Category: Armen Press

ԱՄՆ նախագահ Դոնալդ Թրամփը 5 օրով հետաձգում է Իրանին տված վերջնաժամկետը, որի ընթացքում Հորմուզի նեղուցը չբացելու դեպքում Իրանի էլեկտրակայանները հարձակման պետք է ենթարկվեին:
Իր Truth Social հարթակում Թրամփը գրել է, որ վերջին երկու օրվա ընթացքում Վաշինգտոնը և Թեհրանը «լավ և արդյունավետ զրույցներ» են ունեցել Մերձավոր Արևելքում հակամարտության «ամբողջական և լիակատար լուծման» շուրջ:

«Հիմնվելով այս խորը, հանգամանալից և կառուցողական զրույցների տոնի վրա, որոնք կշարունակվեն շաբաթվա ընթացքում, ես Պատերազմի նախարարությանը հանձնարարել եմ հինգ օրով հետաձգել Իրանի էլեկտրակայանների և էներգետիկ ենթակառուցվածքների դեմ ուղղված ցանկացած և բոլոր ռազմական հարվածները՝ կախված ընթացիկ հանդիպումների և քննարկումների հաջողությունից», — հավելել է նա։

Հայաստանի արտաքին գործերի նախարար Արարատ Միրզոյանը հայտարարել է, որ Հայաստանում կայանալիք խորհրդարանական ընտրություններին ընդառաջ երկրի դեմ իրականացվող հիբրիդային հարձակումների թելերի մի մասը տանում են Ռուսաստան։
ՀՀ ԱԳ նախարարն այդ մասին ասել է խորհրդարանում լրագրողների հետ ճեպազրույցի ժամանակ։

«Եկեք նախ հասկանանք, թե ինչ է նշանակում հիբրիդային հարձակում։ Եթե փորձենք թարգմանել հիբրիդային բառը, դա «խառնածին» բառն է, այսինքն՝ Հայաստանի դեմ խառնածին գործողություններ են։ Դա կարող է լինել ապատեղեկատվության տարածումը, կիբեռհարձակումները և այլն։ Արվո՞ւմ են Հայաստանի դեմ այսպիսի հարձակումներ, միանշանակ արվում են, ո՞վ կարող է այլ կարծիք հայտնել։ Մի մասը զանգվածային լրատվության միջոցների միջոցով է արվում։ Ձեր միջոցով արվածի մի մասը գիտակցված է արվում, մի մասը պատահաբար ստացվում է՝ լուր է, գալիս է, տարածելու անհրաժեշտություն եք տեսնում»,- ասել է Միրզոյանը՝ պատասխանելով հարցին, թե ի՞նչ նկատի ունեն իշխանությունները, երբ ասում են, որ Հայաստանի դեմ հիբրիդային հարձակումներ են։

ՄԱՆՐԱՄԱՍՆԵՐ

Հայաստանի շախմատի տղամարդկանց թիմի անդամ Հայկ Մարտիրոսյանը «19th Agzamov Memorial» շախմատի միջազգային մրցաշարի առաջատարներից է:
Այս մասին հայտնում է Հայաստանի շախմատի ֆեդերացիան:
Գրոսմայստեր Հայկ Մարտիրոսյանը և ՖԻԴԵ-ն ներկայացնող ռուսաստանցի գրոսմայստեր Արտյոմ Ուսկովը կիսում են առաջին հորիզոնականը Ուզբեկստանի մայրաքաղաք Տաշքենդում անցկացվող «19th Agzamov Memorial» շախմատի միջազգային մրցաշարում:
Երկու շախմատիստներն էլ 6 հնարավորից ունեն 5 միավոր և վաղը կմրցեն միմյանց դեմ:
Մրցաշարն անցկացվում է շվեյցարական մրցակարգով՝ 10 խաղափուլով և կեզրափակվի մարտի 26-ին: Մրցաշարին, ընդհանուր առմամբ, մասնակցում է 48 շախմատիստ:

Հայաստանի իշխանությունները վստահ են, որ Ադրբեջանում պահվող հայերի շուտափույթ ազատ արձակումը ևս մեկ քայլով կամրապնդի Հայաստանի և Ադրբեջանի միջև հաստատված խաղաղությունը։
Խորհրդարանում լրագրողների հետ ճեպազրույցի ժամանակ այս մասին ասել է ՀՀ արտաքին գործերի նախարար Արարատ Միրզոյանը։

