Category: Armen Press

Երևանի Ազատության պողոտայի 19 հասցեում գտնվող նախկին «Կանազ» մշակույթի տան չգործող չորսհարկանի շինությունում բռնկված հրդեհից նախնական տվյալներով տուժածներ չկան։ «Արմենպրես»-ի հաղորդմամբ` այս մասին հայտնում է ՀՀ ՆԳՆ փրկարար ծառայությունը` նշելով, որ հրդեհը մեկուսացվել է ժամը 21։11-ին։

❗️Քաղավիացիայի միջազգային կազմակերպության որևէ պետություն չի կարող արգելք սահմանել օդային տարածքի օգտագործման նկատմամբ․ ՀՀ քաղավիացիայի կոմիտե

Հրդեհ է բռնկվել «Կանազ» մշակույթի տանը
Այս մասին դեպքի վայրից տեղեկացրեց «Արմենպրես»-ի թղթակիցը՝ հավելելով, որ հրդեհն ընդգրկում է գրեթե ամբողջ շենքը։
Տեղում աշխատում են ՆԳՆ Փրկարար ծառայության 8 հրշեջ մեքենա, ինչպես նաև ոստիկաններ։
Ինչպես նշեց թղթակիցը՝ քիչ առաջ մշակույթի տան հարակից շենքից բնակիչների տարհանում է սկսվել։
ՀՀ ՆԳՆ փրկարար ծառայությունից հայտնեցին, որ մարտի 25-ին, ժամը 19։12-ին ՆԳՆ 112 օպերատիվ կառավարման կենտրոն ահազանգ է ստացվել, որ Երևան քաղաքի Ազատության պողոտայում գտնվող շինություններից մեկում հրդեհ է բռնկվել։
Հրդեհի բարդության «1 ԲԻՍ» կանչով դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից չորս մարտական հաշվարկ և Հրդեհաշիջման և փրկարարական աշխատանքների կազմակերպման բաժնի հերթապահ խումբը։
Հրդեհի բարդությունից ելնելով հայտարարվել է «Թիվ 3 կանչ». դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից ևս վեց մարտական հաշվարկ։Կտրվի լրացուցիչ տեղեկություն։
https://www.youtube.com/watch?v=v3TJY04u5cQ&t=13s

«Խոսրովի անտառ» պետական արգելոցի տարածքում տեղադրված ֆոտոթակարդները կրկին արձանագրել են Կովկասյան ընձառյուծի ներկայությունը։
«Արմենպրես»-ի հաղորդմամբ՝ այս մասին «Ֆեյսբուք»-ում կատարած գրառման մեջ նշել է ՀՀ շրջակա միջավայրի նախարար Համբարձում Մաթևոսյանը՝ կից հրապարակելով նաև համապատասխան տեսանյութը։

ՀՀ վարչապետ Նիկոլ Փաշինյանը համարում է, որ Հայաստանի և Ղարաբաղի էլիտան 30 տարի Ղարաբաղի ժողովրդին Ղարաբաղում պահել է պատանդի կարգավիճակում:
Փաշինյանը նման տեսակետ հայտնեց ԱԺ-կառավարություն հարցուպատասխանին:

Անդրադառնալով Ղարաբաղյան շարժմանը՝ Փաշինյանն ասաց. «Հայաստանի և Ղարաբաղի էլիտան Ղարաբաղի ժողովրդին Ղարաբաղում պահել է պատանդի կարգավիճակում: Մարդկանց 30 տարի պահել անորոշությունների մեջ՝ չստեղծելով նորմալ կրթական համակարգ և այլն, հասկանո՞ւմ եք, թե ինչ է նշանակում: Իրենք Ղարաբաղին լո՞ւրջ են վերաբերվել. ոչ, լուրջ չեն վերաբերվել: Ես հարց եմ տվել 2018թ-ին՝ քա՞նի հոգի է Ղարաբաղից գնացել թոփ համալսարաններում կրթություն ստացել, հետ եկել. մատերի վրա կարելի է հաշվել՝ այն էլ որոշակի անձնական կապերով, թոփ ընտանիքների թոփ ներկայացուցիչներ: Ղարաբաղի ժողովրդին պատանդի կարգավիճակում են պահել այդ նույն մարդիկ, ում հավաքական անունն է «փախածներ»:

Նա հիշեցրեց՝ ինչ-որ գեներալների ժամանակին բնորոշել է որպես «վախկոտ դավաճաններ»:

