Category: Armen Press

ԱՄՆ նախագահի հատուկ բանագնաց, Սթիֆ Ուիթքոֆը հայտարարել է, որ Ռուսաստանի և Ուկրաինայի միջև բանակցություններում առաջիկա շաբաթներին նոր առաջընթաց է սպասվում։ Այս մասին նա գրառում է կատարել X սոցիալական հարթակում։
«Նախագահի առաջնորդությամբ մենք շարունակում ենք հասնել նշանակալի արդյունքների՝ միաժամանակ աշխատելով խաղաղության համաձայնագրի մշակման ուղղությամբ, որը մեկընդմիշտ վերջ կդնի պատերազմին։ Քննարկումները շարունակվում են, առաջիկա շաբաթներին սպասվում է լրացուցիչ առաջընթաց», — գրել է նա՝ շնորհակալություն հայտնելով Շվեյցարիայի կառավարությանը ԱՄՆ-ՌԴ-Ուկրաինա եռակողմ բանակցությունները Ժնևում հյուրընկալելու համար։

Ադրբեջանի արտաքին գործերի նախարարությունը շնորհակալություն է հայտնել բոլոր այն երկրներին և միջազգային կազմակերպություններին, որոնցից աջակցության հայտարարություններ, նամակներ ու հեռախոսազանգեր են ստացել Նախիջևանի վրա ԱԹՍ-ների գրոհից հետո։
«Արմենպրես»-ի փոխանցմամբ՝ համապատասխան հայտարարությունը հրապարակվել է Ադրբեջանի ԱԳՆ-ի X-ի միկրոբլոգում։
«Անկեղծորեն շնորհակալություն ենք հայտնում աջակցության վերաբերյալ հայտարարությունների, նամակների և հեռախոսազանգերի համար, որոնք ստացվել են մեր միջազգային գործընկերներից Ադրբեջանի տարածքի վրա իրանական ԱԹՍ-ների հարվածներից հետո։ Մեծապես արժևորում ենք Ադրբեջանի նկատմամբ ցուցաբերված համերաշխությունը և մեր երկրի սուվերենությանը, տարածքային ամբողջականությանը և սահմանների անձեռնմխելիությանն աջակցության վերահաստատումը։
Շնորհակալություն ենք հայտնում բոլոր երկրներին և միջազգային կազմակերպություններին, որոնք այս ընթացքում կանգնած էին Ադրբեջանի կողքին և գնահատում ենք նրանց շարունակական աջակցությունն ու ներգրավվածությունը»,- ասված է հայտարարության մեջ։
Գրառմանը կից Ադրբեջանի ԱԳՆ-ն հրապարակել է լուսանկար, որի վրա պատկերված են այն 40 երկրների ու միջազգային 6 կազմակերպությունների դրոշները, որոնց Ադրբեջանը շնորհակալություն է հայտնել. դրանց թվում է նաև Հայաստանի դրոշը։

❗️Երեք օրվա կտրվածքով Ադու Դաբիից և Դուբայից ապահովվել է ընդհանուր 190 ՀՀ քաղաքացու տեղափոխումը Մասկատ։ «Արմենպրես»-ի փոխանցմամբ՝ այս մասին հայտնում են Հայաստանի արտաքին գործերի նախարարությունից։
«ԱՄԷ-ում՝ Աբու Դաբիում և Դուբայում ՀՀ դիվանագիտական ծառայության մարմինների կողմից հավաքագրվել են Օմանով ՀՀ վերադառնալու ցանկություն ունեցող քաղաքացիների տվյալները և անվճար ավտոբուսներով ապահովվել է տեղափոխում դեպի Օման՝ Մասկատի օդանավակայան։
Աբու Դաբիից և Դուբայից դեպի Մասկատ կազմակերպված փոխադրումով տեղափոխվել է մարտի 4-ին՝ 94, մարտի 5-ին՝ 58-ը, մարտի 6-ին՝38 ՀՀ քաղաքացի։
Արդյունքում, երեք օրվա կտրվածքով Ադու Դաբիից և Դուբայից ապահովվել է համապատասխանաբար 70 և 120 (ընդհանուր թվով՝ 190) ՀՀ քաղաքացու տեղափոխումը Մասկատ»,– նշված է ԱԳ նախարարության տարածած հաղորդագրության մեջ։
Ընդգծվում է, որ տեղական իշխանությունների կողմից Դուբայում ապահովվել է ոստիկանական ուղեկցություն։ Գրանցված, բայց չտեղափոխված քաղաքացիներն այդ պահին դեռևս նախընտրել են մնալ Դուբայում։
«Այս պահի դրությամբ ԱՄԷ-ում ՀՀ դիվանագիտական ծառայության մարմինները հավաքագրել են այնտեղ գտնվող բոլոր՝ 170 ՀՀ քաղաքացիների տվյալները, նրանց հետ կապ է պահպանվում անհատական կամ խմբային տարբերակներով։ Այդ թիվը ներառում է նաև Աբու Դաբիում գտնվող 30 հայ ուսանողների։
Այն դեպքերում, երբ Դուբայի որոշ հյուրանոցներում թռիչքները ոչ իրենց մեղքով բաց թողած քաղաքացիները բախվել են խնդիրների, Դուբայում ՀՀ գլխավոր հյուպատոսությունը ներգրավվել է դրանց հասցեագրելու և անհրաժեշտ աջակցություն ցուցաբերելու քննարկումներով։ Պահանջվող ձևաչափով համապատասխան տեղեկատվություն է տրամադրվել նաև ԱՄԷ ԱԳ նախարարությանը»,– եզրափակվում է Հայաստանի արտաքին քաղաքական գերատեսչության հաղորդագրությունը։