«Ադրբեջանում պահվող անձանց, գերիների վերաբերյալ դիրքորոշումը նույնն է, ես գերադասում եմ այս հարցի շուրջ բարձրաձայն և հրապարակային չխոսել, այլ աշխատել։ Երբ արդյունք է լինում, հանրությունը տեղեկացվում է։ Մենք ողջունում ենք վերջերս 4 գերիների ազատ արձակումը և վստահ ենք, որ բոլոր մնացած պահվող անձանց շուտափույթ ազատ արձակումը ևս մեկ քայլով կամրապնդի Հայաստանի և Ադրբեջանի միջև հաստատված խաղաղությունը։ Մենք աշխատում ենք այս ուղղությամբ, նաև Ադրբեջանի և առաջին հերթին Ադրբեջանի գործընկերների հետ ենք այս մասին խոսում։ Այս պահին արդյունք չկա։ Սա այն հարցն է, որ կամ կա արդյունք, կամ չէ։ Աշխատում ենք, իհարկե, չի կարող այս հարցը վերանալ մեր օրակարգից, արդյունք լինի կիմանաք»,- նշել է ՀՀ ԱԳ նախարարը։

Հեռուստատեսության և ռադիոյի հանձնաժողովի ձևավորման 25-ամյա հոբելյանին նվիրված՝ օրերս տեղի ունեցած հանդիսավոր միջոցառմանը մասնակցել են հեռուստառադիոընկերությունների, ցանցային օպերատորների, հեղինակազորված ընկերությունների ղեկավարներ, ինչպես նաև օրենսդիր, գործադիր, անկախ սահմանադրական մարմինների, ՀՀ-ում գործող դեսպանությունների, միջազգային և այլ կազմակերպությունների ներկայացուցիչներ։
ՄԱՆՐԱՄԱՍՆԵՐ

Էմանուել Գրեգուարը՝ ձախ Սոցիալիստական ​​կուսակցության թեկնածուն, որն աջակցություն էր ստացել երկրի մյուս ձախ քաղաքական ուժերի կողմից, Փարիզի քաղաքապետ է ընտրվել մունիցիպալ ընտրությունների երկրորդ փուլի արդյունքներով:

Հայաստանի արտաքին գործերի նախարար Արարատ Միրզոյանն անդրադարձել է վարչապետ Նիկոլ Փաշինյանի հայտարարությանը, թե ընդդիմադիր որոշ ուժերի՝ իշխանության դեպքում Հայաստանն ամենաուշը 2026 թվականի սեպտեմբերին կկանգնի նոր պատերազմի առաջ։
Միրզոյանը թեմային անդրադարձել է ԱԺ-ում լրագրողների հետ ճեպազրույցի ժամանակ։
Հարցին, թե որտեղի՞ց է վարչապետն այդպիսի վստահությամբ նոր պատերազմի ժամկետներ նշում և արդյոք դա շանտա՞ժ չէ, Միրզոյանը պատասխանել է.

«Ես կարծում եմ, որ ժամկետը վարչապետը պայմանական է ասել, այսինքն՝ նկատի ունի ընտրություններից կարճ ժամանակ անց։ Իսկ որ նման հեռանկար կարող է լինել, միանշանակ է։ Ընդդիմադիր որոշ շրջանակների գաղափարախոսությունն այն է, որ գրեթե բոլոր հարևան երկրների հետ տարածքային խնդիրներ կան, տարածքային պահանջներ ու հավակնություններ ունենք։ Ակնհայտ է, որ այս մտայնությամբ մարդիկ, եթե իշխանության գան, անմիջապես խնդիր է առաջանալու հարևանների հետ։ Եվ հաշվի առնելով, թե հիմա խնդիրներն այս օրերին երկրները ինչ մեթոդաբանության են փորձում լուծել՝ շատ մեծ հավանականությամբ Հայաստանն անմիջապես կկանգնի պատերազմի առաջ։ Մենք ասում ենք, որ մեր երկրին պետք է խաղաղություն։Այլ պայմաններում, մեր խորը համոզմամբ, Հայաստանի ոչ թե հաջողությունը, ոչ թե զարգացումը, այլ Հայաստանի՝ որպես անկախ պետության գոյությունը ինքնին կհայտնվի մեծ կասկածի տակ։ Խաղաղությունը մեր առաջարկն է քաղաքացիներին և կա զուգահեռ առաջարկը՝ «չէ, մեզ այս Հայաստանն ընդհանրապես պետք չէ, մենք թքած ունենք սրա վրա, մեզ պետք է եսիմ ինչ Հայաստան»։ Հիմա, ես մեր առաջարկում շանտաժի էլեմենտ տեսնո՞ւմ եմ։ Ոչ, չեմ տեսնում, ինչո՞ւ ենք ասում, լավ ենք անում, դա մեր առաջարկն է Հայաստանի քաղաքացիներին»,- նշել է Միրզոյանը

Անդրադառնալով լրագրողներից մեկի դիտարկմանը, թե ՀՀ գործող իշխանությունը պատերազմ է բերել ժողովրդի գլխին՝ Արարատ Միրզոյանն ասել է, որ իրենց իշխանությունը պատերազմ չի բերել, պատերազմը եղել է 30-ից ավելի տարիների սխալ քաղաքականության հետևանք։

