Category: Vardan Voskanyan

Իրանի դեմ պատերազմը փոփոխելու է ոչ միայն հետպատերազմական Մերձավոր Արևելքը, այլ նաև, դատելով ԱՄՆ-Եվրոպա հակասություններից, նաև այս երկու կենտրոնների միջև հարաբերությունները։
Այդ հարաբերությունների ռազմական հատվածը ուղղակիորեն վերաբերում է ՆԱՏՕ-ին, որի անդամ եվրոպական ոչ մի պետություն, չնայած, ԱՄՆ-ի նախագահի կոչին և բավական կոշտ քննադատությանը, չի ցանկանում ներքաշվել Իրանի դեմ պատերազմում։
Ողջ աշխարհն այժմ, ըստ էության, գտնվում է խոշոր աշխարհաքաղաքական տեղաշարժերի փուլում, և այդ տեղաշարժերից մեկը մեր անմիջական հարևանությամբ է տեղի ունենում։
#հարափոփոխ_տարածաշրջանը
🆔 @vardan_voskanyan

Իրանի դեմ պատերազմի սկզբից ի վեր արդեն որերորդ անգամ ԱՄՆ-ի նախագահ Թրամփը հայտարարում է, որ իրանցիները ցանկանում եմ բանակցել, իսկ երեկ ընդհանրապես նշեց, որ իրենք խոսում են Իրանի հետ։
Մինչդեռ իրանական կողմը մի քանի մակարդակներով պաշտոնապես հայտարարում է, որ ոչ միայն չի բանակցում ԱՄՆ-ի հետ, այլ նաև չի էլ պատրաստվում դա անել։
Ընդ որում, Թեհրանը պնդում է, որ նույնիսկ համաձայն չէ հրադադարի, եթե դրանից հետո չեն բավարարվելու իրանական երեք նախապայմանները՝ Իրանի լիարժեք միջուկային ծրագիր ունենալու իրավունքի ամրագրում, տնտեսական պատժամիջոցների ամբողջական չեղարկում, պատերազմի ընթացքում Իրանին հասցված վնասի լիակատար փոխհատուցում կամ, այլ խոսքերով, ռազմատուգանքի վճարում։
Իրանական մեկ այլ նախապայման էլ իրականում գոյություն ունի, որն ուղիղ չի բարձրաձայնվում, սակայն, ըստ էության, այժմ, փաստացիորեն, իրականացվում է, և դա Հորմուզի նեղուցի ամբողջական կառավարումն է Իրանի կողմից։
#հարափոփոխ_տարածաշրջանը
🆔 @vardan_voskanyan

Ստացել եմ Իրանում ՀԱԵ Ատրպատականի Հայոց Թեմի Ազգային Առաջնորդարանի գրասենյակի հաղորդագրությունը, որն ամբողջությամբ զետեղում եմ այս ալիքում։
ԱՊԱՀՈՎԱԿԱՆ ԻՐԱՎԻՃԱԿԸ ԱՏՐՊԱՏԱԿԱՆԻ ՀԱՅՈՑ ԹԵՄՈՒՄ
Իրանի Իսլամական Հանրապետութեան դէմ շղթայազերծւած պատերազմի առաջին օրւանից, նախագահութեամբ Ատրպատականի Հայոց թեմի առաջնորդ` Գերշ. Տ. Գրիգոր Արք. Չիֆթճեանի, Թեմական խորհուրդը, ինչպէս նաեւ Ուրմիոյ Գործակալական խորհուրդը նախազգուշական քայլերի ձեռնարկեցին, նախ դադարեցնելով ե’ւ Թաւրիզիում ե’ւ Ուրմիայում եկեղեցական արարողութիւնները եւ ազգային նախապէս որոշւած ձեռնարկները, ապահովական առումով։
Նշենք, որ երկու քաղաքների հայոց Ազգային դպրոցները համացանցով շարունակում են իրենց դասաւանդութիւնները։
Թեմական խորհուրդը ցուցաբերելով նաեւ շտաբի անձնւէր պատրաստակամութիւնը, միշտ հետաքրքրւում է այն պայթումների հետեւանքով, երբ հայկական շրջանների մօտակայքում են տեղի ունենում։
Նշենք, որ Ազգային առաջնորդարանը պատերազմի սկզբից մինչեւ օրս, չի դադարեցրել իր աշխատանքը։
Ցարդ մօտակայ ուժեղ պայթումներից ցնցւած պատուհանների ապակիներից բացի այլ վնասներ չի կրել համայնքը, մանաւանդ 10 Մարտ 2026֊ի միջօրէին Թաւրիզի բանակատեղիում տեղի ունեցած օդանաւային հարւածների ընթացքում։
Ի դէպ ասենք նաեւ, որ հակառակ ապահովական ներկայ անբաղձալի դրութեան, Թեմիս Մելիք Թանգեան թանգարանի բարեզարդման աշխատանքները չեն դադարեցւել, մաղթելով որ պատերազմի բաղձալի դադարից յետոյ կը վերաբացւեն դռները, եւ դրա յարկի տակ կը հիւրընկալւեն բոլոր այցելուները։
Յայտնենք նաեւ, որ Սրբազան հայրը եւ Թեմական խորհուրդը մնայուն կապի մէջ են Թեմի վանքերի պահապանների հետ, ստուգելու հնադարեայ վանքերի իրավիճակը, որոնք ցարդ անվնաս են եւ մնայուն հսկողութեան ներքոյ։
Առաջնորդ Սրբազանը իր յարատեւ աղօթքով զօրակցում է Թեմիս բոլոր զաւակներին, Աստծուց խնդրելով անփորձանք պահպանել համայն Իրանի ժողովրդին, որոնց շարքին մանաւանդ հայ ժողովրդի թանկագին զաւակներին։
ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ
ԱՏՐՊԱՏԱԿԱՆԻ ՀԱՅՈՑ ԹԵՄԻ
#հարափոփոխ_տարածաշրջանը
🆔 @vardan_voskanyan

Պարսից ծոցի իրանական Խարգ կղզին վերջերս հայտնվեց ԶԼՄ-ների ուշադրության կենտրոնում ԱՄՆ-ի հրթիռակոծման պատճառով։
Մինչդեռ քչերը գիտեն, որ 2007թ. այստեղ ճանապարհի կառուցման ժամանակ գտնվել է հին պարսկերեն սեպագիր արձանագրություն Աքեմենյանների շրջանից։
Կարճ արձանագրությունը կղզում ստորգետնյա ջրային համակարգի կառուցման մասին էր, և «այս հողը երջանիկ էր», որ արձանագրությունը թողած, ցավոք, անհայտ անձը, այստեղ ջուր բերեց։
2008թ. արձանագրությունը ենթարկվել էր վանդալիզմի՝ զգալիորեն վնասվելով։
#դարձիր_իրանագետ
🆔 @vardan_voskanyan

Իսրայելի վարչապետ Նեթանյահուն, որպեսզի հերքի իր սպանված լինելու մասին լուրերը, այսօր սուրճ խմեց տեսախցիկի առջև։
Խնդիրն այն է, որ, որքանով հիշում եմ, սա առաջին դեպքն էր, երբ իրանական ապատեղեկատվական քարոզչությունն այնքան արդյունավետ աշխատեց, որ, փաստացիորեն, ստիպեց Իսրայելի վարչապետին գնալ այսօրվա քայլին։
Արդեն վաղուց պատերազմները ոչ միայն մարտադաշտում են վարվում, այլ նաև՝ քարոզչական տիրույթում, որը ոչ պակաս կարևոր է։
#հարափոփոխ_տարածաշրջանը
🆔 @vardan_voskanyan

Իրանի դեմ նախորդ և ներկայիս պատերազմների պատճառով Իրանում տեղի է ունեցել հսկայական փոփոխություն, և դա վերաբերում է այս երկրի ռազմաքաղաքական ղեկավարությանը։
Իսլամական հեղափոխություն իրականացրած և իրանա-իրաքյան պատերազմի մասնակից սերնդին փոխարինել է իրանցի ռազմաքաղաքական գործիչների երկրորդ սերունդը։
Չնայած այս սերունդն իր հերթին անցել է այնպիսի լրջագույն փորձությունների միջով, ինչպիսիք էին «Իսլամական պետություն» ահաբեկչական խմբավորման դեմ պայքարն Իրաքում և պատերազմը Սիրիայում, այսուհանդերձ այն չունի Իրանի դեմ ուղղակի ագրեսիան չեզոքացնելու այն փառքը, որն ուներ նախորդ սերունդը։
Հետևաբար, իրանական ներկա ռազմաքաղաքական ղեկավարության ուժգին մոտիվացիան պաշտպանելու Իրանն, ակներևաբար, նկատելիորեն սնվում է նաև այս հանգամանքից։
#հարափոփոխ_տարածաշրջանը
🆔 @vardan_voskanyan

