Category: Armen Press

Ավելորդ քաշը ոչ միայն գեղագիտական խնդիր է, այլև բազմաթիվ քրոնիկական հիվանդությունների զարգացման ռիսկի գործոն։
Ո՞ր դեպքերում է բարիատրիկ վիրահատությունն իսկապես ցուցված, ի՞նչ արդյունքներ կարելի է ակնկալել դրանից, ինչպե՞ս է այն ազդում ուղեկցող հիվանդությունների վրա, ինչո՞ւ է վիրահատությունից հետո կենսակերպի փոփոխությունը վճռորոշ. այս և մի շարք կարևոր հարցերի շուրջ «Արմենպրես»-ի «Հարց բժշկին» փոդքաստի շրջանակում զրուցել ենք Երևանի պետական բժշկական համալսարանի որովայնային վիրաբուժության ամբիոնի վարիչ, «Միքայելյան» համալսարանական հիվանդանոցի վիրաբուժության կլինիկայի ղեկավար, Հայաստանի վիրաբույժների ասոցիացիայի նախագահ Սուրեն Ստեփանյանի հետ:

Երևանի քաղաքապետարանը նախատեսում է Հրազդանի կիրճին տալ հատուկ պահպանվող համայնքային տարածքի կարգավիճակ։
Համապատասխան որոշման նախագիծն արդեն մշակվել է և առաջիկայում կներկայացվի Երևանի ավագանու քննարկմանը։
Այս մասին Երևանի քաղաքապետարանի գործակարգավարական նիստում հայտնեց  աշխատակազմի բնապահպանության վարչության պետի պաշտոնակատար Սիրարփի Հայկազյանը։

«Բնապահպանության վարչության կողմից արդեն մշակվել է ավագանու որոշման նախագիծը, որը կներկայացվի առաջիկա նիստում։ Այս գործողության իրականացմամբ՝ օրենքի փոփոխությունների փաթեթի ընդունումից հետո Երևանը կդառնա առաջին համայնքը, որը կսահմանի բնության հատուկ պահպանվող համայնքային տարածք։ Սա նաև կարևոր հանձնառություն է Հայաստանում անցկացվելիք COP17-ի շրջանակում»,-նշեց Հայկազյանը։

Նրա խոսքով՝ ինչպես բոլոր հատուկ պահպանվող տարածքները, այնպես էլ Հրազդանի կիրճը պետք է ունենա կառավարման պլան։

«Այդ նպատակով Ասիական զարգացման բանկի կողմից արդեն հայտարարվել է համապատասխան մրցույթ»,- ասաց  նա։

Սևանա լճի մակարդակը նախորդ տարվա հունիսի 29-ի համեմատ արդեն բարձրացել է 5 սանտիմետրով։
2026 թվականի հունիսի 29-ին Սևանա լիճը ծովի մակերևույթից գտնվել է 1900 մետր 75 սանտիմետր բարձրության վրա՝ նախորդ տարվա նույն օրը գրանցված 1900 մետր 70 սանտիմետր նիշի դիմաց։ Իսկ 2026 թվականի հունվարից մինչ հունիսի 29-ն ընկած ժամանակահատվածում Սևանա լճի մակարդակը բարձրացել է 53 սանտիմետրով։
Տվյալ ժամանակահատվածում Արփա-Սևան թունելային ջրատարով Սևանա լիճ է տեղափոխվել 134 միլիոն 306 հազար խմ ջուր։
Սևանա լճից Հրազդանի հունով ոռոգման նպատակներով ջրբացթողումներ առայժմ չեն իրականացվում։

Ռուսաստանի նախագահ Վլադիմիր Պուտինը հայտարարել է, որ Ալյասկայի Անքորիջ քաղաքում 2025 թ. օգոստոսին ԱՄՆ նախագահ Դոնալդ Թրամփի հետ տեղի ունեցած բանակցությունների ժամանակ պայմանավորվածություններ չեն եղել, փաստաթղթեր չեն ստորագրվել, սակայն քննարկվել են փոխզիջումներ և առաջարկներ՝ ուղղված ռուս-ուկրաինական հակամարտության լուծմանը։
Այս մասին նա ասել է «Վեստի» լրատվական ծառայության թղթակից Պավել Զարուբինի հետ հարցազրույցում։
Հակամարտության կարգավորման մասին խոսելիս ռուսաստանցի պաշտոնյաները հաճախ խոսում են «Անքորիջի ոգու» մասին։ Պավել Զարուբինի հետ հարցազրույցում Վլադիմիր Պուտինը փորձել է բացատրել, թե ինչ է դա նշանակում։

«Անքորիջում իսկապես որևէ պայմանավորվածություն չի եղել։ Անքորիջի ոգին, չնայած այն չի ամրագրվել որևէ պաշտոնական փաստաթղթում, ոչ ոք որևէ ստորագրություն չի դրել, սակայն Անքորիջում մենք քննարկել ենք որոշակի հնարավորություններ՝ ուղղված Ուկրաինայում ճգնաժամի ավարտին։ Եվ քննարկված փոխզիջումները հենց այն առաջարկներն էին, որոնք ամերիկյան կողմը մեզ ներկայացրել էր։ Մեզ խնդրել էին ընդունել ամերիկացի բանակցողների կողմից ձևակերպված փոխզիջումները։ Մենք մտածել ենք դրա մասին, և ոչ անմիջապես, բայց մենք եկանք Անքորիջ և ասացինք, որ համաձայն ենք», — ասել է Պուտինը՝ հավելելով, որ Մոսկվան ամերիկյան կողմից այլ դիրքորոշում չի լսել։

Ավարտվել է Ռուստամ Ստեփանյանի (կեղծանունը՝ Չաղ Ռուստամ–խմբ․) հոր՝ Ռոբերտ Ստեփանյանի սպանության դեպքի առթիվ նախաձեռնված քրեական վարույթի նախաքննությունը:
Այս մասին հայտնում են Քննչական կոմիտեից։
Նախաքննության ընթացքում առերևույթ փաստական տվյալներ են ձեռք բերվել այն մասին, որ 2025 թվականի դեկտեմբերի 31-ին Կոմիտասի պողոտայի 44 շենքի բակում անհայտ անձը տարբեր հրազեններով կրակոցներ է արձակել «Toyota» մակնիշի ավտոմեքենայի վարորդ Ռոբերտ Ստեփանյանի ուղղությամբ և դիմել փախուստի, ինչի հետևանքով վերջինս տեղափոխվել է հիվանդանոց և ստացած հրազենային վնասվածքներից մահացել։
Քրեական վարույթի շրջանակում իրականացված մեծածավալ վարութային և ապացուցողական գործողությունների, ինչպես նաև ձեռնարկված օպերատիվ-հետախուզական միջոցառումների արդյունքում պարզվել է, որ Ռ.Ս-ի սպանությունը Ա.Խ.-ի օժանդակությամբ կատարել է դատապարտված Ա.Ս.-ն:
Քննիչի միջնորդության հիման վրա հսկող դատախազի կողմից Ա.Ս.-ի նկատմամբ հարուցվել է հանրային քրեական հետապնդում՝ Քրեական օրենսգրքի 155-րդ հոդվածի 1-ին մասով (սպանությունը), 335-րդ հոդվածի 1-ին մասով (հրազենի և ռազմամթերքի ապօրինի շրջանառությունը) և 264-րդ հոդվածի 1-ին մասով (գույքը ոչնչացնելը կամ վնասելը), իսկ Ա.Խ.-ի նկատմամբ` 46-155-րդ հոդվածի 1-ին մասով (սպանությանն օժանդակելը):
Ա.Ս.-ի նկատմամբ որպես խափանման միջոց կիրառվել է կալանքը, իսկ Ա.Խ.-ի վերաբերյալ կայացվել է կալանավորման որոշում և հայտարարվել հետախուզում:
Ա.Ս.-ի վերաբերյալ քրեական վարույթը մեղադրական եզրակացությամբ ուղարկվել է հսկող դատախազին:

Թբիլիսյան խճուղի-Եղվարդի խճուղի հատվածի միացումը երկու կամուրջների և Կորեայի ձորի վրայով անցնող ճանապարհի միջոցով Երևանի տրանսպորտային համակարգի բեռնաթափման ամենակարևոր և խոշորագույն ծրագրերից է։
Այդ մասին հայտարարել է Երևանի քաղաքապետ Տիգրան Ավինյանը։
Երևանի քաղաքապետարանի հունիսի 29-ի գործակարգավարական նիստում Ավինյանը նշել է, որ տվյալ ճանապարհային նախագիծը քաղաքի համար առաջնահերթ նշանակություն ունի։ 

«Այդ ճանապարհը և կամուրջները, վստահաբար, քաղաքի համար ամենաառաջնահերթ ծրագրերից են։ Այդ լուծմամբ մենք M4 մայրուղին միացնում ենք Հյուսիս-հարավ շրջանցիկ ճանապարհին, և փաստացի Թբիլիսյան խճուղուց ապահովում ենք ուղիղ կապ այդ ճանապարհի հետ։ Այս և հաջորդ տարիներին այդ ուղղությամբ աշխատանքների ծավալը շատ մեծ է լինելու»,- ասել է քաղաքապետը։

Էներգետիկ ենթակառուցվածքներին հասցված հարվածների պատճառով ներքին շուկայում վառելիքի ներկայիս դեֆիցիտը կրիտիկական չէ։
Այս մասին հայտարարել է ՌԴ նախագահ Վլադիմիր Պուտինը՝ հավելելով, որ հարկավոր է ավելի արագ ավարտել նավթավերամշակման գործարանների վերանորոգումները, ապահովել նավթամթերքների ներմուծման ավելացումը:
Այս մասին նա ասել է «Վեստի» լրատվական ծառայության թղթակից Պավել Զարուբինի հետ հարցազրույցում։

Երևանի քաղաքապետ Տիգրան Ավինյանը հայտարարել է, որ մայրաքաղաքում հանրային տրանսպորտի համար առանձնացված գծերի ընդլայնումը շարունակում է մնալ առաջնահերթություն:
Հունիսի 29-ին կայացած գործակարգավարական նիստում Ավինյանը ներկայացրեց Երևանի երթևեկության կառավարման կենտրոնի հավաքագրած տվյալները՝ նշելով, որ 2025 թվականի հունվար-դեկտեմբեր ամիսներին վերլուծվել է շուրջ 75 միլիոն ուղևորություն։
Նրա խոսքով՝ այդ ժամանակահատվածում մայրաքաղաքում տրանսպորտային միջոցների միջին արագությունը կազմել է 25 կմ/ժ և ցուցանիշը նվազման միտում ունի, իսկ պիկ ժամերին մարդատար ավտոմեքենաների միջին արագությունը կարող է իջնել մինչև 10 կմ/ժ։ Քաղաքապետը նշեց, որ մինչև 2 կմ երկարությամբ կարճ ուղևորությունները կազմում են ընդհանուր ուղևորությունների շուրջ 15 տոկոսը, իսկ դրանց մեծ մասն իրականացվում է քաղաքի կենտրոնում։

«Ավտոբուսների համար առանձնացված գծերն առաջնահերթություն են։ Մարդիկ բողոքում են, որ այդ գծերով կարող է երթևեկել միայն հանրային տրանսպորտը, սակայն դա բնական է, քանի որ մեր փողոցները լայնացնելու հնարավորություն չունենք։ Մենք Արշակունյաց պողոտան միացնում ենք Իսակովի պողոտային, ունենք խոշոր կամուրջների կառուցման ծրագրեր, սակայն փողոցներն ընդլայնելու հնարավորություն չկա»,- ասաց Ավինյանը։

Նա նաև տեղեկացրեց, որ նախատեսվում է քաղաքի մուտքերի և տարբեր հատվածների հարևանությամբ ստեղծել խոշոր ավտոկայանատեղիներ, որտեղ քաղաքացիները կկարողանան թողնել իրենց անձնական ավտոմեքենաները և ճանապարհը շարունակել հանրային տրանսպորտով։

Վենեսուելայում հունիսի 24-ին տեղի ունեցած հզոր երկրաշարժերի զոհերի թիվը հասել է 1450-ի։ 3150 մարդ վիրավոր է։ Փրկարարների թիմերը շարունակում են ողջ մնացածներին փլատակներից դուրս բերելու աշխատանքները։

Փոփոխություններ՝ Ղարաբաղից տեղահանված ընտանիքների բնակարանային ապահովման պետական աջակցության ծրագրում
https://www.youtube.com/live/KGyUrRxK1II?si=Q6PV3GdBhwpUJCEB