Category: Vardan Voskanyan

Իրանի ԱԳՆ խոսնակ Բաղային արաբական լրատվամիջոցներին տված հարցազրույցում հայտարարել է, որ երկրի պաշտպանության հարցում Թեհրանը «կարմիր գծեր» չունի։
Սա նշանակում է սեփական պաշտպանության նպատակով այս երկիրը հարվածներ է հասցնելու ցանկացած թիրախի, որը համարում է վտանգավոր կամ ոչնչացման ենթակա և որին ունի հասանելիություն։
Որքան էլ պարադոքսալ թվա, նման ռազմավարությամբ Իրանը ձգտում է կանգնեցնել իր դեմ ագրեսիան՝ ոչ թե որևէ մեկից խնդրելով, որ կանգնեցնի այն, այլ պատկերավոր ասած, ողջ Մերձավոր Արևելքը վերածելով ճահճի, որի մեջ խրվելու վտանգը կկանգնեցնի իրենից հզոր հակառակորդին։
#հարափոփոխ_տարածաշրջանը
🆔 @vardan_voskanyan

Ոչ մի հաստատված պաշտոնական տեղեկատվություն չկա Իրանի հոգևոր առաջնորդ այաթոլլահ Խամենեիի զոհվելու մասին։
Գրեթե վստահ եմ, որ այդ դեպքում Իսրայելի վարչապետ Նեթանյահուն անձամբ կհայտներ նման լուրը։
Բայց, եթե նույնիսկ դա ճիշտ լինի, ապա խորքային իմաստով շատ ավելի վատ լուր է դառնալու Իրանի հակառակորդների համար, քանի որ կպարզվի, որ իրանական ռազմաքաղաքական համակարգը շատ հստակ աշխատում է նաև այդ երկրի առաջին դեմքի բացակայության պայմաններում։
#հարափոփոխ_տարածաշրջանը
🆔 @vardan_voskanyan

Մոտ չորս ժամ անդադար Իրանը հրթիռներով և անօդաչուներով հարվածներ է հասցնում Իսրայելին և Պարսից ծոցի տարածաշրջանի ամերիկյան ռազմական ենթակառուցվածքներին։
Ամենայն հավանականությամբ, սա նոր իրանական մարտավարություն է, որն այս պահին անակնկալի է բերել պատերազմ սանձազերծած կողմերին, որոնք կարծես միայն պատրաստ էին «հարված-դադար-պատասխան» արդեն ծանոթ սցենարին, մինչդեռ պատասխանը շարունակական է։
Իրանական ԶՈւ-ի ներկայացուցիչները պնդում են, որ այս մարտավարությունը պահպանվելու է առնվազն առաջիկա ժամերին։
Միայն Իրանի ռազմական կարողություններին քաջածանոթ փորձագետները կարող են վերլուծել,, թե ինչպիսին են իրանական հրթիռների և ԱԹՍ-ների պաշարները և դրանց համալրման ռեսուրսը, սակայն փաստն այն է, որ Իրանի պատասխանն առայժմ չի դադարում։
#հարափոփոխ_տարածաշրջանը
🆔 @vardan_voskanyan

Իրանական աղբյուրները հաղորդում են Իսրայելի ուղղությամբ հրթիռային հարձակման նոր ալիքի մասին։
Պարսից ծոցի տարածաշրջանում, բացի Օմանից, մնացյալ բոլոր պետությունների տարածքում ամերիկյան ենթակառուցվածքներն արդեն իսկ թիրախավորվել են։
Ամփոփելով այս պահի դրությամբ առկա տեղեկատվությունը, պարզ է, որ Իրանը դիմացել է հարվածի առաջին ալիքներին և կարողացել պատասխան հարվածներ հասցնել։
Մերձավոր Արևելքի ողջ տարածքն այժմ, ցավալիորեն, պատերազմի փաստացիորեն մեկ գոտի է, ինչը հղի է ծանրագույն հետևանքներով անխտիր բոլոր տարածաշրջանային երկրների համար։
#հարափոփոխ_տարածաշրջանը
🆔 @vardan_voskanyan

Իրանական աղբյուրները հաղորդում են Բահրեյնում, ԱՄԷ-ում, Քուվեյթում և Կատարում ԱՄՆ-ի ռազմակայանների ուղղությամբ հրթիռային հարվածի մասին։
Եթե դեպի Իսրայել արձակվող իրանական հրթիռները միջին հեռահարության են, ապա Պարսից ծոցի շրջանի ամերիկյան ռազմական ենթակառուցվածքները խոցելի են նաև կարճ հեռահարության հրթիռներով, որոնց քանակն անհամեմատ ավելի մեծ է իրանական զինանոցում։
Իսրայելական հեռուստաալիքներից մեկի մեկնաբանը, նշել է, որ իրանցիները, 12-օրյա պատերազմի համեմատությամբ, պատասխան հարվածները շատ օպերատիվ և լավ են հասցնում։
#հարափոփոխ_տարածաշրջանը
🆔 @vardan_voskanyan

ԱՄՆ-ի նախագահ Թրամփի այսօրվա ելույթը նշանակում է մի բան՝ Իրանի դեմ պատերազմի նպատակը ոչ մի այլ բան չի լինելու, քան այդ երկրում իշխանության փոփոխությունը՝ թեկուզ իշխանական համակարգի ներսում ներքին փոխատեղումների միջոցով։
Եթե պարզվի, որ Թեհրանում կառավարական շենքերին հասցված իսրայելական հարվածների հետևանքով Իրանի ռազմաքաղաքական ղեկավարության շրջանում զոհեր չեն եղել, իսկ առայժմ նման հաստատված տեղեկություն չկա, ապա պարզ կդառնա, որ հարձակման առաջին ալիքն իրականում անարդյունավետ է եղել։
Եթե իսրայելական հարվածի նպատակները եղել են՝ ներքաշել ԱՄՆ-ին պատերազմի մեջ, գլխատել Իրանի ռազմաքաղաքական համակարգը՝ դրանում բանալի անձանց սպանությամբ և հրահրել ներքին անկայունություն հենց համակարգում, իսկ դրան զուգահեռ նաև Թեհրանի փողոցներում, ապա առայժմ հաջողվել է դրանցից միայն մեկը՝ ԱՄՆ-ի ներգրավումը։
#հարափոփոխ_տարածաշրջանը
🆔 @vardan_voskanyan

Առայժմ վստահաբար հայտնի է, որ իսրայելական հարվածները թիրախավորել են Թեհրանում մի քանի նախարարությունների շենքերը և այլ ոչ ռազմական նշանակության օբյեկտներ։
Չհաստատված տեղեկություն կա, որ թիրախավորվել են նաև իրանական ՀՕՊ համակարգի հանգույցներ Ղոմի և Քերմանշահի հատվածներում։
Հասցված վնասների մասին հստակ տեղեկատվություն չկա։
Չնայած տարբեր ԶԼՄ-ներում պարբերաբար հաղորդվող լուրերի, ԱՄՆ-ն առայժմ որևէ պաշտոնական հայտարարություն չի արել այս գործողությանն իր մասնակցության մասին։
Իսրայելում արտակարգ իրավիճակ է, և բոլորն անխտիր պատրաստվում են իրանական հրթիռային պատասխան հարվածին։
#հարափոփոխ_տարածաշրջանը
🆔 @vardan_voskanyan

Այս տարվա հունվարի կեսերից ԶԼՄ-ների մակարդակում պարբերաբար քարոզչական գրոհներ են իրականացվում Իրանի դեմ առ այն, թե ուր որ է ԱՄՆ-ը ռազմական հարված կհասցնի այս երկրին։
Հարվածը սակայն արդեն գրեթե երկրորդ ամիսն է տեղի չի ունենում, քանի որ Իրանը դրա հետևանքների գինը թե՛ ԱՄՆ-ի և թե՛ ողջ տարածաշրջանի համար չափազանց շատ է բարձրացրել, ինչի ակնկալիքը, դատելով ԱՄՆ-ի հատուկ ներկայացուցիչ Վիթքոֆի այն խոսքերից, որ նախագահ Թրամփը զարմացած է, թե հսկայական ամերիկյան զինուժի սպառնալիքին դեմ հանդիման Իրանը ինչո՞ւ չի հանձնվում, Վաշինգտոնում չի եղել։
Մերձավոր Արևելքի դառը ճշմարտությունն այն է, որ հանձնվելը հավասարազոր է ոչ միայն պատվազրկման, այլ նաև միգուցե դանդաղ, բայց հաստատապես մահվան, իսկ Իրանում այս ճշմարտությունը գիտակցում են արդեն հազարամյակներ շարունակ։
#հարափոփոխ_տարածաշրջանը
🆔 @vardan_voskanyan

Ակնհայտ է, որ մինչև այս պահն ԱՄՆ-ի նախագահ Թրամփը չունի Իրանի վրա հարձակման որևէ լավ ընտրանք, ինչը նրան հնարավորություն կընձեռեր իրականացնել տպավորիչ և կարճաժամկետ ռազմական գործողություն՝ հայտարարելով հերթական հաղթանակի մասին։
Հռետորաբանությունն այլ բան է, հողի վրա առկա իրականությունն՝ այլ։ Եվ թերևս հենց այս մասին են խոսում նաև պարբերաբար ԶԼՄ-ներ ապրդող այն լուրերը, թե ամերիկյան բարձրաստիճան զինվորականները չափազանց ռիսկային են համարում Իրանի վրա հարձակումը։
Իրանական կոշտ դիրքորոշումը, որի համաձայն՝ ոչ մի ամերիկյան սահմանափակ հարվածի մասին խոսք լինել չի կարող և պետք է լինի խնդրի լուծում՝ կա՛մ դիվանագիտական ճանապարհով, կա՛մ լայնածավալ տարածաշրջանային պատերազմի միջոցով զգալի ռիսկեր է ի հայտ բերում թե՛ ամերիկյան կողմի և թե՛ տարածաշրջանային դերակատարների համար՝ պաշտոնական Վաշինգտոնին ստիպելով երկար ծանրութեթև անել ռազմական ուղով գնալու նպատակահարմարությունն ու արդյունավետությունը։
Թեև ոչ ոք չի կարող վստահաբար պնդել, թե ինչպես կհանգուցալուծվի վտանգավոր այս ճգնաժամը, սակայն պարզ է, որ հնարավոր պատերազմն իրանցիները դիտարկելու են գոյութենական հարց՝ կենաց-մահու կռիվ, և գործելու են հենց նման տրամաբանությամբ։
#հարափոփոխ_տարածաշրջանը
🆔 @vardan_voskanyan

Թե ասա՝ ձեզ ի՞նչ, լկտիաբար ամեն տեղ քթերը խոթում են։
Մեկ էլ «թշնամի» բառն այստեղ հաճոյախոսություն է։
#հավերժականՀայաստանը
🆔 @vardan_voskanyan