Category: Armen Press

Գերմանիայի արտաքին գործերի նախարար Յոհան Վադեֆուլը մարտի 16-ին հայտարարել է, որ ԱՄՆ-ի և Իսրայելի համար կարևոր է սահմանել, թե երբ են համարելու, որ հասել են իրենց ռազմական նպատակին։
Ինչպես հաղորդում է «Արմենպրես»-ը՝ վկայակոչելով Associated Press-ը, Բրյուսելում ԵՄ ԱԳ նախարարների հետ հանդիպումից առաջ Վադեֆուլը խոսել է լրագրողների հետ ՝ նշելով, որ ԱՄՆ-ն և Իսրայելն այս հարցում պետք է հստակություն մտցնեն։
Նա նաև շեշտել է, որ Իրանի կառավարությունը զգալի վտանգ է ներկայացնում տարածաշրջանի, նավագնացության ազատության և համաշխարհային տնտեսության համար, և «այս վտանգն, անշուշտ, չպետք է շարունակվի»։
Վադեֆուլն առանց մանրամասնելու նաև նշել է, որ կաջակցի Հորմուզի նեղուցը փակող պատասխանատու անձանց դեմ պատժամիջոցներին։
Նախարարի խոսքով՝ երբ ԱՄՆ-Իսրայելի նպատակների վերաբերյալ հստակություն լինի, կգա այն փուլը, երբ կսահմանվի «ամբողջ տարածաշրջանի անվտանգության ճարտարապետությունը», որը կենթադրի Իրանի հետ բանակցություններ։

Հնդկաստանի արտգործնախարար Սուբրամանյամ Ջայշանկարը շնորհակալություն է հայտնել հայ ժողովրդին ու Հայաստանի կառավարությանն Իրանից իր երկրի քաղաքացիների անվտանգ տարհանումն ապահովելու համար։ Ինչպես հաղորդում է «Արմենպրես»-ը, այս մասին նա գրառում է կատարել X-ի իր էջում։

«Շնորհակալ ենք Հայաստանի կառավարությանն ու ժողովրդին Իրանից մինչև հիմա Հնդկաստանի 550 քաղաքացիների անվտանգ տարհանմանն աջակցելու համար։ Բարձր ենք գնահատում նրանք աջակցությունը նման դժվարին ժամանակներում»,- գրել է Ջայշանկարը՝ գրառման մեջ նշելով նաև Հայաստանի արտգործնախարար Արարատ Միրզոյանին։

Ադրբեջանում տեղի է ունեցել Ֆրանսիայի օգտին լրտեսության մեջ մեղադրվող Մարտին Ռայանի և դավաճանության մեջ մեղադրվող Ազադ Մամեդլիի դեմ Ադրբեջանի Պետական ​​անվտանգության ծառայության (ՊԱԾ) կողմից հարուցված քրեական գործով վերջին դատական ​​նիստը։
Ինչպես հաղորդում է «Արմենպրես»-ը, այս մասին հայտնում է ադրբեջանական APA լրատվական գործակալությունը:
Բաքվի ծանր հանցագործությունների դատարանում դատավոր Էլմին Ռուստամովի նախագահությամբ կայացած դատական ​​նիստում ընթերցվել է դատավճիռը, որի համաձայն՝ ֆրանսիացի Մարտին Ռայանը դատապարտվել է 10 տարվա, իսկ Ազադ Մամեդլին՝ 12 տարվա ազատազրկման։
Երկու անձինք էլ իրենց պատիժը կկրեն խիստ ռեժիմի ուղղիչ հաստատությունում։
Դատարանը նաև որոշել է, որ պատիժն ամբողջությամբ կրելուց հետո Մարտին Ռայանը կարտաքսվի Ադրբեջանից։

Արաբական Միացյալ Էմիրությունների Ֆուջեյրա էմիրությունում արդյունաբերական նավթային օբյեկտի վրա անօդաչու թռչող սարքի հարվածի հետևանքով հրդեհ է բռնկվել։
«Արմենպրես»-ի փոխանցմամբ՝ այս մասին հայտնում է Fujairah Media Office-ը։
Քաղաքացիական պաշտպանության խմբերը փորձում են վերահսկել հրդեհը։
Տուժածների մասին տեղեկություններ չեն հաղորդվել։

Մեծ Բրիտանիան 5 միլիոն ֆունտ ստեռլինգ (6.6 միլիոն դոլար) է ուղարկում Լիբանանում գործող մարդասիրական կազմակերպություններին։

🔴 Ղազախստանում նոր սահմանադրության ընդունման վերաբերյալ հանրաքվեին որպես միջազգային փորձագետ մասնակցող բելգիացի Ալբերտո Տուրկստրան բարձր է գնահատում հանրաքվեի անցկացման մակարդակն ու կատարված կազմակերպչական աշխատանքները՝ ընդգծելով, որ նոր փաստաթուղթը երկրի ապագայի համար կարևոր նշանակություն կունենա:
Բրյուսելում գործող վերլուծական և հասարակայնության հետ կապերի «Diplomatic World» նախագծի տնօրեն, փորձագետ Ալբերտո Տուրկստրան նման տեսակետ է արտահայտել «Արմենպրես»-ի թղթակցի հետ զրույցում՝ անդրադառնալով տեղի ունեցած հանրաքվեի անցկացման գործընթացին ու հրապարակված արդյունքներին:
Ինչպես ավելի վաղ հաղորդվել էր, Ղազախստանում մարտի 15-ին տեղի ունեցած հանրաքվեի արդյունքներով երկրի նոր սահմանադրությանը կողմ է քվեարկել քվեարկության մասնակիցների 87.18 տոկոսը կամ 7 միլիոն 954 հազար 667 մարդ։

Եվրամիության անդամ երկրները քննարկելու են, թե ինչ կարող է անել եվրոպական կողմը՝ բաց պահելու Հորմուզի նեղուցը։
Ինչպես հաղորդում է «Արմենպրես»-ը՝ վկայակոչելով France 24-ը, այս մասին Բրյուսելում լրագրողների հետ զրույցում հայտարարել է ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալասը։
«Մեր շահերից է բխում Հորմուզի նեղուցը բաց պահելը, և այդ պատճառով մենք նաև քննարկում ենք, թե ինչ կարող ենք անել այս առումով եվրոպական կողմից», — ասել է նա՝ ԵՄ արտաքին գործերի նախարարների հետ հանդիպումից առաջ։

Մեծ Բրիտանիայի վարչապետ Քիր Սթարմերը հրաժարվում է ռազմանավեր ուղարկել Հորմուզի նեղուցում նավագնացությունը վերականգնելու համար, չնայած ԱՄՆ նախագահ Դոնալդ Թրամփի խնդրանքին: Ինչպես հաղորդում է «Արմենպրես»-ը, այս մասին հաղորդել է The Daily Telegraph թերթը:
Էներգետիկայի նախարար Էդ Միլիբանդը հայտարարել է, որ կառավարությունը «ինտենսիվորեն ուսումնասիրում է» նեղուցի վերաբացման համար հնարավոր քայլերը, սակայն հրաժարվել է հստակ պարտավորություններ ստանձնել։
Նախարարները քննարկում են ականներ որսացող անօդաչու թռչող սարքեր ուղարկելու հարցը, սակայն ներկայում պատրաստ չեն որևէ ռազմանավ ուղարկել նեղուց։
The Daily Telegraph-ը գրում է, որ ռազմանավեր ուղարկելուց հրաժարումը կարող է էլ ավելի վատացնել հարաբերությունները Սթարմերի և Թրամփի միջև։ Սպիտակ տան ղեկավարն արդեն դժգոհություն է հայտնել, որ Լոնդոնը թույլ չի տվել օգտագործել իր ռազմակայաններն Իրանի դեմ առաջին հարվածները հասցնելու համար:

Ղազախստանում տեղի ունեցած հանրաքվեի արդյունքներով երկրի նոր սահմանադրությանը կողմ է քվեարկել քվեարկության մասնակիցների 87.18 տոկոսը կամ 7 միլիոն 954 հազար 667 մարդ։
«Արմենպրես»-ի թղթակցի հաղորդմամբ՝ քվեարկության արդյունքները ներկայացրել է Ղազախստանի կենտրոնական ընտրական հանձնաժողովը:
Ղազախստանի կենտրոնական ընտրական հանձնաժողովը նաև հայտնել է, որ երկրի նոր Սահմանադրության հանրաքվեի քվեարկությանը մասնակցել է 9 միլիոն 127 հազար 192 մարդ կամ հանրաքվեին մասնակցելու իրավունք ունեցողների 73.12%-ը։
Ավելի վաղ Ղազախստանի նախագահ Կասիմ-Ժոմարտ Տոկաևը հանդիպել էր հանրաքվեի քարոզարշավին ակտիվորեն մասնակցած երիտասարդական կազմակերպությունների ներկայացուցիչների հետ և անդրադարձ կատարել քվեարկության դրված փաստաթղթի կարևորությանը:
«Այս օրը, անկասկած, ընդմիշտ կմնա երկրի տարեգրքերում։ Այսուհետ մարտի 15-ը կնշվի որպես Սահմանադրության օր։ Ես կարդացել եմ բազմաթիվ երկրների սահմանադրություններ և վստահորեն կարող եմ ասել, որ մեր հիմնական օրենքը ամենաառաջադեմներից է», — ասել է Տոկաևը։
ՄԱՆՐԱՄԱՍՆԵՐ

Բահրեյնը և Քուվեյթը հերթական անգամ երկարաձգել են թռիչքների արգելքն իրենց օդային տարածքում, որը գործում է փետրվարի 28-ից: