Category: Armen Press

Լիբանանի խորհրդարանը երկու տարով հետաձգել է 2026 թ․ մայիսին կայանալիք խորհրդարանական ընտրությունները։ «Արմենպրես»-ի փոխանցմամբ՝ այս մասին հաղորդում է Al Jazeera-ն։
Լիբանանի խորհրդարանի խոսնակի հայտարարության համաձայն՝ ընտրությունները հետաձգվել են Իսրայելի և «Հեզբոլլահ» խմբավորման միջև պատերազմի պատճառով։
Լիբանանի Ազգային ​​լրատվական գործակալության (NNA) տեղեկացմամբ՝ մարտի 9-ին օրենսդիրներն ընտրությունների հետաձգման շուրջ քվեարկել են 76 կողմ, 41 դեմ և 4 ձեռնպահ ձայների հարաբերակցությամբ:
Խորհրդարանում «Հեզբոլլահ»-ի 13 անդամից բաղկացած դաշինքը քվեարկել է երկարաձգման օգտին։

Լիբանանի նախագահ Ջոզեֆ Աունը մարտի 9-ի առավոտյան ընդունել է Նորվեգիայի, Շվեդիայի և Դանիայի դիվանագիտական ​​առաքելությունների ղեկավարներին՝ նրանց հետ քննարկելու երկրում ստեղծված իրավիճակը՝ Իսրայելի կողմից Բեյրութի հարավային արվարձանի, Լիբանանի հարավային շրջանների և Բեքաա հովտի վրա շարունակվող հարձակումների ֆոնին։ «Արմենպրես»-ի փոխանցմամբ՝ այս մասին հաղորդում է Լիբանանի Ազգային լրատվական գործակալությունը (NNA):
Նախագահը պնդել է, որ նման հարձակումները «չեն հասնի այն նպատակին, որին Իսրայելը ձգտում է հասնել»:
Աունը վերահաստատել է Լիբանանի լիակատար և վերջնական հանձնառությունը 2024 թ. նոյեմբերին համաձայնեցված ռազմական գործողությունների դադարեցման մասին հռչակագրի դրույթներին՝ Իսրայելի կողմից Լիբանանի ողջ տարածքի վրա հարձակումները դադարեցնելու պարտավորության դիմաց։
Նախագահը նաև հաստատել է Լիբանանի «լիակատար պատրաստակամությունը՝ վերսկսելու բանակցությունները և քննարկելու անհրաժեշտ անվտանգային կետերը՝ Իսրայելի կողմից վտանգավոր սրացումը կանխելու համար»։

Եվրամիությունը Մերձավոր Արևելքում շարունակվող հակամարտության և դրա հետևանքով էներգակիրների գների աճի ֆոնին պետք է «անմիջապես չեղարկի» Ռուսաստանից նավթի ու գազի ներմուծման արգելքը: «Արմենպրես»-ի փոխանցմամբ՝ այս մասին հայտարարել է Հունգարիայի արտաքին գործերի նախարար Պետեր Սիյարտոն։

Հայաստանի վարչապետ Նիկոլ Փաշինյանը շնորհավորական ուղերձ է հղել Իսլամական հեղափոխության գերագույն առաջնորդ Սեյեդ Մոջթաբա Խամենեիին՝ գերագույն առաջնորդի պաշտոնում ընտրվելու առիթով:
«Արմենպրես»-ի փոխանցմամբ՝ ՀՀ վարչապետի աշխատակազմի տարածած ուղեձում նշված է.

«Շնորհավորում եմ Ձեզ Իսլամական հեղափոխության գերագույն առաջնորդի պաշտոնում ընտրվելու առիթով:
Վստահ եմ, որ Հայաստանի և Իրանի միջև ամուր կապերը կշարունակեն զարգանալ՝ գրանցելով նոր հաջողություններ:
Առիթը պատեհ համարելով՝ Իրանի բարեկամ ժողովրդին մաղթում եմ բարօրություն և հարատև խաղաղություն»։

Եվրոպական հանձնաժողովի նախագահ Ուրսուլա ֆոն դեր Լայենը Բրյուսելում ԵՄ անդամ երկրների մշտական ​​ներկայացուցիչների խորհրդաժողովում հայտարարել է, որ Իրանի իշխանությունները «բռնաճնշումների են ենթարկել սեփական ժողովրդին», հետևաբար, «իրանական ռեժիմի համար արցունքներ չպետք է թափվեն»

«Այս ռեժիմն ավերածություն և անկայունություն է պատճառել ամբողջ տարածաշրջանում իր պրոքսիների միջոցով, որոնք զինված են հրթիռներով և անօդաչուներով», — նրա ելույթի տեսանյութը տարածել է Reuters գործակալությունը։

Նա նշել է, որ շատ իրանցիներ ինչպես երկրի ներսում, այնպես էլ Եվրոպայում «հույս ունեն, որ այս պահը կարող է ճանապարհ բացել դեպի ազատ Իրան»։
Ֆոն դեր Լայենը նաև ընդունել է, որ տարածաշրջանային հակամարտությունը տարածվել է և հետևանքներ թողել էներգետիկայի, ֆինանսների, առևտրի և փոխադրումների ոլորտներում, հանգեցրել է մարդկանց տեղահանման։
Եվրահանձնաժողովի նախագահը նաև Եվրոպային կոչ է արել վճռականորեն ցուցադրել իր ուժը։

