Category: Armen Press

Մերձավոր Արևելքից 9000 ամերիկացի կարողացել է դուրս գալ փետրվարի 28-ին Իրանի դեմ Իսրայելի և ԱՄՆ-ի ռազմական գործողությունների մեկնարկից ի վեր։ «Արմենպրես»-ի փոխանցմամբ՝ այս մասին հայտարարել է ԱՄՆ պետքարտուղար Մարկո Ռուբիոն մամուլի ասուլիսի ժամանակ։
«Կա ևս 1500 ամերիկացի, որոնք խնդրում են օգնել մեկնման հարցում», — Ռուբիոյի խոսքերն է մեջբերում ԱՄՆ պետքարտուղարությունը։

Իրանի բանակի հակաօդային պաշտպանության ստորաբաժանումը խոցել է ամերիկյան F-15 կործանիչ։
Այս մասին հաղորդում է իրանական Tasnim գործակալությունը՝ վկայակոչելով իրազեկ աղբյուրի։
Գործակալությունը հիշեցնում է, որ մարտի 2-ին Իրանի զինված ուժերը հայտարարել էին հայրենական արտադրության հակաօդային պաշտպանության համակարգերով ամերիկյան 3 կործանիչ խոցելու մասին։ Մարտի 2-ին ինչպես Քուվեյթը, այնպես էլ ԱՄՆ-ն հայտարարել էին, որ ամերիկյան 3 կործանիչ սխալմամբ խոցվել է Քուվեյթի զինված ուժերի կողմից, երբ նրանք հետ էին մղում Իրանի կողմից ավիահարվածները։
Միևնույն ժամանակ, մարտի 2-ի առավոտյան Իրանի զինված ուժերը հայտնել էին Իրանի և Քուվեյթի սահմանային հատվածում F-15 կործանիչ խոցելու մասին։

Մերձավոր Արևելքում տիրող իրավիճակի պատճառով Ֆրանսիայի նախագահ Էմանուել Մակրոնը հրամայել է «Շառլ դը Գոլ» միջուկային ավիակիրը և դրա հարվածային խումբը դուրս բերել Բալթիկ ծովից և տեղակայել Միջերկրական ծովում։ «Արմենպրես»-ի փոխանցմամբ՝ այս մասին հաղորդում է France 24 պարբերականը՝ վկայակոչելով Մակրոնի ուղերձը ժողովրդին։

«Հաշվի առնելով այս անկայուն իրավիճակը և առաջիկա օրերի անորոշությունները՝ ես հրամայել եմ, որ «Շառլ դը Գոլ» ավիակիրը, դրա օդային միջոցները և ուղեկցող ֆրեգատը նավարկեն դեպի Միջերկրական ծով», — ասել է Մակրոնը մարտի 3-ի երեկոյան հեռարձակված հեռուստաուղերձում։

Նա նաև նշել է, որ վերջին մի քանի ժամվա ընթացքում Մերձավոր Արևելքում տեղակայվել են Rafale կործանիչներ, հակաօդային պաշտպանության համակարգեր և օդային ռադարային համակարգեր։
Այս որոշման պատճառ է հանդիսացել մարտի 2-ին Կիպրոսում բրիտանական ավիաբազայի թիրախավորումը անօդաչու թռչող սարքերով։
Մակրոնի խոսքով՝ Կիպրոսը ԵՄ-ի անդամ է, որի հետ Ֆրանսիան վերջերս ռազմավարական գործընկերության պայմանագիր է կնքել։

Եվրամիության արտաքին հարաբերությունների և անվտանգության հարցերով գլխավոր խոսնակ Անիտա Հիպերն անդրադարձել է Ադրբեջանում պահվող հայ գերիների հարցին՝ վերահաստատելով Եվրամիության դիրքորոշումը, որ այս կարևոր հումանիտար հարցը պետք է լուծվի։
Անիտա Հիպերն այդ մասին ասել է հերթական ճեպազրույցի ժամանակ՝ պատասխանելով Civilnet-ի հարցին։
Լրագրողը հարցրել է, թե արդյոք Ադրբեջանում պահվող հայ գերիների հարցը Եվրամիության օրակարգում է, և որքանո՞վ է այդ թեման բարձրացվում Ադրբեջանի հետ շփումներում։

