Category: Armen Press

Վիկտոր Համբարձումյանի անվան Բյուրականի աստղադիտարանում սեպտեմբերի 14-ին մեկնարկեց «Մեր անկայուն տիեզերքը» խորագրով միջազգային գիտաժողովը։ Այն անցկացվում է հայրենի գիտության կարևորագույն կենտրոններից մեկի՝ Բյուրականի աստղադիտարանի հիմնադրման 80-ամյակին նվիրված միջոցառումների շրջանակում։
Հանդիսավոր նիստի բացման արարողության ժամանակ ողջունելով մասնակիցներին՝ Բյուրականի աստղադիտարանի տնօրեն Արեգ Միքայելյանը ներկայացրեց իր ղեկավարած գիտահետազոտական հիմնարկի անցած տպավորիչ ուղին, գիտական նվաճումները և ժամանակակից գործունեությունը։
Բյուրականի աստղադիտարանի գիտական ժառանգությունը կարևորեցին նաև Հայաստանի գիտակրթական այլ հաստատությունների ներկայացուցիչները և արտասահմանցի որոշ մասնակիցներ։ Ի դեպ, գիտաժողովի շուրջ ութ տասնյակ մասնակիցների թվում են ականավոր գիտնականներ, այդ թվում՝ աստղագետներ, ֆիզիկոսներ, տիեզերաբաններ, աստղագիտության ու այլ գիտակարգերում աշխատող մասնագետներ, բազմաթիվ երիտասարդ հետազոտողներ և ուսանողներ։

Հայաստանի պետական եկամուտների կոմիտեի նախագահ Էդուարդ Հակոբյանի գլխավորած պատվիրակությունն աշխատանքային այցով եղել է  Իրանի Իսլամական Հանրապետությունում։
Այցի շրջանակում ՊԵԿ նախագահ Էդուարդ Հակոբյանը հանդիպել է Իրանի տնտեսական հարցերի և ֆինանսների փոխնախարար, մաքսային ծառայության ղեկավար Ֆորուդ Ասգարիի գլխավորած պատվիրակության հետ։
Հանդիպմանն ընդգծվել են վերջին շրջանում համագործակցության ամրապնդմանն ուղղված քայլերը և կարևորել տարբեր հարցերի շուրջ առաջիկայում առավել սերտ համագործակցելու անհրաժեշտությունը։
ՀՀ ՊԵԿ-ից հայտնում են, որ քննարկվել են երկու երկրների միջև միջսահմանային առևտրային հոսքերի և հսկողական գործառնությունների դյուրացմանն ուղղված երկկողմ հետաքրքրության մի շարք հարցեր։
Մասնավորապես, կարևորելով նախնական տվյալների կանոնավոր փոխանակումը՝ որպես փոխադարձ առևտրի դյուրացման և անվտանգության ապահովման կաևոր գործիք՝ կողմերը նախանշել են համակարգի հնարավորինս վաղ գործարկման համար անհրաժեշտ քայլերը։ Անդրադարձ է կատարվել նաև կողմերի միջև լիազորված տնտեսական օպերատորների փոխճանաչմանն ուղղված աշխատանքներին ու վերջնական պայմանավորվածության հասնելու քայլերին։
Հանդիպման արդյունքում համաձայնություն է ձեռքբերվել Մեղրի-Նուրդուզ սահմանային դարպասի համատեղ օգտագործման մասին համաձայնագրի գործողության ժամկետի երկարաձգման հարցի շուրջ։ Քննարկվել են նաև սահմանային թողունակության ծավալների մշտադիտարկման և այդ ծավալների բարձրացմանն ուղղված մեխանիզմների ներդրման հարցեր։
Այցի շրջանակում ՊԵԿ պատվիրակությունը շրջայց է կատարել նաև Նորդուզի անցման կետում, որտեղ ներկայացվել է ԻԻՀ ձեռքբերումները՝ մաքսային համակարգի թվայնացման շրջանակում ։ Քննարկվել են նաև փոխադարձ հետաքրքրություն ներկայացնող այլ հարցեր։
ՊԵԿ նախագահ Էդուարդ Հակոբյանը նշել է, որ Հայաստանն այսօր վճռականորեն շարժվում է տարածաշրջանային զարգացման, կայունության և փոխկապակցվածության ընդլայնման ճանապարհով։ Նա ընդգծել է, որ տարածաշրջանային մարտահրավերներին դիմակայելու և համատեղ բարգավաճման հասնելու լավագույն ուղին փոխադարձ վստահության վրա հիմնված ջանքերի համատեղումն է։
«Այս համատեքստում կարևոր է նաև երկու երկրների՝ որպես տարածաշրջանային կարևոր լոգիստիկ հանգույցների կայացմանը փոխադարձաբար նպաստելու անհրաժեշտությունը։
Այս փոխադարձ զարգացումն ու սերտ համագործակցությունը կարևոր նշանակություն ունեն երկկողմ տնտեսական աճի և տարածաշրջանային կայուն զարգացման համար»,–նշել է Էդուարդ Հակոբյանը։

