Category: Armen Press

Բաղդադում սեպտեմբերի 8-ին տեղի են ունեցել Հայաստանի Հանրապետության և Իրաքի Հանրապետության արտաքին քաղաքական գերատեսչությունների միջև քաղաքական խորհրդակցություններ` ՀՀ արտաքին գործերի և միջազգային առևտրի նախարարի տեղակալ Անի Ավետիսյանի և  Իրաքի արտաքին գործերի նախարարի տեղակալ Մուհամմադ Բահր Ալ-Ուլումի գլխավորությամբ:
Այդ մասին հաղորդագրություն է տարածել ՀՀ արտաքին գործերի և միջազգային առևտրի նախարարությունը։
 
Հանդիպման ընթացքում քննարկվել է երկկողմ օրակարգի և բազմակողմ համագործակցության հարցերի լայն շրջանակ, այդ թվում՝ առևտրատնտեսական կապերի առավել խորացման ուղիները։  
Զրուցակիցներն անդրադարձ են կատարել նաև բարձր տեխնոլոգիաների, կրթության, զբոսաշրջության, ոլորտներում համագործակցության խթանմանը, ուղիղ չվերթների վերականգնման հնարավորությանը, իրավապայմանագրային դաշտի ընդլայնմանը և միջազգային հարթակներում փոխգործակցության առավել սերտացմանը։
Մտքեր են փոխանակվել Հարավային Կովկասի և Միջին Արևելքի տարածաշրջաններում առկա վերջին զարգացումների և միջազգային օրակարգի` փոխադարձ հետաքրքրություն ներկայացնող մի շարք հարցերի շուրջ։ 
Քաղաքական խորհրդակցությունների ավարտին տեղի է ունեցել երիտասարդության և սպորտի ոլորտներում համագործակցության և ՀՀ ԱԳՄԱՆ դիվանագիտական ակադեմիայի և Իրաքի Հանրապետության ԱԳՆ արտաքին ծառայության ինստիտուտի միջև համագործակցության մասին հուշագրերի ստորագրման արարողությունը։

ՀՀ-ում ԱՄՆ գործերի հավատարմատարը Բաքվում հանդիպել է Ադրբեջանի ԱԳ նախարարի տեղակալի հետ

Նիկոլ Փաշինյանն աշխատանքային այցով մեկնել է Ֆրանսիա

Հայաստանում Ֆրանսիայի նորանշանակ դեսպան Ֆլորիան Էսկյուդիեն իր հավատարմագրերն է հանձնել Հայաստանի  նախագահ Վահագն Խաչատուրյանին։

Հանրապետության տարածքում սեպտեմբերի 9-13-ը սպասվում է առանց տեղումների եղանակ։ Քամին` հյուսիսարևմտյան` 2-5 մ/վ։
Այս մասին տեղեկացնում է Հիդրոօդերևութաբանության և մոնիթորինգի կենտրոնը՝ նշելով, որ օդի ջերմաստիճանը սեպտեմբերի 9-13-ը ողջ հանրապետությունում աստիճանաբար կբարձրանա 7-10 աստիճանով։
Երևան քաղաքում սեպտեմբերի 8-ի ցերեկը, 9-13-ին սպասվում է առանց տեղումների եղանակ։

Երևանի քաղաքապետ Տիգրան Ավինյանը հայտարարել է, որ համատիրությունների արմատական փոփոխությունն իր քաղաքական հանձնառությունն է:
Տիգրան Ավինյանն այդ մասին հայտարարել է Երևանի ավագանու նիստի ժամանակ։

«Մենք փաստացի համատիրությունների գործառույթը վերցրել ենք մեր ուսերին, քաղաքի ուսերին. ամբողջ քաղաքում կապիտալ ներդրում ենք իրականացնում։ Այս տարվա վերջով 3060-3070 վերելակ կունենանք փոխարինված ամբողջ քաղաքում, և կմնա փոխելու ընդամենը 1300 վերելակ։ Մարդիկ շատ լավ հասկանում են, թե իրենց համատիրությունները ինչ գործառույթներ ունեն և  տեսնում ենք, որ համատիրություններն այդ գործառույթները փաստացի չեն կատարում, և այստեղ, կարծում եմ, որ մեր միջամտության կարիքը կա»,- ասել է Ավինյանը։

Նա մանրամասնել է, որ հունիսի 7-ին Հայաստանում կայացած խորհրդարանական ընտրությունների քարոզարշավի ընթացքում, երբ մարդկանց հետո շփումների ժամանակ խոսք է գնացել համատիրությունների ոչ արդյունավետ աշխատանքի մասին և ինքը մարդկանց ասել է, որ համատիրությունների ներկայացուցիչներին հենց բնակիչներն են ընտրում, մարդիկ պնդել են, որ իրենք որևէ մեկին չեն ընտրել և չգիտեն, թե ինչպես են համատիրությունները ձևավորվել։

Հայաստանի վարչապետ Նիկոլ Փաշինյանը շնորհավորական ուղերձ է հղել Հյուսիսային Մակեդոնիայի Հանրապետության վարչապետ Հրիստիան Միցկոսկիին՝ Անկախության օրվա առիթով:

«Ջերմորեն շնորհավորում եմ Ձեզ և Հյուսիսային Մակեդոնիայի Հանրապետության ժողովրդին Անկախության օրվա առիթով։
Կարևորում ենք Հյուսիսային Մակեդոնիայի հետ քաղաքական երկխոսության ակտիվացումը, ոլորտային համագործակցության ընդլայնումն ու միջմարդկային կապերի սերտացումը՝ ի բարօրություն մեր երկու երկրների:
Վստահ եմ, որ համատեղ ջանքերով մեզ կհաջողվի նոր զարկ հաղորդել մեր համագործակցությանը թե՛ երկկողմ և բազմակողմ հարթակներում, թե՛ Եվրոպական միության հետ հարաբերությունների սերտացման համատեքստում:
Օգտվելով առիթից՝ մաղթում եմ Ձեզ շարունակական հաջողություններ, իսկ Հյուսիսային Մակեդոնիայի բարեկամ ժողովրդին՝ բարօրություն և կայուն առաջընթաց»։

Հայաստանի պետական եկամուտների կոմիտեն հիշեցնում է, որ Հայաստանի Հանրապետություն ներմուծվող և Հայաստանից Ռուսաստան արտահանվող մի շարք ապրանքախմբերի համար գործում է դրոշմավորման փոխճանաչելիության հատուկ կարգ։ 
Պետական եկամուտների կոմիտեն այդ մասին հաղորդագրություն է տարածել։

Սուրեն Գրիգորյանի ճեպազրույցը
https://www.youtube.com/live/Ts9KWwsuqp0?si=WbiNBLl-Yan2_c9H