«Մենք վճռականորեն պաշտպանել ենք մեր անդամ պետությունների շահերը, երբ նրանց մարտահրավեր են նետել, օրինակ՝ Դանիայի և Գրենլանդիայի դեպքում: Մենք ներդրումներ ենք կատարում մեր ժողովրդավարական կայունության ամրապնդման գործում՝ դիմակայելու դրսից տեղեկատվության մեքենայություներին: Եվ ամենակարևորը՝ մենք սկսել ենք նախագիծ՝ նախատեսված մի քանի սերնդի համար՝ եվրոպական անկախության նախագիծը…. Մենք պետք է այսուհետ էլ առաջ գնանք: Մենք պետք է պատրաստ լինենք ավելի վճռականորեն ցուցադրել մեր ուժը: Օրինակ՝ դիմադրել ագրեսիային և արտաքին միջամտությանը՝ օգտագործելով մեզ մոտ առկա բոլոր միջոցները՝ տնտեսական, դիվանագիտական, տեխնոլոգիական կամ ռազմական», — ասել է ֆոն դեր Լայենը:

ՀԷՑ-ը մանրամասներ է հայտնել նախկինում ստացված բողոքների ուսումնասիրության վերաբերյալ

Իրանի կողմից երկրի գերագույն առաջնորդի պաշտոնում Ալի Խամենեիի որդի Մոջթաբա Խամենեիի նշանակման ֆոնին Չինաստանի արտաքին գործերի նախարարության խոսնակ Գուո Ցզյակունը կոչ է արել բոլոր կողմերին վերադառնալ բանակցություններին՝ իրադրության հետագա սրումից խուսափելու համար։ «Արմենպրես»-ի փոխանցմամբ՝ այս մասին հաղորդում է The Associated Press-ը։
«Սա (խմբ.՝ Մոջթաբա Խամենեիի նշանակումը) իրանական կողմից կայացված որոշում է՝ համաձայն երկրի սահմանադրության»,- հայտարարել է խոսնակը։
Նա հավելել է, որ «Չինաստանը դեմ է ցանկացած պատրվակով այլ երկրների ներքին գործերին միջամտելուն»։
Խոսնակը նաև շեշտել է, որ Իրանի ինքնիշխանությունն ու տարածքային ամբողջականությունը «պետք է հարգվեն»։

❗️Թեհրանից աղտոտված օդի՝ Հայաստան ներթափանցման վտանգ չկա
Հայաստանի Հանրապետության «Հիդրոօդերևութաբանության և մոնիթորինգի կենտրոն»–ն Ամբերդի դիտակայանում իրականացնում է մթնոլորտային տեղումների որակական մոնիթորինգ։
«Արմենպրես»-ի փոխանցմամբ՝ անդրադառնալով մի շարք լրատվամիջոցներում տարածված՝ «թթվային թունավոր անձրևների հետ» կապված որոշ հրապարակումներին՝ Կենտրոնից հայտնում են, որ մարտի 7-8-ը տեղացած մթնոլորտային տեղումների որակական կազմի ուսումնասիրության համաձայն՝ տեղումներում թթվայնության, անիոնային և կատիոնային կազմի փոփոխություն չեն դիտվել։
Միաժամանակ, մարտի 9-11-ը ընկած ժամանակահատվածում Հայաստանը գտնվելու է հյուսիս-արևելյան օդային հոսանքների ազդեցության գոտում, իսկ մարտի 12–20-ը հանրապետությունում հիմնականում կգերակշռեն հարավ-արևմտյան հոսանքները, որոնք ձևավորվում են Միջերկրական ծովի ավազանում։

«Մթնոլորտային գործընթացների վերլուծությունը ցույց է տալիս, որ առաջիկա օրերին Իրանի տարածքից դեպի ՀՀ օդային հոսանքների ներթափանցում չի կանխատեսվում։ Հարավային ցիկլոնների ներթափանցումը ՀՀ տարածք հիմնականում դիտվում է Իրաքի շրջաններից, այլ ոչ թե Իրանից, նման ցիկլոնների ներթափանցում մեր տարածաշրջան լինում է խիստ հազվադեպ։
Հավելենք նաև, որ առաջիկա 10 օրերին Իրանի տարածքում նկատվում է օդային հոսանքների արևմուտք-արևելք տեղաշարժ, այսինքն օդային զանգվածները Իրանի տարածքից տեղաշարժվում են դեպի Թուրքմենստան»,– ասված է «Հիդրոօդերևութաբանության և մոնիթորինգի կենտրոն»–ի տարածած հաղորդագրության մեջ։

Ընդգծվում է, որ կառույցի կողմից իրականացվում է մթնոլորտային պայմանների մշտադիտարկում և առաջին իսկ փոփոխությունների դեպքում հասարակությունը տեղեկացված կլինի։

«Բնակչությանը հորդորում ենք հետևել միայն ՊՈԱԿ-ի կողմից տրված պաշտոնական տեղեկատվությանը»,– եզրափակվում է հաղորդագրությունը։

Իրանը որևէ առնչություն չունի Կիպրոսի, Թուրքիայի և Ադրբեջանի վրա անցյալ շաբաթ իրականացված գրոհների հետ, հայտարարել է Իրանի արտաքին գործերի նախարարության խոսնակ Էսմայիլ Բաղային։ «Արմենպրես»-ի փոխանցմամբ՝ այս մասին հաղորդում է Al Jazeera-ն։
Նա նշել է, որ «Իրանի տարածքից որևէ հարձակում չի սկսվել» այդ երկրների վրա։
Բաղային նաև նշել է, որ հարձակումներից մի քանիսը կարող էին «բեմադրված» լինել։
«Մենք բազմիցս զգուշացրել ենք, որ թշնամին կարող է որոշակի հարձակումներ կազմակերպել՝ մեր և այլ երկրների միջև սեպ խրելու համար», — հավելել է դիվանագետը։

Եվրոպայում գազի գինը գերազանցել է 800 դոլարը 1000 խորանարդ մետրի դիմաց