Category: Armen Press

Ավարտվել է Հայաստանի արտաքին գործերի նախարար Արարատ Միրզոյանի այցը Ժնև, որտեղ նա մասնակցել է ՄԱԿ մարդու իրավունքների խորհրդի և Զինաթափման համաժողովի բարձրաստիճան հատվածներին։
«Արմենպրես»-ի փոխանցմամբ՝ այս մասին հայտնել է ՀՀ ԱԳՆ մամուլի խոսնակ Անի Բադալյանը։
Արարատ Միրզոյանը մեկնել է Վարշավա, որտեղ ՀՀ վարչապետի պատվիրակության կազմում կմասնակցի պաշտոնական այցի շրջանակներում նախատեսված հանդիպումներին:

Ֆրանսիայի կառավարությունը Վերսալի պալատի ղեկավար Քրիստոֆ Լերիբոյին նշանակել է Փարիզի աշխարհահռչակ Լուվր թանգարանի տնօրեն այդ պաշտոնից Լորենս դե Կարի հրաժարականից հետո
Ելիսեյան պալատից հայտնել են, որ 62-ամյա արվեստի պատմաբան Լերիբոյի գլխավոր խնդիրը կլինի ապահովել Լուվրի անվտանգությունը և արդիականացումը և իրագործել Ֆրանսիայի նախագահ Էմանուել Մակրոնի «Նոր վերածնունդ» նախագիծը, որը նախատեսում է Լուվրի վերանորոգում։ 2025 թվականին Մակրոնը հայտարարել էր Լուվրի վերանորոգման 800 միլիոն եվրոյի ծրագրի մասին։
Ըստ լրատվամիջոցի՝ Լերիբոն առաջին հերթին պետք է զբաղվի այն խնդիրներով, որոնց մասին հայտնի է դարձել 2025 թ. հոկտեմբերին Լուվրի հանրահայտ կողոպուտից հետո, որի ընթացքում թանգարանից գողացվել էին 88 միլիոն եվրոյի զարդեր, որոնք դեռ չեն վերադարձվել։
Այժմ նոր տնօրեն պետք է նշանակվի Վերսալի պալատում, որը Լերիբոն ղեկավարում է 2024 թվականից։
Միևնույն ժամանակ նոր տնօրեն է նշանակվել նաև Օրսե թանգարանում. այն այժմ կղեկավարի Անիկ Լեմուանը։ Օրսե թանգարանի տնօրեն Սիլվեն Ամիկը մահացել էր 2025 թ. օգոստոսին։
Լորենս դե Կարը հրաժարական էր տվել Լուվրի թանգարանի տնօրենի պաշտոնից 2025 թ. հոկտեմբերին տեղի ունեցած կողոպուտի, անվտանգության և շենքային պայմանների, ինչպես նաև աշխատակիցների գործադուլների պատճառով։

Հայաստանի պաշտպանության նախարար Սուրեն Պապիկյանը փետրվարի 25-ին Թեհրանում հանդիպել է Իրանի ազգային անվտանգության գերագույն խորհրդի քարտուղար Ալի Լարիջանիի հետ։
«Արմենպրես»-ի փոխանցմամբ՝ այս մասին Պապիկյանը գրել է «Ֆեյսբուք»-ի իր էջում։

«Փետրվարի 25-ին հանդիպել եմ ԻԻՀ ազգային անվտանգության գերագույն խորհրդի քարտուղար Ալի Լարիջանիի հետ։
Հանդիպման ընթացքում քննարկել ենք տարածաշրջանային անվտանգությանն ու կայունությանը, ինչպես նաև Հայաստան-Իրան երկկողմ համագործակցության ընթացքին ու զարգացման հեռանկարներին առնչվող հարցեր։
Կարևորել եմ Իրանի շուրջ ստեղծված իրավիճակը դիվանագիտական ճանապարհով լուծելու անհրաժեշտությունը։
Անդրադարձել ենք նաև Հայաստանի և Իրանի շուրջ ստեղծված անվտանգային միջավայրին»,- գրել է Պապիկյանը:

ՀՀ պաշտպանության նախարար Սուրեն Պապիկյանը պաշտոնական այցով Իրան էր ժամանակ փետրվարի 23-ին։ Այցի շրջանակներում Պապիկյանը մինչ այս հանդիպել էր Իրանի պաշտպանության նախարարի, զինված ուժերի շտաբի պետի և նախագահի հետ։

Մեկնարկում է պաշտոնական այցս Լեհաստան🇦🇲🇵🇱

Գևորգ Պապոյանի ճեպազրույցը
https://youtu.be/PWIEMfrzfF4

ՏՏԳՇՄՊ հարցերի մշտական հանձնաժողովի հերթական նիստ
https://youtu.be/Rb7FvT5JESA

Տոկիոյում տեղի է ունեցել Ճապոնական SkyDrive Inc. ստարտափի կողմից մշակված թռչող ավտոմեքենայի առաջին փորձնական թռիչքը: «Արմենպրես»-ի փոխանցմամբ՝ այս մասին հաղորդում է ՏԱՍՍ գործակալությունը՝ հղում անելով մշակող ընկերությանը։
Ցուցադրական թռիչքի ընթացքում մեքենան հաղթահարել է մոտավորապես 150 մետր հեռավորություն Տոկիոյի ծոցի օդային տարածքում։ Այն օդում է գտնվել 3,5 րոպե։
SD-05 թռչող ավտոմեքենան հանդերձված է կուտակիչներով և 12 ռոտորային շարժիչներով, որոնք ունեն քվադրոկոպտերների պտուտակների նման թիակներ։ Այն նախատեսված է երեք մարդու համար և կարող է հաղթահարել 15-ից մինչև 40 կիլոմետր հեռավորություն։
Իր չափերի շնորհիվ SD-05-ը կարող է վայրէջք կատարել այն վայրերում, որտեղ դա չի կարող անել ուղղաթիռը։ SkyDive-ի գլխավոր տնօրեն Տոմոհիրո Ֆուկուձավայի խոսքով՝ թռիչքի արժեքն ապագայում կարող է մոտավորապես կրկնապատիկ ավելի լինել, քան տաքսունը, իսկ ճանապարհի ժամանակը՝ չորսից հինգ անգամ պակաս:

ՀՀ ԲՏԱ նախարարությունը և Plug and Play աքսելերատորը հրավիրում են մասնակցելու «Երիտասարդության ԻնֆոՎերազինում» տեղեկատվական հանդիպմանը

🔴 Հայաստանի աշխատանքի և սոցիալական հարցերի նախարարի մամուլի խոսնակ Նվեր Կոստանյանն անդրադարձել է ապրիլի 1-ից թոշակներն ու նպաստները բարձրացնելու Կառավարության որոշման շուրջ տարբեր շրջանակների կողմից հնչող մեկնաբանություններին։

««Հայաքվե» կոչվող միավորումը շատ ծանր է տարել կենսաթոշակների և նպաստների բարձրացման լուրը։ Առավոտից իրենց տեղը չեն գտնում․ նկատեցի, որ արդեն մի քանի անհոդաբաշխ ու անտրամաբանական մեկնաբանություններ են տվել այս թեմայով։ Խմբակի հայտարարությունների զավեշտը հասել է այնտեղ, որ սկսել են պնդել, թե իբր թոշակների բարձրացման որոշումը իրենց ինչ-որ ստորագրահավաքի հետևանք է։
Մեր քաղաքացիների բարեկեցության շարունակական բարձրացումը եղել և մնում է ՀՀ կառավարության առաջնահերթությունների շարքում, կենսաթոշակները և նպաստները բարձրացվել և բարձրացվում են պարբերաբեր՝ ընդ որում թե՛ հետվճարի գործիքի կիրառմամբ, թե՛ ապրիլի 1-ից նաև ուղիղ բարձրացման միջոցով։
65-ից բարձր անձանց առողջության ապահովագրության համար պետության կողմից հունվարի 1-ից վճարվող ամսական 10 800 դրամ գումարը, կենսաթոշակների և նպաստների՝ ապրիլի 1-ից 10 000 դրամով բարձրացումը, ինչպես նաև անկանխիկ գործարքներից հունվարի 1-ից տրվող 20% հետվճարը՝ (ևս մինչև 10 000 դրամ) էականորեն նպաստում են մեր ավագ սերնդի ներկայացուցիչների կենսապայմանների բարելավմանը։
Ստացվում է, որ միայն 2026-ին Կառավարությունը ուղիղ կամ անուղղակի կերպով 30 800 դրամով ավելացնում է մեր ավագ սերնդի ներկայացուցիչներին տրվող սոցիալական երաշխիքների ծավալը, ինչը ահռելի քայլ է մեր ավագ սերնդի բարեկեցության բարձրացման ուղղությամբ։
Տեսա նաև մեկնաբանություններ, թե այս քայլը հատուկ արվում է ընտրություններից առաջ՝ ներքաղաքական նպատակներով։ Այս հայտարարությունն անում են անձինք, ում իշխանության տարիներին Հայաստանում ծերության նպաստը 16 000 դրամ էր։ Քաղաքական հենց այս շրջանակի ներկայացուցիչներն էին, որ մարդկանց «փարոս» համակարգի միջոցով միտումնավոր պահում էին աղքատության մեջ, որպեսզի ընտրությունից ընտրություն մեկ շիշ ձեթով, տուկի թելով, 10 000 դրամով դարձնեն ձայնավաճառ։ Փաստերն ինքնին խոսուն են, ավելացնելու ոչինչ չունեմ»,- «Արմենպրես»-ի փոխանցմամբ՝ «Ֆեյսբուք»-ի իր էջում գրել է Նվեր Կոստանյանը։

Հայաստանի արտաքին առևտրաշրջանառությունն ընթացիկ տարվա հունվարին՝ 2025 թվականի նույն ամսվա համեմատ կրճատվել է 12 տոկոսով՝ կազմելով 1 մլրդ 275.7 մլն դոլար: Դեկտեմբերի համեմատ ծավալը նվազել է 49.2 տոկոսով:
Այս մասին հայտնում է ՀՀ վիճակագրական կոմիտեն:
2026 թվականի հունվարին արտահանումը համապատասխանաբար 13.5 և 55 տոկոսով պակաս է եղել նախորդ տարվա հունվար և դեկտեմբեր ամիսների ցուցանիշից՝ կազմելով 463.9 մլն դոլար:
Ներմուծումը հունվարին համապատասխանաբար 11.2 և 45.2 տոկոսով պակաս է եղել, քան 2025 թվականի հունվարին և դեկտեմբերին՝ կազմելով 811.8 մլն դոլար:
ԱՄՆ դոլարի նկատմամբ հայկական արժույթի փոխարժեքը եղել է 379.98 դրամ: