Category: Azatutyun

Թրամփը բանակցություններին ժամանակ է տալիս, Իրանը՝ դադարեցնում հարվածները
Իրանն ու ԱՄՆ-ն երկուշաբթի դադարեցրել են ռազմական գործողությունները՝ Պարսից ծոցի նավագնացությանը և նավթարդյունաբերությանը հնարավորություն տալով խուսափել հրթիռային հարվածներից: Սա տեղի է ունենում այն բանից հետո, երբ ՄԱԿ-ում ԱՄՆ ներկայացուցիչը հայտարարեց, որ նախագահը «բանակցություններին որոշակի տարածք է տալիս»։
Թեհրանը հայտնել է, որ Մերձավոր Արևելքում Վաշինգտոնի դաշնակիցների դեմ պատասխան հարձակումները դադարեցրել է, իսկ ՄԱԿ-ում ԱՄՆ դեսպան Մայք Ուոլցը հայտարարել է, որ թեև ամերիկյան ուժերը շարունակում են մնալ «լիովին պատրաստ», Թրամփը բանակցություններին «մի փոքր տարածք» է տրամադրում։
Ավելի կարդալ՝ այստեղ

Զանգվածային հրաձգություն Սիեթլում
Միացյալ Նահանգների Սիեթլ քաղաքի կենտրոնում սննդի փառատոնի ժամանակ հրաձգություն է տեղի ունեցել, առնվազն երկու մարդ զոհվել է, հինգը՝ այդ թվում՝ երկու տարեկան երեխա, վիրավորվել են:
«Խնդրում ենք խուսափել այդ տարածքից», — զգուշացրել է Սիեթլի ոստիկանությունը՝ նկատի ունենալով Սիեթլի կենտրոնը, որտեղ անցկացվում էր սննդի փառատոն: «Ոստիկանությունը հետաքննում է հրաձգության դեպքը», — նշել են իրավապահները։

F-16 կործանիչը երրորդ ռուսական անօդաչու թռչող սարքն է խոցել, Reuters-ի փոխանցմամբ՝ հայտարարել է Ռումինիայի պաշտպանության նախարարությունը:
Ռումինիայի նախագահ Նիկուսոր Դանը հայտարարել է. «Անթույլատրելի է, որ Ռուսաստանը շարունակի խախտել Ռումինիայի օդային տարածքը, որը միաժամանակ ՆԱՏՕ-ի և Եվրամիության օդային տարածք է»։

Իսրայելի վարչապետ Բենյամին Նեթանյահուն հայտարարել է, որ Վաշինգտոնում ԱՄՆ նախագահ Դոնալդ Թրամփի հետ հանդիպմանը կքննարկեն «օրակարգում գտնվող բոլոր հարցերը, այդ թվում՝ Իրանում տիրող իրավիճակը»: Այս մասին հայտնում է The Times of Israel-ը:
Նեթանյահուն երկուշաբթի կմեկնի Վաշինգտոն և երեքշաբթի կհանդիպի Թրամփի հետ։ Նա նաև կմասնակցի մահացած ամերիկացի սենատոր Լինդսի Գրեհեմի հուղարկավորությանը, հայտնել է նրա գրասենյակը։

Երևանն ու Թեհրանը քննարկել են Արաքս գետի վրա երկրորդ կամրջի կառուցման նախաձեռնությանը վերաբերող հարցեր, հայտնում է Հայաստանի տարածքային կառավարաման և ենթակառուցվածքների (ՏԿԵ) նախարարությունը:
Իրանում գտնվող ՏԿԵ նախարար Դավիթ Խուդաթյանն ու ԻԻՀ ճանապարհների և քաղաքաշինության նախարար տիկին Ֆարզանե Սադեղը հանդիպմանը նշել են, որ դրա իրականացումը կբարձրացնի երկու երկրների միջև տրանսպորտային թողունակությունը և կնպաստի տնտեսական համագործակցության հետագա զարգացմանը։
Նրանք պայմանավորվել են ձեռնարկել անհրաժեշտ քայլեր՝ երկու երկրների միջև բեռնափոխադրումների ծավալների ավելացման ուղղությամբ։

Հեռախոսազրույց են ունեցել Աբբաս Արաղչին և Կայա Կալլասը
Mher-ի փոխանցմամբ՝ նրանք քննարկել են տարածաշրջանային և միջազգային վերջին զարգացումները։
Անդրադառնալով Կասպից ծովում իրանական առևտրային նավի վրա ուկրաինական հարձակմանը՝ Իրանի ԱԳ նախարարը կոչ է արել ՄԱԿ-ի Անվտանգության խորհրդին, Եվրոպական Միությանը և միջազգային հանրությանը վճռական արձագանք տալ և պահանջել, որ այս հանցավոր գործողության մեղավորներն ու հովանավորները պատասխանատվության ենթարկվեն։

Ուկրաինայի հակամարտությունը սառեցնել հնարավոր չէ․ Պեսկով
Ուկրաինայի հակամարտությունը սառեցնել հնարավոր չէ՝ հաշվի առնելով Ուկրաինայի կառավարության դիրքորոշումը, հայտարարել է ՌԴ նախագահի մամուլի քարտուղար Դմիտրի Պեսկովը՝ անդրադառնալով Ղազախստանի նախագահ Կասիմ-Ժոմարտ Տոկաևի հայտարարությանը, թե հակամարտությունը կարելի է սառեցնել։
Պեսկովի խոսքով՝ Կիևի դիրքորոշման պատճառով «սառեցումը, որպես այդպիսին, անհնար է»։

Զանգվածային վրաերթ Բեռլինում․ զոհ և վիրավորներ կան
Շաբաթ երեկոյան Բեռլինի ԼԳԲՏ համայնքի մարդաշատ միջոցառման ժամանակ զանգվածային վրաերթի հետևանքով մեկ մարդ զոհվել, ևս 17-ը՝ վիրավորվել են, ոմանց կյանքին վտանգ է սպառնում։ Իրավապահները որոնում են մեղավորներին, Reuters-ի փոխանցմամբ՝ հայտնել են մայրաքաղաքի ոստիկանությունից։
Ավելի ուշ ոստիկանությունից մանրամասնել են, որ որպես կասկածյալ որոնում են «Բեռլինի իսլամիստական շրջանակների անդամի» և միջոցներ են ձեռնարկում նրան ձերբակալելու ուղղությամբ։

Կասպից ծովում իրանական առևտրային նավի վրա ուկրաինական հարձակումից զոհ կա, հայտնում են Թեհրանից
Իրանի արտաքին գործերի նախարարությունը շաբաթ օրը դատապարտել է Կասպից ծովում իրանական առևտրային նավի վրա ուկրաինական հարձակումը՝ հայտարարելով, որ պայթյունի պատճառով մեկ նավաստի զոհվել է, ևս մեկը՝ վիրավորվել, փոխանցում է Reuters-ը։
Թեհրանը նավի վրա հարձակումն ագրեսիա է որակել և հայտարարել, որ պաշտպանելու է իր ազգային շահերն ու անվտանգությունը՝ միևնույն ժամանակ Կիևին մեղադրելով ուկրաինական պատերազմն ընդլայնելու փորձերի մեջ։
Ինչպես հայտնում է իրանական պետական IRNA գործակալությունը, Թեհրանում Ուկրաինայի ժամանակավոր հավատարմատարը կանչվել է ԱԳՆ, որտեղ իրանական կողմն իր բողոքն է հայտնել, ինչպես Թեհրանն է բնութագրում, «թշնամական և հանցավոր» հարձակման առթիվ։