Category: Armen Press

«Կրասնոդար»-ը դարձել է  ռուսական Պրեմիեր լիգայի փոխչեմպիոն. Սպերցյանը լավագույնն է գոլ+փոխանցում համակարգով
Ռուսաստանի ֆուտբոլի առաջնության վերջին՝ 30-րդ տուրի արդյունքներով «Կրասնոդար»-ը, որտեղ հանդես է գալիս Հայաստանի ազգային հավաքականի կիսապաշտպան Էդուարդ Սպերցյանը, դարձել է երկրի փոխչեմպիոն:  
Ռուսաստանի չեմպիոն է դարձել Սանկտ Պետերբուրգի «Զենիթ»-ը՝ 68 միավորով։ «Կրասնոդար»-ը հավաքել է 66 միավոր և երկրորդն է, իսկ երրորդ հորիզոնականում Մոսկվայի «Լոկոմոտիվ»-ն է՝ 53 միավորով։ 
Էդուարդ Սպերցյանն առաջնությունն ավարտել է 13 գոլով և 16 արդյունավետ փոխանցմամբ: Նա դարձել է ՌՊԼ-ի լավագույն ասիստենտ, ինչպես նաև գոլ+փոխանցում համակարգով գրավել է առաջին տեղը:

Հայաստանի ֆուտբոլի Առաջին խմբի առաջնության 29-րդ տուրում «Սարդարապատ»-ը 2:1 հաշվով հաղթեց «Սյունիք»-ին: Այս արդյունքի շնորհիվ Ալեքսանդր Տոռեսի թիմը դարձավ Հայաստանի Առաջին խմբի առաջնության չեմպիոն:
Վճռորոշ խաղում գոլերով աչքի ընկան Համլետ Մինասյանն ու Լևոն Վարդանյանը: «Սարդարապատ»-ը միավորների թիվը հասցրեց 73-ի ու առաջնության ավարտից 1 տուր առաջ անհասանելի դարձավ մրցակիցների համար:
Ընթացիկ մրցաշրջանում «Սարդարապատ»-ը 29 մրցավեճից հաղթել է 23-ում, կրել է 2 պարտություն, գրանցել 4 ոչ-ոքի:

Առողջապահության համաշխարհային կազմակերպությունը (ԱՀԿ) հայտնել է, որ MV Hondius զբոսանավում հիվանդացության դեպքերի պատճառ դարձած հանտավիրուսի գլոբալ տարածման ռիսկը մնում է ցածր։

«Հանրային առողջության ռիսկը վերագնահատվել է առկա ամենաարդիական տեղեկատվության հիման վրա, և գլոբալ ռիսկը մնում է ցածր», — ասվում է ԱՀԿ-ի կողմից X սոցիալական ցանցում հրապարակված հայտարարության մեջ։

Կազմակերպությունը նշել է, որ զբոսանավի չվարակված ուղևորների և անձնակազմի համար ռիսկը մնում է չափավոր՝ նշելով, որ կոնտակտավոր անձանց մոտ հիվանդությունը դեռ կարող է դրսևորել ինկուբացիոն ժամանակահատվածում, ուստի անհրաժեշտ է շարունակական մոնիթորինգ։
ԱՀԿ-ն ակնկալում է, որ վիրուսի հետագա փոխանցման ռիսկը կնվազի վերահսկողության միջոցառումների կիրառումից հետո։

Արաբական Միացյալ Էմիրությունների արտաքին գործերի նախարարությունը խստորեն դատապարտել է երկրի միակ ատոմակայանի դեմ ուղղված դրոնային հարձակումը։
Իշխանությունները հայտնել են, որ Աբու Դաբիի Ալ-Զաֆրա շրջանում Բարաքա ատոմային էլեկտրակայանի ներքին անվտանգության գոտուց դուրս գտնվող էլեկտրական գեներատորի դեմ հարձակում իրականացրած անօդաչու թռչող սարքը երկրի տարածք է մտել արևմտյան սահմանից։ Ընդ որում, ՆԳՆ տվյալներով, երկրի տարածք է մտել 3 դրոն, սակայն դրանցից 2-ը չեզոքացվել է և միայն մեկն է հարվածել գեներատորին՝ հրդեհ առաջացնելով։
Միջադեպի հետևանքով տուժածներ կամ ճառագայթային անվտանգության մակարդակների վրա որևէ ազդեցություն չի արձանագրվել։
ԱԳՆ-ն հայտարարության մեջ ընդգծել է, որ այս հարձակումները հանդիսանում են վտանգավոր էսկալացիա, անընդունելի ագրեսիա և ուղղակի սպառնալիք երկրի անվտանգությանը։

«Խաղաղ նպատակներով օգտագործվող միջուկային էներգետիկ օբյեկտների թիրախավորումը միջազգային իրավունքի, ՄԱԿ-ի կանոնադրության և միջազգային մարդասիրական իրավունքի ակնհայտ խախտում է՝ հաշվի առնելով այն լուրջ վտանգները, որոնք կարող են առաջանալ քաղաքացիական բնակչության, շրջակա միջավայրի, ինչպես նաև տարածաշրջանային և միջազգային անվտանգության համար»,- ասվում է հայտարարության մեջ։

ԱՄԷ-ն վերահաստատել է, որ որևէ պայմաններում չի հանդուրժի իր անվտանգության և ինքնիշխանության դեմ ուղղված որևէ ոտնձգություն։
Դեռևս հայտնի չէ, թե ով է հարձակման պատասխանատուն։

