Category: Armen Press

Վարչապետ Փաշինյանն առաջնորդության մասին․ ՈՒՂԻՂ
https://youtu.be/v_ujagsFnZA

Ռուսաստանի արտաքին գործերի նախարար Սերգեյ Լավրովը և Իրանի նրա պաշտոնակից Աբբաս Արաղչին հեռախոսազրույցի ընթացքում քննարկել են Պարսից ծոցի գոտում տիրող իրավիճակը, ինչպես նաև Ռուսաստանի կողմից կառուցված «Բուշեր» ատոմակայանին հարվածները։ Զրույցի մասին հաղորդագրություն է տարածել Ռուսաստանի արտգործնախարարությունը։

«Մարտի 23-ին իրանական կողմի նախաձեռնությամբ տեղի է ունեցել հեռախոսազրույց Ռուսաստանի Դաշնության արտաքին գործերի նախարար Սերգեյ Լավրովի և Իրանի արտաքին գործերի նախարար Աբբաս Արաղչիի միջև։ Քննարկվել է Պարսից ծոցի գոտում տիրող իրավիճակը, որը կտրուկ վատթարացել է ԱՄՆ-ի և Իսրայելի ագրեսիայի հետևանքով», — նշված է հաղորդագրության մեջ։

Լավրովն ընդգծել է Իրանի միջուկային օբյեկտներին, այդ թվում՝ «Բուշեր» ատոմակայանին ամերիկա-իսկայելական հարվածների «բացարձակ անընդունելիությունը»՝ նշելով, որ դրանք անթույլատրելի ռիսկեր են ստեղծում ռուսաստանցի անձնակազմի անվտանգության համար և հղի են աղետալի բնապահպանական հետևանքներով «տարածաշրջանի բոլոր երկրների համար՝ առանց բացառության»։
Գերատեսչությունում հավելել են, որ Իրանը և ՌԴ-ն մտահոգություն են հայտնել «Կասպից ծովի ջրատարածքում Վաշինգտոնի և Թել Ավիվի հրահրած հակամարտության վտանգավոր տարածման առումով» ։

Տեղի է ունեցել ՀՀ վարչապետ Նիկոլ Փաշինյանի հեռախոսազրույցը ՌԴ նախագահ Վլադիմիր Պուտինի հետ։
Զրուցակիցները քննարկել են երկկողմ օրակարգի շրջանակին վերաբերող հարցեր եւ պայմանավորվել առաջիկա հարմար առիթով քննարկումը շարունակել հանդիպման ձեւաչափով։

Հայաստանը շահագրգռված է իր շուրջ խաղաղության լիակատար պահպանմամբ
Ազգային ժողովում լրագրողների հետ ճեպազրույցում այս մասին ասել է ՀՀ արտաքին գործերի նախարար Արարատ Միրզոյանը՝ անդրադառնալով Իրանում Իսրայելի և ԱՄՆ-ի կողմից շարունակվող ռազմական գործողություններին և Մերձավոր Արևելքում առկա լարված իրավիճակին։

«Մենք շահագրգռված ենք Հայաստանի Հանրապետության շուրջ խաղաղության լիակատար պահպանմամբ։ Նույն մեր եղբայրական Իրանի ժողովրդի պարագայում մենք ցավում ենք մահերի, ենթակառուցվածքներին հարվածների առնչությամբ։ Նրանց հարևան արաբական պետություններն էլ են մեր բարեկամ երկրները։ Մենք կողմ ենք նրան, որ րոպե առաջ խաղաղություն հաստատվի, իսկ մեր շուրջ խաղաղության պահպանմամբ շահագրգիռ ենք էլ ավելի՝ տասնապատիկ և հարյուրապատիկ»,- ասել է Միրզոյանը։

Հայաստան-Եվրամիություն վիզաների ազատականացման գործընթացի ավարտի կոնկրետ ժամկետ այս պահին չկա, սակայն գործընթացը ընթանում է արագ տեմպերով։
«Արմենպրես»-ի հաղորդմամբ՝ այս մասին ԱԺ Եվրոպական ինտեգրման հարցերի մշտական հանձնաժողովի նիստում հայտարարեց արտաքին գործերի նախարարի տեղակալ Վահան Կոստանյանը։
ՄԱՆՐԱՄԱՍՆԵՐ

Ազգային ժողովում քննարկվել է Հայաստանի համար Եվրամիության կողմից տրամադրվող ֆինանսական աջակցության ծավալներն ու դրանց օգտագործման ընթացքը։
ԱԺ Եվրոպական ինտեգրման հարցերի մշտական հանձնաժողովի նիստում «Հայաստան» խմբակցության պատգամավոր Արմեն Գևորգյանը հիշեցրեց, որ վերջին տարիներին տարբեր հարթակներում հայտարարվել է շուրջ 3 միլիարդ եվրոյի աջակցության մասին՝ ներառյալ 2,6 մլրդ եվրոյի տնտեսական և ներդրումային փաթեթը, 270 մլն եվրոյի ծրագիրը և վերջերս հայտարարված լրացուցիչ 140 մլն եվրոն։
Պատգամավորը հարց բարձրացրեց՝ այդ գումարներից իրականում որքա՞նն է հասել Հայաստան և ինչպես է արտահայտվել տնտեսության մեջ։
Ֆինանսների նախարար Վահե Հովհաննիսյանը պատասխանեց, որ իրականացվում են մի շարք ծրագրեր, որոնց զգալի մասը վերաբերում է ենթակառուցվածքներին։
ՄԱՆՐԱՄԱՍՆԵՐ