«Որպես ընդհանուր կետ՝ մենք աջակցում ենք Հայաստանին և Ադրբեջանին խաղաղության գործընթացում։ Մենք ցույց ենք տվել մեր աջակցությունը և մի քանի տարի կողմերի և միջազգային գործընկերների հետ աշխատել ենք, որ երկարատև խաղաղության համար պայմաններ ստեղծվեն, իսկ գերիների մասով մենք հստակ ենք եղել, որ այս կարևոր հումանիտար խնդիրները պետք է լուծվեն, այդ թվում անհայտ կորածների ճակատագիրը և Ադրբեջանում պահվող հայերի հարցը»,- պատասխանել է Անիտա Հիպերը։

Արարատ Միրզոյանը հեռախոսազրույց է ունեցել Ֆրանսիայի արտաքին գործերի նախարար Ժան-Նոել Բարոյի հետ։
Անդրադարձ է կատարվել Մերձավոր Արևելքում ստեղծված իրավիճակին: Մտքեր են փոխանակվել համապատասխան գոտիներում գտնվող քաղաքացիներին աջակցության ուղղությամբ տարվող աշխատանքների շուրջ:
Նախարար Միրզոյանն ընդգծել է խաղաղ լուծման հասնելու կարևորությունը:
Արարատ Միրզոյանը և Ժան-Նոել Բարոն ընդգծել են մայիսին Երևանում Եվրոպական քաղաքական համայնքի գագաթաժողովի՝ բարձր մակարդակով անցկացման նպատակով ցուցաբերվող ակտիվ ներգրավածությունը:

🔴 Հրաձիգ Էլմիրա Կարապետյանը` Եվրոպայի առաջնության արծաթե մեդալակիր

Ոչ ֆորմալ հանդիպում Վրաստանի վարչապետ Իրակլի Կոբախիձեի հետ

ՀՀ ԱԳ նախարար Արարատ Միրզոյանը հեռախոսազրույց է ունեցել Եվրոպական հանձնաժողովի փոխնախագահ, ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալասի հետ։
Այդ մասին տեղեկացնում է «Արմենպրես»-ը՝ վկայակոչելով ՀՀ ԱԳՆ ֆեյսբուքյան պաշտոնական էջում զետեղված գրառումը։
Զրուցակիցներն անդրադարձ են կատարել Մերձավոր Արևելքում ստեղծված իրավիճակին, այդ թվում՝ հումանիտար բնույթի հարցերի:
Նախարար Միրզոյանն ընդգծել է խաղաղության օրակարգի առաջմղման հարցում ՀՀ մոտեցումները, Հայաստանի և Ադրբեջանի միջև խաղաղության շարունակական ամրապնդմանը ՀՀ բնակչության շրջանում ձևավորված աջակցությունը:
Արարատ Միրզոյանը և Կայա Կալասն ընդգծել են առաջիկա միջոցառումների և այցերի իրականացման և ՀՀ-ԵՄ օրակարգն առաջ մղելու հարցում ակտիվ ներգրավվածությունը:

Օմանից առաջին հատուկ չվերթը մարտի 3-ին, ժամը 06:15-ին ժամանել է Երևան։
Չվերթով Հայաստան են ժամանել Մերձավոր Արևելքում և Իրանի շուրջ ստեղծված իրավիճակի հետևանքով տարածաշրջանի տարբեր երկրներում մնացած քաղաքացիները:
«Արմենպրես»-ի հետ զրույցում այս մասին հայտնեցին Քաղաքացիական ավիացիայի կոմիտեից՝ նշելով, որ ինքնաթիռը Մասկատից տեղափոխել է ռազմական գործողությունների պատճառով այնտեղ մնացած քաղաքացիներին:
Տարհանման հատուկ չվերթը իրականացրել է FlyOne Armenia ավիաընկերությունը։
Հիշեցնենք, որ Մերձավոր Արևելքում և Իրանի շուրջ ստեղծված իրավիճակի հետևանքով չեղարկվել են մի շարք չվերթեր ԱՄԷ-ից, Իրանից, Կատարից և Իսրայելից դեպի Երևան և հակառակ ուղղություններով:

🔴 Արդեն 4-րդ օրն է ռմբակոծում են. ի՞նչ են պատմում Իրանից Հայաստան եկողները
https://youtu.be/n5Dvo1YB-z0