Category: Armen Press

«Արհեստական բանականության սերունդ» և «STEP.ai» դպրոցական ծրագրերի փորձարարական փուլերի բարեհաջող ավարտից հետո նախատեսվում է դրանք և նույնաբովանդակ այլ ծրագրեր հասանելի դարձնել ՀՀ բոլոր հանրակրթական ուսումնական հաստատություններին:
Այս մասին «Արմենպրես»-ի հարցմանն ի պատասխան՝ հայտնեցին ՀՀ կրթության, գիտության, մշակույթի և սպորտի նախարարությունից՝ անդրադառնալով կրթական համակարգում արհեստական բանականության ներդրման ընթացքին ու դրա հետագա ընդլայնմանը։

«Արհեստական բանականության կրթական համակարգ մուտքը անխուսափելի է, ուստի ներկայումս ՀՀ ԿԳՄՍ նախարարության կողմից աշխատանքներ են տարվում համապատասխան գործիքակազմերի մշակման ուղղությամբ: Մշակվել է ճանապարհային քարտեզ, որը ներառում է երեք հիմնական և փոխկապակցված ուղղություն, որոնք միտված են ոչ միայն կրթական համակարգի վերափոխմանը, այլև ապագայի մարտահրավերներին դիմակայելու ընդունակ և ստեղծագործ սերունդ կերտելուն»,-նշեցին գերատեսչությունից։

Ըստ այդմ՝ ամրագրվել են կարճաժամկետ (ընդհանուր վերապատրաստում և խորացված մասնագիտական վերապատրաստում), միջնաժամկետ (մենթորական ցանցի ստեղծում) և երկարաժամկետ (ինստիտուցիոնալացում) թիրախներ:

Երևանի քաղաքապետ Տիգրան Ավինյանն այցելել է Նուբարաշենի աղբավայր, ծանոթացել ընդամենը մի քանի ամսում իրականացված ծավալուն աշխատանքներին: Այդ մասին տեղեկացնում է «Արմենպրես»-ը՝ վկայակոչելով Երևանի քաղաքապետարանի լրատվության վարչության տարածած հաղորդագրությունը։  
Տարածքի հսկողության ու անվտանգային կանոնների պահպանման նպատակով՝ դեռևս 2025 թվականի Երևանի քաղաքապետի հանձնարարությամբ տեղադրվել են տեսախցիկներ, արգելափակոցներ, ողջ տարածքը ցանկապատվել է, արդիականացվել և կահավորվել է պահակակետը, անցկացվել է արտաքին լուսավորության նոր համակարգ, շուրջ 1400 գծամետր ջրի խողովակ: Էականորեն նվազեցվել են այն ռիսկերը, որոնք կային նախկինում։ 
Այսօր աղբավայր մուտք գործող և դուրս եկող ավտոմեքենաների հստակ գրանցում է վարվում։
Օրական 150 մեքենա հող է տեղափոխվում աղբավայր՝ տարիների ընթացքում կուտակված աղբը ծածկելու համար: Այս միջոցառումներն առաջին հերթին ունեն կանխարգելիչ բնույթ և հնարավորինս կնվազեցնեն հրդեհի վտանգը:

ՀՀ ԱԳՆ-ի կողմից տարածված նախորդ հաղորդագրությունից հետո ընդլայնվել է այն երկրների ցանկը, որոնց քաղաքացիները փետրվարի 28-ից մարտի 10-ն ընկած ժամանակահատվածում Իրանից տեղափոխվել են Հայաստանի տարածքով. այդ երկրների թիվը հասել է 46-ի՝ ներառելով նաև Կանադան, Հունաստանը, Սերբիան, Ֆինլանդիան և Եգիպտոսը: Այդ մասին տեղեկացնում է «Արմենպրես»-ը՝ վկայակոչելով ՀՀ ԱԳՆ մամուլի խոսնակ Անի Բադալյանի ֆեյսբուքյան գրառումը։

«Turkish Airlines» ավիաընկերության մեկնարկային չվերթը Ստամբուլի միջազգային օդանավակայանից մարտի 11-ին ժամանել է «Զվարթնոց» միջազգային օդանավակայան։

Հանդիպում Եվրոպական ժողովրդական կուսակցության նախագահ Մանֆրեդ Վեբերի հետ

ՀՀ վարչապետ Նիկոլ Փաշինյանը ելույթ է ունեցել Եվրոպական խորհրդարանի լիագումար լիստում: «Արմենպրես»-ը ելույթը ներկայացնում է ամբողջությամբ

Մենք խաղաղության հասել ենք ժողովրդավարության շնորհիվ, ժողովրդավարական արժեքներին մեր նվիրվածության շնորհիվ, որովհետեւ Հայաստանին պարտադրված մտածողության կաղապարները կարողացանք հաղթահարել՝ ականջալուր լինելով ժողովրդին, իրական, ապրող, կյանքի եւ խաղաղության փափագ ունեցող մարդկանց։
«Արմենպրես»-ի փոխանցմամբ՝ Եվրախորհրդարանում ունեցած ելույթում այս մասին ասել է ՀՀ վարչապետ Նիկոլ Փաշինյանը:

«2026 թվականի հունիսի 7–ին Հայաստանի Հանրապետությունում տեղի են ունենալու հերթական խորհրդարանական ընտրություններ եւ այդ ընտրություններով մեր ժողովրդավարությունը պետք է խաղաղությունը դարձնի անշրջելի, ապա եւ խաղաղությամբ՝ ժողովրդավարությունը կդառնա անշրջելի։ Մենք գնում ենք այս ճանապարհով եւ ես սա ասում եմ որպես Հայաստանի Հանրապետության ժողովրդի լեգիտիմ ներկայացուցիչ», — ասել է Փաշինյանը։

Եվրամիությանը Հայաստանի ինտեգրվելու ճանապարհին այս պահին ամենամեծ խնդիրը ԵՄ-ի եւ Վրաստանի միջեւ քաղաքական երկխոսության սառեցված վիճակն է։
Եվրախորհրդարանում ունեցած ելույթում այս մասին ասել է ՀՀ վարչապետ Նիկոլ Փաշինյանը:

«Վրաստանը մեզ համար ճանապարհ է դեպի Եվրոպական Միություն, եւ մենք Եվրոպական Միությանը Հայաստանի Հանրապետության անդամակցելու գործընթացի մեկնարկի մասին օրենքը ընդունեցինք այն բանից հետո, երբ Վրաստանը ԵՄ անդամության թեկնածուի կարգավիճակ ստացավ։ Սա Հայաստանի ԵՄ անդամագրման հեռանկարը դարձրեց շոշափելի եւ մեր ակնկալիքն ու խնդրանքն է, որ Եվրոպական Միություն–Վրաստան կառուցողական գործընթացը զարգանա։ Դա կարեւոր է Հայաստանի համար, նույնքան կարեւոր, որքան Վրաստանի համար», — նշել է Փաշինյանը։

Վարչապետը նկատել է՝ «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրենքի ընդունումից հետո շատերն են Հայաստանում հարցնում, թե երբ Հայաստանը կդառնա Եվրոպական միության անդամ։

«Մեր պատասխանը շատ հստակ է․ որեւէ երկիր առանց Եվրոպական միության չափանիշներին համապատասխանելու չի կարող դառնալ ԵՄ անդամ։ Հետեւաբար մեր խնդիրն է, եվրոպացի մեր գործընկերների աջակցությամբ շարունակել բարեփոխումների ճանապարհը եւ նախ օբյեկտիվորեն համապատասխանել ԵՄ անդամագրման չափանիշներին։
Երբ սա տեղի ունենա, կա երկու ճանապարհ․ կամ ԵՄ–ն մեզ կընդունի, կամ չի ընդունի։ Այսպես ասում եմ, որովհետեւ հասկանում եմ, որ ԵՄ ընդլայնումը, նոր անդամի ներգրավումը պարզ հարց չէ, ու նաեւ քաղաքական որոշման խնդիր է։
Հետեւաբար, եթե ԵՄ–ն Հայաստանը կընդունի որպես լիիրավ անդամ, շատ լավ է։ Եթե չի ընդունի, մենք էլի կշահենք, որովհետեւ կլինենք ԵՄ ստանդարտներին համապատասխանող երկիր», — ընդգծել է Փաշինյանը։

2024 թվականի մարտ–ապրիլին մենք հասել էինք Հայաստանի պետականության եզրին ու եթե 2024 թվականի ապրիլին չկայացնեինք Ադրբեջանի հետ սահմանազատման գործընթացը մեկնարկելու որոշում, Հայաստանի Հանրապետությունն այսօր կլիներ առավելագույնը՝ արտաքին կառավարման ներքո։ «Արմենպրես»-ի փոխանցմամբ՝ Եվրախորհրդարանում ունեցած ելույթում այս մասին ասել է ՀՀ վարչապետ Նիկոլ Փաշինյանը՝ ընդգծելով, որ դա իր անձնական համոզմունքն է: