Category: Vardan Voskanyan

Ոչ մի այլ մասնագետ, բացի իրանագետից, չի կարող բացատրել և վերլուծել, թե ինչ արարողություն է այս կադրերում։
Մոտ 95 միլիոն բնակչությամբ, 1 միլիոն 650 հզ. քառակուսի կմ տարածքով և հազարամյակների պատմությամբ ու մշակույթով Իրանի տարբեր հատվածներում կան հանրային սգո տարբեր սովորույթներ։
Այս մեկը կենտրոնական Իրանում տարածված՝ պարսկերենով نخل‌گردانی ]naxl-gardāni] կամ نخل‌برداری [naxl-bardāri], բառացի՝ «արմավենուց պատրաստված պատգարակի պտտել կամ վերցնել», կոչվող հինսվուրց հանրային սգո ծեսն է։
Իրանը խորությամբ հասկանալու համար այս ամենը շատ կարևոր է։
#դարձիր_իրանագետ
🆔 @vardan_voskanyan

Իսրայելում մտցվել է խստագույն ռազմական գրաքննություն, և իրանական հրթիռային հարվածների հետևանքով ռազմական ենթակառուցվածքներին հասցված վնասների վերաբերյալ տեղեկությունն ամբողջովին գաղտնիացված է։
«Ալ-Ջազիրայի» լրագրողը Արևմտյան ափից ռեպորտաժում պնդում է, որ 12-օրյա պատերազմի փորձից ելնելով, գրաքննությունն այնքան խիստ է, որ այս օրերին իրանական հրթիռների՝ իսրայելական ռազմական և ռազմավարական նշանակության օբյեկտներին հասցրած վնասների բնույթի մասին տեղեկությունները հայտնի կդառնան միայն տարիներ անց։
#հարափոփոխ_տարածաշրջանը
🆔 @vardan_voskanyan

Իրանի դեռևս չօգտագործված ռեսուրսներից մեկը գտնվում է Բահրեյնում։
Պարսից ծոցի այս միապետությունն ունի շիայական մեծամասնությամբ բնակչություն (մոտ 70 տոկոս), սակայն իշխանությունը պատկանում է սուննի փոքրամասնությանը։
Հենց այս երկրից էին այն կադրերը، որոնցում տեղի բնակիչները ուրախանում էին այստեղ տեղակայված՝ Պարսից ծոցի տարածաշրջանում ամենամեծ ամերիկյան ռազմակայանին հասցվող իրանական հարվածներից։
Իրանական գրեթե ամենօրյա հարվածները Բահրեյնի տարածքի տարբեր ենթակառուցվածքներին ակնհայտորեն որոշակի ոգևորություն էր առաջացրել տեղի շիաների շրջանում, և հավանաբար կա շիայական հուզումների վտանգ, ինչի պատճառով էլ քիչ առաջ տարածվեց տեղեկատվություն, որ այս պետության իշխանությունները պաշտոնապես արգելում են բոլոր տեսակի փողոցային և հանրային հավաքները։
Ի դեպ, 2011թ., այսպես կոչված, «արաբական գարնանը» Բահրեյնում շիաների շրջանում տեղի ունեցած լայնածավալ հուզումները ճնշվեցին Սաուդյան Արաբիայի և ԱՄԷ-ի անվտանգության ուժերի՝ այս երկիր մուտքից հետո միայն։
#հարափոփոխ_տարածաշրջանը
🆔 @vardan_voskanyan

Քանի որ միջազգային ԶԼՄ-ներում շատ քիչ են ռազմական փորձագետների լուրջ կարծիքները, որոշեցի դիմել ԱԲ-ի օգնությանը։
Արդյունքները խտապատկերով ներկայացված են, բայց կա մի մարտավարական առանձնահատկություն։
Դատելով առկա տեղեկատվությունից, Իրանը նոր-նոր է միայն սկսում կիրառել իր ունեցած տեխնոլոգիապես ավելի առաջադեմ և արդյունավետ խոցման հրթիռները։
Տրամաբանությունը պարզ է՝ ավելի հին հրթիռների միջոցով հնարավորին հյուծել հակառակորդների ՀՕՊ համակարգերի հրթիռային պաշարները և հետո միայն գործի դնել ավելի նորերը։
Երեկ Իսրայելի վրա արձակված հրթիռներից երկուսին այդ երկրի ՀՕՊ-ի չարձագանքելը միջազգային ԶԼՄ-ներում, պատճառաբանվում է նաև նրանով, որ իրանցիները Պարսից ծոցի շրջանում շարքից դուրս էին բերել վաղ նախազգուշացման ամերիկյան մի քանի ռադար, և հրթիռների արձակման մասին ազդանշանն Իսրայելում շատ ուշ են ստացել։
Մյուս կողմից՝ ԱՄՆ-ը, Իսրայելը և Պարսից ծոցի երկրներն օգտագործում են միևնույն «Պատրիոտ» համակարգերը, և դրանց հրթիռների մաշվող պաշարների համալրումը խնդրահարույց է դառնում։
#հարափոփոխ_տարածաշրջանը
🆔 @vardan_voskanyan

