Category: Armen Press

Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը հանդիպել է Հունաստանի արդարադատության նախարարության գլխավոր քարտուղար Պելոպս Լասկոսի հետ։
Այս մասին նշված է ՀՀ դեսպանության տարածած հաղորդագրության մեջ։
Նշվում է, որ հանդիպմանը քննարկվել են արդարադատության ուղղությամբ Հայաստանի և Հունաստանի միջև ինստիտուցիոնալ համագործակցություն հաստատելու քայլերը։
Տիգրան Մկրտչյանը ներկայացրել է Հայաստանում այդ բնագավառում իրականացվող բարեփոխումները և Եվրոպական միության կարևոր դերակատարությունն այդ հարցում։
Պելոպս Լասկոսը, ընդգծելով, որ 2027 թվականին Հունաստանը նախագահելու է Եվրոպական միությունում, մատնանշել է, որ ԵՄ գործունեության երեք հիմնասյուներից մեկը հենց արդարադատության համակարգում համագործակցությունն է անդամ և գործընկեր պետությունների միջև։

Կանանց իրավունքների միջազգային օրվա առթիվ Հայաստանում ֆրանսիական համալսարանը (ՀՖՀՀ) Հայաստանում Ֆրանսիայի դեսպանության հետ համատեղ ամենամյա «Մտքի կանայք, գործի կանայք» միջոցառումն այս տարի անցկացրեց նոր՝ Speed Dating ձևաչափով։
«Արմենպրես»-ի հաղորդմամբ՝ միջոցառման ընթացքում մասնակիցները հնարավորություն ունեցան անհատական կարճ հանդիպումների միջոցով հարցեր ուղղել բուհի հաջողակ շրջանավարտներին և փորձառու մասնագետներին՝ ստանալով խորհուրդներ մասնագիտական զարգացման և կարիերայի կառուցման վերաբերյալ։
Միջոցառման այս տարվա հյուրերն էին Telecom Armenia ընկերության գործառնական տնօրինության փոխտնօրեն Արևիկ Ավագյանը, Scorpio Creative մարքեթինգային ընկերության հիմնադիր և տնօրեն Էլեն Գեղամյանը, PROFAL ընկերության մարքեթինգի տնօրեն, համալսարանի դասախոս Սոսի Դեմիրճյանը, արհեստական բանականության գերհամակարգչային ենթակառուցվածքի Cloud պլատֆորմի պրոդուկտային ուղղության պատասխանատու Լիլիթ Խանջյանը, PMI Armenia կազմակերպության նախագահ, Astrum PM ընկերության և PM Awards Armenia նախաձեռնության հիմնադիր Աստղիկ Սահակյանը, և Վերակառուցման և զարգացման եվրոպական բանկի խորհրդատվական բլոկի ղեկավար Զառա Օհանյանը։

Ընտրական գործընթացների նկատմամբ ցանկացած ապօրինի ազդեցություն կամ միջամտություն ենթակա է իրավական գնահատականի։ «Արմենպրես»-ի փոխանցմամբ՝ այս մասին հայտարարություն է տարածել ՀՀ ՆԳ նախարարությունը՝ նշելով, որ Ոստիկանությունը հաղորդում է ներկայացրել Քննչական կոմիտե:

«ՀՀ արտաքին հետախուզության ծառայությունը տարածել է տեղեկատվություն այն մասին, որ այլ երկրում տվյալ երկրի հատուկ ծառայությունների անունից հանդես գալով, տարբեր դերակատարներ փորձում են ճնշում գործադրել հայազգի և ՀՀ քաղաքացի հանդիսացող ու տվյալ երկրում տնտեսական գործունեությամբ զբաղվող անձանց նկատմամբ՝ վերջիններիս մղելով Հայաստանում սպասվող խորհրդարանական ընտրություններին մասնակցության հայտ ներկայացրած քաղաքական որոշ ուժերին աջակցելու գործողություններ իրականացնելուն։
Տեղեկատվության հիման վրա՝ ՆԳՆ ոստիկանության իրականացրած ստուգողական գործողությունների արդյունքում՝ նյութապես շահագրգռելու եղանակով անձանց ընտրական իրավունքի ազատ իրականացմանը խոչընդոտելու և նյութական կամ այլ կախվածությունն օգտագործելով ընտրությանը մասնակցելուն հարկադրելու հատկանիշներով առերևույթ հանցանքի մասին կազմված հաղորդումը փոխանցվել է ՀՀ քննչական կոմիտե»,– ասված է Ոստիկանության տարածած հայտարարության մեջ։

ՆԳՆ ոստիկանությունը հիշեցնում է, որ ընտրական գործընթացների նկատմամբ ցանկացած ապօրինի ազդեցություն կամ միջամտություն ենթակա է իրավական գնահատականի։

«Կոչ ենք անում լինել զգոն, իսկ նմանատիպ դեպքերի մասին տեղեկություն ունենալու դեպքում անմիջապես դիմել ՆԳՆ Ոստիկանություն՝ զանգահարելով 112 կամ տեղեկատվությունն ուղարկելով mia@gov.am էլ․ հասցեին, ինչպես նաև տեղեկատվություն կարող եք փոխանցել azdararir.am հարթակի միջոցով»,– եզրափակվում է հայտարարությունը։

Եկամուտների հայտարարագրման գործընթաց
https://youtu.be/JGYZ5fsneQs

ՀՀ Կառավարությունը որդեգրել է միջուկային էներգիան որպես էներգետիկ անվտանգության էական գործոն պահպանելու քաղաքականություն:
Ելույթով հանդես եկա Փարիզում ընթացող Միջուկային էներգիայի երկրորդ գագաթնաժողովին:

Իրաքի վարչապետ Մուհամմադ Շիա աս-Սուդանին ԱՄՆ պետքարտուղար Մարկո Ռուբիոյի հետ հեռախոսազրույցում ընդգծել է, որ Իրաքը չպետք է օգտագործվի որպես տարածաշրջանային պատերազմում հարձակումների հարթակ։

Իրանի ռազմաօդային ուժերը մի շարք հարվածներ են հասցրել Իսրայելի Հայֆա քաղաքի նավթավերամշակման գործարանին և գազի վերամշակման գործարանին, ինչպես նաև վառելիքի մի քանի պահեստարանի՝ ի պատասխան Թեհրանում վառելիքի ենթակառուցվածքի վրա գրոհի։ «Արմենպրես»-ի փոխանցմամբ՝ այս մասին հաղորդել է Իրանի բանակի մամուլի ծառայությունը։

«Իրանի Իսլամական Հանրապետության բանակի ռազմաօդային ուժերի քաջարի մարտիկները, իրանական նավթի պահեստարանների վրա հարձակմանն ի պատասխան, անօդաչու թռչող սարքերով հարվածներ են հասցրել Հայֆայում սիոնիստական ​​ռեժիմին պատկանող նավթավերամշակման և գազի վերամշակման գործարաններին, ինչպես նաև վառելիքի պահեստարաններին», — հաղորդել է Իրանի պետական ​​հեռուստառադիոընկերությունը։

Հայաստանում օդի ջերմաստիճանը կբարձրանա
Հայաստանում մարտի 10-ի ցերեկը, 12-ին սպասվում է առանց տեղումների եղանակ։ «Արմենպրես»-ի փոխանցմամբ՝ հայտնում են Հիդրոօդերևութաբանության և մոնիթորինգի կենտրոնից՝ նշելով նաև, որ մարտի 11-ին, 13-14-ին՝ առանձին շրջաններում, 15-ին՝ շրջանների մեծ մասում, սպասվում են տեղումներ․ լեռնային և նախալեռնային շրջաններում՝ ձյան, հովտային շրջաններում՝ ձնախառն անձրևի և անձրևի տեսքով։
Քամին` հյուսիսարևմտյան` 2-5 մ/վ։ Օդի ջերմաստիճանը մարտի 11-14-ի և՛ գիշերը, և՛ ցերեկն աստիճանաբար կբարձրանա 3-6 աստիճանով։
Երևանում մարտի 10-ի ցերեկը, 11-13-ը սպասվում է առանց տեղումների եղանակ։ Մարտի 14-15-ին ժամանակ առ ժամանակ սպասվում են տեղումներ՝ թաց ձյան և ձնախառն անձրևի տեսքով։

Իրանի կանանց ֆուտբոլի հավաքականի հինգ անդամներ Ավստրալիայում մարդասիրական վիզաներ և ապաստան են ստացել. նրանց անվտանգության հետ կապված մտահոգություններ են առաջացել այն բանից հետո, երբ նրանք հրաժարվել են կատարել Իրանի օրհներգը։ Այս մասին հաղորդում է BBC-ն։
Ավստրալիայի ներգաղթյալների նախարար Թոնի Բուրկը հայտարարել է, որ Ավստրալիայի ոստիկանությունը կանանց «տեղափոխել է անվտանգ վայր»։ Թիմի մյուս անդամներին ևս ասվել է, որ նրանք կարող են մնալ Ավստրալիայում։

«Նրանք ցանկանում են հստակ տեղ հասցնել, որ քաղաքական ակտիվիստներ չեն։ Նրանք մարզիկներ են, որոնք ցանկանում են անվտանգ լինել»,- ասել է նախարարը՝ հավելելով, որ բանակցություններ են ընթանում մի քանի օր շարունակ։

Թիմի մնացած անդամները տեղափոխվել են Գոլդ Քոստի օդանավակայան և մարտի 10-ի երեկոյան կմեկնեն Սիդնեյ։
Թիմի ավտոբուսը կարճ ժամանակով կանգնեցրել են տասնյակ ակտիվիստներ, որոնք փորձել են համոզել մյուս խաղացողներին ևս մնալ Ավստրալիայում:

«Ես թիմի մյուս անդամներին ասում եմ, որ նույն հնարավորությունը կա իրենց համար», — նշել է նախարարը՝ հավելելով, որ իրենք գիտակցում են, որ այդ կանայք գտնվում են դժվարին իրավիճակում։

Ավստրալիայի վարչապետ Էնթոնի Ալբանիզը հաստատել է, որ հինգ խաղացողներին տրամադրվել են մարդասիրական վիզաներ։
Գործակալության փոխանցմամբ՝ կանայք պետք է վերադառնային տուն, սակայն երկրպագուները մտահոգություն էին հայտնել նրանց անվտանգության համար, քանի որ թիմը հրաժարվել էր երգել ազգային օրհներգը նախորդ շաբաթ Հարավային Կորեայի դեմ խաղից առաջ։ Այս քայլը քննադատություն էր առաջացրել Իրանում, նրանց պատժելու կոչեր էին հնչել։
Ավստրալիայի մարդասիրական վիզաների ծրագիրը մշտական ​​պաշտպանություն է տրամադրում փախստականներին և մարդասիրական օգնության կարիք ունեցող անձանց: Վիզա ունեցողները կարող են ապրել, աշխատել և սովորել երկրում։
Մարտի 9-ին ԱՄՆ նախագահ Դոնալդ Թրամփն իր Truth Social հարթակում պահանջել էր գործողություններ ձեռնարկել՝ պնդելով, որ Ավստրալիան պետք է «ապաստան տա» կանանց։

«ԱՄՆ-ն կընդունի նրանց, եթե դուք չընդունեք», — հավելել էր նա։

Ավելի ուշ Թրամփը կրկին գրառում էր կատարել՝ նշելով, որ խոսել է Ավստրալիայի վարչապետ Էնթոնի Ալբանիզի հետ, և «հինգ խաղացողների համար արդեն հոգ են տարել»։ Թրամփը նշել էր, որ խաղացողներից մի քանիսն իրենց պարտավորված են զգում վերադառնալ, քանի որ «անհանգստանում են իրենց ընտանիքների անվտանգության համար, այդ թվում՝ ընտանիքի անդամներին ուղղված սպառնալիքների պատճառով, եթե նրանք չվերադառնան»։