Հայաստանի կենտրոնական ընտրական հանձնաժողովը Հայաստանում հունիսի 7-ին կայանալիք խորհրդարանական ընտրություններին ընդառաջ իրազեկող տեսանյութ է տարածել՝ ներկայացնելով, թե ինչպես կարող են քաղաքացիները փոխել իրենց ընտրատեղամասը։
ԿԸՀ-ն նշում է, որ ընտրատեղամասը փոխելու դիմումները քաղաքացիները կարող են ուղարկել ՆԳՆ Միգրացիայի և քաղաքացիության ծառայություն մինչ մայիսի 26-ը, ժամը 14:00-ն:
Ովքե՞ր կարող են նման դիմում ուղարկել
Ովքեր հաշվառված են մի համայնքում, բայց քվեարկության օրը լինելու են այլ համայնքում:
Ովքեր հաշվառում չունեն:
Ովքեր հենաշարժական խնդիր ունեն, բայց իրենց տեղամասը հարմարեցված չէ:
Կարևոր նկատառում՝ Վերջին խմբի ընտրողները կարող են տեղամասի փոփոխության դիմում ուղարկել նաև միևնույն համայնքի կամ բնակավայրի ներսում:

Գյումրիի թանգարաններն այս տարի ևս միացել են «Թանգարանային գիշեր» համաեվրոպական միջոցառմանը
Քաղաքում գործող ինչպես համայնքային ենթակայության, այնպես էլ ՀՀ կրթության, գիտության, մշակույթի և սպորտի նախարարության ենթակայության տակ գործող մշակութային օջախները, միանալով միջազգային այս նախաձեռնությանը, կազմակերպել են բազմաբովանդակ միջոցառումներ՝ ցուցահանդեսներ, կրթական ծրագրեր, վարպետաց դասեր, հանրային քննարկումներ։
ՄԱՆՐԱՄԱՍՆԵՐ

Գյումրիի «Կումայրի» պատմա-մշակութային թանգարան-արգելոցի պատկերասրահում մայիսի 16-ին հանդիսավորությամբ բացվեց ՀՀ արվեստի վաստակավոր գործիչ, ճանաչված գեղանկարիչ, լուսանկարիչ և բանաստեղծ Սամվել Սևադայի (Սամվել Գրիգորյան) «Անվերջ վերադարձ» խորագիրը կրող անհատական հետահայաց ցուցահանդեսը:

Հայաստանի մարդու իրավունքների պաշտպան Անահիտ Մանասյանը խիստ մտահոգիչ է համարում «Նուբարաշեն» հոգեկան առողջության պահպանման կենտրոնում արձանագրված ինքնասպանության դեպքը։
Անահիտ Մանասյանը հայտարարություն է տարածել դեպքի առնչությամբ, որը ներկայացնում ենք ստորև․ 

«Հոգեկան առողջության հաստատություններում գտնվող անձինք գտնվում ենպետության հատուկ հոգածության և պաշտպանության ներքո, ուստի նման դեպքերը լրջագույն հարցադրումներ են առաջացնում կյանքի իրավունքի ապահովման, պատշաճ հսկողության, ինչպես նաև ինքնասպանությունների կանխարգելման արդյունավետ մեխանիզմների կիրառման վերաբերյալ։
Մտահոգիչ է և այն, որ խոսքը ազատությունից զրկված անձի մասին է, որի նկատմամբ պետությունն ունի պատասխանատվություն՝ ապահովելու նրա անվտանգությունն ու առողջական վիճակին համարժեք խնամքը։
Նման դեպքերը պետք է դառնան իրավասու մարմինների կողմից անհապաղ, արդյունավետ և բազմակողմանի քննության առարկա, իսկ հոգեկան առողջության հաստատություններում վերահսկողության և ինքնասպանությունների կանխարգելման մեխանիզմները պետք է պատշաճ կիրառվեն և կատարելագործվեն։
Մարդու իրավունքների պաշտպանը իրավասու մարմիններից պարզաբանումներ կպահանջի դեպքի բոլոր հանգամանքների, այդ թվում՝ հոգեբուժական հաստատությունում կիրառված հսկողության միջոցների, բժշկական արձագանքի, ինչպես նաև ինքնասպանության ռիսկերի գնահատման և կանխարգելման ուղղությամբ իրականացված գործողությունների վերաբերյալ։
Պաշտպանը վերահաստատում է, որ հոգեկան առողջության խնդիրներ ունեցող անձանց իրավունքների պաշտպանությունը պահանջում է առավել զգայուն, մասնագիտական և շարունակական մոտեցում, իսկ նման ողբերգական դեպքերի կանխարգելումը պետք է լինի պետության առաջնահերթություններից մեկը»։

Սյունիք կատարած այցի շրջանակում ԿԳՄՍ նախարար Ժաննա Անդրեասյանն այցելել է Շվանիձոր բնակավայրի մանկապարտեզ, դպրոց և մշակույթի տուն, ծանոթացել պետական տարբեր ծրագրերով կատարված բարեկարգման աշխատանքներին։
Այս մասին հաղորդագրություն է տարածել ՀՀ ԿԳՄՍ նախարարությունը։
Ժաննա Անդրեասյանին ուղեկցել են նախարարի տեղակալ Ալֆրեդ Քոչարյանը, Սյունիքի մարզպետի տեղակալ Հայկ Հարությունյանը, Մեղրի համայնքի ղեկավար Խաչատուր Անդրեասյանը։