Արարատ Միրզոյանի ճեպազրույցը. ՈՒՂԻՂ
https://www.youtube.com/watch?v=9K7iKCKUV3g

Հայաստանի հունահռոմեական ոճի ըմբշամարտի մինչև 23 տարեկանների հավաքականի անդամներն ամփոփել են Եվրոպայի առաջնության արդյունքները
Եվրոպայի առաջնության ոսկե մեդալակիր Սուրեն Աղաջանյանը գոհ է առաջնության ընթացքից:

«Կային սխալներ, որոնց վրա պետք է աշխատեմ՝ մեծահասակների մրցաշարերում դրանք չկրկնելու համար: Հիմա արդեն պատրաստվում եմ մեծահասակների Եվրոպայի առաջնությանը: Ինձ համար Եվրոպայի Մ23 տարեկանների առաջնությունում առանձնահատուկ էր լեհ ըմբիշի հետ գոտեմարտը, քանի որ ինչ-որ պահի կորցրել էի զգոնությունս, սակայն վերգտա ինձ ու հաղթեցի»,-«Արմենպրես»-ի մամուլի սրահում լրագրողների հետ հանդիպման ժամանակ ասաց Աղաջանյանը:

ԵԱ-ի ոսկե մեդալակիր Արամայիս Հարությունյանի համար առաջնությունում կարևոր գոտեմարտը եզրափակիչն է եղել:

«Ինձ համար Եվրոպայի այս առաջնությունում առանձնահատուկ էր եզրափակիչ գոտեմարտը: Մրցակիցս Եվրոպայի եռակի ու աշխարհի կրկնակի չեմպիոնն էր: Մրցակցությունը նույնիսկ մինչ եզրափակիչ արդեն իսկ լարված էր: Ինձ համար այս հաղթանակը սպասելի էր»-առանձնացրեց նա:

Եվրոպայի փոխչեմպիոն Սամվել Տերտերյանի համար բոլոր գոտեմարտերն էլ հավասարապես կարևոր են եղել:

«Մինչ եզրափակիչը ունեցել եմ երեք գոտեմարտ և բոլորին էլ հաղթել եմ հավասար հաշվով: Դեռևս մարզիչների հետ վերլուծություն չենք արել, սակայն ունենք ժամանակ սխալները հասկանալու համար: Առաջիկայում հավաքների ենք, որոնց ընթացքում կփորձենք վերլուծել բացթողումները»,-ասաց նա:

Եվրոպայի առաջնության բրոնզե մեդալակիր Մանվել Խաչատրյանը հաջորդիվ ձգտելու է չեմպիոնության:

«Մեծ սպասելիքներով էի մեկնարկել Եվրոպայի առաջնությանը, և ձգտումս էր, որ ոսկե մեդալ նվաճեի, սակայն բավարարվեցի միայն բրոնզե մեդալով: Հաջորդ մրցաշարերին փորձելու եմ բարելավել արդյունքները»,-եզրափակեց նա:

🔴 Հայաստանի Հանրապետությունը հումանիտար օգնություն է ուղարկել Իրանի Իսլամական Հանրապետություն
Այս մասին Ազգային ժողովի արտաքին հարաբերությունների հանձնաժողովի նիստի ընթացքում ասաց ՀՀ ԱԳ նախարար Արարատ Միրզոյանն՝ ներկայացնելով 2025 թվականի գործունեության վերաբերյալ զեկույցը։

«Ուզում եմ տեղեկացնել, որ Հայաստանի Հանրապետությունը հումանիտար օգնություն է ուղարկել Իրանի Իսլամական Հանրապետությանը՝ հիմնականում դեղորայքի տեսքով։ Եվ այլ կերպ լինել չէր կարող»,-ասաց Միրզոյանը՝ պատասխանելով ԱԺ «Հայաստան» դաշինքի պատգամավոր Քրիստինե Վարդանյանի հարցին։

Միրզոյանը նաև մատնանշեց, որ ԱԳ նախարարությունն այս մասին «շեփորահարելու» անհրաժեշտություն չի տեսել, սակայն, քանի որ հարցը հնչում է, հարկ է համարում հայտնել այս մասին։
Ավելի վաղ Հայաստանի Հանրապետության վարչապետ Նիկոլ Փաշինյանը հայտարարել էր, որ Հայաստանը պատրաստ է սեփական նախաձեռնությամբ հումանիտար աջակցություն ցուցաբերել Իրանին, եթե նման անհրաժեշտություն առաջանա։

«Իրանի Իսլամական Հանրապետությունը մեզ հումանիտար օգնության հարցով դիմելու անհրաժեշտություն չունի, որովհետև ինքներս, եթե տեսնենք, որ կա որևէ հումանիտար բնույթի կարիք, որին մենք կարող ենք աջակցել, կանենք այդ քայլը»,- ասել էր Նիկոլ Փաշինյանը։