Category: Armen Press

Չեխիայի Հանրապետության վարչապետ Անդրեյ Բաբիշը շնորհավորել է վարչապետ Նիկոլ Փաշինյանին Հայաստանում ընտրություններում տարած հաղթանակի առիթով

Հարգելի՛ վարչապետ, թույլ տվեք անձամբ իմ և Չեխիայի Հանրապետության անունից անկեղծորեն շնորհավորել ձեզ վերջին խորհրդարանական ընտրություններում տարած հաղթանակի կապակցությամբ։ Այս ընտրությունների արդյունքը հստակ վկայում է այն վստահության մասին, որը ձեր երկրի քաղաքացիները ունեն ձեր նկատմամբ։ Ես ջերմությամբ եմ հիշում այս տարվա մայիսին Երևանում կայացած մեր հանդիպումը և ուրախ եմ, որ Հայաստանի Հանրապետությունը հյուրընկալեց Եվրոպական քաղաքական համայնքի գագաթնաժողովը, որը կարելի է համարել հաջողված, և ուղեկցվեց դրական միջազգային արձագանքով։ Վստահ եմ, որ Ձեր առաջնորդությամբ Հայաստանի Հանրապետությունը հաջողությամբ կհաղթահարի առկա մարտահրավերները, կշարունակի բարգավաճել և պահպանել իր արևմտամետ ուղղությունը։
Մեր երկրների միջև հարաբերությունները ավանդաբար բարեկամական են եղել՝ հիմնված ընդհանուր արժեքների, փոխադարձ հարգանքի և մի շարք ոլորտներում, մասնավորապես՝ առևտրի, տրանսպորտի և պաշտպանական արդյունաբերության մեջ սերտ համագործակցության վրա։ Ես մեծապես գնահատում եմ այս գործընկերությունը և անհամբեր սպասում եմ մեր ապագա անձնական համագործակցությանը թե՛ երկկողմանի, թե՛ միջազգային կազմակերպությունների շրջանակներում։
Մաղթում եմ ձեզ հաջողություններ, քաջառողջություն և մեծ ուժ ձեր պահանջախնդիր և պատասխանատու պարտականությունների կատարման գործում։

Թուրքիայի ազգային պաշտպանության նախարար Յաշար Գյուլերը Բրյուսելում մասնակցել է ՆԱՏՕ-ի անդամ երկրների պաշտպանության նախարարների հանդիպմանը։
Այդ մասին հայտնում է թուրքական «Անադոլու» լրատվական գործակալությունը:
Հանդիպման շրջանակում Թուրքիայի պաշտպանության նախարարը կարճատև զրույցներ է ունեցել մի շարք գործընկերների հետ։
Բացի այդ, նա ՆԱՏՕ-ում Թուրքիայի մշտական ներկայացուցչության գրասենյակում հանդիպել է Ֆրանսիայի պաշտպանության նախարար Կատրին Վոտրենի հետ։

Սևանա լճում անցկացված լայնածավալ ցուցադրական-տակտիկական ուսումնավարժանքի ընթացքում փորձարկվել է ջրային միջավայրում հնարավոր արտակարգ իրավիճակներին արձագանքող ուժերի համատեղ գործողությունների համակարգը՝ զբոսանավում հրդեհի սցենարով։
Այս մասին տեսանյութ է հրապարակվել ՀՀ ՆԳՆ փրկարար ծառայության կայքում, որտեղ նշվում է, որ ուսումնավարժանքը կազմակերպվել է զբոսանավում հրդեհի բռնկման սցենարով և նպատակ է ունեցել գնահատել տարբեր ծառայությունների արագ արձագանքման, փոխգործակցության և օպերատիվ կառավարման արդյունավետությունը։

Հայաստանի հունիսի 1-17-ը 411 տոննա ջերմատնային բանջարեղեն ու ելակ և շուրջ 1.8 մլն հատ ծաղիկ է արտահանվել։
Այս մասին հատնել է Հայաստանի Հանրապետության էկոնոմիկայի նախարար Գևորգ Պապոյանը Կառավարության՝ հունիսի 18-ի նիստի ընթացքում։
Աշխարհագրությունն ըստ ծավալների, հետևյալն է՝ Վրաստան, Ուզբեկստան, ԱՄԷ, Իրան, Ուկրաինա, Բուլղարիա, Կիպրոս, Լատվիա, Ռումինիա, Չեխիա, Ավստրիա, Նիդեռլանդներ, Ֆրանսիա, Բելառուս, Ղազախստան։
Գևորգ Պապոյանի խոսքով՝ մեկնարկել է նաև ծիրանի արտահանումը.

«162 տոննա ծիրան ենք արտահանել. երեկ առաջին արտահանումներն են եղել՝ Ուկրաինա, Վրաստան»,– տեղեկացրել է Էկոնոմիկայի նախարարը։

Հայաստանի շախմատի տղամարդկանց թիմի անդամ Շանթ Սարգսյանը արագ շախմատի թիմային առաջնության հերթական տուրում հաղթել է աշխարհի հնգակի չեմպիոն Մագնուս Կարլսենին:
Այս մասին հայտնել է Հայաստանի շախմատի ֆեդերացիան։
«Չինաստանի Հոնկոնգ քաղաքում ընթացող 2026 թվականի աշխարհի արագ շախմատի թիմային առաջնության 7-րդ խաղափուլում հայ գրոսմայստեր Շանթ Սարգսյանը հաղթանակ տարավ աշխարհում ամենաբարձր վարկանիշ ունեցող Մագնուս Կարլսենի նկատմամբ»,- ասված է ֆեդերացիայի հաղորդագրության մեջ։

Հայաստանի Հանրապետության վարչապետ Նիկոլ Փաշինյանը կմասնակցի Եվրասիական տնտեսական միության միջկառավարական խորհրդի՝ օգոստոսի 15-ին նախատեսված  նիստին։
Նիկոլ Փաշինյանն այդ մասին հայտնել է Կառավարության նիստից հետո լրագրողների հետ ճեպազրույցի ժամանակ։
Փաշինյանն ասել է, որ մասնակցելու է այդ նիստին և զբաղվելու է այն խնդիրներով, որոնք առաջացել են՝ կապված հայկական ապրանքների արտահանման սահմանափակումների հետ՝ շեշտելով, որ այսօր էլ Հայաստանի կառավարությունն այդ խնդիրներով զբաղվում է։
Հիշեցնենք, որ Ռուսաստանը Հայաստանում հունիսի 7-ին կայացած խորհրդարանական ընտրություններին ընդառաջ ներմուծման սահմանափակումներ էր կիրառել հայկական բազմաթիվ ապրանքների նկատմամբ, որոնք մինչ օրս շարունակվում են։ Այդ օրերին Ռուսաստանից նաև պարբերաբար հայտարարություններ էին հնչում, որ Հայաստանը պետք է հնարավորինս արագ կողմնորոշվի Եվրասիական տնտեսական միության և Եվրամիության միջև ընտրություն կատարելու հարցում։
Ընտրությունների քարոզարշավի ժամանակ Հայաստանի վարչապետ Նիկոլ Փաշինյանը հայտարարել էր, որ ընտրություններից հետո ինքը մասնակցելու է ԵԱՏՄ-ի նիստերին և զբաղվելու է այդ խնդիրների լուծմամբ։
Եվրասիական միջկառավարական խորհրդի առաջիկա նիստը հրավիրված է օգոստոսի 15-ին  և կանցկացվի Ղրղզստանի Չոլպոն-Աթա քաղաքում։