ՄԱԿ-ի փախստականների հարցերով գերագույն հանձնակատարի գրասենյակը (ՄԱԿ ՓԳՀ) հայտարարել է, որ Լիբանանում մոտ 100 000 մարդ տեղահանվել է, իսկ այնտեղ ապրող տասնյակ հազարավոր սիրիացի փախստականներ վերադարձել են սահմանից այն կողմ։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
ՄԱԿ ՓԳՀ-ն ստեղծված իրավիճակն անվանել է «լուրջ մարդասիրական արտակարգ իրավիճակ»։
Իսրայելը լայնածավալ տարհանման հրամաններ է տվել հարավային Լիբանանի և Բեյրութի որոշ հատվածների համար։
«ՄԱԿ-ի փախստականների հարցերով գերագույն հանձնակատարի գրասենյակը Մերձավոր Արևելքում սրվող ճգնաժամը հայտարարել է որպես լուրջ մարդասիրական արտակարգ իրավիճակ, որը պահանջում է անհապաղ արձագանք ամբողջ տարածաշրջանում և Հարավարևելյան Ասիայում», — Ժնևում կայացած մամուլի ասուլիսում ասել է ՄԱԿ ՓԳՀ արտակարգ իրավիճակների և ծրագրերի աջակցության տնօրեն Այակի Իտոն։
Նա նշել է, որ տեղահանության մասշտաբի վերաբերյալ մինչ այժմ տրված թվերն, ամենայն հավանականությամբ, թերագնահատված են։
Այակի Իտոն նաև ասել է, որ հակամարտության առաջին օրերին մոտ 100 000 մարդ տեղահանվել է Իրանում, և որ ՄԱԿ-ի փախստականների հարցերով գերագույն հանձնակատարի գրասենյակի աշխատակիցներն ամեն օր հարյուրավոր զանգեր են ստանում օգնություն խնդրող իրանցիներից։

Հայաստանի Հանրապետության էկոնոմիկայի նախարար Գևորգ Պապոյանն ընդունել է Հայաստանում Ղազախստանի Հանրապետության արտակարգ և լիազոր դեսպան Բոլատ Իմանբաևին։
«Արմենպրես»-ի փոխանցմամբ՝ Էկոնոմիկայի նախարարությունից հայտնում են, որ քննարկվել են տնտեսության ոլորտում երկկողմ փոխշահավետ գործակցության ընդլայնմանը, առևտրաշրջանառության ծավալների, ինչպես նաև Ղազախստանից դեպի Հայաստան ներդրումային հոսքերի ավելացմանը վերաբերող հարցեր։
Անդրադարձ է կատարվել նաև տրանսպորտային կապակցվածությանն ու կայուն մատակարարումների ապահովմանը, զբոսաշրջության զարգացմանը և երկուստեք հետաքրքրություն ներկայացնող այլ թեմաների։

Բահրեյնի զինված ուժերի գլխավոր հրամանատարությունը հայտարարել է երկրի տարածքը թիրախավորած 78 հրթիռ և 143 անօդաչու թռչող սարք ոչնչացնելու մասին: «Արմենպրես»-ի փոխանցմամբ՝ այս մասին հաղորդում է Al Jazeera-ն։
Քուվեյթի պաշտպանության նախարարության մամուլի քարտուղար Սաուդ ալ Աթվանը հայտարարել է, որ փետրվարի 28-ից ի վեր երկրի զինվորականները հայտնաբերել և չեզոքացրել են 212 բալիստիկ հրթիռ և 394 անօդաչու թռչող սարք։
Նրա խոսքով՝ գրոհների մեկնարկից ի վեր վիրավորվել է 67 քուվեյթցի զինծառայող, հաղորդում է Al Arabiya-ն։ Հեռուստաալիքը նշում է, որ սա հակամարտության սկսվելուց ի վեր վիրավորների ամենամեծ թիվն է Պարսից ծոցի բոլոր երկրների բանակների շարքում։
Կատարում նույնպես հաղորդել են ամերիկյան «Ալ Ուդեյդ» ավիաբազան թիրախավորած մի քանի հրթիռի և ԱԹՍ-ի կալանման մասին, գրում է «The National» հրատարակությունը՝ հղում անելով Կատարի իշխանությունների հայտարարությանը։

Իսրայելի պաշտպանության բանակը գրոհում է Բեյրութի Դահիյա շրջանում գտնվող «Հեզբոլլահ» շարժման ենթակառուցվածքների վրա: «Արմենպրես»-ի փոխանցմամբ՝ այս մասին ասվում է Իսրայելի պաշտպանության բանակի հաղորդագրության մեջ։
Զինվորականները խոստացել են մանրամասները տրամադրել ավելի ուշ։
Իսրայելի պաշտպանության բանակը Դահիյային արդեն հարվածներ է հասցրել լույս մարտի 6-ի գիշերը։ Դրանից առաջ իսրայելցի զինվորականները խաղաղ բնակիչներին կոչ են արել տարհանվել։
Տարհանման մասին նման հրամանները կարող են խախտել միջազգային մարդասիրական իրավունքը, հայտարարել է ՄԱԿ-ի մարդու իրավունքների հարցերով գերագույն հանձնակատար Վոլկեր Տյուրկը։ Ըստ BBC-ի՝ նա ասել է, որ «բնակչության զանգվածային, ընդհանուր տեղահանման մասին հրամանները», երբ խոսքը հարյուրավոր կամ հազարավոր մարդկանց մասին է, «լուրջ հարցեր են առաջացնում միջազգային մարդասիրական իրավունքի տեսակետից»։
Այն շրջաններում, որտեղից Իսրայելի պաշտպանության բանակը կոչ է անում տարհանվել, բնակվում է մոտավորապես 400 000 մարդ։

Իրանի զինված ուժերը հայտարարել են, որ առաջիկա օրերին կակտիվացնեն և կընդլայնեն թշնամու դիրքերի վրա հարձակումները։ Նաև հաղորդվել է իսրայելական և ամերիկյան թիրախներին նոր հարվածներ հասցնելու մասին։
«Արմենպրես»-ի փոխանցմամբ՝ այս մասին հաղորդում է Mehr գործակալությունը՝ վկայակոչելով Իրանի զինված ուժերի հրամանատարության շտաբի խոսնակին։
Խաթամ ​​ալ-Անբիա կենտրոնական շտաբի խոսնակի հայտարարության համաձայն՝ Իրանի ռազմաօդային և ռազմածովային ուժերը պայթուցիկ անօդաչու թռչող սարքեր են արձակել Իսրայելի ուղղությամբ՝ հարվածելով Ռամաթ Դավիդի ավիաբազային և Մերոն լեռան ռադարային կայանին։
Հայտարարության մեջ նաև ասվում է, որ ռազմածովային ուժերի հարվածային անօդաչու թռչող սարքերը թիրախավորել են Քուվեյթի Ալ-Օդեյրի ճամբարում ամերիկացիների գտնվելու վայրը։
Բացի այդ, խոսնակը նշել է, որ բանակի ցամաքային ուժերն անօդաչու թռչող սարքերով հարձակում են իրականացրել Իրաքյան Քրդստանի մայրաքաղաք Էրբիլում ամերիկյան շտաբի վրա։
Իր հերթին, Իսլամական հեղափոխության պահապանների կորպուսի հասարակայնության հետ կապերի բաժինը հայտնել է, որ մարտի 6-ին Իրանը սկսել է «Իրական խոստում 4» գործողության 20-րդ ալիքը՝ անօդաչու թռչող սարքերով և հրթիռներով թիրախավորելով Թել Ավիվի կենտրոնում գտնվող դիրքեր։

Հայաստանի տարածքային կառավարման և ենթակառուցվածքների նախարար Դավիթ Խուդաթյանը նախարարության աշխատակազմին է ներկայացրել նորանշանակ տեղակալ Առնակ Ավետիսյանին։

ԱՄՆ զինվորական հետաքննիչները կարծում են, որ հարվածը Իրանի Մինաբ քաղաքում գտնվող օրիորդաց դպրոցին, ամենայն հավանականությամբ, հասցրել է ԱՄՆ-ն: Այս մասին գրում է Reuters-ը՝ հղում անելով երկու աղբյուրի։
Գործակալության զրուցակիցները նշել են, որ սա վերջնական եզրակացությունը չէ. հետաքննությունը շարունակվում է։
Reuters-ին չի հաջողվել պարզել, թե ինչ տվյալների հիման վրա են հետաքննիչներն այս եզրակացությանը հանգել, ինչպես նաև հայտնի չէ, թե դեռ որքան ժամանակ կարող է տևել հետաքննությունը։