Category: Armen Press

Վրաստանը դրական է գնահատում ԱՄՆ փոխնախագահ Ջեյ Դի Վենսի այցը Հայաստան և Ադրբեջան
«Արմենպրես»-ի փոխանցմամբ՝ ինչպես հայտնում է Վրաստանի առաջին ալիքը, այս մասին հայտարարել է Վրաստանի արտաքին գործերի նախարար Մակա Բոճորիշվիլին՝ հավելելով՝ այդ այցը ցույց է տալիս, որ ԱՄՆ նախագահ Դոնալդ Թրամփը կարևորում է Հարավային Կովկասում խաղաղության հաստատումը:
Նրա խոսքով՝ Թբիլիսին ևս իր ներդրումն է կատարում այդ գործընթացում:
Անդրադառնալով պնդումներին, թե Հայաստանի և Ադրբեջանի միջև հաղորդակցային ուղիների ապաշրջափակման պարագայում Վրաստանը կարող է դուրս մնալ տարածաշրջանային գործընթացներից՝ Բոճորիշվիլին նշել է, որ Վրաստանի դերն անհնար է թերագնահատել:

«Ոչ ոք չի բացառում այլընտրանքային ուղիների գոյությունը, և դրանում ոչ մի վատ բան չկա», — ասել է նախարարը:

Իրանի և Միացյալ Նահանգների պատվիրակությունները Ժնևում ընթացող բանակցությունների ժամանակ քննարկում են իրանական պատժամիջոցների վերացման հարցը։
Ինչպես հաղորդում է «Արմենպրես»-ը՝ վկայակոչելով ՏԱՍՍ-ը, այս մասին հայտնել է Իրանի ԱԳՆ խոսնակ Էսմայիլ Բաղային։

«Բանակցությունների թեման, ինչպես մենք բազմիցս նշել ենք, կենտրոնացած է միջուկային հարցի վրա։ Մեր դիրքորոշումը թե՛ պատժամիջոցների վերացման, թե՛ Իրանի կողմից միջուկային էներգիայի խաղաղ օգտագործման իրավունքի վերաբերյալ շատ հստակորեն հայտարարվել է օմանյան կողմին [որը հանդես է գալիս որպես միջնորդ]։ Այս հարցերը մանրամասն կքննարկվեն այսօր կայանալիք բանակցությունների ընթացքում», — ասել է Բաղային Իրանի պետական ​​հեռուստառադիոընկերության եթերում։

Իրանի նախագահ Մասուդ Փեզեշքիանը հայտարարել է, որ հունվարին երկրում տեղի ունեցած անկարգությունների ժամանակ զոհվել է մինչև 400 զինվոր, առնվազն 2000 քաղաքացիական անձ դարձել է անմեղ զոհ։
Ինչպես հաղորդում է «Արմենպրես»-ը, այս մասին նա խոսել է Իրանի պետական ​​հեռուստառադիոընկերության եթերում։ Անդրադառնալով ամերիկյան կողմի պնդումներին, թե Իրանը «չարիքի և ահաբեկչության բուժման վայր է, որտեղ սպանում են մարդկանց», Փեզեշքիանն ասել է․

«Երեկ ԱՄՆ նախագահը հայտարարել է, որ Իրանը կազմակերպել է 32000 մարդու զանգվածային սպանությունը։ Մենք զանգվածային սպանություններ կատարե՞լ ենք։ Մենք տրամադրել ենք վիճակագրություն և նույնիսկ նշված անձանց անձնագրերի համարները։ Ամեն ոք, ով պնդում է ավելի բարձր թվեր, պետք է ապացուցի դա։ Ավելին, հայտարարված թվերից ավելի քան 2000 մարդ անմեղ զոհեր են, 300-400-ը՝ զինվորականներ, որոնք սպանվել են օրենքն ու կարգը պաշտպանելիս»։

Հայաստանը հույս ունի, որ Ամերիկայի Միացյալ Նահանգների և Իրանի միջև լարվածության պատճառով տարածաշրջանում ստեղծված իրավիճակը կհանգուցալուծվի դիվանագիտական ճանապարհով
Լեհաստանի միջազգային հարաբերությունների ինստիտուտում Լեհաստանում օտարերկրյա դեսպանների, դիվանագետների և վերլուծական կենտրոնների ներկայացուցիչների հետ հանդիպման ժամանակ այդ մասին ասել է Հայաստանի վարչապետ Նիկոլ Փաշինյանը՝ անդրադառնալով մասնակիցներից մեկի հարցին, թե եթե Իրանն ու ԱՄՆ-ն փոխզիջման չգան և տարածաշրջանում ճգնաժամ սկսվի, ինչպե՞ս դա կազդի Հայաստանի կայունության վրա։

«Ինչ վերաբերում է Իրանին և ԱՄՆ-ին. գիտեք, Հայաստանը փոքր և համեստ պետություն է, և մեր կարողությունների սահմաններում չէ դատել ԱՄՆ-ի և Իրանի հարաբերությունների մասին։ Մենք, իհարկե, մտահոգված ենք, և մեր ցանկությունն է, որպեսզի հնարավորություններ լինեն դիվանագիտական ճանապարհով ելք գտնելու այս իրավիճակից։ Իհարկե, այս շատ փոփոխական և անկայուն իրավիճակում մենք ուրախ ենք, որ կարողացել ենք կայունություն և խաղաղություն հաստատել մեր տարածաշրջանում։ Եվ ցանկացած անկայունություն, ցանկացած մարտահրավեր շատ մտահոգիչ է, և մենք հույս ունենք, որ կայուն իրավիճակ կունենանք լայն տարածաշրջանում։ Ակնհայտ է, որ մենք չենք կարող մեծ ազդեցություն ունենալ այդ իրավիճակի վրա, ուստի մեր անելիքն է հուսալ, որ ամեն ինչ լավ կլինի։ Եվ, եթե լինեն հնարավորություններ դրական ազդեցություն ունենալու, մենք կուզեինք, բայց, ինչպես ասել եմ՝ մենք փոքր պետություն ենք և կարող ենք ընդամենը խրախուսել և միանալ դիվանագիտության ձայներին»,- ասել է Փաշինյանը։

ԱՄՆ նախագահ Դոնալդ Թրամփն Ուկրաինայի նախագահ Վոլոդիմիր Զելենսկիի հետ հեռախոսազրույցում նշել է, որ ցանկանում է հնարավորինս շուտ դադարեցնել Ռուսաստանի հետ պատերազմը։ «Արմենպրես»-ի փոխանցմամբ՝ այս մասին հայտնում է Axios-ը՝ վկայակոչելով Ուկրաինացի պաշտոնյայի և զանգի մասին տեղյակ երկու այլ աղբյուրների։
Աղբյուրները նշել են, որ Թրամփի և Զելենսկիի միջև հեռախոսազրույցը շատ բարեկամական և դրական է եղել։
Ըստ տեղեկությունների՝ Զելենսկին շնորհակալություն է հայտնել Թրամփին իր ողջ օգնության համար և ասել, որ միայն Թրամփը կարող է համոզել Պուտինին դադարեցնել պատերազմը։

Եվրոպայի խորհուրդը լիովին սատարում է Հայաստանում լրատվամիջոցների բարեփոխումների համապարփակ օրակարգին և ընթացիկ լավարկումներին, որոնք ուղղված են խոսքի ազատության ամրապնդմանն ու ժողովրդավարության դեմ ուղղված սպառնալիքների դեմ պայքարին։
«Արմենպրես»-ի հաղորդմամբ՝ այս մասին Եվրոպայի խորհրդի «Խոսքի և մամուլի ազատության և տեղեկատվության հասանելիության խթանումը Հայաստանում» ծրագրի մեկնարկն ազդարարող միջոցառման ժամանակ հայտարարեց Եվրոպայի խորհրդի երևանյան գրասենյակի ղեկավար Մաքսիմ Լոնգանգեն։

Սևանա լճի՝ բացարձակ նիշից ցածր հողամասերում ապամոնտաժվել է 65 շենք շինություն. քանդվել է նաև Արմեն Աշոտյանի եղբոր կողմից ապօրինի կառուցված շենքը:
https://youtu.be/2e-7Su_UKVI

🔴 ՀՀ կառավարության նիստ․ ՈՒՂԻՂ
https://youtu.be/ox3KjnnXrkI

ԵԽ-ի «Խոսքի և մամուլի ազատության և տեղեկատվության հասանելիության խթանումը ՀՀ-ում» ծրագրի մեկնարկը
https://youtu.be/sN3uNR-KOaI

Միացյալ Նահանգներում Հայաստանի Հանրապետության դեսպան Նարեկ Մկրտչյանը հանդիպել է ԱՄՆ Ֆինանսների քարտուղարի փոխտեղակալ Ռեբեկա Բըրչի հետ։
Այս մասին հայտնում են ԱՄՆ-ում ՀՀ դեսպանությունից՝ մանրամասնելով, որ հանդիպումը տեղի է ունեցել ԱՄՆ ֆինանսների քարտուղարությունում։
Նշվում է, որ հանդիպման ընթացքում քննարկվել են ՀՀ-ԱՄՆ տնտեսական և ֆինանսական համագործակցությանն առնչվող հարցեր, Հայաստանում իրականացվող բարեփոխումները, ինչպես նաև երկկողմ համագործակցության ընդլայնման հնարավորությունները։
Դեսպան Նարեկ Մկրտչյանն ու Ռեբեկա Բըրչը մտքեր են փոխանակել ՀՀ-ԱՄՆ փոխշահավետ ոլորտներում համագործակցության խորացման և համապատասխան գերատեսչությունների միջև երկխոսության ամրապնդման շուրջ։