ԱՄՆ նախագահ Դոնալդ Թրամփը 5 օրով հետաձգում է Իրանին տված վերջնաժամկետը, որի ընթացքում Հորմուզի նեղուցը չբացելու դեպքում Իրանի էլեկտրակայանները հարձակման պետք է ենթարկվեին:
Իր Truth Social հարթակում Թրամփը գրել է, որ վերջին երկու օրվա ընթացքում Վաշինգտոնը և Թեհրանը «լավ և արդյունավետ զրույցներ» են ունեցել Մերձավոր Արևելքում հակամարտության «ամբողջական և լիակատար լուծման» շուրջ:

«Հիմնվելով այս խորը, հանգամանալից և կառուցողական զրույցների տոնի վրա, որոնք կշարունակվեն շաբաթվա ընթացքում, ես Պատերազմի նախարարությանը հանձնարարել եմ հինգ օրով հետաձգել Իրանի էլեկտրակայանների և էներգետիկ ենթակառուցվածքների դեմ ուղղված ցանկացած և բոլոր ռազմական հարվածները՝ կախված ընթացիկ հանդիպումների և քննարկումների հաջողությունից», — հավելել է նա։

Հայաստանի արտաքին գործերի նախարար Արարատ Միրզոյանը հայտարարել է, որ Հայաստանում կայանալիք խորհրդարանական ընտրություններին ընդառաջ երկրի դեմ իրականացվող հիբրիդային հարձակումների թելերի մի մասը տանում են Ռուսաստան։
ՀՀ ԱԳ նախարարն այդ մասին ասել է խորհրդարանում լրագրողների հետ ճեպազրույցի ժամանակ։

«Եկեք նախ հասկանանք, թե ինչ է նշանակում հիբրիդային հարձակում։ Եթե փորձենք թարգմանել հիբրիդային բառը, դա «խառնածին» բառն է, այսինքն՝ Հայաստանի դեմ խառնածին գործողություններ են։ Դա կարող է լինել ապատեղեկատվության տարածումը, կիբեռհարձակումները և այլն։ Արվո՞ւմ են Հայաստանի դեմ այսպիսի հարձակումներ, միանշանակ արվում են, ո՞վ կարող է այլ կարծիք հայտնել։ Մի մասը զանգվածային լրատվության միջոցների միջոցով է արվում։ Ձեր միջոցով արվածի մի մասը գիտակցված է արվում, մի մասը պատահաբար ստացվում է՝ լուր է, գալիս է, տարածելու անհրաժեշտություն եք տեսնում»,- ասել է Միրզոյանը՝ պատասխանելով հարցին, թե ի՞նչ նկատի ունեն իշխանությունները, երբ ասում են, որ Հայաստանի դեմ հիբրիդային հարձակումներ են։

ՄԱՆՐԱՄԱՍՆԵՐ

Հայաստանի շախմատի տղամարդկանց թիմի անդամ Հայկ Մարտիրոսյանը «19th Agzamov Memorial» շախմատի միջազգային մրցաշարի առաջատարներից է:
Այս մասին հայտնում է Հայաստանի շախմատի ֆեդերացիան:
Գրոսմայստեր Հայկ Մարտիրոսյանը և ՖԻԴԵ-ն ներկայացնող ռուսաստանցի գրոսմայստեր Արտյոմ Ուսկովը կիսում են առաջին հորիզոնականը Ուզբեկստանի մայրաքաղաք Տաշքենդում անցկացվող «19th Agzamov Memorial» շախմատի միջազգային մրցաշարում:
Երկու շախմատիստներն էլ 6 հնարավորից ունեն 5 միավոր և վաղը կմրցեն միմյանց դեմ:
Մրցաշարն անցկացվում է շվեյցարական մրցակարգով՝ 10 խաղափուլով և կեզրափակվի մարտի 26-ին: Մրցաշարին, ընդհանուր առմամբ, մասնակցում է 48 շախմատիստ:

Հայաստանի իշխանությունները վստահ են, որ Ադրբեջանում պահվող հայերի շուտափույթ ազատ արձակումը ևս մեկ քայլով կամրապնդի Հայաստանի և Ադրբեջանի միջև հաստատված խաղաղությունը։
Խորհրդարանում լրագրողների հետ ճեպազրույցի ժամանակ այս մասին ասել է ՀՀ արտաքին գործերի նախարար Արարատ Միրզոյանը։

«Ադրբեջանում պահվող անձանց, գերիների վերաբերյալ դիրքորոշումը նույնն է, ես գերադասում եմ այս հարցի շուրջ բարձրաձայն և հրապարակային չխոսել, այլ աշխատել։ Երբ արդյունք է լինում, հանրությունը տեղեկացվում է։ Մենք ողջունում ենք վերջերս 4 գերիների ազատ արձակումը և վստահ ենք, որ բոլոր մնացած պահվող անձանց շուտափույթ ազատ արձակումը ևս մեկ քայլով կամրապնդի Հայաստանի և Ադրբեջանի միջև հաստատված խաղաղությունը։ Մենք աշխատում ենք այս ուղղությամբ, նաև Ադրբեջանի և առաջին հերթին Ադրբեջանի գործընկերների հետ ենք այս մասին խոսում։ Այս պահին արդյունք չկա։ Սա այն հարցն է, որ կամ կա արդյունք, կամ չէ։ Աշխատում ենք, իհարկե, չի կարող այս հարցը վերանալ մեր օրակարգից, արդյունք լինի կիմանաք»,- նշել է ՀՀ ԱԳ նախարարը։