Category: Armen Press

ՀՀ ֆինանսների նախկին նախարար Գագիկ Խաչատրյանի որդու՝ Արտյոմ Խաչատրյանի նկատմամբ որպես խափանման միջոց ընտրվել է կալանքը։
Այս մասին տեղեկացնում են ՀՀ քննչական կոմիտեից։
Քննչական կոմիտեի փոխանցմամբ՝ Արտյոմ Խաչատրյանի նկատմամբ հայտարարվել է հետախուզում, քանի որ նա Հայաստանում չի գտնվում։

Համայն Վրաստանի նորընտիր կաթողիկոս-պատրիարք, Մցխեթա-Թբիլիսիի արքեպիսկոպոս, Բիճվինթայի և Ցխում-Աբխազիայի միտրոպոլիտ Շիո Երրորդն ընդունել է Վրաստանում ՀՀ դեսպան Աշոտ Սմբատյանին։
ՀՀ դեսպանն իր երախտիքն է հայտնել ջերմ ընդունելության համար և համոզմունք հայտնել, որ Վրաց ուղղափառ եկեղեցու նոր պատրիարքի հոգևոր ծառայությունը շարունակությունն է լինելու նախորդների սերմանած քրիստոնեական բարքերի՝ առավել հզորացնելով Եկեղեցին և վրաց ժողովրդին։
Համայն Վրաստանի կաթողիկոսն իր օրհնությունն է փոխանցել հայ ժողովրդին, Հայաստանի Հանրապետությանը և ՀՀ դեսպանին։
Նա կարևորել է հայ և վրաց ժողովուրդների դարավոր բարեկամությունը, քրիստոնեական արժեհամակարգի ընդհանրությունը, որի շնորհիվ և հանուն որի երկու ժողովուրդները հավասարապես պայքարել են և կերտել իրենց ինքնությունը։
Շիո Երրորդն անդրադարձել է նաև արդի մարտահրավերներին՝ ընդգծելով, որ դրանց հաղթահարման միակ ճանապարհը հոգևոր և ազգային արժեքներին հավատարմությունն ու ինքնության պահպանումն է։
Խոսելով Հայ և Վրաց եկեղեցիների միջև հաստատված ջերմ կապերի մասին՝ նա վերահաստատել է Վրաց եկեղեցու ցանկությունն ու պատրաստակամությունը՝ այդ կապերն առավել խորացնելու և զարգացնելու ուղղությամբ։

ԱՄՆ նախագահ Դոնալդ Թրամփը կեղծ է որակել իրանական լրատվամիջոցներում հրապարակված տեղեկությունները Իրանի հետ  համաձայնագրի նախագծի վերաբերյալ՝ հայտարարելով, որ այդ տեղեկությունները չեն համապատասխանում իրականությանն ու գրավոր համաձայնեցված պայմաններին:
Այս մասին Դոնալդ Թրամփը հայտարարել է Truth Social հարթակի իր էջում։
ԱՄՆ նախագահի պարզաբանմամբ՝ իրանական լրատվամիջոցների պնդումները, այդ թվում՝ համաձայնության հասնելու վերաբերյալ, իրականության հետ որևէ կապ չունեն: Իր գրառման մեջ Թրամփը միաժամանակ Հորմուզի նեղուցից դուրս եկող հնդկական նավերին անօդաչու թռչող սարքերով հարվածելու մեջ է մեղադրել  Իրանին՝ բացարձակապես անընդունելի համարելով դա:
Իրանական Mehr լրատվական գործակալությունը հայտնել էր, որ ԱՄՆ-ի և Իրանի միջև հակամարտության կարգավորման վերաբերյալ փոխըմբռնման հուշագիրը բաղկացած է 14 կետից, որոնց թվում է Հորմուզի նեղուցի բացումը, նավթի վաճառքի հետ կապված պատժամիջոցների վերացումը։
Ըստ գործակալության՝ փաստաթուղթը ներառում է հետևյալ համաձայնեցված դրույթները՝ բոլոր ճակատներում մարտերի անհապաղ դադարեցում, այդ թվում՝ Լիբանանում, 30 օրվա ընթացքում ծովային շրջափակման վերացում և ԱՄՆ ուժերի դուրսբերում Իսլամական Հանրապետությանը սահմանակից տարածքներից, ԱՄՆ-ի և նրա դաշնակիցների կողմից Իրանի վերակառուցման առնվազն 300 միլիարդ դոլարի ծրագրերի ներկայացում, իրանական նավթի և նավթամթերքի վաճառքի նկատմամբ պատժամիջոցների դադարեցում։
Բացի այդ, ըստ փաստաթղթի, Իրանը և ԱՄՆ-ն 60 օրվա ընթացքում կանցկացնեն միջուկային հարցի շուրջ բանակցություններ, որոնց արդյունքներով կստորագրվի համաձայնագիր։
Ըստ գործակալության՝ միջուկային հարցի շուրջ բանակցություններ սկսելու համար Իրանը որպես պայման է առաջադրել 12 միլիարդ դոլարի ակտիվների ապասառեցումը, շրջափակման վերացումը և նավթային պատժամիջոցների դադարեցումը։
Այնուամենայնիվ, Իրանի հրթիռային ծրագրի և տարածաշրջանում «դիմադրության առանցքի» ուժերի աջակցության հարցերը չեն ներառվել ԱՄՆ-Իրան հուշագրի տեքստում։

⚡️ Facebook, Instagram և Messenger հարթակների աշխատանքում խափանումներ են արձանագրվել։ Օգտատերերը հայտնում են նորությունների հոսքի թարմացման, հաղորդագրությունների ուղարկման և ստացման, ինչպես նաև հավելվածներ մուտք գործելու հետ կապված խնդիրների մասին։

Մեկնարկում է օտարերկրացի և սփյուռքահայ դիմորդների փաստաթղթերի ընդունումը՝ 2026-2027 ուսումնական տարում ՀՀ միջին մասնագիտական, ինչպես նաև բարձրագույն և հետբուհական մասնագիտական կրթական ծրագրեր իրականացնող ուսումնական հաստատություններ ընդունվելու համար:

Գյումրիում և Ապարանում հունիսի 12-ի երեկոյան սպասվում են հորդառատ անձրևներ։
Այս մասին տեղեկացրել է Հիդրոօդերևութաբանության և մոնիթորինգի կենտրոնի տնօրեն Լևոն Ազիզյանը։

«Առաջիկա ժամերի ընթացքում հորդառատ անձրևներ կդիտվեն Գյումրի և Ապարան համայնքներում։
Հնարավոր է նաև կարկուտ»,– Ֆեյսբուքի իր էջում գրել է Լևոն Ազիզյանը։

Հայաստանի Հանրապետության արտաքին գործերի նախարարությունը շնորհավորական ուղերձ է հղել Ռուսաստանի օրվա կապակցությամբ։
Համապատասխան շնորհավորական ուղերձը ԱԳ նախարարությունը տարածել է X-ի իր միկրոբլոգում։

«Շնորհավորում ենք Ռուսաստանի արտաքին գործերի նախարարության մեր գործընկերներին և Ռուսաստանի քաղաքացիներին ազգային տոնի՝ Ռուսաստանի օրվա կապակցությամբ։ Մաղթում ենք ձեզ խաղաղություն, բարգավաճում և ամենայն բարիք»,-ասված է ուղերձում։

ՀՀ ԱԺ մշտական հանձնաժողովների համատեղ նիստ

Հեռուստատեսության և ռադիոյի հանձնաժողովի որոշմամբ «5-րդ ալիք»-ի և «Հ2»-ի նկատմամբ կիրառվել են վարչական տույժեր
Որոշումն ընդունվել է ՀՌՀ-ի հունիսի 12-ի նիստի արդյունքներով։
Նիստի օրակարգում ընդգրկված էր 4 հարց։
1. Տեսալսողական մեդիածառայություն մատուցողների կողմից Ազգային ժողովի 2026 թվականի հունիսի 7-ի հերթական ընտրությունների նախընտրական քարոզչության սահմանված կարգի պահպանման վերաբերյալ Հեռուստատեսության և ռադիոյի հանձնաժողովի կողմից իրականացված մշտադիտարկման արդյունքների և եզրակացության հրապարակման հարցը։
2. «ՄԵԴԻԱՔԱՍՏ» ՍՊԸ-ի ներկայացրած տեսալսողական ծրագրերի ծանուցման հարցը։
3. «ՇԱՐԿ» ՍՊԸ-ի («5-ՐԴ ԱԼԻՔ») նկատմամբ վարչական ակտի ընդունումը՝ սեփական նախաձեռնությամբ հարուցված թիվ 18 վարչական վարույթի եզրափակիչ փուլում։
4. «ՀԱՅԿԱԿԱՆ ԵՐԿՐՈՐԴ ՀԵՌՈՒՍՏԱԱԼԻՔ» ՍՊԸ-ի նկատմամբ վարչական ակտի ընդունումը՝ սեփական նախաձեռնությամբ հարուցված թիվ 20 վարչական վարույթի եզրափակիչ փուլում։
Նիստին ներկա էր նաև Ժողովրդավարական հաստատությունների և մարդու իրավունքների գրասենյակի (ԺՀՄԻԳ) ներկայացուցիչ Եգոր Տիլպունովը։