Author: Vahe Aghajanyan

Անհրաժեշտ է հայկական քաղաքական միտքը բարձրացնել «Путин сказал армянам давать проход» մակարդակից
Արփինե Հովհաննիսյանը տեսանյութ է տեղադրել, որում ներկայացնում է ստեղծված իրավիճակի զարգացման հնարավոր 2՝ մանդատները վերցնել — չվերցնելու սցենարներն իրենց ռիսկերով ու հնարավորություններով։
Թե՜ Արփինեի, թե՜ ադեկվատ խոսք հնչեցնող այլ անձանց պարագայում նկատել եմ այս խնդիրը, որ շատ մարդիկ ուղղակի հրաժարվում են ընդունել այն իրականությունը, որը կա ու երբ դու իրենց ասում ես այդ իրականության մասին, իրենք սկսում են քեզ վիրավորել։ Մարդիկ կարծում են, որ կա մեկ քայլանոց կոմբինացիա, որը կարելի է խաղարկել ու իշխանություն փոխել, բայց դա չի արվում։ Օրինակ, կարելի է կոչ անել մարդկանց դուրս գալ փողոց, մարդիկ դուրս կգան փողոց ու իշխանությունը կփոխվի կամ կարելի է ընդամենը չվերցնել մանդատները ու դա բավարար է, որ Նիկոլը գնա։ Կամ ավելի տարածված խոսույթ, որ հերիք է՝ Պուտինը մեկ զանգ անի ու ամեն ինչ կփոխվի կամ էլ իշխանության տարածած թեզը՝ Պուտինը ուզում է, բայց չի կարողանում փոխել մեզ։
Իհարկե, այս ամենում իր մեծ մեղքն ունի նաև ընդդիմությունը, որը վերջին ամիսների իր խոսույթով նման ակնկալիքներ է ձևավորել ու հիմա մարդկանց նման պահվածքն ուղղակի շոկի հետևանք է։
Ընկերներ ջան, մանավանդ ընդդիմադիր հայացքներ ունեցող ընկերներ ջան, ցավոք, ամեն ինչ այդքան պարզ չէ ու ոչ մի մեկ քայլանոց կոմբինացիա չկա, որը հնարավոր է անել, բայց չի արվում։ Կարողացեք լսել, ընկալել և ընդունել ադեկվատ խոսքը, որովհետև կյանքը ցույց տվեց, որ ովքեր ամեն ինչի լուծումը ներկայացնում են շատ պարզ ու հեշտ ձևով, այո՜, դա ականջահաճո է, բայց որպես կանոն՝ վերջում պարզվում է, որ նման մարդիկ ընդամենը զբաղվում էին խաբեությամբ, ինչին հաջորդում է մեծ հիասթափությունը։
Կա իրականություն։ Եկեք ընդունենք այդ իրականությունը ու գտնենք լուծման ճանապարհը, որը հենց երկարաժամկետ ու տքնաջան աշխատանք է պահանջելու։ Իրականությունը մերժելը ինքնախաբեություն է։
Եւ ինչու՞ այս գրառման համար ընտրեցի հենց այդ վերնագիրը, որովհետև համարում եմ սա հոգեբանական խնդիր, սա միայն քաղաքականության մասին չէ, մենք ազգովի հարցերի լուծումը պատկերացնում են «Путин сказал армянам давать проход» տրամաբանության մեջ, իսկ վերջին ամիսներին ժողովրդի լայն զանգվածների համար տրամաբանությունը մնացել է նույնը, պարզապես փոխվել է проход տվողի անունը․․․

Ռոբերտ Քոչարյան անձնավորության նկատմամբ ունեմ մեծ հարգանք, նա իսկապես տարբերվող քաղաքական գործիչ է, կարգուկանոնի մարդ է, բայց որտե՞ղ է խնդիրը։ Խնդիրն այն է, որ նրա շուրջ միշտ եղել են մարդիկ, որ իրենց վարքով, մեծ-մեծ խոսելով այս մարդուն միայն վնաս են տվել ու հիմա էլ կարծես թե նման մարդիկ կան, որոնք իրենց արդեն նախարար են զգում։
Շատ հստակ ասում եմ, որ թույլ չեմ տալու ու հենց Քոչարյանի թիմում շատ հստակ պետք է իմանան, որ ցանկացած նման քայլ շատ խիստ հակազդեցություն է ստանալու հենց իրենց նկատմամբ դրական տրամադրված մարդկանց կողմից։
Կենտրոնացեք ընտրությունների վրա, մնացած հարցերը՝ միայն դրանից հետո, ընդ որում՝ այս պահին այս իշխանությանը ծառայող ոստիկանը ՉԻ ԿԱՐՈՂ լինել Քոչարյանի ՆԳ նախարարի թեկնածու։ Սա էլ հստակ իմացեք։

Երբ ես էի ԲՈՒՀ ընդունվում, իմ ֆակուլտետում ուսման վարձը մոտ 500 հազար դրամ էր, հիմա նույն ֆակուլտետի վարձն արդեն 900 հազար դրամից ավել է ու ամեն տարի աճում է, մյուս ֆակուլտետներում ևս միջին վարձը արդեն 800 — 900 հազար դրամ է ու սա իսկապես լուրջ բեռ է մարդկանց համար, որովհետև մենք այս երկրում ենք ապրում ու գիտենք, որ շատ մարդիկ ուղղակի չունեն այս վարձը տալու հնարավորություն, չնայած ունեն շատ տաղանդավոր և խելացի երեխաներ։
Ցանկացած ուսանող գիտի, զգացել է, թե ուսման վարձը ինչ բեռ է դառնում իր ու իր ընտանիքի համար։ Ինքս ուսանող ժամանակ աշխատել եմ, որպեսզի օգնեմ ծնողներիս վճարել ուսմանս վարձը, ինչպես շատ ուսանողներ ու կոնկրետ տղաների պարագայում բանակից վերադառնալուց հետո ուղղակի չի ստացվում տեսնել ծնողի չարչարանքը, անընդհատ տանից գումար վերցնել, գնալ դասի ու փորձում ես գտնել ցանկացած աշխատանք, որ գոնե քո «ձեռքի ծախսը» դու հոգաս ու դա ազդում է նաև քո ուսման որակի վրա, որովհետև շատ բաներ սկսում ես չհասցնել, բացեր են մնում։
Շատ կարևոր եմ համարում, որ անվճար բարձրագույն կրթության դրույթը շատ է շրջանառվում այս նախընտրական փուլում ու գրեթե բոլոր ընդդիմադիր ուժերն այս կամ այն չափով դա ընդգրկել են իրենց ծրագրում։ Կենացային տրամաբանությունից դուրս ինձ համար կոնկրետ բովանդակային ծրագիրը ներկայացրել է «Հայաստան» դաշինքը, մասնավորապես, Աննա Գրիգորյանն է հենց այս հարցով զբաղվում, ինքն էլ հենց կրթության ոլորտի մասնագետ է։ Ու խոսքը նրա մասին չէ, որ ԲՈՒՀ-ի դռները բացվի բոլորի առաջ, հատուկ ընդունելության մեխանիզմ կգործի, որ մարդիկ գիտելիքը ունենալու, քննությունը հանձնելու դեպքում ստանան այդ անվճար ուսումը ստանալու հնարավորությունը ու չմտածեն, թե որտեղից վարձը հայթհայթեն։ Վարձերը կսուբսիդավորվեն պետության կողմից ու բյուջեում այդ գումարները հաստատ կգտնվեն։
Սա իսկապես կարևոր հարց է ու կուզեի, որ բացի քաղաքական հարցերից, մարդիկ նման ծրագրային դրույթներին ևս ուշադրություն դարձնեին։ Ի դեպ, եթե հարցեր ունեք, ավելի մանրամասն կցանկանաք ինչ-որ բան իմանալ, կարող եք գրել մեկնաբանություններում, վստահ եմ՝ Աննան ինքն էլ սիրով կպատասխանի բոլոր հարցերին։ Նաև Ձեր կարծիքն է կարևոր այս ծրագրի հետ կապված, դա էլ կխնդրեմ գրեք, որովհետև բոլորդ էլ կամ եղել եք ուսանող կամ տանը ունեք ուսանող:

Նիկոլ Փաշինյանի դեմ անձնական ոչինչ չունեմ, նրան աշխատում եմ չվիրավորել, առավել ևս՝ չհայհոյել, անձնական դաշտ չեմ մտնում երբեք (ի տարբերություն իր թիմակիցների), որովհետև եթե դու կարողանում ես օբյեկտիվ քննադատել, բացատրել, թե ինչու է ինքը սխալ ու ինչու պետք է գնա, դու չունես վիրավորելու, հայհոյելու, գոռալու կարիք։
ԲԱՅՑ ես ունեմ համոզմունք, որ մեր երկրին պետք է փոփոխություն, մենք չենք կարող շարունակել ապրել այս թշնամանքի, թույնի ու ատելության մեջ, սա քայքայում է բոլորիս, սա քայքայում է մեր պետության հիմքերը, մենք պետք է քայլ առաջ անենք որպես պետություն, թերթենք այս էջը ու գնանք առաջ։
Կարծում եմ՝ 8 տարին լրիվ բավարար էր հասկանալու համար, որ այս թիմը այլևս տալու բան չունի մեր երկրին ու ժողովրդին, լուսանկարում պատկերված անձնավորության պահվածքը հենց դրա վառ ապացույցն է, որ նա իրեն պահում է այսպես, քանի որ առաջարկ ու ասելիք չունի ժողովրդին։ Մենք հոգնել ենք այս ամենից, պարոն Փաշինյան, մեր երկրին փոփոխություն է պետք՝ որքան էլ տհաճ լինի Ձեզ դա լսելը։
Վերադարձ անցյալին երբեք չի լինելու, անցյալի բարքերը հավերժ մնացել են անցյալում, երբեք թույլ չենք տա այդ ամենի վերադարձը, վստահ եղեք, բայց այն, ինչ կա հիմա, դա էլ պետք է դառնա անցյալ, մեզ անհրաժեշտ է ներքին համերաշխություն, իսկ դա հնարավոր է միայն այս իշխանության հեռանալու դեպքում։
Պարոն Փաշինյան, եթե դուք դեռ կարող եք մեկ լավ բան անել այս երկրի համար, դա ուժով իշխանությունը չպահելն է ու ընտրությունների ճանապարհով հեռանալն է։ Մեր երկրին ցնցումներ պետք չեն։ Դուք ստեղծեք նախադեպը, որ Հայաստանում ընտրություններով տեղի ունենա իշխանափոխություն։
Միասին կարող ենք հասնել փոփոխության, վերացնել թշնամանքը, ատելությունը մեր երկրից։
Հունիսի 7-ին գնա՜ ընտրատեղամաս ու քվեարկի՜ր փոփոխություն բերելու, թշնամանքը վերացնելու օգտին։