«Այո, վախկոտ դավաճաններն ու փախած էլիտաներն այս պատմության մեջ պետք է իրենց գնահատականին արժանանան՝ որպես Հայաստանի պետականությունը, Հայաստանի և Ղարաբաղի ժողովրդին պատանդ պահածներ»,-ընդգծեց վարչապետը:

Միջազգային հարաբերություններում որևէ երկիր սիրուն աչքերի համար երաշխավորություն չի ստանձնում։
Ազգային ժողովում կառավարության հետ հարցուպատասխանի ժամանակ այս մասին ասաց արտաքին գործերի նախարար Արարատ Միրզոյանը՝ արձագանքելով խաղաղության գործընթացում երաշխավորների թեմայի շուրջ քննարկումներին։
Միրզոյանը նշեց, որ ընդդիմությունը վերջին շրջանում ակտիվորեն առաջ է քաշում երաշխավորների թեման։
«Այս վերջին օրերին մեր ընդդիմադիր խմբակները երաշխավորացավ են կպել։ Մինչ այդ ընդհանրապես խաղաղությունը չէին ընդունում, հիմա խոսում են խաղաղության մասին, բայց՝ երաշխավորներով»,- ասաց նա։
Միրզոյանի խոսքով՝ միջազգային հարաբերություններում երաշխավորները միշտ առաջնորդվում են սեփական շահերով։
«Սառը հաշվարկների աշխարհում ոչ մեկ ոչ մեկի սիրուն աչքերի համար երաշխավորություն չի անում և նաև իր զինվորների արյունը չի թափում, ծախսերը չի անում»,- ընդգծեց նախարարը։
Նա հավելեց, որ պատմության մեջ բազմաթիվ օրինակներ կան, երբ նույնիսկ երաշխավորված և ստորագրված համաձայնությունները խախտվել են՝ երբեմն հենց այդ երաշխավորների կողմից։
Միրզոյանի գնահատմամբ՝ ներկայում առկա խաղաղությունը արդեն ապացուցել է իր կենսունակությունը՝ պահպանվելով տարածաշրջանային լարված պայմաններում։
«Խաղաղությունը կարող է պահպանվել այնքան ժամանակ, քանի դեռ այն շահավետ է երկու կողմերին»,- ընդգծեց նա։
Նախարարի խոսքով՝ Հայաստանի նպատակը Ադրբեջանի հետ փոխշահավետ համագործակցության համակարգի ձևավորումն է, որը կխթանի երկարաժամկետ խաղաղության պահպանումը։

Առաջիկա խորհրդարանական ընտրություններին Հայաստանի ժողովուրդը պետք է որոշի՝ Ղարաբաղյան շարժումը շարունակվո՞ւմ է, թե՞ չի շարունակվում:
Այս մասին հայտարարեց ՀՀ վարչապետ Նիկոլ Փաշինյանն ԱԺ-կառավարություն հարցուպատասխանին՝ անդրադառնալով մտահոգությանը, թե որոշ շրջանակների կողմից սպառնալիք է ընկալվում իր այն ձևակերպումը, որ, եթե «Քաղաքացիական պայմանագիր» կուսակցությունը չընտրվի, պատերազմ կլինի:
Նա հիշեցրեց, որ 2020թ շատ մեծ մեղադրանքներ են ուղղվել իրեն, որ ինքը վտանգների մասին չի զգուշացրել հանրությանը: Այդ մեղադրանքից և սխալից վարչապետն արել է հետևություններ:
«Այս ընտրությանը ժողովուրդը պետք է ասի հետևյալը՝ Ղարաբաղյան շարժումը շարունակվո՞ւմ է, թե՞ չի շարունակվում:
Այսօր «Քաղաքացիական պայմանագիրը» միակ քաղաքական ուժն է, որը որպես քաղաքական մեծամասնություն, որոշել է և չի շարունակում Ղարաբաղյան շարժումը:
Մյուս բոլոր ուժերն ասում են, որ իրենք շարունակելու են Ղարաբաղյան շարժումը:
Ժողովուրդը դա պետք է որոշի: Եթե որոշում է, որ Ղարաբաղյան շարժումը շարունակվում է, նշանակում է՝ պատերազմ, որովհետև Ղարաբաղյան շարժումը պատերազմ է: Եթե որոշում է, որ խաղաղություն է, ուրեմն Ղարաբաղյան շարժումը չենք շարունակում: Շատ պարզ ընտրություն է»,-ասաց Փաշինյանը՝ կարևորելով քաղաքացիների հետ պարզ խոսելը:
Անդրադառնալով Անկախության հռչակագրին՝ վարչապետն ասաց, որ դա ոչ անկախության հռչակագիր է, այլ կոնֆլիկտի ու կախվածության հռչակագիր է:
«Մենք բոլորս ծագել ենք, սերել ենք Ղարաբաղյան շարժումից՝ որպես քաղաքականությամբ զբաղվող մարդիկ: Բայց, եթե մենք չենք առերեսվելու, չենք փոխվելու, ուրեմն չի փոխվելու նաև մեր պատմական ճակատագիրը»,-նշեց նա:

Հայաստանում 2022-2025թթ սպառազինության և ռազմական տեխնիկայի գնման վրա 5.4 անգամ ավելի շատ ծախս է արվել, քան երկու տասնամյակի՝ 1998-2018թթ ընթացքում:
Այս մասին վստահեցրեց ՀՀ պաշտպանության նախարար Սուրեն Պապիկյանն ԱԺ-կառավարություն հարցուպատասխանին:

Վարորդական քննություններից գոյացող եկամուտները չեն կարող ուղղվել միայն տվյալ համակարգին, քանի որ դրանք մտնում են ընդհանուր պետական բյուջե։
Ազգային ժողովի հարցուպատասխանի ժամանակ այս մասին ասաց Ներքին գործերի նախարար Արփինե Սարգսյանը՝ արձագանքելով «Քաղաքացիական պայմանագիր» խմբակցության պատգամավոր Հայկ Սարգսյանի առաջարկին՝ արտահերթ քննություններից գոյացող միջոցների մի մասը ուղղել համակարգի աշխատակիցների աշխատավարձերի բարձրացմանը և տեխնիկական համալրմանը։

Հայաստանի գործող իշխանությունը հասկացել է՝ Ղարաբաղյան շարժման ներքո Հայաստանը դրվել է օտար աշխարհաքաղաքական շահերի զոհասեղանին:
Այս մասին ասաց ՀՀ վարչապետ Նիկոլ Փաշինյանն ԱԺ-կառավարություն հարցուպատասխանին՝ անդրադառնալով Հայաստանի քարտեզի տեսքով կրծքազարդի վերաբերյալ հարցին:
 «Ես ուրախ եմ, որ մենք այդ ճանապարհն անցել ենք և ուժ ունենք խոստովանելու, որ Ղարաբաղյան շարժման ներքո մենք մեր երկիրը դրել ենք օտար աշխարհաքաղաքական շահերի զոհասեղանին: Մենք դա հասկացել ենք շատ ուշ: Կան քաղաքական ուժեր, որոնք չեն էլ հասկացել, չեն էլ հասկանալու»,-ասաց Փաշինյանը:
Ցույց տալով կրծքազարդ քարտեզը՝ վարչապետն ասաց՝ սա նրա մասին է, որ ՀՀ ժողովուրդը ստեղծել է իր անվտանգությունը, բարեկեցությունը, ազատությունը և իրավունքները պաշտպանելու համար: Դա ՀՀ միջազգայնորեն ճանաչված տարածքն է:
«Երբ մենք ինքներս ուղղակի կամ անուղղակի ժխտել ենք ՀՀ միջազգայնորեն ճանաչված տարածքը՝ դրանով ոնց որ ասել ենք, թե ՀՀ-ն միջազգայնորեն ճանաչված տարածք չունի: Անուղղակի ենք ասել: Այդ է պատճառը, որ այս ընկալման տրամաբանության մեջ մենք անընդհատ ավելի ու ավելի շատ ենք զոհաբերել մեր ինքնիշխանությունից, անկախությունից՝ որպես պետություն: Եվ, երբ վերադարձել ենք ՀՀ միջազգայնորեն ճանաչված տարածքին, այդ օրից ժամ-ժամ դարձել ենք ավելի ինքնիշխան, ավելի անկախ, ավելի անվտանգ, ավելի հեղինակավոր միջազգային պետություն»,-ասաց վարչապետը:
Ցույց տալով քարտեզը՝ նա ասաց, որ դա Հայաստանի ինքնիշխանության ու անկախության, պետականության խորհրդանիշն է: