Category: Armen Press

Մեծ Բրիտանիայի թագավոր Չարլզ 3-րդը ԱՄՆ Կոնգրեսի առջև ելույթում հայտարարել է, որ չնայած Եվրոպայում և Մերձավոր Արևելքում անորոշությանն ու հակամարտությանը, Միացյալ Թագավորությունը և ԱՄՆ-ն միշտ կլինեն հավատարիմ դաշնակիցներ՝ միավորված ժողովրդավարության պաշտպանության գործում։

Իրանը չի պլանավորում ԱՄՆ-ի հետ բանակցությունների ընթացքում քննարկել իր հրթիռային ծրագիրը, ինչպես նաև Թեհրանի կողմից աջակցվող տարածաշրջանային զինված կազմավորումների՝ «Դիմադրության առանցքի» հարցը, հայտնել է Կահիրեում Իսլամական Հանրապետության դեսպան Մոջթաբա Ֆերդոուսի Փուրը։

Ապրիլի 29-ին, ժամը 02։22-ին ՆԳՆ 112 օպերատիվ կառավարման կենտրոն ահազանգ է ստացվել, որ հրդեհ է բռնկվել Երևան քաղաքի Տիչինայի փողոցում գտնվող տներից մեկում։
Դեպքի վայր են մեկնել ՆԳՆ Երևան քաղաքի փրկարարական վարչության հրշեջ-փրկարարական ջոկատներից երեք մարտական հաշվարկ և Հրդեհաշիջման և փրկարարական աշխատանքների կազմակերպման բաժնի հերթապահ խումբը։
Հրդեհը մեկուսացվել է ժամը 03։05-ին, մարվել՝ 03:18-ին։ Այրվել է երկհարկանի տան երկրորդ հարկը (մոտ 90 քմ):
Հրշեջ-փրկարարները տարհանել են 10 քաղաքացու։
Հրշեջ-փրկարարներին հաջողվել է կանխել հրդեհի տարածումը դեպի առաջին հարկ և կից երկու տներ։

Մարդկության պատմության վաղնջական ժամանակներից դարերի անխախտ ընթացքով մեզ հասած համր ու պատկերավոր ուղերձ են ժայռապատկերները, որոնք ավանդում են նախնյաց կենսակերպի, նրանց ապրումների, հույզերի ու ձգտումների մասին՝ դառնալով ապառաժներին հավերժացած կապի միջոց սերունդների միջև:
Դա հույժ կարևոր տեղեկատվություն է, որը ոչ միայն թույլ է տալիս պատկերացում կազմել տասնյակ հազարավոր տարիներ առաջ մարդկանց կյանքի կազմակերպման մասին, այլև, որ ավելի կարևոր է, ոճային նմանությամբ ու ընդհանրացմամբ նույնականացնել տվյալ տարածքում ապրողների կամ հաստատվածների խմբին, որոնք հետագայում կարող էին ազգերի ձևավորման կորիզը դառնալ:
Հայաստանում, ընդհանրապես, Հայկական լեռնաշխարհում հայտնաբերված ժայռապատկերներն ունեն ոճային հստակ առանձնահատկություններ, որոնք չեն հանդիպում այլ երկրներում և տարածաշրջաններում: Այդ անկրկնելի նշանները ժամանակի ընթացքում ժայռերից փոխադրվել և վերարտադրվել են զուրօրինակ գորգերի վրա՝ ձևավորելով հայկական ոճը:
Այսպիսի հետաքրքիր մանրամասներով ուղեկցվեց «Արմենպրես»-ի հարցազրույցը ժայռապատկերների և հնագույն հուշարձանների բազմամյա հետազոտող, անվանի գիտնական Կարեն Թոխաթյանի հետ, որը սկսեցինք նրա հեղինակած «Հայաստանի ժայռապատկերները» բացառիկ գրքին անդրադարձով, իսկ ավարտեցինք՝ Կենդանակերպի նշանների հայկական ծագման մասին տեսությամբ:

Ընտանեկան որոշ պատմություններ դուրս են գալիս անձնական հիշողության սահմաններից։ Դրանք դառնում են ժամանակի, գաղթի, ինքնության և ժառանգության փոխանցման պատմություններ։Այդպիսի պատմություն է Լևոն Մուրադյանի և նրա դստեր՝ RISH-ի հիմնադիր Նունե Մուրադյանի ճանապարհը։
1990-ականների վերջում Բելգիա տեղափոխվելով՝ Մուրադյանների ընտանիքը նոր երկիր չէր տանում միայն նոր կյանքի ակնկալիքը։ Նրանք իրենց հետ բերում էին հիշողություն, ներքին ուժ, Հայաստանից խորը կապվածություն և մի յուրահատուկ կարողություն՝ ինտեգրումը վերածելու ստեղծման, իսկ արմատները՝ ապագայի հենարանի։Լևոն Մուրադյանը Բելգիա է գալիս 1998 թվականին։
Շատ արագ նա նկատում է, որ հայկական համայնքի ներսում արդեն ձևավորված կյանք կա, սակայն բացակայում է մի կարևոր օղակ՝ նոր ժամանողների և բելգիական հասարակության միջև կենդանի կապը։

Հայաստանի արտաքին գործերի նախարար Արարատ Միրզոյանն ու Ֆրանսիայի արտաքին գործերի նախարար Ժան-Նոել Բարոն Փարիզում մասնակցել են Ֆրանսիայում ՀՀ դեսպանության նոր նստավայրի բացմանը։ «Արմենպրես»-ի փոխանցմամբ՝ այս մասին Միրզոյանը տեսանյութ է հրապարակել «Ֆեյսբուք»-ում։
«Այսօր իմ բարեկամ Ժան-Նոելի հետ մենք մասնակցեցինք Հայաստանի Հանրապետության դեսպանության նոր նստավայրի հանդիսավոր բացմանը»,- նշել է Միրզոյանը։
Նախարարները տեսանյութը եզրափակել են՝ «Կեցցե՛ Հայաստանը, կեցցե՛ Ֆրանսիան» վանկարկումներով։

Հնդկաստան կատարած պաշտոնական այցի ընթացքում ՀՀ պաշտպանության նախարարի առաջին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանը հանդիպել է Հնդկաստանի պաշտպանության քարտուղար Ռաջեշ Կումար Սինգհիին։ Այս մասին հայտնում են Պաշտպանության նախարարությունից։
Հանդիպման ընթացքում Էդվարդ Ասրյանն ու Ռաջեշ Կումար Սինգհին քննարկել են պաշտպանության բնագավառում Հայաստան-Հնդկաստան համագործակցությանը վերաբերող հարցեր։

Արեգակի վրա M մակարդակի երեք խոշոր բռնկում է արձանագրվել։ «Արմենպրես»-ի փոխանցմամբ, ինչպես հայտնում է ՌԻԱ Նովոստին, այս մասին տեղեկացրել են Ռուսաստանի գիտությունների ազգային ակադեմիայի արեգակնային հետազոտության ինստիտուտից։
Ինստիտուտի տրամադրած տեղեկության համաձայն՝ երեք խոշոր բռնկումները տեղի են ունեցել Մոսկվայի ժամանակով 15։23-17։07-ին։ Դրանք եղել են M1.03, M1.58 և M1.11 մակարդակի։
Ապրիլի 28-ի կեսգիշերին արեգակի վրա ևս 12 սովորական բռնկում է արձանագրվել՝ C մակարդակի։

Վարչապետի աշխատակազմի ղեկավար Արայիկ Հարությունյանը հանդիպել է Ընտրական համակարգերի միջազգային հիմնադրամի (IFES) նախագահ և գլխավոր գործադիր տնօրեն Էնթոնի Բենբերիի հետ։
Հանդիպման ընթացքում բարձր է գնահատվել 2018 թվականից ի վեր IFES-ի հետ Հայաստանում իրականացվող համատեղ ծրագրերը՝ ուղղված ժողովրդավարական կառավարման ամրապնդմանը և վստահելի ընտրական գործընթացների զարգացմանը։
Զրույցի ընթացքում նշվել է, որ ազատ, արդար և թափանցիկ ընտրությունների ապահովումը շարունակում է մնալ Կառավարության առաջնահերթություններից մեկը։ Այս համատեքստում ընդգծվել է, որ 2026 թվականի ընտրությունները դիտարկվում են որպես հնարավորություն՝ ամրապնդելու ժողովրդավարական ինստիտուտները և բարձրացնելու հանրային վստահությունը։
Կողմերն անդրադարձել են նաև առաջիկա ընտրական գործընթացներին՝ ներառյալ տեղական ինքնակառավարման մարմինների ընտրությունները, և կարևորել երկարաժամկետ ու համակարգված համագործակցության շարունակականությունը։

Ռուսաստանի Դաշնության մաս կազմող Բուրիաթիայի Հանրապետությունում տեղի ունեցած ձնահոսքի վայրից փրկարարները ևս մեկ դի են դուրս բերել։ Այս մասին հայտնում է ՏԱՍՍ-ը։
«Փրկարարները ևս մեկ մարմին են հայտնաբերել Բուրիաթիայի «Իրոկինդա» հանքավայրում տեղի ունեցած ձնահոսքի վայրից»,- հայտնել են Արտակարգ իրավիճակների նախարարությունից։
Ավելի վաղ փրկարարները ևս 3 դի էին դուրս բերել։ Փլատակներում, հնարավոր է, ևս 2 մարդ լինի։