Հյուսիսային Իրաքի քրդական ինքնավարության առաջնորդները դիստանցավորվում են քրդական գործոնն Իրանի դեմ օգտագործելու ծրագրից, որովհետև անհանգստացած են ինքնավարության ներսում ավելորդ ռազմաքաղաքական և տնտեսական անկայունության հեռանկարից։
Այն որ այդ ծրագիրը լրջորեն փորձ է կատարվում օգտագործել Իրանի դեմ պատերազմում, ուղղակիորեն փաստվում է նաև ԱՄՆ-ի նախագահ Թրամփի այն անթաքույց հայտարարությամբ, թե ինքը կաջակցի քրդական ուժերին, եթե նրանք ցամաքային գործողություն սկսեն Իրանի դեմ։
Դատելով առկա տեղեկատվությունից՝ երեկ գիշեր և այսօր առավոտյան ամերիկյան և իսրայելական օդային հարվածների մի խոշոր հատված կենտրոնացած է եղել Իրանի Քրդստան նահանգի և դրա կենտրոն Սանանդաջի ուղղությամբ, ինչով փորձ է կատարվում «ճանապարհ հարթել» ցամաքային ներխուժման համար։
Իրանական կողմն իր հերթին հուժկու հարվածներ է հասցրել Իրանից սերող երկու քրդական կուսակցությունների ճամբարներին իրաքյան Քրդստանի տարածքում։
Ըստ այդմ, այն դեպքում, երբ Իրանի հակառակորդները ձգտում են «ճանապարհ» բացել ցամաքային ներխուժման համար, Իրանը փորձում է անել այնպես, որ այդ «ճանապարհից» օգտվողներ չմնան։
#հարափոփոխ_տարածաշրջանը
🆔 @vardan_voskanyan

Տարբեր լրատվամիջոցների արդեն մի քանի ռեպորտաժ կա Իրան-Թուրքիա սահմանային անցակետից, որոնցում լրագրողը խոսում է պատերազմի պայմաններում հայրենիք վերադարձող իրանցիների հետ։
Առնվազն երկու նման ռեպորտաժներում խոսողները թյուրքախոս ատրպատակցիներն են, որոնց այս օրերին էլ մեզանում հաճախ սխալմամբ կոչում են Իրանի «ադրբեջանցիներ» և որոնց նաև երեկվա իր հոխորտալից բարբաջանքում գրեթե ապստամբության կոչ էր անում Բաքվի բարբարոսական վարչախմբի պարագլուխը։
Կատարյան «Ալ-Ջազիրայի» եթերում Թուրքիայից իր հայրենիք՝ Իրան, վերադարձող թավրիզաբնակ ատրպատականցի բժիշկը նշում է, որ գնում է անհրաժեշտության դեպքում կռվելու Իսրայելի դեմ մինչև վերջին շունչը և արյան վերջին կաթիլը։
#հարափոփոխ_տարածաշրջանը
🆔 @vardan_voskanyan

Իրանի դեմ պատերազմի համատեքստում հիմա գրեթե բոլորի ուշադրությունը կենտրոնացած է ռազմական գործողություններին։
Քչերն են ուշադրություն դարձնում, թե Իրանի պետական համակարգի նույնիսկ առաջին դեմքի սպանությունից հետո և ծանր պատերազմական պայմաններում որքան կազմակերպված և ներդաշնակ են աշխատում քաղաքացիական կառուցակարգերը։
Կարծում եմ՝ սա անակնկալ էր նաև Իրանի վրա հարձակվողների համար, որովհետև մինչ այս Իրաքի, Լիբիայի և Սիրիայի պետական համակարգի քանդման «փորձն» Իրանի դեպքում չի աշխատում։
Պատկերավոր ասած, Իրանի և, դիցուք՝ սադդամյան Իրաքի տարբերությունը միայն մեկ տառի մեջ չէ, այլ նաև պետականության այն պատմական խորը ավանդույթում, որը ենթադրում է ոչ թե միայն մեկ անձի շատ ուժեղ իշխանություն և այլևս ոչինչ, այլ նման իշխանության պայմաններում նաև ուժեղ պետական կառուցակարգերի առկայություն, որոնք էլ իրականացնում են պետության պատշաճ կառավարումը նաև խիստ ճգնաժամային պայմաններում։
#հարափոփոխ_տարածաշրջանը
🆔 @vardan_voskanyan

