Category: Armen Press

Երևանում անցկացվելիք Սպորտային հրաձգության Եվրոպայի մեծահասակների առաջնությանն ընդառաջ ասուլիս:
https://youtu.be/mUDRWdxsYWU

Երևանում նախատեսվող «Աջափնյակ» մետրոյի կայարանի հարող տարածքում քաղաքապետ Տիգրան Ավինյանի հանձնարարականով քաղաքաշինական ներդրումային ծրագիր է մշակվել և համապատասխան մրցույթ անցկացվել։
Երևանի քաղաքապետարանի փետրվարի 23-ի գործակարգավարական նիստում այդ մասին զեկուցեց քաղաքապետի խորհրդական Անետա Բաբայանը։

«Նախաորակավորման փուլի ընթացքում դիմել են 7 միջազգային և տեղական ընկերություններ, որոնցից երկուսը որակավորվել են։ Արդեն ուղարկել ենք, որպեսզի առաջարկներն ամբողջական ներկայացնեն, որի վերջնաժամկետը մարտի 3-ն է։ Դրանից հետո արդեն կամփոփենք՝ վերջնական տեխառաջադրանք, բանակցություններ և պայմանագրի կնքում։ Ակնկալում ենք, որ հունիսի կեսերից աշխատանքները կմեկնարկեն»,-ներկայացրեց Բաբայանը։

Նա մանրամասնեց, որ այդ առաջարկների շրջանակում ակնկալվում է հարակից տեղանքում որոշակի լուծումներ՝ ինչպես քաղաքաշինական բովանդակությամբ, այնպես էլ ներդրումային ծրագրի մշակում, որով հնարավոր կլինի ներդրումային փաթեթ ձևավորել։
Երևանի քաղաքապետ Տիգրան Ավինյանը պարզաբանեց, որ հանձնարարականի տրամաբանության համաձայն՝ նախատեսվող «Աջափնյակ» կայարանի հատվածում կիրականացվի բիզնես տրամաբանությամբ ծրագիր, ինչը որոշակիորեն կմեղմի կայարանի կառուցման ծախսերը։

Եվրոպական հանձնաժողովը պահանջել է Վաշինգտոնից «լիակատար հստակություն» մտցնել՝ կապված քայլերի հետ, որն ամերիկյան կողմը մտադիր է ձեռնարկել մաքսատուրքերի վերաբերյալ ԱՄՆ Գերագույն դատարանի որոշումից հետո։ Ինչպես հաղորդում է «Արմենպրես»-ը, այս մասին հայտնում է Reuters-ը։
Գերագույն դատարանի կողմից ԱՄՆ նախագահի սահմանած մաքսատուրքերի անօրինական լինելու մասին որոշումից հետո Թրամփը փետրվարի 20-ին հայտարարել էր համաշխարհային ապրանքների վրա նոր՝ 10% մաքսատուրք սահմանելու մասին՝ հաջորդ օրը դրանք հասցնելով 15%-ի։
«Ներկայիս իրավիճակը չի նպաստում երկու կողմերի միջև համաձայնեցված «արդար, հավասարակշռված և փոխշահավետ» տրանսատլանտյան առևտրի և ներդրումների ապահովմանը», — ասվում է Եվրահանձնաժողովի հայտարարության մեջ։
2025 թվականի առևտրային համաձայնագիրը ԱՄՆ մաքսատուրքի դրույքաչափը սահմանել է 15% ԵՄ ապրանքների մեծ մասի համար, բացառությամբ այն ապրանքների, որոնց վրա գործում են այլ՝ ոլորտային մաքսատուրքեր, ինչպիսին է պողպատը։ Այն նաև նախատեսում էր զրոյական մաքսատուրք որոշ ապրանքների վրա, ինչպիսիք են ինքնաթիռները և դրանց պահեստամասերը: ԵՄ-ն համաձայնվեց վերացնել ԱՄՆ-ի բազմաթիվ ապրանքների ներմուծման մաքսատուրքերը և հրաժարվեց ավելի բարձր մաքսատուրքեր սահմանելու սպառնալիքներից։
«Մասնավորապես, ԵՄ ապրանքները պետք է շարունակեն օգտվել առավել մրցակցային ռեժիմից՝ առանց մաքսատուրքերի բարձրացման, որը գերազանցում է նախկինում համաձայնեցված հստակ և համապարփակ շեմը», — հայտարարել է ԵՄ գործադիր մարմինը՝ հավելելով, որ անկանխատեսելի մաքսատուրքերը կործանարար են և խաթարում են վստահությունը համաշխարհային շուկաներում։
Հայտարարության մեջ նաև նշվում է, որ ԵՄ առևտրի հանձնակատար Մարոշ Շեֆչովիչը փետրվարի 21-ին քննարկել է այս հարցը ԱՄՆ առևտրի ներկայացուցիչ Ջեյմիսոն Գրիրի և առևտրի նախարար Հովարդ Լուտնիկի հետ։

Չեխիայում Հայաստանի դեսպան Աշոտ Հովակիմյանը հանդիպել է Չեխիայի արտաքին գործերի նախարարի տեղակալ Յիրժի Բրոդսկիի հետ
«Արմենպրես»-ի փոխանցմամբ՝ այս մասին հաղորդագրություն է տարածել Չեխիայում ՀՀ դեսպանությունը։
Կողմերը մտքեր են փոխանակել Հայաստանի և Չեխիայի միջև քաղաքական երկխոսության խորացման հեռանկարների շուրջ։ Երկուստեք ընդգծվել է առևտրատնտեսական ոլորտում համագործակցության ընդլայնման պատրաստակամությունը։ Քննարկվել են ընթացիկ տարվա ընթացքում Հայաստանում նախատեսվող բարձրագույն մակարդակի միջազգային միջոցառումներին չեխական կողմի մասնակցությանը վերաբերվող հարցեր:
Դեսպան Հովակիմյանը զրուցակցին է ներկայացրել վաշինգտոնյան համաձայնություններից հետո Հարավային Կովկասում ծավալված գործընթացները, այդ թվում՝ տարածաշրջանային ենթակառուցվածքների ապաշրջափակման համատեքստում վերջին զարգացումները և ՀՀ կառավարության «Խաղաղության խաչմերուկ» ծրագիրը:

Ֆլորիդայում ԱՄՆ նախագահ Դոնալդ Թրամփի Մար-ա-Լագո կալվածքի շրջակայքում անվտանգության ուժերի կողմից հատուկ պահպանության տակ գտնվող տարածք փետրվարի մտած և գաղտնի ծառայության աշխատակիցների կողմից սպանված տղամարդը Հյուսիսային Կարոլինայի բնակիչ, 21-ամյա նկարիչ Օսթին Թաքեր Մարտինն է
Ինչպես հաղորդում է «Արմենպրես»-ը, տղամարդը փետրվարի 22-ին փորձել է Մար-ա-Լագո կալվածքի տարածք։ Որոշ տեղեկությունների համաձայն՝ նա անցել է Թրամփի կալվածքի բաց դարպասներով, երբ մեկ այլ մեքենա դուրս է եկել այնտեղից:
Ֆլորիդայի Փալմ Բիչ շրջանի ոստիկանությունից հայտնել են, որ ներխուժողին «հրամայվել է գցել իր հետ կրած երկու իրերը»՝ բենզինով տարան և հրացանը: «Այդ պահին նա իջեցրել է բենզինի տարան և բարձրացրել որսորդական հրացանը կրակելու դիրքի վրա», — հայտնել են ոստիկանությունից։ Դրանից հետո անվտանգության ծառայության գործակալները կրակել են՝ սպառնալիքը չեզոքացնելու նպատակով: Օսթին Թաքեր Մարտինը տեղում մահացել է։
Ամերիկյան լրատվամիջոցները հայտնում են, որ միջադեպի ժամանակ Թրամփը և նրա ընտանիքի անդամները կալվածքում չեն եղել։
Ֆինանսների նախարար Սքոթ Բեսենթը Fox News-ին ասել է, որ խոսել է նախագահ Թրամփի հետ, նախագահն ու նրա ընտանիքի անդամներն անվտանգ են։ «Նրանք չպետք է հանդուրժեն մահափորձը մահափորձի հետևից», — հավելել է Բեսենթը։

Անվերահսկելի աշխատանք է եղել. Ավինյանը` փոսալցումների որակի մասին
https://youtu.be/U6yzpwFf9oc

Երևանի քաղաքապետարանի գործակարգավարական խորհրդակցություն
https://youtu.be/vDi5MDImt_k

Ավարտվեցին 25-րդ ձմեռային Օլիմպիական խաղերը, իսկ փակման պաշտոնական արարողությունը կայացավ իտալական Վերոնա քաղաքի օլիմպիական արենայում:
Օլիմպիական խաղերն անցկացվեցին Միլան ու Կորտինա քաղաքներում:
Այս խաղերում մեդալային ոչ պաշտոնական հաշվարկով հաղթող դարձավ Նորվեգիայի հավաքականը, որը նվաճել է 18 ոսկե, 12 արծաթե ու 11 բրոնզե մեդալ:
Փակման պաշտոնական արարողության առաջին հատվածում ներկայացվեց իտալական մշակույթն ու օպերային արվեստը:
Այնուհետ Վերոնայի օլիմպիական արենա մտան մասնակից երկրները ներկայացնող մարզիկները, որոնց շարքում չկային Հայաստանի մարզիկները:
Փակման արարողության ընթացքում պարգևատրվեցին դահուկավազքի (50 կմ) մրցաշարի մեդալակիրները։
Նրանց պարգևատրեցին ՄՕԿ-ի նախագահ Քիրսթի Քովենթրին և Դահուկավազքի միջազգային ֆեդերացիայի նախագահ Յոհան Էլիաշը:
Տղամարդկանց պայքարում բոլոր մեդալները նվաճել էին Նորվեգիայի հավաքականի ներկայացուցիչները:
Ոսկե մեդալակիրը Յոհաննես Կլեբոն է, արծաթե մեդալակիրը Մարտին Նիգետը, իսկ բրոնզե մեդալակիրը Էմիլ Իվերսենը:
Կանանց մրցաշարում ոսկե մեդալ նվաճեց Էպա Անդերսոնը (Շվեդիա), արծաթի արժանացավ Հայդի Վենգը (Նորվեգիա), բրոնզե մեդալակիրը Նադյա Քեյլինն է (Շվեյցարիա):
Արարողությունը եզրափակվեց օլիմպիական դրոշի փոխանցմամբ հաջորդ խաղերի կազմկոմիտեի ներկայացուցիչներին, ինչպես նաև կրակի մարմամբ:
2030 թվականի ձմեռային Օլիմպիական խաղերը կանցկացվեն ֆրանսիական Ալպերում:
 

ԱՄՆ գործերի ժամանակավոր հավատարմատար Դեյվիդ Ալենը այցելել է Վայոց Ձորի մարզ՝ Նորավանք վանական համալիր ու «Արենի-1» քարանձավ՝ ավելին իմանալու Հայաստանի պատմության մասին ու բացահայտելու գեղեցիկ բնաշխարհը։
«Արմենպրես»-ի փոխանցմամբ՝ այս մասին հաղորդագրություն է տարածել ՀՀ-ում ԱՄՆ դեսպանությունը։

«Սա նաև հնարավորություն էր ներկայացնել պատմամշակութային ժառանգության պահպանության հարցում ԱՄՆ կառավարության աջակցությունը։ «Արենի-1» քարանձավում «Միացյալ Նահանգների դեսպանի մշակութային արժեքների պահպանության հիմնադրամի» միջոցով կատարվել են ամրակայման ու միջավայրի քայքայիչ ազդեցության ռիսկերը կրճատելուն ուղղված աշխատանքներ։ Սա ի ցույց է դնում Միացյալ Նահանգների առաջատար դերը համաշխարհային մշակութային ժառանգության պահպանության, ինչպես նաև մեր երկրների միջև կապերի ամրապնդման հարցում»,- ասված է հաղորդագրության մեջ։