Category: Armen Press

Հայաստանն ու Իրանը բանակցում են Ռազմավարական համագործակցության փաստաթուղթ ստորագրելու վերաբերյալ։
Այս մասին լրագրողների հետ զրույցում հայտնեց Հայաստանի վարչապետ Նիկոլ Փաշինյանը։

«Մենք քննարկումներ ունենք և բանակցում ենք հնարավոր համաձայնագիրը։ Երբ որ համաձայնագրի շուրջ բանակցությունները հաջողությամբ կավարտվեն, բնականաբար, դրանից հետո պետք է ստորագրվի»,- ասաց Փաշինյանը։

Վարչապետը հայտնեց, որ համաձայնագրի ստորագրման համար հստակ ժամկետ դեռ չկա։

«Զայեդ» մարդկային եղբայրության մրցանակի արժանացած Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը նաև գումարային պարգև կստանան։ «Արմենպրես»-ի փոխանցմամբ՝ լրագրողների հետ զրույցում Նիկոլ Փաշինյանը նշեց, որ մրցանակային հիմնադրամը 1 մլն դոլար է։

«Քանի որ կիսել ենք մրցանակը, ենթադրվում է, որ յուրաքանչյուրիս 500 հազար դոլար կտրվի։ Գումարը դեռ փոխանցված չէ, բայց վստահ եմ՝ կփոխանցվի, և ես մտածում եմ այդ գումարն ի՞նչ հանրային կարիքի կամ նպատակի է պետք ուղղել։ Երբ կլինի կոնկրետ որոշում, առիթ կլինի, կհայտնենք»,- ասաց վարչապետը։

Հայաստանի վարչապետ, «Քաղաքացիական պայմանագիր» կուսակցության վարչության նախագահ Նիկոլ Փաշինյանն արձագանքեց 2026 թվականի խորհրդարանական ընտրություններում կուսակցության համամասնական ցուցակը քվեարկությամբ ձևավորելու վերաբերյալ ընդդիմադիրների մեղադրանքներին։
Լրագրողների հետ զրույցում վարչապետը, մասնավորապես, հակադարձեց այն պնդումներին, թե այս քայլով կուսակցությունը «ժողովրդավարության իմիտացիա» է ստեղծում։
«Քվեարկության արդյունքներով՝ «Քաղաքացիական պայմանագիր» կուսակցության հենց առաջին կանոնադրության մեջ սահմանվել է, որ հերթական խորհրդարանական ընտրություններում կուսակցության համամասնական ցուցակը սահմանվում է համաժողովի կողմից, մենք առաջին անգամ, որպես քաղաքական ուժ խորհրդարանական ընտրություններին մասնակցել ենք 2017 թվականին և 2017 թվականին հերթական ընտրություն է եղել և մեր համամասնական ցուցակը ձևավորվել է նույն կերպ՝ փակ, գաղտնի վարկանիշային քվեարկությամբ»,- ասաց Փաշինյանը։
Վարչապետը հիշեցրեց՝ 2017 թվականից հետո տեղի է ունեցել երկու արտահերթ ընտրություն՝ 2018-ին և 2021-ին, որոնցում, ըստ կուսակցության կանոնադրության, համամասնական ցուցակը ձևավորել է վարչությունը։
«Որովհետև արտահերթի ժամանակ պրոցեսներն ավելի արագ են տեղի ունենում և ժամանակի խնդիր կա։
2026-ին տեղի է ունենալու հերթական ընտրություն, և, ինչպես 2017-ին, այս դեպքում էլ իրականացնում ենք փակ գաղտնի քվեարկության արդյունքում ցուցակի ձևավորում»,- նշեց Նիկոլ Փաշինյանը։