Իրանի արտգործնախարար Արաղչին, ի պատասխան ամերիկյան հեռուստաալիքի լրագրողի այն հարցին, թե արդյոք Իրանում վախենո՞ւմ են ԱՄՆ-ի ցամաքային ներխուժումից, պատասխանում է՝ «Ո՛չ, մենք սպասում ենք նրանց»:
Ակնհայտորեն զարմացած տեսքով և առոգանությամբ լրագրողը հարցնում է՝ թե Իրանում իրոք սպասո՞ւմ են ԱՄՆ-ի ցամաքային զորքերի ներխուժմանը։
Պատասխանն աներեր է՝ «Այո՛, որովհետև մենք վստահ ենք, որ կդիմակայենք նրանց, և դա կլինի մեծ աղետ նրանց համար»։
#հարափոփոխ_տարածաշրջանը
🆔 @vardan_voskanyan

Նախիջևանի օդանավակայանին հասցված իրանական հարվածի վերաբերյալ, անկախ պաշտոնական Թեհրանի սպասվելիք մեկնաբանությունից, որն, ի դեպ, կարող է լինել ժխտողական, իրանական տելեգրամյան որոշ ալիքներով ստեղծվում է պատում (նարատիվ), որ ԱԹՍ-ով հարվածն իրականացվել է նպատակաուղղված։
Ըստ այս պատումի՝ ԱՄՆ-ի և Իսրայելի կողմից փորձ է կատարվել նշված օդանավակայանը օգտագործել Իրանի հյուսիս-արևմուտքի ենթակառուցվածքներին հարվածներ հասցնելու նպատակով։
Այս պահին պարզ է մի բան. չնայած Բաքվի բարբարոսական վարչախմբի մեծից փոքր պաշտոնյաների «զայրութի» և պոռոտախոսության մակարդակին, սա նախնական դաս էր, որն, անկախ ամեն ինչից, արդեն իսկ տրվել է։
#հարափոփոխ_տարածաշրջանը
🆔 @vardan_voskanyan

Այսօր իրանական և քրդական աղբյուրները հերքեցին երեկ երեկոյան ամերիկյան «Fox News»-ի տարածած այն տեղեկությունը, թե իրանական քրդերի զինյալներն Իրաքի տարածքից ցամաքային գործողություն են սկսել Իրանի դեմ։
Մինչ այդ էլ Հյուսիային Իրաքի քրդական ինքնավարության «Rudaw» լրատվական գործակալությունը հայտնել էր, որ ԱՄՆ-ի նախագահ Թրամփը խոսել է «Իրանի Քրդստանի դեմոկրատական կուսակցության» գլխավոր քարտուղար Հիջրիի հետ։
Բրիտանական «BBC»-ի պարսկերենով ծառայության եթերում լրագրողի երկու անգամ հնչեցրած հարցին ի պատասխան, այդ կուսակցության խոսնակը ո՛չ հերքեց, ո՛չ հաստատեց նշված լուրը։
Իրանի վրա հարձակումից օրեր առաջ այս երկրի տարածքից սերող հինգ քրդական վտսրսնդի կուսակցություներ, որոնցից առնվազն երկուսը զինված ջոկատներ և ճամբարներ ունեն Իրաքյան Քրդստանի տարածքում, ստեղծել էին դաշինք, որին օրերս միացավ նման վեցերորդ քրդական կուսակցությունը։
Ոչ մի կասկած չկա, որ գործ ունենք քրդական գործոնը պատերազմի ժամանակ Իրանի դեմ աշխատեցնելու ծրագրի հետ, հարց է սակայն, թե որքանո՞վ այն կաշխատի։
#հարափոփոխ_տարածաշրջանը
🆔 @vardan_voskanyan