Category: Infocom

❗️Ժամը 17:00-ի դրությամբ Լոռու և Տավուշի մարզերում իրականացվում են բնակավայրերի ուսումնասիրման, որոնողական, վնասների գնահատման, նկուղներից ջրահեռացման, ինչպես նաև տարհանման և սննդի բաշխման աշխատանքներ։
🔸 Սանահին կայարանից ընդհանուր տարհանվել է 137 բնակիչ (5-ը` մայիսի 28-ին), 141 բնակիչ շարունակում է մնալ Սանահին կայարանում։ Ջրահեռացվել է ընդհանուր 130 տոննա ջուր։ Փրկարարական աշխատանքների արդյունքում Լոռու և Տավուշի մարզերի տարբեր բնակավայրերից փրկվել և տարհանվել է 443 մարդ: [ՆԳՆ ՓԾ]

🇪🇺🇦🇲 ՀՀ–ում ԵՄ դիտորդներն ու Ռումինիայի դեսպանն այցելել են Կապանի օդանավակայան, Մեղրի և Ագարակ համայնքներ։
🗣 «Պատիվ է հյուրընկալել ՀՀ-ում Ռումինիայի դեսպան, նորին գերազանցություն Կոռնել Իոնեսկուին Սյունիքի օդանավակայանում, Մեղրիի և Ագարակի տարածաշրջաններում»,-նշված է ՀՀ-ում ԵՄ առաքելության` X-ի միկրոբլոգում արած գրառման մեջ։

📢 Հայաստանյան 5 իրավապաշտպան կազմակերպություններ հանդես են եկել հայտարարությամբ․
❗️«2024թ մայիսի 27-ին բողոքի ակցիաների ժամանակ ՀՀ ոստիկանության ծառայողների կողմից հասարակական կարգի պահպանմանն ուղղված գործողություններն ուղեկցվել են մասնակիցներին զանգվածային բերման ենթարկելով, որոշ մասնակիցների նկատմամբ բռնություններով, միջոցների ոչ իրավաչափ կիրառման դեպքերով։
🔸«Դատապարտում ենք իրավապահ մարմինների բռնարարքների յուրաքանչյուր դեպք, յուրաքանչյուր դրսևորում և պահանջում ենք ՀՀ իրավապահ մարմինների աշխատակիցներին գործել բացառապես օրինականության շրջանակներում, մարդու իրավունքների նկատմամբ հարգանքի և ժողովրդավարական պետությունում հասարակական կարգի պահպանման սկզբունքներին համապատասխան։
📌 ՀՀ ներքին գործերի նախարարությունից պահանջում ենք հարգել խաղաղ ցույցի մասնակիցների իրավունքները, զերծ մնալ բռնություններից, անհամաչափ ուժի գործադրումից և նրանց արժանապատվությունը նվաստացնող այլ գործողություններից, ապահովել ցանկացած խաղաղ բնույթ ունեցող հավաքի ընթացքը։ Ժողովրդավարական պետության չափանիշներին համապատասխան ոստիկանություն ունենալու հարցը մնում է օրակարգում առաջնային»։

⚡️ Գեղարքունիքի մարզում երեք կանայք են կայծակնահարվել, նրանցից մեկը տեղում մահացել է, մյուս երկուսը տեղափոխվել են հիվանդանոց։

🏥 Գավառի բժշկական կենտրոնի վերակենդանացման բաժանմունքի վարիչ Նարինե Թումանյանը հայտնել է․ « Համապատասխան բուժօգնությունից հետո վիճակները բավարար է։ Ունեն զարկերակային գերճնշում։ Չորս ժամից կկարգավորվեն և ամեն ինչ նորմալ կլինի»։ |factor.am|

🗣 Աղետի գոտում ևս մի քանի օր, օրը 200-300 կամավորի կարիք կունենանք. ՏԿԵ նախարար Գնել Սանոսյան

👷‍♀️ «Խնդրել ենք, որ մինչև 200 կամավոր մոտենա: Տիղմով ու ջրով լցված բավականին շատ տարածքներ ունենք՝ շենք-շինությունների ու խանութների հատվածներ կան, որոնց հատկապես ներսի հատվածներում ձեռքի աշխատանք է պահանջվում: Հիմա ձեռքի ուժի կարիք կա։ Այնպես որ, արդեն կամավորների կարիք ունենք: Եթե մարդիկ կան, որ ցանկանում են օգնել, խնդրում ենք իրենց դիմել, որ համակարգված աշխատենք»,- ասաց Սանոսյանը:
🏢 Կամավորների աշխատանքը համակարգում են Լոռու մարզպետարանի ներկայացուցիչն ու Ալավերդիի համայնքապետի տեղակալը։ Սանոսյանը նաև նշել է, որ տեխնիկայի կարիք չկա, սակայն արտահագուստի կա։ |azatutyun.am|

Արդյո՞ք հնարավոր չէր կանխատեսել հեղեղումները․ Գագիկ Սուրենյանի մեկնաբանությունը |factor.am|
🗣️ «Մայիսի 24-26-ն ընկած ժամանակահատվածում հանրապետություն ներթափանցած հզոր ցիկլոնի հետևանքով սպասվող ինտենսիվ անձրևների մասին մայիսի 24-ի առավոտյան հատուկ նախազգուշացում ենք տարածել, ինչպես նաև տեղեկագրով հայտնել բոլոր գերատեսչություններին»,- ասել է ՇՄՆ «Հիդրոօդերևութաբանության և մոնիթորինգի կենտրոն»-ի տնօրենի տեղակալ Գագիկ Սուրենյանը։
📈 Ըստ Սուրենյանի՝ իրենց տարածած հաղորդագրությունն, ըստ էության, ենթադրում էր, որ հանրապետության առանձին գետերում հնարավոր են գետերի ելքերի զգալի մեծացում։ Մայիսի 24-ի հաղորդագրության մեջ թեև խոսվում է սպասվող ինտենսիվ անձրևների մասին, սակայն հնարավոր հեղեղումների մասին խոսք չկա։

Հանրապետությունը պետք է կերտվի ժողովրդի և ոչ թե իրեն վերնախավ համարող մեկուսացած խմբերի երազանքներին և պատկերացումներին համահունչ․ Նիկոլ Փաշինյանի ելույթը Սարդարապատի հուշահամալիրում

🔸 «Մեր խնդիրը Հանրապետությունը մեր ժողովրդի երազանքներին համապատասխանեցնելն է, ոչ թե կենացներին, ոչ թե իրեն վերնախավ համարող մեկուսացած խմբերի կողմից թելադրվող շինծու տեքստերին, այլ քաղաքացու, իրական մարդու, իրական ժողովրդի կարիքներին, նպատակներին համապատասխանացնելու։
🔸․․․Մարդը ուզում է լինել ազատ, բարեկեցիկ, կենսուրախ ու երջանիկ, մարդը ուզում է ապրել խաղաղ, արդար ու արժանապատիվ միջավայրում։ Եվ այս նպատակին պիտի ծառայի պետությունը, Հայաստանի Հանրապետությունը, որը մարդու պետությունն է և պետք է ծառայի մարդուն, բայց սա մի նպատակ է, որ հեշտ չի տրվում․ այն անցնում է փշերի ու որոգայթների, ծանր ու դժվար որոշումների, հիասթափությունների ու չհասկացվածության միջով, բայց դա ուղիղ ճանապարհ է, և մենք անցնում ենք այդ ճանապարհը ու մենք հասնելու ենք մեր Ավետյաց երկրին, մեր Ավետյաց Հանրապետությանը»։

Հանրապետության տոնի առթիվ ՀՀ բարձրագույն ղեկավարությունն այցելել է Սարդարապատի հուշահամալիր։
Այժմ հուշահամալիրում ելույթ է ունենում ՀՀ վարչապետ Նիկոլ Փաշինյանը։

✍️ ՀՀ վարչապետի որոշմամբ փրկարարական ծառայության գեներալ-մայորի կոչում է շնորհվել ՆԳ նախարարի տեղակալ-Փրկարար ծառայության գնդապետ Կամո Ցուցուլյանին։