Հայաստանի Ազգային ժողովի նախագահ Ռուբեն Ռուբինյանը սեպտեմբերի 14-ին ընդունել է Հայաստանի Հանրապետությունում Էստոնիայի Հանրապետության արտակարգ և լիազոր դեսպան Մարգ Մարդիսալու-Կահարին։
ՀՀ ԱԺ-ի տարածած հաղորդագրության մեջ նշվում է, որ հանդիպմանն անդրադարձ է կատարվել Հայաստանի և Էստոնիայի միջև երկկողմ հարաբերությունների զարգացմանը։
Զրուցակիցները պատրաստակամություն են հայտնել շարունակելու համագործակցությունը բոլոր ոլորտներում՝ առանձնահատուկ կարևորելով միջխորհրդարանական կապերի ակտիվացումը։
Ռուբեն Ռուբինյանը և Մարգ Մարդիսալու-Կահարը մտքեր են փոխանակել տարածաշրջանային մի շարք հարցերի շուրջ։
Կողմերն անդրադարձել են ՀՀ-ԵՄ օրակարգին և դրա շրջանակում համագործակցության ընդլայնմանը։

Հայաստանը նախատեսում է վավերացնել ԱՊՀ մասնակից պետությունների իրավասու մարմինների կողմից միջազգային վերահսկելի մատակարարումների կազմակերպման և իրականացման կարգը սահմանող պայմանագիրը, որը նպատակ ունի ուժեղացնել համագործակցությունն անդրազգային հանցավորության, այդ թվում՝ թմրամիջոցների, զենքի, մշակութային և պատմական արժեքների ապօրինի տեղափոխման դեմ պայքարում։

«Արմենպրես»-ի հաղորդմամբ՝ «Անկախ Պետությունների Համագործակցության մասնակից պետությունների իրավասու մարմինների կողմից միջազգային վերահսկելի մատակարարման կազմակերպման և իրականացման կարգի մասին» պայմանագիրը վավերացնելու մասին օրենքի նախագիծը Ազգային ժողովում ներկայացրեց ՀՀ ներքին գործերի նախարարի տեղակալ Արմեն Ղազարյանը։

«Խաղաղության կամուրջ» նախաձեռնության հայաստանյան անդամները մտահոգություն են հայտնում Գանձասար միջնադարյան վանական համալիր և դրան կից թանգարան դիվանագետների այցի ընթացքում հայկական մշակութային ժառանգության ներկայացման հետ կապված վերջին զարգացումների առնչությամբ։
Նախաձեռնության տարածած հայտարարության մեջ նշվում է․ 
«Այն պահին, երբ Հայաստան-Ադրբեջան խաղաղության գործընթացում արդեն իսկ արձանագրվել է նշանակալի առաջընթաց, և երկու հասարակություններից ակնկալվում է տասնամյակների հակամարտությունից հետո շարունակել անցումը հարաբերությունների նոր մշակույթի, հանրային խոսքն ու գործողությունները կարևոր նշանակություն ունեն։
Վերջին զարգացումները խորացնում են անվստահությունը և լրացուցիչ տարածք են ստեղծում նրանց համար, ովքեր պնդում են, թե երկխոսությունն անիմաստ է, իսկ խաղաղության հասնելու փորձերն՝ ապարդյուն։ Խաղաղության կառուցումը պահանջում է բարդ և անկեղծ խոսակցություն, միմյանց մտահոգությունների նկատմամբ ուշադրություն և գիտակցված ջանք՝ խուսափելու այնպիսի գործողություններից, որոնք կարող են վերաբացել վերքերը կամ ուժեղացնել թշնամական վերաբերմունքը։
Ուստի կոչ ենք անում խաղաղության գործընթացում ներգրավված բոլոր դերակատարներին գործել այս պահի պատասխանատվությանը համապատասխան և զերծ մնալ այնպիսի խոսքից ու գործողություններից, որոնք կարող են ապակառուցողական ընկալվել»։ 
Հայտարարության տակ ստորագրել են նախաձեռնության անդամներ Արեգ Քոչինյանը, Նաիրա Սուլթանյանը, Բորիս Նավասարդյանը, Նարեկ Մինասյանը, Սամվել Մելիքսեթյանը։

