Category: Armen Press

Հայաստանի նախագահ Վահագն Խաչատուրյանը շնորհավորական ուղերձ է հղել Կանանց միջազգային օրվա առթիվ

Սիրելի՛ կանայք,
Ջերմորեն շնորհավորում եմ ձեզ Մարտի 8-ի՝ Կանանց միջազգային օրվա առթիվ։
Այս օրն առիթ է մեկ անգամ ևս արժևորելու և մեծարելու կանանց դերը մեր հասարակության, ընտանիքների և պետական կյանքի բոլոր ոլորտներում։ Հայ կնոջ կերպարը դարեր շարունակ մարմնավորել է նվիրում, հոգատարություն, ուժ և պատասխանատվություն՝ լինելով ընտանիքի ամրության, արժեքների պահպանման և սերունդների դաստիարակության հիմնասյուներից մեկը։
Միևնույն ժամանակ ժամանակակից աշխարհում առավել կարևոր է ապահովել կանանց լիարժեք մասնակցությունը հասարակական և պետական կառավարման գործընթացներին։ Հավասար հնարավորությունների ապահովումը, կանանց իրավունքների պաշտպանվածությունն ու սեռային հավասարության ամրապնդումը հանդիսանում են արդիական և կարևոր նախապայմաններ մեր երկրի կայուն զարգացման, ժողովրդավարական ինստիտուտների ամրապնդման և արդյունավետ կառավարման համար։
Մենք բարձր ենք գնահատում այն մեծ ներդրումը, որ կանայք ունեն գիտության, կրթության, մշակույթի, տնտեսության, պաշտպանության և պետական կառավարման ոլորտներում։ Ձեր գիտելիքը, պատասխանատվությունն ու նախաձեռնողականությունը կարևոր դեր ունեն մեր պետության առաջընթացի և ապագայի կառուցման գործում։
Այս տոնական օրը մեր խորին երախտագիտությունն ու հարգանքն ենք հայտնում մեր կանանց, մայրերին, քույրերին և դուստրերին՝ նրանց անսպառ սիրո, նվիրվածության և հոգատարության համար, որոնց շնորհիվ մեր ընտանիքներն ու հասարակությունը դառնում են ավելի ամուր և համերաշխ։
Սիրելի՛ կանայք,
Մաղթում եմ ձեզ առողջություն, երջանկություն, խաղաղություն և նոր հաջողություններ՝ ձեր ընտանիքներում և ձեր գործունեության բոլոր ոլորտներում։
Թող ձեր ջանքերը և նախաձեռնությունները շարունակեն նպաստել մեր պետության զարգացմանն ու բարօրությանը:

Չինաստանի արտաքին գործերի նախարար Վան Ին անդրադարձել է Իրանի շուրջ ստեղծված իրավիճակին և ներկայացրել Պեկինի դիրքորոշումը՝ նշելով հակամարտության կարգավորման հինգ հիմնական սկզբունքները։

