Category: Armen Press

ԱՄՆ ֆինանսների նախարարության արտասահմանյան ակտիվների վերահսկողության վարչությունը (OFAC) տրամադրել է ընդհանուր լիցենզիա, որը թույլատրում է ռուսական նավթի և նավթամթերքի վաճառքը։ «Արմենպրես»-ի փոխանցմամբ՝ այս մասին հաղորդվում է OFAC-ի կայքում։
Ըստ հաղորդագրության՝ OFAC-ը տրամադրել է համար 134 ընդհանուր լիցենզիան, որը «թույլատրում է ռուսական ծագման այն նավթի ու նավթամթերքի մատակարարումն ու վաճառքը, որոնք նավերի վրա բեռնվել են 2026 թ. մարտի 12-ի դրությամբ»։
Պարզաբանվում է, որ թույլատրված են բոլոր գործառնությունները, որոնք անհրաժեշտ են ցանկացած նավի վրա բեռնված ռուսական ծագման նավթահումքի կամ նավթամթերքի վաճառքի, առաքման կամ բեռնաթափման համար։
Դրա հետ մեկտեղ ընդհանուր լիցենզիան արգելում է «Իրանի, Իրանի կառավարության կամ իրանական ծագման ապրանքների ու ծառայությունների հետ կապված ցանկացած գործարք կամ գործունեություն»։
Թույլտվությունը կգործի մինչև 2026 թ. ապրիլի 11-ը։

Թուրքիայի կենտրոնական հատվածում մարտի 13-ի վաղ առավոտյան 5,5 մագնիտուդ ուժգնությամբ երկրաշարժ է գրանցվել։
Ինչպես հաղորդում է «Արմենպրես»-ը, այս մասին հայտնում են թուրքական ԶԼՄ-ները՝ հղում անելով Թուրքիայի Արտակարգ իրավիճակների և աղետների կառավարման վարչությանը (AFAD)։Տեղեկությունների համաձայն՝ ստորգետնյա ցնցումների էպիկենտրոնը գտնվել է Թոքաթ նահանգի Նիքսար քաղաքում։
Երկրաշարժը տեղի է ունեցել տեղական ժամանակով մոտավորապես ժամը 03:35-ին։ Սեյսմոլոգների տվյալներով՝ երկրաշարժի օջախը գտնվել է մոտ 6,4 կիլոմետր խորության վրա։ Ցնցումները զգացվել են նաև հարակից մի շարք նահանգներում, ինչի հետևանքով բնակիչների մի մասը լքել է տները և դուրս եկել փողոցներ։Զոհերի կամ ավերածությունների մասին տեղեկություններ չեն հաղորդվել։

Իսրայելը հարված է հասցրել Բեյրութի հյուսիսային ծայրամասում գտնվող Նաբաա շրջանի Բուրջ Համուդ թաղամասին, որի բնակչության մեծամասնությունը հայեր են։ Հարվածի հետևանքով բնակարաններից մեկում հրդեհ է բռնկվել։ Այս մասին հաղորդում է The Associated Press-ը։
Գործակալությունը նշում է, որ վերջին օրերի ռազմական գործողությունների և 2024 թվականին «Հեզբոլլահ»-ի և Իսրայելի միջև հակամարտության ընթացքում հայկական այս թաղամասն առաջին անգամ է հարվածի ենթարկվում։
Զոհերի և տուժածների մասին տեղեկություններ չեն ստացվել։
Բացի այդ, Լիբանանի առողջապահության նախարարությունը հայտնել է, որ վաղ առավոտյան Իսրայելը թիրախավորել է Բեյրութի հարավ-արևմտյան ափամերձ Ջնահ թաղամասը։ Հարվածի հետևանքով մեկ մարդ է զոհվել։
Հարվածներից հետո Իսրայելի բանակը հայտարարել է, որ Բեյրութում թիրախավորել է «Հեզբոլլահ»-ի անդամի։
Երկու թաղամասերն էլ հեռու են Բեյրութի հարավային արվարձաններից, որոնց բնակիչներին Իսրայելի բանակը տարհանման հրահանգներ է տվել։

Իսրայելի վարչապետ Բենիամին Նեթանյահուն վստահ չէ, որ իրանցիները կտապալեն երկրի իշխանություններին, եթե Իսրայելը և ԱՄՆ-ն դրա համար պայմաններ ստեղծեն։ Ինչպես «Արմենպրես»-ը տեղեկանում է The Times of Israel-ից, այս մասին նա ասել է Իրանի դեմ ռազմական գործողություններ սկսելուց հետո իր առաջին մամուլի ասուլիսում։

«Կարող ես մարդկանց բերել ջրի մոտ, բայց չես կարող նրանց ստիպել խմել», — ասել է նա։

Նեթանյահուն հավելել է, որ Իսրայելի և ԱՄՆ-ի հարվածների շնորհիվ պայմաններ են ստեղծվում, որ Իրանում իշխանափոխություն լինի։