Աշխատանքի և բարեկեցության նախարարությունը սեպտեմբերի 12-13-ին ԶԼՄ ներկայացուցիչների համար կազմակերպել էր արտագնա սեմինար-քննարկում՝ նվիրված աշխատանքի և բարեկեցության ոլորտում իրականացվող վերջին բարեփոխումներին և առաջիկա նախաձեռնություններին։
«Արմենպրես»-ի հաղորդմամբ՝ միջոցառմանը բանախոսություններով հանդես են եկել Աշխատանքի և բարեկեցության նախարար Արսեն Թորոսյանը, Երևանում Եվրոպայի խորհրդի գրասենյակի ղեկավարի տեղակալ Սվետիսլավ Պաունովիչը, նախարարի տեղակալներ Արտյոմ Սմբատյանը, Լուսինե Քոչարյանը և Ռոզա Բաբայանը, ինչպես նաև Եվրոպայի խորհրդի գործընկերները։

Հայաստանի ազգային պատկերասրահում կբացվի «Մարդկության դեմքը. Սուրենյանցի «Լքյալը» և հումանիստական արվեստը» միջազգային ցուցահանդեսը

Երևանի Աղի լճի հարակից տարածքը նոր տեսք կունենա, կառուցվելու է սպորտային հրապարակ
https://youtu.be/eAhRPRdGDj4?si=tTN9hT4xhnpYyRKA

Սյունիքի մարզի Ծավ բնակավայրի բնակիչներից մեկը դիմել է ՀՀ առողջապահության նախարարության «Հիվանդությունների վերահսկման և կանխարգելման ազգային կենտրոն» ՊՈԱԿ-ի Սյունիքի մասնաճյուղ՝ հայտնելով, որ իր բնակարանի ծորակից հոսող ջրում նկատել է մետաղական զանգված։
Ինչպես «Արմենպրես»-ին տեղեկացրին ՀՀ առողջապահության նախարարությունից՝ ՀՎԿԱԿ-ի Սյունիքի մասնաճյուղի մասնագետները բնակչի տնից ջրի նմուշառում են իրականացրել։

«Լաբորատոր հետազոտության արդյունքում նմուշում սնդիկի պարունակությունը սահմանային թույլատրելի շեմից բարձր է եղել։ Հաշվի առնելով արձանագրված ցուցանիշի բարձր մակարդակը, ինչպես նաև այն հանգամանքը, որ նախկինում իրականացված քիմիական հետազոտություններով նման շեղումներ չէին արձանագրվել, կրկնակի նմուշառումներ են իրականացվել չորս կետից, այդ թվում՝ ջրաղբյուրից և բնակիչների ծորակներից։ Սեպտեմբերի 11-ին ստացված արդյունքներով կրկին արձանագրվել են նույն ցուցանիշները։ Բոլոր պատկան մարմինները տեղեկացվել և զգուշացվել են արձանագրված շեղման մասին՝ բնակչության ջրապահովման կարիքներն ապահովելու նպատակով։ Մինչև ջրի որակի վերականգնումը Ծավ բնակավայրի բնակիչներին հորդորում ենք զերծ մնալ ջրի օգտագործումից՝ ինչպես խմելու, այնպես էլ կենցաղային նպատակներով»,- նշված է նախարարության տարածած հաղորդագրության  մեջ։