Երեկ ամերիկյան հեռուստաալիքներից մեկին հարցազրույցում Իրանի արտգործնախարար Արաղչին ուղիղ տեքստով հայտարարեց, որ Պարսից ծոցի իրանական Խարգ և Աբու Մուսա կղզիների հրթիռակոծումն ԱՄՆ-ի զինուժի կողմից տեղի է ունեցել ԱՄԷ-ի տարածքից «Հայմարս» համակարգերով։ Այս մասին հայտարարել էր նաև ԻՀՊԿ-ի ներկայացուցիչը։
Եթե որևէ մեկը հաշվարկ իրականացներ, թե Պարսից ծոցի ո՞ր արաբական երկրների տարածքին է իրանական կողմն ավելի շատ հարվածներ հասցրել, ապա առաջին տեղերում կլինեին Բահրեյնը և ԱՄԷ-ը։
Բահրեյնի պարագայում Իրանում այս օրերին հատկապես ոչ պաշտոնական մակարդակում ավելի հաճախ են խոսում նաև այս կղզի-պետությունն Իրանին վերադարձնելու գործընթաց սկսելու մասին, քանի որ այն միայն 1971թ. թվականին է դե յուրե անջատվել, իսկ մինչ այդ թեև գտնվում էր բրիտանական գերիշխանության տակ, սակայն համարվում էր Իրանի նահանգներից մեկը։
#հարափոփոխ_տարածաշրջանը
🆔 @vardan_voskanyan

Իրանի պատմության, մշակույթի և նաև այսօրվա զարգացումների մասին բավական երկար խոսել ենք այս հարցազրույցում։
Եթե հետաքրքրում է, կարող եք լսել։
#հարափոփոխ_տարածաշրջանը
🆔 @vardan_voskanyan

Մեզանում քիչ է խոսվում այն մասին, թե ո՞րոնք են այս պատերազմում Իրանի նպատակները։
Որքան էլ առաջին հայացքից զարմանալի թվա, իրանցիների հիմնական նպատակը պատերազմն հենց այս պահին կանգնեցնելը չէ։
Իրանի գրեթե բոլոր բարձրաստիճան ռազմաքաղաքական գործիչներն այս կամ այն ձևակերպմամբ գլխավոր այդ նպատակը նախանշում են՝ որպես ոչ թե հենց այս պատերազմի ամեն գնով դադարեցում, այլ պատերազմի այնպիսի վարում, որը կկանխարգելի հնարավոր հաջորդ պատերազմը։
Ըստ այդմ՝ իրանական ռազմավարությունը միտված է հասնելու այնպիսի արդյունքի, երբ ԱՄՆ-ը և Իսրայելը կհասկանան, որ Իրանի դեմ պատերազմելն անիմաստ է, անօգուտ և վտսնգավոր։
Մեկ այլ հեռագնա ածանցյալ նպատակ նույնպես կա՝ ցույց տալ տարածաշրջանի արաբական երկրներին, որ ԱՄՆ-ի ռազմակայանների առկայությունը ոչ թե պաշտպանում է այդ երկրները, այլ դրանք դարձնում ռազմական թիրախ, ուստի ավելի արդյունավետ կլինի տարածաշրջանային ուժերով ապագա համատեղ անվտանգության համակարգի ստեղծումը։
Որքանով Իրանը կհասնի իր հիմնական և ածանցյալ նպատակներին դժվար է ասել, բայց որ նախանշված ուղղություններով իրանցիներն անում են հնարավորը, իսկ երբեմն նույնիսկ անհնարին թվացողը, արդեն իսկ ակներև է։
#հարափոփոխ_տարածաշրջանը
🆔 @vardan_voskanyan

Աշխարհում ոչ մի տրամաբանող անձ չի կասկածում, որ ԱՄՆ-ի բանակը թվաքանակով և տեխնիկական հագեցվածությամբ անհամեմատ գերազանցում է իրանական ԶՈւ-երին։
Բայց արդի աշխարհում նման առավելությունը, որպես կանոն, հավասարակշռվում է անզուգաչափ հակադարձումով, ինչն էլ Իրանը հիմա փորձում է անել։
Բժշկության մեջ կա, ցավին դիմանալու շեմի հասկացություն, որը տարբեր անձանց մոտ տարբեր է և անկախ ֆիզիկական ուժից։ Սա երկրների պարագայում, միգուցե, պետք է կոչել դիմակայունության շեմ։
Իրանի դեմ այս պատերազմն, իրականում, հենց ցավին դիմանալու կամ դիմակայունության շեմերի պայքար է, այլ ոչ թե՝ ում ռումբն է ավելի խոշոր և մահաբեր։
#հարափոփոխ_տարածաշրջանը
🆔 @vardan_voskanyan