խորացնում է ճգնաժամը` նպաստելով հանրության աչքերում ոստիկանության հեղինակազրկմանը։
Մյուս կողմից, մարդիկ զենքի միջոցով հարցեր են լուծում, երբ տոտալ անվստահություն ունեն արդարադատության հանդեպ։
Վերջին օրերին սկանդալային ձայնագրությունն ապացուցեց, որ Փաշինյանի իշխանությունը տապալել է դատաիրավական բարեփոխումները։
Իշխանությունից պետք է պահանջել` իր նախընտրական խոստումների կատարում, տվյալ դեպքում` 1) ոստիկանության բարեփոխումների ներառականություն, կադրային լուծումներ, նրա գործունեության նկատմամբ հանրային վերահսկողության մեխանիզմների ներդրում, 2) դատական համակարգի արմատական բարեփոխում` քաղաքական նպատակահարմարության բաղադրիչի իսպառ բացառմամբ։