Գերատեսչությունից հայտնում են, որ բնակիչների շրջանում առողջական վիճակի հետ կապված ախտանշաններ չեն արձանագրվել։ Միաժամանակ կանխարգելիչ միջոցառումների շրջանակում մասնագետները բնակիչների շրջանում համայցեր կիրականացնեն։
Կառավարությունը և համայնքը միջոցներ կձեռնարկեն՝ մինչև խնդրի կարգավորումը գյուղի բնակիչներին անհրաժեշտ անվտանգ ջրի մատակարարումն ապահովելու համար։ Միաժամանակ միջոցներ են ձեռնարկվում ջրի աղտոտման պատճառը պարզելու ուղղությամբ։

Ազգային ժողովում մեկնարկած իններորդ գումարման երկրորդ նստաշրջանի նիստում առաջին ընթերցմամբ քննարկվում է լիազորությունները ստանձնած կառավարության անդամի երդման տեքստի վերախմբագրման հարցը։
Կառավարության ներկայացրած «Կառավարության կառուցվածքի և գործունեության մասին» օրենքում փոփոխություն կատարելու մասին օրենքի նախագիծը ներկայացրեց ՀՀ արդարադատության նախարար Սրբուհի Գալյանը։
Նրա խոսքով՝ նախագծով առաջարկվում է վերախմբագրել լիազորությունները ստանձնած կառավարության անդամի երդման տեքստը՝ այն հիմնավորմամբ, որ գործող տեքստն ամբողջությամբ չի արտացոլում պետության հարատևության, սերունդների առջև պատասխանատվության, պետականության ամրապնդման և զարգացման առանցքային տարրերը։

«Առաջարկվող նոր տեքստում օգտագործված հասկացություններն ընտրվել են՝ արտացոլելու համար ՀՀ պետականության հիմքերը, ժողովրդավարական կառավարման սկզբունքները և կառավարության անդամի սահմանադրական առաքելությունը»,- ասաց Գալյանը։

 Նախարարը նշեց, որ առաջարկվում է երդման տեքստում կիրառել «հանուն ՀՀ հարատևության, ինքնիշխանության և զարգացման» ձևակերպումը։

««Հարատևություն» հասկացությունը վերաբերում է ՀՀ շարունակական գոյությանն ու կայունությանը, «ինքնիշխանություն» հասկացությունը՝ պետության ինքնուրույն որոշումներ կայացնելու իրավասությանը, իսկ «զարգացում» հասկացությունը՝ պետության առաջընթացին և բարեկեցության ապահովմանը»,- մանրամասնեց Գալյանը։

Նրա խոսքով՝ նախագծով առաջարկվում է պահպանել նաև «պահպանել ՀՀ Սահմանադրությունը և օրենքները» դրույթը, որն ընդգծում է կառավարության անդամի՝ Սահմանադրությանը և օրենքներին համապատասխան գործելու պարտականությունը։

««Ծառայել հանրային շահին» ձևակերպմամբ սահմանվում է, որ կառավարության անդամի գործունեությունը պետք է ուղղված լինի հանրային շահի ապահովմանը և չպետք է պայմանավորված լինի մասնավոր կամ առանձին խմբերի շահերով։ «Պաշտպանել պետական շահը» ձևակերպումը կառավարության անդամի պարտականությունը կապում է ՀՀ պետական շահերի պաշտպանության հետ՝ իր լիազորությունների իրականացման շրջանակներում»,-հավելեց նախարարը։

 Գալյանի խոսքով՝ «նպաստել ՀՀ պետականության և սահմանադրական կարգի ամրապնդմանը» դրույթը նախատեսում է կառավարության անդամի կողմից պետական ինստիտուտների և սահմանադրական կարգի ամրապնդմանն ուղղված գործունեություն։ «Գործել ի շահ ներկա և ապագա սերունդների» ձևակերպմամբ կառավարության անդամի գործունեության շրջանակում ընդգծվում է երկարաժամկետ հետևանքների հաշվառումը և այնպիսի որոշումների կայացումը, որոնք հաշվի են առնում նաև ապագա սերունդների շահերը։

«Այս մոտեցումը միտված է ամրապնդելու միջսերնդային պատասխանատվության սկզբունքը պետական կառավարման մեջ»,- եզրափակեց նախարարը