«Մենք օպտիմալ պայմաններ կստեղծենք դրա (խմբ.՝ իշխանափոխության) համար, այդ թվում՝ ավիահարվածներ հասցնելով, ինչպես արեցինք երեկ, ինչպես անում ենք այս օրերին, որպեսզի իրանցիներին հնարավորություն տանք դուրս գալ փողոցներ…. Ես չեմ կարող վստահ ասել, որ իրանցիները կտապալեն ռեժիմը…. Մենք բոլորս հույս ունենք, որ այս ամենի արդյունքում ռեժիմը կտապալվի, բայց ռեժիմն, ի վերջո, պետք է տապալվի ներսից», — ասել է նա մարտի 12-ի երեկոյան կայացած ասուլիսում։

ՄԱՆՐԱՄԱՍՆԵՐ

Թուրքագետ Նելլի Մինասյանը կարծում է, որ Թուրքիան մերձավորարևելյան ընդհանուր գործընթացների հանդեպ ցուցաբերում է շատ մեծ զգայունություն և հետաքրքրություն, որովհետև այնտեղ շատ խնդիրներ դիտարկվում են նաև Թուրքիայի ազգային անվտանգության տեսանկյունից։
«Արմենպրես»-ի հետ զրույցում Նելլի Մինասյանն անդրադարձավ Մերձավոր Արևելքում տեղի ունեցող պատերազմական գործողություններին և այդ համատեքստում այն հարցին, թե ինչպե՞ս է դիրքավորվել Թուրքիան և ինչ վերաբերմունք է ցուցաբերում Իրանի նկատմամբ։

Հարավային Կովկասում Հայաստանն աստիճանաբար վերածվում է ավելի ու ավելի կարևոր գործընկերոջ Եվրոպական միության համար, և եթե բարեփոխումների այս տեմպը պահպանվի, առաջիկա տարիներին առանց վիզայի ճանապարհորդելն իրատեսական հեռանկար է։
ԵՄ-ն պատրաստ է նաև շարունակել աջակցել Հայաստան-Ադրբեջան խաղաղության գործընթացին, այդ թվում՝ տարածաշրջանային հաղորդուղիների զարգացման մեջ ներդրումների միջոցով՝ համահունչ Հայաստանի «Խաղաղության խաչմերուկ» նախաձեռնությանը։
Այս մասին «Արմենպրես»-ին տված բացառիկ հարցազրույցում նշել է մարտի 12-ին Հայաստան ժամանած՝ Եվրոպական հանձնաժողովի ներքին գործերի և միգրացիայի հարցերով հանձնակատար Մագնուս Բրունները։

ՀՀ աշխատանքի և սոցիալական հարցերի նախարար Արսեն Թորոսյանը Նյու Յորքում հանդիպում է ունեցել ՄԱԿ-ի Բնակչության հիմնադրամի գործադիր տնօրեն Դիենե Քեյթայի հետ։
«Արմենպրես»-ի հաղորդմամբ ՝ այս մասին հայտնում են նախարարությունից:
Հանդիպմանը քննարկվել են ժողովրդագրության և գենդերային հավասարության ոլորտներում համատեղ աշխատանքների արդյունքներին առնչվող մի շարք հարցեր․ անդրադարձ է կատարվել նաև կանանց տնտեսական զորեղացման, ընտանիքամետ քաղաքականությունների մշակման և իրականացման ուղղությամբ համագործակցության ընթացքին։
Հանդիպման ընթացքում ընդգծվել է ՄԱԿ-ի Բնակչության հիմնադրամի կողմից տրամադրված մասնագիտական և տեխնիկական աջակցության դերը՝ ոլորտային բարեփոխումների արդյունավետ իրականացման գործում։ Կարևորվել է նաև քննարկված ուղղություններով փորձի փոխանակման, վերապատրաստման դասընթացների կազմակերպման և համատեղ նախաձեռնությունների իրականացման անհրաժեշտությունը։
Կողմերը պատրաստակամություն են հայտնել անհրաժեշտ ջանքեր ներդնել համագործակցության հետագա խորացման ուղղությամբ։

❗️Դոհայում ՀՀ դեսպանությունը մարտի 12-ին ՀՀ քաղաքացիների համար կազմակերպել է Կատարից անվճար տեղափոխում Օման: Այս մասին տեղեկացվել են ՀՀ բոլոր քաղաքացիները, հնարավորությունից օգտվել է ՀՀ 10 քաղաքացի:

ՀՀ պաշտպանության նախարար Սուրեն Պապիկյանը հանդիպել է Բելգիայի Թագավորության պաշտպանության և արտաքին առևտրի նախարար Թեո Ֆրանկենի հետ։
«Արմենպրես»-ի հաղորդմամբ ՝ Պապիկյանը հանդիպումից լուսանկարներ է հրապարակել:
«Բրյուսել կատարած աշխատանքային այցիս շրջանակում մարտի 12-ին հանդիպել եմ Բելգիայի Թագավորության պաշտպանության և արտաքին առևտրի նախարար Թեո Ֆրանկենի հետ»,-կից գրել է պաշտպանության նախարարը:

Հայաստանի կառավարության հանձնառությունն է խորքային փոփոխություններ ունենալ սահմանների համալիր կառավարման ոլորտում
Այս մասին ասաց Ներքին գործերի նախարար Արփինե Սարգսյանը «Վիզաների ազատականացման ուղին. ԵՄ-Հայաստան համագործակցության ամրապնդումը վիզաների ազատականացման գործողությունների ծրագրի իրականացման շրջանակում» պանելային քննարկման շրջանակում իր բացման խոսքում: