Category: Vardan Voskanyan

Իրանի արտգործնախարար Արաղչին «X» սոցիալական ցանցում արձագանքել է ԱՄՆ-ի պետքարտուղարի այսօրվա հայտարարությանը, նշելով՝ «Պրն. Ռուբիոն խոստովանեց այն, ինչ մենք բոլորս գիտեինք․ ԱՄՆ-ը մտել է ընտրովի պատերազմի մեջ՝ հանուն Իսրայելի։ Երբեք, այսպես կոչված, իրանական «սպառնալիք» չի եղել»։
Այս հարցում քարոզչական դաշտում իր պետքարտուղարի՝ հայտարարության հնարավոր բացասական ազդեցությունը մեղմելու համար ԱՄՆ-ի նախագահ Թրամփը հայտարարել է, որ Իսրայելն իրեն չի ստիպել մտնել պատերազմի մեջ, կարծում եմ՝ դա անելով ոչ միայն ներքաղաքական նկատառումներով, այլ նաև հնարավոր այն հարցերը բացառելու, որոնք կարող են միգուցե ոչ բացեիբաց, սակայն հնչեցնել պատերազմից զգալի կորուստներ կրող Պարսից ծոցի արաբական երկրների ղեկավարները։
#հարափոփոխ_տարածաշրջանը
🆔 @vardan_voskanyan

Վերջին երկու օրերին ԱՄՆ-ի նախագահ Թրամփի վարչակազմը միմյանցից որոշակիորեն տարբեր բացատրություններ է տալիս Իրանի դեմ պատերազմ սկսելու պատճառների և նպատակահարմարության վերաբերյալ։
Նման բացատրությունների անհրաժեշտությունը պետք է, որ պայմանավորված լինի ամերիկյան հասարակական կարծիքում առկա կասկածների առկայությամբ և դրանք փարատելու՝ վարչակազմի մտահոգությամբ։
Վաշինգտոնի՝ պատերազմի մեջ մտնելու պատճառի կարծես թե իրականությանն ամենամոտ պատկերը այսօր ներկայացրել է ԱՄՆ-ի պետքարտուղար Ռուբիոն, որը նշել է, թե Թել-Ավիվն, ամեն դեպքում, հարված էր հասցնելու Իրանին, և նման հարձակումից հետո վտանգ կար, որ իրանական պատասխանը կլիներ ոչ միայն Իսրայելի, այլ նաև տարածաշրջանի ամերիկյան ուժերի ուղղությամբ, ինչը ԱՄՆ-ի զինուժում կհանգեցներ ավելի մեծ զոհերի թվի, քան այժմ կա։
Այն որ Իսրայելի հարձակումը պարտադիր կերպով չէր նշանակելու իրանական պատասխան հարված ԱՄՆ-ի տարածաշրջանային ռազմական ներկայությանը, կարելի է փաստել նաև 12-օրյա պատերազմի փորձով, երբ իրանցիներն, այն էլ նախօրոք զգուշացնելով Կատարի իշխանությանը, հրթիռակոծեցին այդ երկրում տեղակայված ԱՄՆ-ի ռազմակայանը, Իրանի տարածքի՝ ամերիկյան ռմբակոծությունից հետո միայն։
Նեթանյահուի կողմից ԱմՆ-ին պատերազմի մեջ ներքաշելու մասին ռազմական գործողությունների սկզբից հետո խոսել էր նաև Թուրքիայի նախագահ Էրդողանը, որը, հավանաբար, ՆԱՏՕ-ի խողովակներով նույնպես տեղեկացված էր եղել։
#հարափոփոխ_տարածաշրջանը
🆔 @vardan_voskanyan

Երեկ մամուլի ասուլիսի ժամանակ Հայաստանում Իրանի դեսպան Շիրղոլամին, պատասխանելով տարածաշրջանում լարվածության պայմաններում Հայաստանի համար ստեղծված վտանգների մասին հարցին, շեշտել է՝ «Մեր բարեկամ և եղբայր Հայաստանի անվտանգությունը մեզ համար չափազանց կարևոր է։ Հայաստանի տարածքային ամբողջականությունը նույնպես մեր կարմիր գիծն է»։
Միայն պետականության հինավուրց ավանդույթով պատասխանատու երկիրը կարող է իր համար ծանրագույն և հսկայական ռեսուրսներ խլող պատերազմի պայմաններում շարունակել առանց երկմտանքի կրկին արձանագրել, որ հարևան բարեկամական և եղբայրական մեր պետության ամվտանգույթունն ու տարածքային ամբողջականությունը շարունակում են չափազանց կարևոր և «կարմիր գիծ» լինել։
#հարափոփոխ_տարածաշրջանը
🆔 @vardan_voskanyan

Իրանի դեմ սանձազերծված պատերազմի սկզբից ի վեր առաջին անգամ ԻՀՊԿ-ի հետ փոխկապակցված ոչ պաշտոնական տելեգրամյան ալիքներից մեկը տարածեց արհեստածին Ադրբեջանը թիրախավորող կարծես թե առաջին քարոզչական նյութը։
«Flightradar»-ի՝ Դուբայ-Բաքու ավիաչվերթի խտապատկերին կից պարսկերենով գրված է՝ «Արդյո՞ք Դուբայից Բաքու ուղղությամբ թռիչքն ամերիկացի զինվորներին է տեղափոխո՞ւմ»։
Կարծում եմ՝ առաջիկայում այլ նյութեր էլ կլինեն, եթե արդեն իսկ չեն եղել, և դուրս մնացել նվաստիս ուշադրությունից։
#հարափոփոխ_տարածաշրջանը
🆔 @vardan_voskanyan

Կասկած չկա, որ Իրանի դեմ հարձակումից առաջ ԱՄՆ-ի նախագահ Թրամփի վարչակազմը հաշվարկել է նաև ամերիկյան հասարակության հնարավոր վերաբերմունքը պատերազմին և դրանում ռիսկերի գնահատումից հետո միայն անցել գործողությունների։
Պարզ է սակայն, որ ամեն ինչ հստակ հաշվարկելն էլ անհնարին է, հատկապես, եթե ի նկատի ունենանք, որ իրանական Մինաբ քաղաքի դպրոցին դաժան հարվածը և 165 աղջիկ դպրոցականների զոհվելն այնպիսի արձագանք է գտել ԱՄՆ-ում, որ դրան ստիպված է եղել անդրադառնալ նաև պետքարտուղար Ռուբիոն։
Մյուս կողմից՝ սպասելի էր, որ դեմոկրատները ևս պասիվ չեն լինի, և Կալիֆոռնիայի նահանգապետ Նյուսոնը երեկ չափազանց խիստ տոնայնությամբ քննադատել է նախագահ Թրամփին ամերիկացի զինվորների զոհվելու, ինքնաթիռների կորստի, Պարսից ծոցի արաբական դաշնակիցներին հարվածի տակ դնելու և, որ ամենակարևորն է, իրանական դպրոցը և երեխաներին թիրախավորելու համար։
Սրան զուգահեռ Նյու-Յորքում տեղի է ունեցել կարծես թե առաջին հակապատերազմական ցույցը։
Իրավիճակն այդքան էլ բարվոք չէ եվրոպացի դաշնակիցների հետ հարաբերություններում՝ չնայած առայժմ խոսքային մակարդակում մի քանի երկրների ղեկավարների աջակցությանը, չափազանց սուր հակապատերազմական հռետորաբանությամբ է հանդես գալիս Իսպանիան, իսկ Բրիտանիայի վարչապետ Սթարմերը միայն Սպիտակ տան նկատելի ճնշման տակ, ի վերջո, համաձայնեց տրամադրել Դիեգո Գարսիա բրիտանական ռազմակայանը Հնդկական օվկիանոսում։
Բավական հետաքրքիր ցուցիչ է նաև հանրապետական և Թրամփի մտերիմ դաշնակից սենատոր Գրահամի հայտարարությունը «Fox News»-ին առ այն, որ եթե Եվրոպայում քաղաքական հակակրանքի վերաբերյալ հարցում անցկացվի, ապա Թրամփը և Նեթանյահուն կլինեն առաջին երկու տեղերում։
#հարափոփոխ_տարածաշրջանը
🆔 @vardan_voskanyan

Քիչ առաջ ամերիկյան ԶՈւ-երի Կենտրոնական հրամանատարությունը հայտնել է ևս երկու զինվորական ծառայողի զոհվելու մասին։
Վերլուծելով հաղորդագրությունները, կարելի է ենթադրել, որ ամերիկյան կողմը զոհերի մասին հաղորդագրությունները տալիս է տեղեկատվական սահմանափակ չափաբաժիններով, այլ ոչ թե միանգամից՝ հաշվի առնելով ամերիկյան հասարակական կարծիքի խիստ զգայունությունը սեփական բանակում կորուստների հանդեպ։
#հարափոփոխ_տարածաշրջանը
🆔 @vardan_voskanyan

Քիչ առաջ իրանական հեռուստատեսությամբ ԻՀՊԿ խորհրդական Ջաբբարին հայտարարել է, որ Հորմուզի նեղուցով նավագնացությունը փակված է, և յուրաքանչյուր նավ, որը կփորձի անցնել դրանով, կհդեհվի իրանական ուժերի կողմից։
Ըստ նրա՝ հարվածներ են հասցվելու նաև նավթատար խողովակաշարերին, և ոչ մի կաթիլ նավթ տարածաշրջանից դուրս չի գնալու։
Հարկ է նշել, որ Հորմուզի նեղուցով է անցնում նավթի համաշխարհային օրական սպառման ծավալի մոտ 20 տոկոսը, իսկ Սաուդյան Արաբիայից, ԱՄԷ-ից և Իրաքից ձգվող նավթամուղերով՝ մոտ 8-9 տոկոսը (տվյալներն ըստ ԱԲ-ի են)։
#հարափոփոխ_տարածաշրջանը
🆔 @vardan_voskanyan

Այսօր, երբ Իրանի ԱԽ քարտուղար Լարիջանին, որն, իր դեպ, այս պահին շատ ավելի փաստացի լիազորությունների է տիրապետում (այդ մասին, թերևս, առանձին կգրեմ), հայտարարում էր, որ Իրանը պատրաստվել է երկարատև պատերազմի, դա քարոզչական հռետորաբանություն չէր։
Իրանը խորությամբ ճանաչող ցանկացած մասնագետ գիտե, որ այս երկրի վրա հարձակման դեպքում պաշտպանության նպատակով Իսլամական հեղափոխության պահապանների կորպուսը սկսում է գործել, այսպես կոչված, «մոզաիկական պաշտպանության» հստակ մշակված հայեցակարգով։
Եթե համառոտ բնութագրեմ այդ հայեցակարգը, ապա այն ենթադրում է հակառակորդի դեմ ապակենտրոնացված, անզուգաչափ և ցանցային հյուծիչ պատերազմ արտաքին հարձակման դեպքում։
Ըստ այդմ՝ Իրանի և դրա սահմաններից դուրս մերձակա տարածքը պայմանականորեն բաժանվում է բազմաթիվ ինքնուրույն պաշտպանական միավորների՝ ինչպես մոզաիկայի մասերն են։
Եթե կենտրոնական հրամանատարությունը զոհվում է, ավելի ցածր օղակների տեղային հրամանատարները հաջորդաբար շարունակում են գործել ինքնուրույն՝ հիմնվելով նախապես մշակված մարտավարության վրա։
Անզուգաչափ պատասխանը ներառում է միջին և կարճ հեռահարության հրթիռների և ԱԹՍ-ների համակցված տարափի մարտավարություն, մեծաթիվ
արագընթաց հրթիռակիր նավակների «մեղվի պարսի» սկզբունքով թշնամական խոշոր նավերի վրա հարձակում Պարսից ծոցում և երկրի սահմաններից դուրս իրանական արբանյակ խմբավորումների ակտիվացում հարձակողական ու դիվերսիոն գործողությունների համար։
Կարևոր դեր ունի աշխարհազորի զանգվածային մոբիլիզացիան ներքին անվտանգության ապահովման, բնակավայրերի ցամաքային պաշտպանության և երկարատև դիմադրության նպատակով։
Անհրաժեշտության դեպքում պատերազմի ձգձգումը և դրան համընդգրկուն ու հյուծիչ բնույթ հաղորդելը համարվում է կարևորագույն բաղադրիչ, քանի որ ծրագրված է, որ երկրի ռազմավարական խորքը թույլ է տալու երկարաժամկետ դիմադրություն կազմակերպել, այն հաշվարկով, որ նույնիսկ ռազմական գերակայություն ունեցող հակառակորդը քաղաքական և տնտեսական առումներով կբախվի լրջագույն ռիսկերի և անլուծելի խնդիրների։
Այժմ, ի դեպ, իրանական այս բազմաբաղադրիչ համակարգն անցնում է իր ամենալուրջ փորձությունն աշխարհի ամենահզոր գերտերության հետ պատերազմում։
#հարափոփոխ_տարածաշրջանը
🆔 @vardan_voskanyan

Այսօր Իրանի Քրդստան նահանգի կենտրոն Սանանդաջի ռազմական ենթակառուցվածքներից մեկին ևս հարված է հասցվել։
Հենց այսօր էլ ԱՄՆ-ի ՊՆ-ի մամուլի ասուլիսին հարց է հնչել ԱՄՆ-ի՝ Իրաքի Քրդստանի զորամիավորումների հետ հնարավոր ցամաքային գործողության մասին։
Չնայած նախարարի պատասխանը խուսափողական էր, բայց Իրանի ծայրամասերում զինված անջատողականների ներգրավմամբ ցամաքային պլացդարմներ ստեղծելու անհրաժեշտության մասին «պատահաբար» հենց այսօր գրել է նաև իսրայելական «The Jerusalem Post»-ը։
Իրանի ներսում էթնիկական գործոնի վրա քարոզչական ազդեցությանն էր միտված նաև Իսրայելի վարչապետ Նեթանյահուի առաջին պատերազմական ուղերձը, որում նա խոսում էր ոչ թե իրանցիների, այլ պարսիկների, ատրպատականցիների, ահվազցիների և այլոց մասին, որոնք պետք է ապստամբեն։
Ուշագրավ է, որ իսրայելական քարոզչությունն իրանցի արաբներին կոչում է ահվազցի («ահվազի»), որը Խուզեստան նահանգի կենտրոն Ահվազ քաղաքի անունից է, դե որովհետև սեփական երկրում արաբներ ունեցող Իսրայելում արաբներին ապստաբելու կոչը կարող է վտանգավոր լինել։
#հարափոփոխ_տարածաշրջանը
🆔 @vardan_voskanyan

Բրիտանական «BBC» պետական հեռարձակողին ամենավառ երևակայության դեպքում անգամ դժվար է համարել իրանամետ լրատվամիջոց։
Դրա ռուսերենով ծառայության եթերում ռազմական փորձագետը պնդում է, որ Պարսից ծոցի արաբական միապետությունների տարածքի ամերիկյան ռազմակայաններին հասցված իրանական հարվածները եղել են չափազանց ուժգին, և դրանց մի մասը, դատելով արբանյակային լուսանկարներից, գործնականում «ջնջվել են երկրի երեսից։
Ըստ ռուս ռազմական փորձագետների՝ Կատարում խոցված հեռահար գործողության ռադարը ևս չափազանց կարևոր հանգույց է եղել ամերիկյան Հակահրթիռային պաշտպանության համաշխարհային համակարգում, և Իրանն առաջին երկիրն է, որ կարողացել է թիրախավորել նման կարևոր և թանկարժեք հանգույց։
#հարափոփոխ_տարածաշրջանը
🆔 @vardan_voskanyan