Հայաստանի վարչապետ Նիկոլ Փաշինյանը կարևորում է այն փաստը, որ Հայաստանի Անվտանգության խորհրդի քարտուղար Արմեն Գրիգորյանի և Ադրբեջանի նախագահի արտաքին հարաբերությունների գծով խորհրդական Հիքմեթ Հաջիևի վերջին հանդիպումը տեղի է ունեցել հենց Հայաստանում, այլ ոչ թե տարածաշրջանից դուրս։  
Նիկոլ Փաշինյանն այդ մասին ասել է լրագրողների հետ ճեպազրույցի ժամանակ։
«Սա նշանակում է, որ   խաղաղության գործընթացի ուղղությամբ մենք գնում ենք առաջ և կառավարում ենք այն ռիսկերը, որոնք կարող էին առաջանալ»,- ասել է վարչապետը։
Նա նշել է, որ հանդիպման ընթացքում բարձրացվել են տարբեր հարցեր, այդ թվում՝ անազատության մեջ գտնվող անձանց, ինչպես նաև   սահմանային իրադրության կառավարման հետ կապված հարցեր։
«Ես եմ Արմեն Գրիգորյանին հանձնարարել, որպեսզի Ադրբեջանի իր գործընկերոջ հետ քննարկի՝ կա՞ արդյոք հանդիպման անհրաժեշտություն, թե՞ ոչ։ Մենք զբաղված ենք իրադրության կառավարմամբ»,-ասաց Փաշինյանը՝ հավելելով, որ աշխարհի բոլոր երկրների բանակցությունները  բոլոր երկրների հետ միմյանց դիրքորոշումները, պլանները, ռազմավարությունները, մտահոգող հարցերը քննարկելու համար են։
Հայաստանի անվտանգության խորհրդի քարտուղար Արմեն Գրիգորյանը Ադրբեջանի նախագահի արտաքին հարաբերությունների գծով խորհրդական Հիքմեթ Հաջիևը հանդիպել էին հունիսի 14-ին Դիլիջանում։ Կողմերը հանդիպման վերաբերյալ նույնաբովանդակ հաղորդագրություն էին տարածել, ըստ որի բանակցությունների ընթացքում քննարկվել են ադրբեջանա-հայաստանյան խաղաղության օրակարգին վերաբերող հարցեր և ընդգծվել է երկկողմ ուղիղ երկխոսության շարունակման կարևորությունը։

Հայաստանի վարչապետ Նիկոլ Փաշինյանն անդրադարձել է «Ուժեղ Հայաստան» դաշինքի առաջնորդ Սամվել Կարապետյանի հայտարարությանը ընդդիմադիր քաղաքական ուժերի համախմբման գործընթաց սկսելու մասին։
Կառավարության նիստից հետո լրագրողների հետ զրույցում, անդրադառնալով «Արմենպրես»-ի հարցին, թե կարելի է արդյոք Սամվել Կարապետյանի հայտարարությունը ընդդիմադիր ուժերի համախմբման պրոցես սկսելու մասին համարել Հայաստանում հետընտրական պրոցեսներ սկսելու նախերգանք, Փաշինյանը պատասխանել է.
«Ձեր նշած համախմբումը նոր չի տեղի ունեցել, դա վաղուց է տեղի ունեցել, ուղղակի չէին հայտարարում, որ ժողովրդի տրամադրությունը չընկնի։ Այդ ուժերը նույն ուժերն են՝ նույն կետից կառավարվող, նույն սկզբունքների հիման վրա գործող։ Դա ի՞նչ նորություն է, դա ակնհայտ փաստ է»։
ՄԱՆՐԱՄԱՍՆԵՐ

Փորձում ենք կառավարել պատերազմի ռիսկերը. ՀՀ վարչապետ
https://youtu.be/c-gJSIi4NHU?si=rfkGTNV6ovcR7UbF

ԱՄՆ-ն նախնական ֆինանսավորման վերբերյալ որոշում է կայացրել․ Փաշինյանը ԹՐԻՓՓ-ի նախագծի մասին
https://youtu.be/9bznhNSSCik?si=e4_Pwnd9R4RPklHe