Category: Infocom

🇦🇲🇫🇷 Փետրվարի 13-ին Փարիզի քաղաքային խորհուրդը միաձայն ընդունել է «Ադրբեջանում ձերբակալված ԼՂ նախկին առաջնորդների մտահոգիչ իրավիճակի վերաբերյալ» կոչ։
📌 Նշված կոչով, անդրադառնալով ԼՂ նախկին առաջնորդների ձերբակալման հանգամանքներին, Ադրբեջանում նրանց պահման պայմաններին և նրանց դեմ առաջադրված շինծու մեղադրանքներին, Փարիզի քաղաքային խորհուրդը դատապարտում է ԼՂ նախկին առաջնորդների ապօրինի ձերբակալությունը և կեղծ դատավարությունները, պահանջում է նրանց ազատ արձակումը։
[Ֆրանսիայում ՀՀ դեսպանություն]

🇦🇲🇩🇪 Վարչապետ Նիկոլ Փաշինյանը փետրվարի 13-16-ը աշխատանքային այցով մեկնել է Մյունխեն:
📌 Վարչապետը կմասնակցի Մյունխենի անվտանգության համաժողովի բացման պաշտոնական արարողությանը:
🤝 Համաժողովի շրջանակում Նիկոլ Փաշինյանը երկկողմ մի շարք հանդիպումներ կունենա արտերկրի գործընկերների հետ: [ՀՀ կառավարություն]

⚖️ Մարդու իրավունքների եվրոպական դատարանն այսօր որոշում է կայացրել «Իշխանյանն ընդդեմ Հայաստանի» գործով:
📝 Այս գործը վերաբերում է 2015 թվականի «Electric Yerevan» բողոքի ցույցի ցրմանը, մասնավորապես՝ Հովհաննես Իշխանյանի ձերբակալությանը և ոստիկանությունում պահվելուն:
💶 ՄԻԵԴ-ը որոշեց, որ Հայաստանի կառավարությունը պարտավոր է դիմումատուին վճարել՝ ոչ նյութական վնասի համար՝ 5,000 եվրո և դատական ծախսերի համար՝ 2,000 եվրո։ |aravot.am|

🇦🇲🇦🇿 Ռուբեն Վարդանյանը հայտարարել է, որ հրաժարվել է Ադրբեջանի կողմից նշանակված պաշտպան Ազեր Մահարրամովից, և որ նրա իրավունքները պաշտպանելու է միայն նրա պայմանագրային փաստաբան Աբրահամ Բերմանը, գրում են ադրբեջանական լրատվամիջոցները։
⚖️ Դատական նիստի սկզբում ԼՂ նախկին պետնախարարը և նրա փաստաբան Աբրահամ Բերմանը խնդրել են պայմաններ ստեղծել առանձին հանդիպման համար։ Բաքվի դատարանը բավարարել է միջնորդությունը, որից հետո ընդմիջում է հայտարարվել։ |armeniasputnik.am|

📻 ՀՀ-ից 2010 թվականին հափշտակված, նույն տարվա ընթացքում իրականացված գնահատման համաձայն՝ 1 միլիարդ 755 միլիոն դրամ արժեքով «Ռադիո» ՓԲ ընկերությունը (հայտնի է Նորատուսի ալեհավաքներով, ունի ռազմավարական նշանակություն) վերադարձվել է Հայաստանի Հանրապետությանը:
🔸 Մասնավորապես՝ «Ռադիո» ՓԲ ընկերության սեփականատեր «Միջազգային Ռադիոցանց» ՓԲ ընկերության 100 տոկոս բաժնեմասերը 2025 թվականի փետրվարի 12-ին փոխանցվել են Հայաստանի Հանրապետությանը:
[Նիկոլ Փաշինյան]

🇦🇲🇮🇷Առաջին նախագահ Լևոն Տեր-Պետրոսյանն իր առանձնատանը հանդիպել է ՀՀ-ում Իրանի դեսպանի հետ:
🤝 Շուրջ մեկուկես ժամ տևած զրույցի ընթացքում շոշափվել են հայ-իրանական հարաբերությունների ներկայիս իրավիճակը և դրանց խորացման հեռանկարները։ Նախագահն իր հիացմունքն արտահայտեց պարոն դեսպանի՝ օրերս հրավիրած չափազանց բովանդակալից ասուլիսի վերաբերյալ:
[Լևոն Տեր-Պետրոսյանի գրասենյակ]

⚖️ ԱԱԾ գեներալ-մայոր Տիգրան Բարսեղյանի դիակի արտաքին զննությամբ բռնության հետքեր չեն հայտնաբերվել: Այս մասին Infocom-ի հարցին ի պատասխան հայտնել է ՔԿ մամուլի քարտուղար Կիմա Ավդալյանը։
🔸 Հիշեցնենք, որ armlur.am կայքը երեկ հայտնել էր, որ իրենց տեղեկություններով՝ Բարսեղյանի մարմինը գտել են տանը, մահանալուց 3 օր անց։
🗣 ՔԿ-ից նշում են, որ դեպքի առթիվ նախաձեռնվել է քրեական վարույթ՝ Քրեական օրենսգրքի 155-րդ հոդվածի 1-ին մասի հատկանիշներով (սպանությունը` ապօրինաբար մեկ ուրիշին կյանքից զրկելը)․
📌 Նշենք, որ մահվան դեպքերի առթիվ քրեական վարույթները նախաձեռնվում են սպանության հոդվածով՝ քննչական որոշակի գործողություններ իրականացվելով (որոնք կարող են իրականացվել միայն նախաձեռնված վարույթի շրջանակում) դեպքի հանգամանքները ամբողջապես պարզելու, վարկածը հաստատելու կամ հերքելու նպատակով, որից հետո միայն կայացվում է քրեադատավարական համապատասխան որոշում (վարույթի կարճում կամ արարքի վերաորակում)։