Պետական գույքի կառավարման կոմիտեն ներկայացրել է e-auctions.am էլեկտրոնային աճուրդի համակարգի միջոցով առաջիկայում օտարման կամ վարձակալության ներկայացված գույքի ցանկը։ Մանրամասները՝ ստորև.
1. Վաճառվում են «SAMAND» մակնիշի ավտոմեքենաներ:
2. Վաճառվում են «GAZ» մակնիշի ավտոմեքենաներ։
3. Վաճառվում են «VAZ» մակնիշի ավտոմեքենաներ։
4. Վաճառվում են «PAZ» մակնիշի ավտոմեքենաներ։
5. Վաճառվում են «MAZ» մակնիշի ավտոմեքենաներ։
6. Վաճառվում են «UAZ» մակնիշի ավտոմեքենաներ։
7. Վաճառվում են «ZIL» մակնիշի ավտոմեքենաներ։
8. Վաճառվում են «VOLKSWAGEN» մակնիշի ավտոմեքենաներ։
9. Վաճառվում են «HYUNDAI» մակնիշի ավտոմեքենաներ։
10. Վաճառվում են «TOYOTA CAMRY» մակնիշի ավտոմեքենաներ։
11. Վաճառվում են «CHEVROLET NIVA» մակնիշի ավտոմեքենաներ։
12. Վաճառվում է «FORD TRANSIT 2.3» մակնիշի ավտոմեքենա:
13. Վաճառվում է «RAF 22031» մակնիշի ավտոմեքենա:
14. Վաճառվում է «ERAZ 32181» մակնիշի ավտոմեքենա:
15. Վաճառվում է «IZH 2715» մակնիշի ավտոմեքենա:
16. Վաճառվում է «KAVZ 3270» մակնիշի ավտոմեքենա:
17. Վաճառվում է «PEUGEOT PARS 1.8» մակնիշի ավտոմեքենա:
18. Վաճառվում է «INFINITI QX4 3.5» մակնիշի ավտոմեքենա:
19. Վաճառվում է «KIA OPTIMA 2.0» մակնիշի ավտոմեքենա:
20. Տրվում է վարձակալության Երևանի Հովհ. Թումանյանի անվան անվան № 32 հիմնական դպրոցի 1-ին հարկից 46․1 քմ տարածք:
21. Տրվում է վարձակալության Արարատի մարզի Խաչփարի միջնակարգ դպրոցի 1-ին հարկից 146․7 քմ տարածք:
22. Տրվում է վարձակալության Երևանի Ջորջ Դունայանցի անվան № 154 հիմնական դպրոցի 1-ին հարկից 180․2 քմ տարածք:
23. Տրվում է վարձակալության Երևանի № 185 հիմնական դպրոցի 2-րդ հարկից 154․3 քմ տարածք:
24. Տրվում է վարձակալության Երևանի Գևորգ Չաուշի անվան № 188 հիմնական դպրոցի 2-րդ հարկից 154․3 քմ տարածք:
Հարցերի դեպքում զանգահարել +374 11 52 39 86 հեռախոսահամարին։
https://armenpress.am/hy/article/1242143/amp

«Վրացական երկաթուղի» ընկերությունը որևէ բանակցություն չի վարում Աբխազիայի տարածքով Ռուսաստանի հետ երկաթուղային հաղորդակցության վերականգնման վերաբերյալ։ «Արմենպրես»-ի փոխանցմամբ՝ այս մասին ընկերությունը հայտնել է «Իմեդի» հեռուստաընկերությանը։

««Վրացական երկաթուղի»-ն չի քննարկում Ռուսաստանի և Վրաստանի միջև երկաթուղային հաղորդակցության վերականգնման հարցը, հետևաբար, մեզ համար բացարձակապես անհասկանալի է, թե ինչու է այս հարցը հայտնվել օրակարգում», — ասվում է ընկերության հայտարարության մեջ։

Իր հերթին, Վրաստանի խորհրդարանի խոսնակ Շալվա Պապուաշվիլին հայտարարել է, որ հանրապետությունը շփումներ չունի Ռուսաստանի հետ երկաթուղային հաղորդակցության վերականգնման վերաբերյալ։

Հայաստանի Հանրապետության վարչապետ Նիկոլ Փաշինյանն ընդունել է Հայաստանում Իրանի Իսլամական Հանրապետության նորանշանակ արտակարգ և լիազոր դեսպան Խալիլ Շիրլողամիին
Նիկոլ Փաշինյանը շնորհավորել է Խալիլ Շիրլողամիին դեսպանի պաշտոնը ստանձնելու առիթով և կարևորել Իրանի հետ հարաբերությունների հետևողական զարգացումը։
ՀՀ վարչապետն ընդգծել է, որ Հայաստան–Իրան հարաբերություններում առկա է աննախադեպ դինամիկա, ինչը պայմանավորված է նաև նրանով, որ երկու երկրները միմյանց կապվում են բնական շահերով։ Երկրի ղեկավարը հույս է հայտնել, որ Խալիլ Շիրլողամիի գործունեության ընթացքում կողմերին կհաջողվի համագործակցությունն էլ ավելի խորացնել և ընդլայնել բոլոր ոլորտներում։
Դեսպանը շնորհակալություն է հայտնել հյուրընկալության համար և վարչապետին փոխանցել ԻԻՀ նախագահ Մասուդ Փեզեշքիանի ջերմ ողջույնները։ Խալիլ Շիրլողամին շեշտել է երկու ժողովուրդների միջև բազմադարյա սերտ կապերի փաստը, որի վրա էլ հիմնված է Հայաստանի և Իրանի միջև փոխվստահության բարձր մակարդակը։
Դեսպանի խոսքով՝ Իրանը ողջունում է խաղաղությանը միտված Հայաստանի վարչապետի քաղաքականությունը, ինչը նպաստում է տարածաշրջանի զարգացմանն ու առաջընթացին։
Խալիլ Շիրլողամիին շեշտել է՝ զարգացած Հայաստանը նախանշված է Իրանի ռազմավարական քաղաքականության հիմքում և իրենք առաջնորդվում են այդ սկզբունքով։
Հաջորդիվ զրուցակիցները քննարկել են տարբեր ոլորտներում Հայաստան–Իրան փոխգործակցությանը վերաբերող հարցեր, անդրադարձ կատարել համատեղ ծրագրերի ընթացքին։
Տարածաշրջանային հաղորդուղիների ապաշրջափակման և առևտրատնտեսական հարաբերությունների խթանման համատեքստում կողմերը կարևորել են երկու երկրների միջև երկաթուղային կապի ապահովմանն ուղղված քայլերը, ինչը կարող է դառնալ ավելի լայն կապերի հաստատման մաս։

Հայաստանի Հանրապետության տարածքային կառավարման և ենթակառուցվածքների նախարար Դավիթ Խուդաթյանը փետրվարի 13-ին ընդունել է Հայաստանում ՌԴ արտակարգ և լիազոր դեսպան Սերգեյ Կոպիրկինի գլխավորած պատվիրակությանը։
ՀՀ ՏԿԵ նախարարությունից հայտնում են, որ հանդիպման ժամանակ քննարկվել են ՀԱԷԿ-ի երկրորդ էներգաբլոկի շահագործման ժամկետի երկարաձգման աշխատանքների վերաբերյալ հարցեր։
Քննարկվել են նաև ենթակառուցվածքների զարգացմանը, ինչպես նաև երկկողմ հետաքրքրություն ներկայացնող մի շարք այլ հարցեր։
Երկուստեք կարևորվել է միջտարածաշրջանային համագործակցությունը և պայմանավորվածություն է ձեռք բերվել հաջորդիվ էլ շարունակել խորացնել համագործակցությունն այդ ուղղությամբ։

Հայաստանում Եվրոպական միության դիտորդական առաքելության հետագա գործունեության վերաբերյալ հարցը ԵՄ-ն Հայաստանի կառավարության հետ կքննարկի աշնանը՝ Բրյուսելում
«Արմենպրես»-ի հաղորդմամբ՝ այս մասին Հայաստանում Եվրոպական միության առաքելության 3-րդ տարեդարձի առթիվ կազմակերպված միջոցառման շրջանակներում լրագրողների հետ զրույցում ասել է առաքելության ղեկավար Մարկուս Ռիտերը։

«Ինչի շուրջ համաձայնության ենք եկել, այն է, որ շարունակելու ենք մեր ներկա աշխատանքը։ Մենք կշարունակենք նաև սահմանին հարակից տարածքներում պարեկություն իրականացնել և զեկուցել այնտեղ տեղի ունեցող իրադարձությունների մասին՝ մինչև Հայաստանի և Ադրբեջանի միջև խաղաղության պայմանագիրը ստորագրվի և վավերացվի։ Աշնանը Եվրամիությունը Բրյուսելում կքննարկի առաքելության ապագային վերաբերող հարցերը»,-ընդգծել է Ռիտերը։

Ռիտերը նաև խոսել է ԵՄ դիտորդական առաքելության՝ շուրջ երեք տարվա կատարած աշխատանքի, գործունեության ուղղությունների, ինչպես նաև Հայաստան-Ադրբեջան հարաբերությունների կարգավորման գործում առաքելության ունեցած դերակատարության մասին։

«Երբ մենք ժամանեցինք Հայաստան, սահմանին մեծ լարվածություն կար, տեղի էին ունենում կրակոցներ, նույնիսկ կային զոհված և վիրավոր զինծառայողներ։ Դա բավականին դժվար ժամանակաշրջան էր։ Այդ օրերին մենք նաև հասկացանք, որ սահմանամերձ բնակավայրերում ապրող բնակչությունը վախենում էր, որ ինչ-որ նոր բախում կարող է տեղի ունենալ։ Բնակիչները մտահոգված էին նոր և բաց հակամարտության հնարավորությամբ, սակայն դա տեղի չունեցավ։ Այս տեսանկյունից կարող եմ ասել, որ առաքելությունն իրագործվել է՝ ունենալով հաջողություն։ Իրավիճակը հանգիստ և խաղաղ է»,-ընդգծել է Մարկուս Ռիտերը՝ շեշտելով, որ այդ հանդարտ իրավիճակը Հայաստանի ու Ադրբեջանին հնարավորություն է տալիս խոսելու և դեռևս առկա խնդիրները խաղաղ ճանապարհով լուծելու համար։

Հիշեցնենք, որ Մարկուս Ռիտերն արդեն ավարտում է իր պաշտոնավարումը Հայաստանում։

Հայաստանի անվտանգության խորհրդի քարտուղար Արմեն Գրիգորյանը հայտարարել է, որ Երևանն ու Անկարան շարունակում են քննարկումները՝ արդեն իսկ ձեռք բերված պայմանավորվածությունները երրորդ երկրների քաղաքացիների և դիվանագիտական անձնագիր ունեցող անձանց համար սահմանի բացման վերաբերյալ հնարավորինս շուտ իրականացնելու շուրջ։
Այս մասին Գրիգորյանն ասել է լրագրողների հետ զրույցում՝ անդրադառնալով Հայաստան-Թուրքիա հարաբերությունների կարգավորման գործընթացին։
«Ժամկետի մասին որևէ բան չեմ կարող ասել։ Մենք ակնկալում ենք, որ այն պայմանավորվածությունները, որոնք ունեցել ենք Թուրքիայի հետ, կիրականացնենք։ Շարունակում ենք քննարկել թուրքական կողմի հետ, որպեսզի այդ պայմանավորվածությունները իրականություն դարձնենք հնարավորինս շուտ»,- խոսելով Հայաստան-Թուրքիա սահմանի հնարավոր բացման ժամկետների մասին՝ ասել է Արմեն Գրիգորյանը։
Հայաստան-Թուրքիա սահմանը փակվել է 1993 թվականից՝ Թուրքիայի կողմից։ 2022 թվականից Հայաստանն ու Թուրքիան հարաբերությունների կարգավորման գործընթաց են սկսել, որի շրջանակներում կողմերը պայմանավորվել են սահմանը սկզբնական շրջանում բացել երրորդ երկրների քաղաքացիների և դիվանագիտական անձնագիր ունեցող անձանց համար, սակայն այդ պայմանավորվածությունը մինչ այս պահը կյանքի չի կոչվել։

Եվրոպական միության դիտորդական առաքելությունը իր դրական ազդեցությունն է ունեցել Հայաստանի ու Ադրբեջանի միջև խաղաղության հաստատման գործում․ Երևանը ցանկանում է, որ ԵՄ քաղաքացիական առաքելությունը շարունակի մնալ Հայաստանում
Այս մասին լրագրողների հետ զրույցում նշել է Հայաստանի ԱԽ քարտուղար Արմեն Գրիգորյանը։
Նրա խոսքով՝ Հայաստանը մշտապես հրապարակային, ինչպես նաև Եվրամիության գործընկերների հետ մասնավոր զրույցներում նշում է, որ շատ բարձր է գնահատում Բրյուսելի հետ համագործակցությունը և շատ դրական է գնահատում նաև ՀՀ-ում ԵՄ դիտորդական առաքելության գործունեությունը։

«Մենք համոզված ենք, որ առաքելությունն իր դրական ազդեցությունն է ունեցել կայունության գործոնի տեսանկյունից և նաև նպաստել է, որ տարածաշրջանում կայունություն, ինչպես նաև սահմանային համայնքների բնակչության մոտ վստահություն լինի կայունության և անվտանգության նկատմամբ»,-շեշտել է ԱԽ քարտուղարը։

Գրիգորյանը նշել է, որ ԵՄ դիտորդական առաքելությունը դրական ազդեցություն և կարևոր դեր է ունեցել Հայաստան-Ադրբեջան խաղաղության հաստատման տեսանկյունից։
ԱԽ քարտուղարն ընդգծել է, որ Հայաստան-Ադրբեջան կարգավորման գործում կարևոր գործոն է եղել նաև ԱՄՆ նախագահ Դոնալդ Թրամփի դերակատարությունը։
Անդրադառնալով հարցին՝ կա՞ արդյոք պատկերացում, թե հետագայում որն է լինելու առաքելության աշխատանքը՝ Արմեն Գրիգորյանը պատասխանել է, որ, այնուամենայնիվ, Հայաստանը ցանկանում է, որ ԵՄ դիտորդական առաքելությունը շարունակի գործունեություն ծավալել ՀՀ-ում։

«Մի բան հստակ է․ մենք ուզում ենք, որ ԵՄ քաղաքացիական առաքելությունը շարունակի մնալ Հայաստանում։ Գիտեք, որ խաղաղության պայմանագրի շրջանակներում մենք համաձայնություններ ունենք, դեռևս պետք է այն ստորագրվի և վավերացվի, որպեսզի ուժի մեջ մտնի, և հետո հասկանանք, թե ինչպես ենք առաջ շարժվում այդ մասով։ Բայց միանշանակ է, որ մենք ուզում ենք առաքելությունը շարունակի մնալ Հայաստանում և կշարունակենք աշխատել այս ուղղությամբ»,-ընդգծել է ԱԽ քարտուղարը։

Նա նաև հավելել է, որ հետագա համագործակցության ձևերը ԵՄ-ի հետ քննարկման փուլում են։

«Կքննարկենք, կհասկանանք, թե ինչպիսի գործունեության շրջանակում մենք կարող ենք համագործակցել։ Մենք կհասկանանք, թե ինչպես կարող ենք անել, բայց դա նաև կախված է խաղաղության պայմանագրի վավերացումից»,-նշել է Գրիգորյանը։