Սիրելի՛ կանայք, մայրեր, քույրեր, դուստրեր,
շնորհավորում եմ բոլորիդ Կանանց միջազգային օրվա՝ Մարտի 8-ի առիթով։
2018 թվականի Ժողովրդական, ոչ բռնի, թավշյա հեղափոխությունից հետո մենք խոսում էինք մեր երկրում կանանց դերի մեծացման, հանրային կյանքում նրանց մասնակցության ընդլայնման մասին։
Այսօր դա իրողություն է։ Կանայք հսկայական մասնակցություն ունեն մեր երկրի կառավարման գործում. ներգրավված են քաղաքական եւ տնտեսական կյանքում՝ նախկինում չտեսնված ծավալով:
Ներքին գործերի նախարարություն, Արտաքին հետախուզության ծառայություն, Դատախազություն, Քրեակատարողական ծառայություն․ այս գերատեսչություններն այսօր կանայք են ղեկավարում, մի բան, որը ոչ միայն առաջին անգամ է մեր պատմության մեջ, այլեւ անհնարինի ժանրից կլիներ մեր նախահեղափոխական մտածողության մոդելներում։
Կառավարությունում այսօր կանայք ներկայացված են ավելի, քան երբեւէ, օրենսդիր մարմնում ներկայացված են ավելի, քան երբեւէ, դատաիրավական մարմիններում ներկայացված են ավելի, քան երբեւէ, Տեղական ինքնակառավարման մարմիններում ներկայացված են ավելի, քան երբեւէ, զինվորական ծառայության մեջ ներկայացված են ավելի, քան երբեւէ, ոստիկանությունում ներկայացված են ավելի, քան երբեւէ, տնտեսական, քաղաքական, հանրային կյանքում ներկայացված են ավելի, քան երբեւէ, եւ սա նաեւ մեր 300 դպրոց, 500 մանկապարտեզ ծրագրի շնորհիվ, որը ոչ միայն երեխաներին ավելի լավ կրթություն ստանալու հնարավորություն է տալիս, այլեւ նրանց մայրիկներին հնարավորություն է տալիս աշխատել։
Սրան գումարվում է մինչեւ երկու տարեկան երեխաների խնամքի համար մայրերին տրվող նպաստի համակարգը․ Հեղափոխությունից հետո մենք ավելացրեցինք նպաստի չափերը եւ որոշակի բանաձեւերով ծրագրի շահառու դարձրեցինք բոլոր մայրերին։
Սիրելի՛ ժողովուրդ, սիրելի՛ քաղաքացիներ,
Այսօր մեր երկիրը բոլորիդ աչքի առաջ հաջողություններ է գրանցում, եւ դա կապված է նաեւ մեր հանրային, պետական, տնտեսական կյանքում կանանց ներգրավվածության մեծացող աստիճանի հետ։ Կանայք հիմնականում չեն տրվում քրեական ենթամշակույթի ազդեցությանը, որի քայքայող նշանակությունը մեզանում գիտակցված չէ խորությամբ։ Այդ երեւույթի քայքայիչ ազդեցությունն է, որ խոչընդոտում է մեր տղաների առավել կրթամետ լինելուն, ինչը լրջագույն խնդիր է մեր իրականության մեջ։ Մյուս կողմից ուրախություն եմ ապրում՝ տեսնելով, թե մեր աղջիկները որքան կենտրոնացած են կրթության վրա, ինչը մեծացնում եւ մեծացնելու է նրանց մրցունակությունն աշխատանքի եւ կարիերայի մեջ։
Կրթության նկատմամբ աղջիկների այս ուրախալի ձգտումը կապված է նաեւ մի ցավալի փաստի հետ․ քրեական ենթամշակույթի ազդեցությամբ ոմանք մտածում են, թե կին լինելն ինքնին թերություն է, իսկ տղամարդ լինելն ինքնին առավելություն (այս մտածողությունն արգելակում է տղաների կրթական ձգտումները)։
Այս պայմաններում մեր աղջիկները մի կողմից մեկնարկային անհավասար պայմաններում են, մյուս կողմից ապացուցելու բան ունեն, եւ ապացուցում են, թե որքա՜ն տաղանդավոր են, որքա՜ն ուժեղ, որքա՜ն կամային, եւ այս ընթացքում ոչ միայն պահպանում եւ խնամում են իրենց գեղեցկությունը, այլեւ դառնում են ավելի ու ավելի գեղեցիկ, որովհետեւ սեփական ուժերի վրա վստահ կինն ինքնին գեղեցիկ է։
Այս ամենի համատեքստում, իհարկե, կա մի խնդիր, որը պետք է ռազմավարական մտորումների տեղիք տա։ Որքան շատ է հանրային, քաղաքական, տնտեսական կյանքում ներգրավված կինը, այնքան պակաս է հակված երեխա ունենալու, եւ սա մեծագույն խնդիր է մեր երկրի համար։
Մենք պետք է կարողանանք այնպիսի երկիր կառուցել, որտեղ առնվազն երեք երեխա ունենալը սովորական լինի յուրաքանչյուր կնոջ համար, բայց եւ չնշանակի պասիվացում, մեկուսացում հանրային, տնտեսական կյանքից։
Մենք հիմա նման երկիր ենք կառուցում․ մանկապարտեզների կառուցման մեր ծրագիրը, որը կշարունակվի նաեւ 2026–2031 թվականներին, մսուրային ծառայությունը լայնորեն հասանելի կդարձնի ողջ հանրապետությունում։
Սիրելի՛ կանայք, մայրեր, քույրեր, դուստրեր,
շնորհավորում եմ բոլորիդ Կանանց միջազգային օրվա առիթով։ Սիրում եմ բոլորիդ, հպարտանում եմ բոլորովդ եւ խոնարհվում եմ բոլորիդ առջեւ։
Նիկոլ Փաշինյան

Առաջիկա խորհրդարանական ընտրությունների արդյունքում լինելու է «Հեղափոխություն 3»
Այս մասին հայտարարեց ՀՀ վարչապետ Նիկոլ Փաշինյանը՝ Գյումրիում ներկուսակցական քարոզարշավի հավաքի ընթացքում իր ելույթի ժամանակ։

«Մենք 2018 թվականին ընտրություններով արել ենք ներքաղաքական հեղափոխություն, 2021 թվականի ընտրություններում ժողովուրդը մեզ առաջնորդել է դեպի սոցիալ-հոգեբանական և մտածողության հեղափոխություն, 2026 թվականի հունիսի յոթի ընտրություններում մենք հասնելու ենք պատմաքաղաքական հեղափոխության, որը մեզ՝ Հայաստանի ժողովրդին, յոլա գնալու, գոյատևման քաղաքականության ցիկլից դուրս է բերելու և դնի զարգացման հարատև պետության օրակարգի ռեսուրսների վրա>,- նշեց Հայաստանի վարչապետը։

Նիկոլ Փաշինյանը վստահեցրեց՝ 2026 թվականի խորհրդարանական ընտրություններից շատ չանցած Գյումրիում լինելու է «Գյումրի 1»․

«Մենք մոռանում ենք, որ Գյումրիում հեղափոխություն տեղի չի ունեցել, Գյումրին հեղափոխական իշխանություն չի ունեցել և 2026 թվականի խորհրդարանական ընտրություններից շատ չանցած Գյումրիում լինելու է «Գյումրի 1»։

Վարչապետն արձանագրեց՝ հունիսի 7-ի ընտրություններում Հայաստանին և Հայաստանի ժողովրդին պետք է ոչ թե պարզապես հաղթանակ, այլ, որ խաղաղության թիմը ստանա բացարձակ սահմանադրական մեծամասնություն։

«Մեր նշաձողը 65% ն է այս ընտրություններում: Բայց մի շատ կարևոր արձանագրում ենք արել. շատ լավ է, որ ժողովուրդը մեզ տալիս է այդ վստահությունը, բայց մենք երբեք ոչ մի վայրկյան չպետք է մեր զգոնությունը թուլացնենք: Մեզ ասելով՝ նկատի ունեմ ոչ միայն մեր կուսակցական ընկերներին, այլև` մեր ընտրողներին, մեր ժողովրդին։ 2026թ. հունիսի 7-ին Հայաստանի Հանրապետությունում տեղի է ունենալու պատմաքաղաքական հեղափոխություն։ Եվ այդ հեղափոխությունն անելու որոշում պետք է կայացնի միայն մեկ մարդ` և այդ մեկ մարդը դու ես»,- նշեց Նիկոլ Փաշինյանը։

Աբու Դաբիում ՀՀ դեսպանության կողմից տեղադրված՝ ԱՄԷ-ում մնացած ՀՀ քաղաքացիների հայտարարության ցանկում մարտի 7-ի առավոտվա դրությամբ գրանցվել է 183 քաղաքացի։
«Արմենպրես»-ի փոխանցմամբ՝ այս մասին հայտնել են ՀՀ ԱԳ նախարարությունից, ընդգծելով, որ Աբու Դաբիում ՀՀ դեսպանությունը և Դուբայում ՀՀ գլխավոր հյուպատոսությունը շարունակում են արտակարգ ռեժիմով պատասխանել ՀՀ քաղաքացիներին հետաքրքրող հարցերին։
ԱՄԷ-ում ՀՀ դեսպանություն դիմած քաղաքացիները բարձրացրել են ՀՀ վերադառնալու թռիչքների չեղարկման/հետաձգման հետևանքով ՀՀ-ում աշխատանքից բացակայությունների խնդիրը՝ հայցելով աջակցություն առ այն, որ ՀՀ-ում գործատուներն անհարգելի չհամարեն բացակայությունները և պահպանվի բացակա օրերի աշխատավարձը։
«ՀՀ ԱԳՆ այս խնդիրը քննարկում է կառավարության գործընկերների հետ՝ ՀՀ քաղաքացիներին լուծում առաջարկելու նպատակով։
Մարտի 8-ին դեսպանության և գլխավոր հյուպատոսության կողմից կազմակերպվող դեպի Օման տեղափոխումից օգտվելու նպատակով գրանցվել է 37 ՀՀ քաղաքացի»,– ասված է ԱԳՆ–ի տարածած հաղորդագրության մեջ։

Գյումրիում ելույթ եմ ունենում ներկուսակցական քարոզարշավի հավաքում
Նիկոլ Փաշինյան

ՀՀ կառավարությունը կտրամադրի մինչև 250 հազար դրամ փոխհատուցում յուրաքանչյուր անձի համար, ում ՀՀ վերադարձի / տարանցիկ չվերթները չեղարկվել էին Մերձավոր Արևելքում ռազմական գործողությունների հետևանքով, և ովքեր նոր տոմսեր են ձեռք բերել ՀՀ վերադառնալու համար:
«Արմենպրես»-ի հաղորդմամբ՝ ՀՀ ԱԳՆ-ի այս նախաձեռնության մասին «Ֆեյսբուք»-ի իր էջում գրել է նախարար Արարատ Միրզոյանը՝ նշելով, որ քաղաքացու կողմից ավելի պակաս արժեքով նոր տոմսի ձեռքբերման պարագայում փոխհատուցումը կտրամադրվի վճարված գումարի չափով:
Փոխհատուցման տրամադրման մեխանիզմը և հավելյալ մանրամասները կսահմանվեն առաջիկա օրերին։

Հայաստանի Հանրապետության վարչապետ Նիկոլ Փաշինյանը մարտի 7–ին այցելել է Արագածոտնի և Շիրակի մարզեր, որտեղ բազմաթիվ հանդիպումներ է ունեցել տարբեր բնակավայրերի քաղաքացիների հետ։
Ինչպես «Արմենպրես»-ը տեղեկանում է ՀՀ վարչապետի «Ֆեյսբուք»-ի էջում հրապարակված տեսանյութերից, ՀՀ վարչապետը կանգառներ է կատարել Արագածոտնի մարզի Աշտարակ, Թալին քաղաքներում, Շիրակի մարզի Մարալիկ, Պեմզաշեն, Արթիկ համայնքներում։

Միացյալ Նահանգների ու Իսրայելի ռազմաօդային ուժերը համատեղ զանգվածային ավիահարվածներ են հասցրել Թեհրանի Մեհրաբադ միջազգային օդանավակայանին։
Այս մասին հաղորդել է իրանական Tasnim գործակալությունը։
«ԱՄՆ-ն և Իսրայելն առավոտյան Թեհրանի «Մեհրաբադ» օդանավակայանի տարածքում իրականացրել են ամենադաժան հարձակումներից մեկը։ Լսվել են մի քանի պայթյուններ»,-նշել է գործակալությունը՝ հավելելով, որ պայթյուններին հետևել են ուժգին հրդեհներ։

Հայաստանի Հանրապետության արդարադատության նախարար Սրբուհի Գալյանի գլխավորությամբ՝ տեղի է ունեցել Սահմանադրական բարեփոխումների խորհրդի հերթական նիստը։
«Արմենպրես»-ի հաղորդմամբ՝ այս մասին հայտնում են Արդարադատության նախարարությունից։
Նիստի ընթացքում Խորհրդի անդամները շարունակել են դատական համակարգին վերաբերող կարգավորումների քննարկումը: