Blog

Իրանական արկի ընկնելու հետևանքով հրդեհ է բռնկվել Արաբական Միացյալ Էմիրություններում գտնվող Ավստրալիայի ռազմաբազայում։
Ինչպես հաղորդում է «Արմենպրես»-ը՝ վկայակոչելով Associated Press լրատվական գործակալությունը, այս մասին հայտնել է Ավստրալիայի վարչապետ Էնթոնի Ալբանեզեն։

«Իրանական արկը հարվածել է բազայի մոտակայքում։ Ես կարող եմ հաստատել, որ ավստրալացի անձնակազմի անդամներից ոչ մեկը չի տուժել, և այս պահին բոլորը լիովին անվտանգ են», — լրագրողներին ասել է Ալբանեզեն։

Նա տեղեկացրել է, որ արկի հարվածից փոքր հրդեհ է բռնկվել, ինչից «աննշան վնասվել են բնակելի շենքն ու բժշկական հաստատությունը»։

«Բազա տանող ճանապարհին այդ արկի հարվածի հետևանքով առաջացած փոքր հրդեհի պատճառով բազայի բնակելի և բժշկական հատվածներն աննշան վնասվել են», — հավելել է նա։

Ալբանեզեն չի նշել, թե անձնակազմի քանի անդամ է եղել բազայում այդ պահին կամ արդյոք այնտեղ ներկա են եղել որևէ այլ երկրի քաղաքացիներ։

Իրանն Ատոմային էներգիայի միջազգային գործակալությանը (ԱԷՄԳ) տեղեկացրել է, որ մարտի 17-ի երեկոյան «Բուշեր» ատոմային էլեկտրակայանի տարածքում արկ է ընկել։ Ինչպես հաղորդում է «Արմենպրես»-ը, այս մասին ասվում է գործակալության X-ի էջում արված գրառման մեջ։

«Իրանն ԱԷՄԳ-ին տեղեկացրել է, որ երեքշաբթի երեկոյան «Բուշեր» ԱԷԿ-ի տարածքում արկ է ընկել։ Ատոմակայանի վնասի կամ անձնակազմի անդամների վնասվածքների մասին տեղեկություններ չկան։ Գործակալության տնօրեն Ռաֆայել Գրոսին կրկին կոչ է անում հակամարտության ընթացքում առավելագույն զսպվածություն ցուցաբերել՝ միջուկային վթարի ռիսկը կանխելու համար»,- ասվում է գրառման մեջ։