Category: Armen Press

Իսրայելը փակել է իր օդային տարածքը՝ Իրանին հասցրած հարվածներից հետո։
«Արմենպրես»-ի փոխանցմամբ՝ այս մասին հաղորդել է Իսրայելի օդանավակայանների կառավարման վարչությունը։
Ինչպես նշել է N12 հեռուստաալիքը, օտարերկրյա ավիաընկերությունների ինքնաթիռները, որոնք պետք է Իսրայելում վայրէջք կատարեին, օդում պտտվում և վերադառնում են այն օդանավակայաններ, որտեղից իրականացրել էին թռիչքը։
Նշվում է նաև, որ իսրայելական ավիաընկերությունները փորձում են իրենց ինքնաթիռներն ուղարկել հարևան երկրների օդանավակայաններ։
Ռուսական ՏԱՍՍ գործակալությունն էլ հայտնել է, որ Իրանը ևս փակել է իր օդային տարածքը։ Նշվում է, որ երկրի օդային տարածքը փակվել է բոլոր տեսակի օդանավերի համար։
Ավելի վաղ Իսրայելի արտաքին գործերի նախարարությունը հայտարարել էր, որ Իսրայելը կանխարգելիչ հարված է հասցրել Իրանին՝ Իսրայելին սպառնացող վտանգը չեզոքացնելու համար։ Իրանական լրատվամիջոցներն էլ հայտնել են Թեհրանում պայթյունների մասին։

Իսրայելը հայտարարել է Իրանին կանխարգելիչ հարված հասցնելու մասին։
«Արմենպրես»-ի փոխանցմամբ՝ այդ մասին հայտնել է Իսրայելի արտաքին գործերի նախարարությունը։
Նշվում է, որ Իրանին կանխարգելիչ հարված է հասցվել՝ Իսրայելին սպառնացող վտանգը չեզոքացնելու նպատակով։
Հաղորդվել է նաև, որ Իսրայելի պաշտպանության նախարարը երկրում արտակարգ դրություն է հայտարարել։
Իսրայելի պաշտպանության նախարարության մամուլի ծառայությունը հայտնել է, որ փոխվել են բնակչության համար նախատեսված ուղեցույցները։ Արգելվել են հավաքները և ձեռնարկությունների աշխատանքը, ինչպես նաև կրթական գործունեությունը։
«Իրավիճակը գնահատելուց հետո որոշում է կայացվել անհապաղ փոփոխություններ կատարել Ներքին գործերի նախարարության ուղեցույցներում։ Փոփոխությունների շրջանակներում որոշվել է երկրի բոլոր շրջանները լիարժեք գործունեության ռեժիմից տեղափոխել անհրաժեշտ գործունեության ռեժիմի», — ասվում է հայտարարությունում։
Կանոնակարգերը ներառում են «կրթական գործունեության, հավաքների և ձեռնարկությունների գործունեության արգելք՝ բացառությամբ կենսական կարևորության ոլորտների հետ կապված ձեռնարկությունները»։
Միևնույն ժամանակ իրանական լրատվամիջոցները հայտնել են Թեհրանում պայթյունների մասին։
Նշվում է, որ Թեհրանում երեք պայթյուն է գրանցվել։ Մասնավորապես, իրանական Fars լրատվական գործակալությունը հայտնել է, որ իսրայելական մի քանի հրթիռ ընկել է Իրանի մայրաքաղաքի վրա։

Իսրայելը հարված է հասցրել Իրանի նախագահի պալատին և հետախուզական կենտրոնին։ (Իսրայելական ԶԼՄ-ներ)

🔴 Զգուշացե՛ք զեղծարարներից. «Արմենպրես»-ի կայքը նմանակող հարթակը փորձում է օգտատերերին ներքաշել կեղծ ներդրումային սխեմաների մեջ
CivilNet-ի փաստերի ստուգման հարթակի նոր ուսումնասիրության համաձայն, սոցցանցերի հայկական տիրույթում ակտիվորեն տարածվում են գրառումներ պնդումով, թե իբր վարչապետ Նիկոլ Փաշինյանի և գործարար Գագիկ Ծառուկյանի անունները հայտնվել են ամերիկացի հանցագործ Ջեֆրի Էփշտեյնի գործով գաղտնի զեկույցներում։ Կայքը նշում է` տեղեկությունը սենսացիոն վերնագրերով տարածվում է Instagram-ում և Facebook-ում գովազդային գրառումների միջոցով` թիրախավորելով հայաստանցի օգտարերերին։
Կայքում բացակայում է որևէ հղում դեպի իրական ներդրումային համակարգ. փոխարենը պահանջվում է հարցաթերթիկում մուտքագրել անձնական տվյալներ և հեռախոսահամար։ Դրանք լրացնելուց հետո զեղծարարները զանգահարում են զոհերին՝ ներկայանալով որպես «ներդրումային խորհրդատուներ»։
ՄԱՆՐԱՄԱՍՆԵՐ

Վարչապետի ելույթը՝ Սպորտային հրաձգության Եվրոպայի մեծահասակների առաջնության բացման արարողությանը
https://youtu.be/BMSELOtGIUI

Հայաստանի Հանրապետության արտաքին գործերի նախարարությունն Անկախության օրվա կապակցությամբ շնորհավորել է Դոմինիկյան Հանրապետության ժողովրդին ու կառավարությանը

Շնորհավորում ենք Դոմինիկյան Հանրապետությանը՝ Անկախության օրվա կապակցությամբ։ Մեր ջերմ շնորհավորանքներն ենք հղում Դոմինիկյան Հանրապետության ժողովրդին և կառավարությանը՝ մաղթելով նրանց խաղաղություն, բարգավաճում և բարեկեցություն:

Ադրբեջանի Շեմախի շրջանում 4.7 մագնիտուդ ուժգնությամբ երկրաշարժ է գրանցվել
Այս մասին հայտնում են ադրբեջանական լրատվամիջոցները՝ հղում կատարելով երկրի ​​սեյսմոլոգիական կենտրոնի երկրաշարժերի հետազոտությունների բյուրոյին։
Նշվում է, որ երկրաշարժը գրանցվել է տեղական ժամանակով ժամը 15:52-ին, իսկ էպիկենտրոնը գտնվել է 12 կիլոմետր խորության վրա։ Երկրաշարժի ուժգնությունը էպիկենտրոնում կազմել է մինչև 5 մագնիտուդ, իսկ մոտակա տարածքներում գրանցվել է մոտ 3-4 մագնիտուդով ցնցում։
Տեղական ժամանակով ժամը 16։05-ին գրանցվել է նաև երկրորդ երկրաշարժը՝ 3,3 մագնիտուդով։
Զոհերի կամ վիրավորների մասին տեղեկություններ չեն հաղորդվել։

Իսպանիայում Հայաստանի Հանրապետության դեսպան Սոս Ավետիսյանի նախաձեռնությամբ Մադրիդի Կոմպլուտենսե համալսարանում Հայաստանի և Ադրբեջանի միջև խաղաղության գործընթացի, ինչպես նաև TRIPP նախաձեռնության վերաբերյալ կոնֆերանս է անցկացվել։
Այս մասին հաղորդագրություն է տարածել Իսպանիայում ՀՀ դեսպանությունը։
Նշվում է, որ հանդիպման ընթացքում դեսպանը ներկայացրել է բանակցությունների ներկա առաջընթացը՝ ընդգծելով Հայաստանի հանձնառությունը տարածաշրջանում կայուն և երկարատև խաղաղության հասնելուն։
Կոնֆերանսի ընթացքում դեսպան Սոս Ավետիսյանը նաև պատասխանել է լսարանի հարցերին։

Կանադա-Եվրասիական առևտրատնտեսական պալատը (CECTE) և Հայաստանի հանքարդյունաբերության և մետալուրգիայի ասոցիացիան (ՀՀՄԱ) փետրվարի 26-ին Երևանում ստորագրեցին փոխըմբռնման հուշագիր, իսկ Զանգեզուրի պղնձամոլիբդենային կոմբինատը դարձավ պալատի անդամ։

Հայաստանի անվտանգության խորհրդի գրասենյակը մանրամասներ է ներկայացրել փետրվարի 27-ին վարչապետ Նիկոլ Փաշինյանի գլխավորությամբ կայացած Անվտանգության խորհրդի նիստի վերաբերյալ։
ՀՀ անվտանգության խորհրդի գրասենյակն այդ մասին հաղորդագրություն է տարածել։

«Վարչապետ Նիկոլ Փաշինյանի գլխավորությամբ կայացել է Անվտանգության խորհրդի հերթական նիստը։
Նիստին, Անվտանգության խորհրդի անդամներից բացի, մասնակցել են նաև Հանրապետության նախագահ Վահագն Խաչատուրյանը և Ազգային ժողովի նախագահ Ալեն Սիմոնյանը։
Նիստի ընթացքում անդրադարձ է կատարվել Հայաստանի Հանրապետության Զինված ուժերի բարեփոխումների ընթացքին, ՀՀ-ի դեմ կիրառվող հիբրիդային սպառնալիքներին հակազդման միջոցառումներին, ինչպես նաև առցանց հարթակներում, այդ թվում՝ սոցիալական ցանցերում, երեխաների պաշտպանությանն առնչվող հարցերին»,- ասված է հաղորդագրության մեջ:
Ավելի վաղ ՀՀ վարչապետ Նիկոլ Փաշինյանը «Ֆեյսբուք»-ի իր էջում գրել էր, որ փետրվարի 27-ին տեղի է ունեցել ՀՀ անվտանգության խորհրդի նիստ։