Category: Armen Press

Եվրամիության անդամ երկրները քննարկելու են, թե ինչ կարող է անել եվրոպական կողմը՝ բաց պահելու Հորմուզի նեղուցը։
Ինչպես հաղորդում է «Արմենպրես»-ը՝ վկայակոչելով France 24-ը, այս մասին Բրյուսելում լրագրողների հետ զրույցում հայտարարել է ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալասը։
«Մեր շահերից է բխում Հորմուզի նեղուցը բաց պահելը, և այդ պատճառով մենք նաև քննարկում ենք, թե ինչ կարող ենք անել այս առումով եվրոպական կողմից», — ասել է նա՝ ԵՄ արտաքին գործերի նախարարների հետ հանդիպումից առաջ։

Մեծ Բրիտանիայի վարչապետ Քիր Սթարմերը հրաժարվում է ռազմանավեր ուղարկել Հորմուզի նեղուցում նավագնացությունը վերականգնելու համար, չնայած ԱՄՆ նախագահ Դոնալդ Թրամփի խնդրանքին: Ինչպես հաղորդում է «Արմենպրես»-ը, այս մասին հաղորդել է The Daily Telegraph թերթը:
Էներգետիկայի նախարար Էդ Միլիբանդը հայտարարել է, որ կառավարությունը «ինտենսիվորեն ուսումնասիրում է» նեղուցի վերաբացման համար հնարավոր քայլերը, սակայն հրաժարվել է հստակ պարտավորություններ ստանձնել։
Նախարարները քննարկում են ականներ որսացող անօդաչու թռչող սարքեր ուղարկելու հարցը, սակայն ներկայում պատրաստ չեն որևէ ռազմանավ ուղարկել նեղուց։
The Daily Telegraph-ը գրում է, որ ռազմանավեր ուղարկելուց հրաժարումը կարող է էլ ավելի վատացնել հարաբերությունները Սթարմերի և Թրամփի միջև։ Սպիտակ տան ղեկավարն արդեն դժգոհություն է հայտնել, որ Լոնդոնը թույլ չի տվել օգտագործել իր ռազմակայաններն Իրանի դեմ առաջին հարվածները հասցնելու համար:

Ղազախստանում տեղի ունեցած հանրաքվեի արդյունքներով երկրի նոր սահմանադրությանը կողմ է քվեարկել քվեարկության մասնակիցների 87.18 տոկոսը կամ 7 միլիոն 954 հազար 667 մարդ։
«Արմենպրես»-ի թղթակցի հաղորդմամբ՝ քվեարկության արդյունքները ներկայացրել է Ղազախստանի կենտրոնական ընտրական հանձնաժողովը:
Ղազախստանի կենտրոնական ընտրական հանձնաժողովը նաև հայտնել է, որ երկրի նոր Սահմանադրության հանրաքվեի քվեարկությանը մասնակցել է 9 միլիոն 127 հազար 192 մարդ կամ հանրաքվեին մասնակցելու իրավունք ունեցողների 73.12%-ը։
Ավելի վաղ Ղազախստանի նախագահ Կասիմ-Ժոմարտ Տոկաևը հանդիպել էր հանրաքվեի քարոզարշավին ակտիվորեն մասնակցած երիտասարդական կազմակերպությունների ներկայացուցիչների հետ և անդրադարձ կատարել քվեարկության դրված փաստաթղթի կարևորությանը:
«Այս օրը, անկասկած, ընդմիշտ կմնա երկրի տարեգրքերում։ Այսուհետ մարտի 15-ը կնշվի որպես Սահմանադրության օր։ Ես կարդացել եմ բազմաթիվ երկրների սահմանադրություններ և վստահորեն կարող եմ ասել, որ մեր հիմնական օրենքը ամենաառաջադեմներից է», — ասել է Տոկաևը։
ՄԱՆՐԱՄԱՍՆԵՐ

Բահրեյնը և Քուվեյթը հերթական անգամ երկարաձգել են թռիչքների արգելքն իրենց օդային տարածքում, որը գործում է փետրվարի 28-ից:

Իսրայելական զորքերը նոր ցամաքային գործողություն են սկսում Լիբանանի տարածքում արմատական «Հեզբոլլահ» շարժման դեմ։ Ինչպես հաղորդում է «Արմենպրես»-ը, այս մասին մարտի 16-ին X սոցիալական ցանցում հայտարարել են Իսրայելի պաշտպանության ուժերը։
«Իսրայելի պաշտպանության բանակի զորքերը սկսել են սահմանափակ և թիրախային ցամաքային գործողություններ հարավային Լիբանանում «Հեզբոլլահ»-ի հիմնական հենակետերի դեմ՝ ուղղված առաջնային պաշտպանական գոտու ամրապնդմանը»,- ասվում է հայտարարության մեջ։
Իսրայելական կողմից հայտնել են, որ «գործողությունը առաջնային պաշտպանական դիրքը ամրապնդելու պաշտպանական ջանքերի մի մասն է», որի շրջանակում նախատեսվում է «վերացնել ահաբեկիչներին»՝ հյուսիսային Իսրայելի բնակիչների համար անվտանգության լրացուցիչ շերտ ստեղծելու համար։

Խնդրում եմ կնոջս շուն չտալ, տանն արդեն տեղ չկա. քաղաքապետ
https://youtu.be/8mJru1ztSPk

ԱՄՆ-ում կայացել է կինոաշխարհի ամենահեղինակավոր մրցանակաբաշխություններից մեկը՝ Օսկարի 98-րդ մրցանակաբաշխությունը։
Ինչպես հաղորդում է «Արմենպրես»-ը, ռեժիսոր Փոլ Թոմաս Անդերսոնի՝ հեղափոխականների մասին պատմող ֆիլմը «One Battle After Another» («Պայքարը պայքարից հետո») տարել է երեկոյի գլխավոր մրցանակը՝ դառնալով տարվա լավագույն ֆիլմ։ Իսկ Անդերսոնը նաև արժանացել է լավագույն ռեժիսորի մրցանակին։ Ընդհանուր առմամբ ֆիլմը ստացել է վեց մրցանակ, այդ թվում և՝ «Լավագույն քասթինգ», «Լավագույն ադապտացված սցենար», «Լավագույն մոնտաժ»։
«Լավագույն դերասան» անվանակարգում մրցանակը ստացել է Մայքլ Բ․ Ջորդանը «Sinners» («Մեղավորներ») ֆիլմում իր դերակատարման համար։ «Լավագույն դերասանուհի» է ճանաչվել Ջեսի Բաքլին Շեքսպիրի ընտանեկան ողբերգության մասին պատմող «Hamnet» («Համնետ») դրամայում մարմնավորած կերպարի համար:
«Sinners» («Մեղավորները») ֆիլմը, որի պրոդյուսերների շարքում է ամերիկահայ Սև Օհանյանը և որը ներկայացված էր ռեկորդային թվով՝ 16 անվանակարգերում, հաղթել է 4 անվանակարգերում, այդ թվում և «Լավագույն կինեմատոգրաֆ», «Լավագույն օրիգինալ սցենար», «Լավագույն օրիգինալ երաժշտություն»։
Երկրորդ պլանի լավագույն դերասան է ճանաչվել Շոն Պենը՝ «One Battle After Another» ֆիլմում իր դերի, իսկ երկրորդ պլանի լավագույն դերասանուհի՝ Էմի Մադիգանը՝ «Weapons» («Զենքեր») ֆիլմի համար։«Լավագույն անիմացիոն ֆիլմ» մրցանակը ստացել է «KPop Demon Hunters» («K-pop դև որսորդներ») ֆիլմը, «Լավագույն միջազգային ֆիլմ» է ճանաչվել նորվեգական «Sentimental Value» («Զգացմունքային արժեք») ֆիլմը, իսկ «Լավագույն վավերագրական ֆիլմ» մրցանակը ստացել է «Mr. Nobody Against Putin» («Պարոն Ոչ ոք ընդդեմ Պուտինի») ֆիլմը։
Ջեյմս Քեմերոնի «Ավատար․ կրակ և մոխիր» ֆիլմը ճանաչվել է հաղթող «Լավագույն վիզուալ էֆեկտներ» անվանակարգում։

Երևանի քաղաքապետարանի գործակարգավարական խորհրդակցություն
https://youtu.be/gLuuGb9v644

Հայաստանում ոչ մի դպրոց չի փակվում։ Փակվում են ավերված դպրոցները, որտեղ աշակերտ չկա

«Քաղաքացիական պայմանագիր» կուսակցության ներկայացուցիչների հետ Գորիսում բնակիչների հետ հանդիպմանն այս մասին ասաց ՀՀ վարչապետ Նիկոլ Փաշինյանը` պատասխանելով Խնածաղ գյուղի դպրոցի փակման մասին քաղաքացու արտահայտած մտահոգությանը։

«Ոչ մի դպրոց չի փակվում։ Մենք փակում ենք ավերված դպրոցներ, որտեղ աշակերտ չկա։ Երեխային տասը տարի պահում ենք յոթ հոգանոց դպրոցում, հետո իրեն տանում ենք յոթ միլիարդանոց աշխարհ, ասում ենք դե շփվի։ Տանում ենք հազար հոգանոց զորամաս ու ասում` դե այստեղ ծառայի։ Հետո ասում ենք` վայ, էս երեխեքը ինչի՞ չդիմացան։ Որովհետև դպրոցում ամենակարևորը այն չի, որ երեխան իմանա, թե որն է Իսպանիայի մայրաքաղաքը, չնայած դա էլ է կարևոր։ Բայց կարևոր է` իմանա շփվել տարբեր բնավորությունների մարդկանց հետ տարբեր իրավիճակներում։ Երեխան պետք է տանից դուրս գա։ Երեխայի հասունացման ամենակարևոր պրոցեսը տանից դուրս գալն է», — ասաց վարպետը։

ՀՀ վարչապետ Նիկոլ Փաշինյանը կարծում է, որ «ոչ այսպիսի խաղաղության» մասին կամ «այլ խաղաղությունից» խոսելիս որոշ մարդիկ նկատի ունեն պատերազմ` «հանուն ավելի լավ խաղաղության», ինչն, ըստ վարչապետի, աբսուրդ է։
Փաշինյանն այս մասին ասաց «Քաղաքացիական պայմանագիր» կուսակցության ներկայացուցիչների հետ Գորիսում բնակիչների հետ հանդիպմանը։
«Ասում են` մենք էլ դեմ չենք խաղաղությանը, բայց ուրիշ խաղաղության։ Այս խաղաղությունից նահանջելը, այս խաղաղությունից շեղվելը նշանակում է բոլորովին այլ բան։ Դա նշանակում է պատերազմ` հանուն ավելի լավ խաղաղության։ Իրենք այդպես չեն ասում, բայց փաստացի դա է ստացվում։ Ասում են` մենք ավելի լավ խաղաղություն ենք ուզում։ Ինչպե՞ս։ Ի՞նչ է ավելի լավ խաղաղությունը։ Այդ մարդկանց խոսույթը վերլուծելով` ես գալիս եմ հետևյալ եզրակացության. մարդիկ ուզում են պատերազմ` հանուն ավելի լավ խաղաղության։ Դա աբսուրդ է», — նշեց Փաշինյանը։
Վարչապետի խոսքով` որոշ մարդիկ ասում են, թե իշխանությունները բավարար չափով ուժեղ չեն, ուրիշներն էլ ասում են` բռնակալական իշխանություն է։

«Դա նշանակում է, որ մենք ճիշտ բալանսի վրա ենք։ Ես համաձայն եմ, թույլ իշխանությունն աղետ է։ Բայց երբ ասում են` իշխանությունը միջազգայնորեն թույլ է… Ամենապրիմիտիվ օրինակը բերեմ։ Հայաստանի Երրորդ Հանրապետության պատմության մեջ առաջին անգամ ՀՀ միջազգային օդանավակայանում միայն Հայաստանի սահմանապահ զորքերի զինծառայողներն են։ Բա այդ ուժեղ իշխանությունը չէր մտածե՞լ` օտարերկրացին այցելում է մեր երկիր, օտարերկրյա սահմանապահը սկսում է ծաղրել հյուրին, ու հյուրի միջոցով` ծաղրել երրորդ երկրին։ Բա այդ ուժեղ ղեկավարների, այդ ուժեղ տղամարդկանց տան մուտքի մոտ կա՞ օտարերկրյա անցակետ։ Հիմա Հայաստան-Իրան սահմանային անցակետը նույնպես ամբողջությամբ Հայաստանի սահմանապահների հսկողության տակ է։ Բա այսպիսի թույլ իշխանություն կլինի՞, բռնել իր երկրի միջազգային օդանավակայանի անցակետն ապահովել է հարյուր տոկոս ինքնիշխանությամբ, նույնը` Իրան-Հայաստան սահմանային անցակետը։ Բա այդ ուժեղ իշխանությունը ինչո՞ւ չէր անում դա, ի՞նչն էր պատճառը», — ասաց վարչապետը։